Diosta servinqantsikta precisaqpaq churashun

“Imepis quecunapaq yarpacachäyë: rason caqllapaq.” (FILI. 4:8.)

1, 2. ¿Imanirtaq wakinkunaqa kushikïta ashirlla kawakuyan, y imatataq tapukushwan?

KANANQA imëpitapis masmi nunakuna tukïta hipayan. Awmi, “allapa sasa cawaqui tiempucuna[chömi]” këkantsik. Y Diospa kaqta mana musyaq nunakunanäqa, manam ni ima rurëtapis puëdeyantsu (2 Tim. 3:1-5). Problëmankunata kikinkunalla altsëta tïrarpis, manam llapanta altsëta puëdeyantsu. Tsëmi llakikïninkunata qonqëta munar tukï kushikïkunata ashiyan.

² Atskaq nunakunam yarparëninkunata qonqëta munarnin tukï kushikïkunata ashiyan. Noqantsikpis alleq mana pensarqa, pëkunanöllam rurar qallëkushwan. ¿Imatataq rurashwan tsëkunaman mana ishkinapaq? ¿Diospa kaqta rurarllanatsuraq kawakushwan? ¿Imatataq rurashwan Diospa kaqta ruranapaq y kushikunapaq? ¿Bibliachö ima ninqantaq yanapamashwan precisaq kaqta rurarpis, kushikunapaq huk rurëkunata akranapaq?

Ama kë mundochö nunakunanöqa kushikïllata ashishuntsu

3, 4. ¿Biblia ima ninqantaq rikätsikun precisaq kaqta puntaman churanapaq?

³ Kë mundochö nunakunaqa “quiquincunapa munenincunallata rurac[urmi]” kawakuyan (2 Tim. 3:4). Tsënö kawakïqa Jehoväpaq ruranqantsikkunata ushakätsinmanmi (Pro. 21:17). Tsëmi Timoteuta y Tïtuta qellqanqan cartachö Pablu rikätsikurqan kë mundochö nunakunanö mana portakunapaq, sinöqa Diosta servinqantsikta más precisaqpaq churanapaq (lei 1 Timoteu 2:1, 2 y Titu 2:2-8).

⁴ Unënam rey Salomon parlarqan kushikïkunata haqirir más precisaq kaqta ruranapaq (Ecl. 3:4; 7:2-4). Y wallka tiempollam kawantsik, tsëmi salvacionta tarinapaq sinchikunantsik (Luc. 13:24). Tsëpaqqa tiempota horqarninmi ‘cabal nunana queta’ ashinantsik (Fili. 4:8, 9). Huk parlakïchöqa, llapanchömi cristiänonö kawakunantsik.

5. ¿Ima rurëtataq precisaqpaq churashwan?

⁵ Cristiänokunaqa Jehovänö y Jesusnömi trabäjonkunata precisaqpaq rikäyan (Juan 5:17). Tsëmi alli trabajaq y mana suwakoq kayanqampita patronninkuna alabayan. Y huk teytanäqa allim trabajanan familianta manteninampaq, tsëta mana ruraptinqa “Diosman marcäconqanpis manam imapaqpis sirwintsu” (1 Tim. 5:8).

Dios ninqanta rurar kushikushun

6. ¿Imanötaq musyantsik Diosta adoranqantsik alläpa precisaq kanqanta?

⁶ Unëpitanam Jehová shuyarashqa serviqninkuna pë munanqannö adorayänanta. Tsënö shuyararmi, Moises qellqanqan Leyta israelïtakuna mana wiyakurnin tukïta hipayaptin Diosnintsik yanaparqannatsu (Jos. 23:12, 13). Apostolkunapa tiemponchöpis, cristiänokunata mandarqanmi mana alli yachatsikïkunaman y mana alli portakïkunaman mana ishkiyänanrëkur alleq tsarakuyänampaq (2 Juan 7-11; Apo. 2:14-16). Y kanampis Pëta adoranqantsikta ichikllapaq churanataqa manam munantsu (1 Tim. 6:20).

7. ¿Imamantaq yarparaq Pablu yachatsikunampaq?

⁷ Diospita yachatsikïqa alläpam kushitsimantsik. Pero kushishqa yachatsikunapaqqa, precisaq kanqantam rikänantsik y alleqmi preparakunantsik. Pablu ruranqanta rikärishun, pëqa nunakunata imanöpis yachatsinampaq kaqmanmi yarparaq. Pëmi kënö nirnin qellqarqan: “Tsenoqa quecä pecunata marcäquinincunacho  yanapecunäpaqmi. Ojala tseno rurarnin, atscaqta yanapecüman salbaquicuyänanpaq. Tse niriyanqaqnomi, wauqicuna y panicuna, rurecä, salbasionpaq alli willaquita willapäcunärecur. Tsenopachiri tse creyicoqcunawan Dioscho cushicurishaq” (1 Cor. 9:22, 23). Kë apostolqa alläpam nunakunata yachatsirnin kushikoq, y yarparaqmi wanayanqankunachö imanö yanapanampaqpis. Tsëmi Jehoväta alli serviyänampaq shumaq yanapaq.

8. a) ¿Imanötaq servishwan yachatsinqantsik nunakunata? b) ¿Imanirtaq Bibliapita estudiatsikunqantsik alläpa kushikïpaq?

⁸ Pablupaqqa, Diospita yachatsikï alläpam precisëkoq. Awmi, pëqa Jehoväta y nuna mayinta esclävonö servinampaqqa listom këkarqan (Rom. 12:11; 1 Cor. 9:19). Noqantsikpis Diospa Palabrampitaqa yachatsikunantsikmi, wayikunachö estudio biblicota qokurnin, Yachatsikuyänan Wayichö discursokunata qornin o familiantsikwan Bibliapita yachakurnin. ¿Alleqku musyantsik yachatsikï alläpa preciso kanqanta? Itsa tukï rurakïnintsikkunapita tiempota horqashqa, llapan semänakuna estudio bíblico qokï alläpa sasa o aja kanman. Pero ¿manaku Jesusqa tsënö rurëpaq “qaraquimi mas cushiqueqa chasquir cushiquipitapis” nirqan? (Hech. 20:35.) Awmi, ¡Diospita yachatsikur kushikïnöqa manam imapis kantsu!

9, 10. a) ¿Rasumpaku Diospa kaqta precisaqpaq churaqkunaqa asikuriyanmantsu ni kushikuriyanmantsu? Imanir tsënö ninqëkita willakaramï. b) ¿Imataq anciänokunata yanapanqa yachanëpaq kayänampaq?

⁹ Jehová ninqanta ruranantsik alläpa precisaptimpis, tiempontsiktaqa rakirishwanmi amïgontsikkunawan kushishqa karinapaq. Jesusqa tsëta ruranapaqmi yachatsimarquntsik. Manam nunakunata yachatsirllatsu pureq, sinöqa rurëninkunapita hamareqmi, y wakin nunakunawan reqinakunampaqpis tiempota rakeqmi (Luc. 5:27-29; Juan 12:1, 2). Hina manam Diostam servï nirtsu piñashqanö kakunantsik. Jesucristu piñashqanö parlapäkuptin y mana yachanëpaq kaptinqa, ¿piraq witipanman karqan? Pero pëqa manam tsënötsu karqan. Tsëmi wambrakunapis kushishqa lädonchö täräyaq (Mar. 10:13-16). ¿Imatataq rurashwan Jesucristunö llapampaq tiempota horqanapaq?

¹⁰ Huk cristiänom huk anciänopaq kënö nirqan: “Kikin allillata rurëta munarpis, manam wakinkuna kikinnö rurayänantaqa mañakoqtsu”. ¿Tsënötsuraq noqantsikpaqpis wakinkuna parlayan? Pero wakinkuna allita rurayänanta munanqantsikqa manam mana allitsu. Këllaman yarpärishun, teytakuna wambrankuna imata rurayänampaqpis nirir yanapariyaptinqa, wambrakunaqa teytan ninqantam rurëta tïrayan. Y congregacionchö cristiänokunapis alläpam agradecikuyan anciänokuna willapäyanqanta y Diospa kaqchö más allita rurayänampaq consejayanqanta. Pero anciänokunaqa manam tukïta rurayanqampitatsu yachaqtukuyänan, sinöqa pï mëpis witipäriyänampaqmi yachanëpaq kayänan (Rom. 12:3). Huk cristiänam anciänokunapaq kënö nirqan: “Manachi anciänokuna ima ninqätapis brömapaq churayänantaqa gustamanmantsu, hina piñashqanö kayaptimpis manachi witipëta munämantsu”. Huk cristiänanam kënö nin: “Piñashqanö kayaptinmi, wakin cristiänokuna parlapëta mantsayan”. Pero manachi mëqan anciänopis munanmantsu cristiano mayinkuna Diosnintsikta llakishqa serviyänantaqa, porque ‘kushishqa Diostam’ servintsik (1 Tim. 1:11, NM).

Congregacionchö cargota chaskeq ollqukuna

11. ¿Imanötaq huk cristiano rikätsikun congregacionchö más cargota chaskïta munanqanta?

¹¹ Congregacionchö ollqukuna más cargota chaskiyänampaq Pablu parlarqa, manam kikinkunapa munëninkunata ashiyänampaqtsu parlëkarqan. Tsëpa rantinqa alli trabayänampaqmi kënö nir willaparqan: “Pipis inglisiacho [“congregacionchö”, NM] mandacoq queta munarqa, allitam yarpecushqa. Tseqa allinatam jina” (1 Tim. 3:1, 4). ¿Imanötaq huk cristiano rikätsikun congregacionchö más cargokunata chaskïta munanqanta? Cristiano mayinkunata imëkachöpis yanaparmi y más alli cristiano kanampaq sinchikurmi. Huk cristiano bautizakunqampita huk watata cumpliriptin y 1 Timoteu 3:8-13  ninqanta cumpliptinqa, siervo ministerial kanampaqnam anciänokuna rikäyanman. 8 kaq versïculochömi kënö nin: “Diacono nunacunapis [“siervo ministerialkunapis”, NM] [...]. Ama cayätsuntsu badulaqueqa”.

12, 13. ¿Imakunatataq jövenkuna rurayanman congregacionchö más cargokunata chaskiyänampaq?

¹² Joven, ¿bautizakushqanaku kanki y cristiano kënikita precisaqpaqku churëkanki? Más jövenyëkarqa congregacionchö masnam yanapakunkiman, tsënöpa más cargokunata chaskinëkipaq. Huk rurëqa, mana haqita yachatsikoq yarqïmi. ¿Yashqawan y wambrawampis yachatsikoq yarqunkiku? ¿Estudio biblicota tarita tirëkankiku? Estudio biblicota qonapaq reunionkunachö yachatsikayämunqannö yachatsikurqa, más alli yachatsikoqmi tikranki, y yachatsinqëki nunakuna imanö këkäyanqantapis masmi musyanki. Hina Jehová munanqannö kawar qallëkuyaptinnäqa, masmi Biblia ninqannö rurayänampaq yanapanki.

¹³ ¿Churakarqunkinaku edäyashqana cristiänokunata wanayanqanchö yanapanëkipaq? ¿Kushishqaku Yachatsikuyänan Wayita pitsëchö y altsëchö yanapakunki? Tsënö yanapakurqa, Diospa kaq alläpa precisaq kanqantam rikätsikïkanki. Qampis Timotëunö këta puëdenkim, pëqa cristiano mayinkunata kuyëpam llapan wanayanqankunachö yanapaq (lei Filipenses 2:19-22).

14. ¿Imanötaq anciänokuna jövenkunata yanapayanman?

¹⁴ Qamkuna anciänokuna, jövenkunata ima rurëmampis churayë congregacionchö tukïnöpa yanapakuyänampaq, pëkunaqa sinchikïkäyanmi ‘lluta rurecunaman’ mana ishkiyänampaq, hina sinchikïkäyanmi ‘allicunallata rurar, Diosman marcäcur, nuna mayintsiccunawan shumaq cuyanacur cawacuyänampaq’ (2 Tim. 2:22). Congregacionchö rurayanqankunam rikätsikunqa “imano cayanqantapis”. Mandayanqëkikunata llapanta shumaq rurayaptinqa, “llapancuna[m] cuentata qocuyanqa waran waran mas cabal alli nuna” tikrëkäyanqanta (1 Tim. 3:10; 4:15).

Congregacionchö y wayintsikchöpis alli portakushun

15. 1 Timoteu 5:1, 2 ninqannö, ¿imanötaq cristiänokuna respetakoq kayanqanta rikätsikuyan?

¹⁵ Alli portakurqa, Pablu Timoteuta consejanqannömi cristiano mayintsikta shumaq respëtowan rikänantsik (lei 1 Timoteu 5:1, 2). Këtaqa rikätsikunantsik warmikunawan o ollqukunawan këkar imanöpis portakunqantsikchömi. Jobqa warmikunata alläpam respetaq, y warminta respetanqantanäqa rikätseq wakin warmikunata mana rikaparmi, tsënöpam imanö respetakunapaqpis yachatsimarquntsik (Job 31:1). Respëtowan cristiänokunata rikaqkunaqa, manam pitapis casakïta munaqnöqa parlapantsu ni asipantsu, ni penqakatsintsu. Y novio këkaqkunanäqa majampaq kaqta alläpam respetayänan. Awmi, Diospa kaqta respetaq cristiänoqa, manam pitapis rikapanmantsu ni parlapanmantsu casakïta munaqnö mana casakïta munëkarqa (Pro. 12:22).

16. ¿Imanötaq kë mundochö qowata y teytata rikäyan, pero imatataq Bibliaqa yachatsikun?

¹⁶ Hina familiachö imanö rikänakunapaqpis Jehová patsätsinqantam yarpänantsik. Satanaspa mundonqa qowata y teytata penqakïmanmi churashqa. ¿Imanö? Pelïculakunachö y imëkakunachöpis huk teytata o qowata mana respetayanqanta rikätsikurnin. Pero Bibliaqa yachatsikun huk ‘warmeqa qowanpa mandaduncho cananpaqmi’ (Efe. 5:23; 1 Cor. 11:3).

17. ¿Imanötaq rikätsikuntsik wayintsikchö Jehoväpa kaqta puntaman churëkanqantsikta?

¹⁷ Huk cristiano familianta manteninampaq alli trabajarpis, Jehoväpa kaqta puntaman mana churarqa manam allitatsu rurëkan (Deu. 6:6, 7). Tsëmi, huk qowa congregacionchö más cargokunata chaskïta munarqa, 1 Timoteu 3:4 ninqannö ruranan: “Wayincho caqcunatapis allapa shumaq manijaqmi canman, y tsurincunapis respetacur cäsucoqmi cayanman”. Qam teyta karqa, kënö tapukï: “¿Llapan semänakunaku Familiachö Diosta Adorana Hörachö familiäta yachatsï?”. Pero llakikïpaqqa, wakin qowakuna familianta yachatsita qonqayanqanmi, y warminkunaraq yarpätsiyänanta wanayanqanmi. Llapan  qowakunam familiachö Diospita yachakïta alläpa precisaqpaq churayänan. Pero warmikunapis qowankunata yanapayänanmi patsätsiyanqan hörachö yachakuyänampaq alistakurnin.

18. ¿Imanötaq wambrakuna yachakuyanman Diospa kaqta puntaman churëta?

¹⁸ Bibliaqa hina wambrakunata ninmi, más precisaq kaqta puntaman churayänampaq (Ecl. 12:1). Wambrakuna yachayanqanmannö y edadninmannö wayichö yanapakuyanqanqa alläpa allim. Tsënöpam wambra kayanqampita alli trabajëta yachakuyanqa (Lam. 3:27). Davidqa jövenllaraq këkarmi üsha mitsikïta yachakurqan. Hina música toquëta, cancionkunata qellqëtapis yachakurqanmi, tsëmi Israelpa reynimpis pëpaq tocanampaq qayatsirqan (1 Sam. 16:11, 12, 18-21). David wambrallaraq karqa wakin wambrakunawampis pukllaqchi, pero maskunatapis yachakurqanmi, tsëmi yanaparqan jövenyarkur Jehoväta más alli alabanampaq. Këllaman yarpärishun, üshakunata mitsinqanchömi alli pacienciayoq këta yachakurqan, tsëmi Israel markata pushanampaqpis yanaparqan. Jövenkuna, ¿qamkunapis yachakïkäyankiku Diosnintsikta más alli serviyänëkipaq y más cargokunata chaskiyänëkipaq?

Ama alläpaqa allitukushuntsu

19, 20. ¿Imakunatataq kikintsikpaq y adoracionnintsikpaq pensanantsiktsu?

¹⁹ Diostam servïkü nirninqa manam pasëpa alli ruraq kanqantsikta pensanantsiktsu. Manachi llapan cristiänopis, kikinlla alli ruraq kanqantaqa pensëta munanmantsu (Ecl. 7:16). Pasëpa asikoq kanqantsikqa manam yanapamantsiktsu wayichö, trabäjochö y congregacionchö problëmakuna kaptin. Hina manam familiantsikpaq rimashwantsu, tsëqa manam shumaq kawakunapaq yanapamashwantsu. Y congregacionchö cristiano mayintsikkunawanqa asikurishwanmi y shumaq parlarinapaqpis tiempota rakirishwanmi. Pero manam qonqanantsiktsu parlakïnintsikwan kushitsikunapaq y yanapakunapaq kaqta (2 Cor. 13:10; Efe. 4:29).

²⁰ Kë mundochö nunakunaqa manam Jehoväta ni Leyninkunata respetayantsu. Pero noqantsikqa yarparantsikmi mandakunqannö pëllapaq kawanapaq kaqta. Jehoväpa kaqta precisaqpaq churaq nunakunawan Diosta serviqa, ¡imanö kushikïpaqmi! Awmi, kawënintsikchö y adoracionnintsikchöqa, imëpitapis masmi Diospa kaqta puntaman churëta munantsik.

¿Imatataq contestankiman?

• ¿Imanirtaq kë mundochö nunakunanöqa pensashwantsu?

• ¿Imanötaq Diospa kaqta precisaqpaq churarpis kushi kushi kanantsik?

• Huk alli cristiänoqa, ¿imanötaq Diospaq ruranqankunata rikan?

• ¿Imanirtaq alläpa precisan familiantsikkunata y congregacionchö këkaqkunata respëtowan rikänantsik?

[Yachakunapaq kaqpa tapukïninkuna]

[15 kaq päginachö dibüjukuna]

Huk qowa familian wananqankunapaq trabajarpis, Diospa kaqtam puntaman churanan