¿Imataq alli willakïkuna?

“Alli willaquinïta willa[cu]yänequi[m] presisan.” (MATEO 24:14.)

CRISTIÄNOKUNAQA Diospa Gobiernompita ‘alli willaquitam willakuyänan’, y tsëtaqa rurayan Diospa Gobiernon kë Patsata shumaq gobernamunampaq kaqta nunakunata yachatsirmi. Hina Bibliaqa parlanmi “salvacionpaq alli willakïkuna[ta]”, “Diospa alli willaqui[nimpaq]” y “Jesucristupa alli willaquinin[paqpis]” (Salmo 96:2; 1 Tesalonicenses 2:9; Marcos 1:1). Tsëqa, ¿imataq alli willakïkuna?

Wallka parlakïchöqa, Jesuspa yachatsikïninkunam, y tsë yachatsikïninkunataqa qateqninkunam qellqayarqan. Ciëlopa manaraq kutikurmi Jesus qateqninkunata kënö nir mandarqan: “Qamcunata[m] cachayaq jinantin nasioncunapa ewar, noqaman creyicuyänanpaq nunacunata willapäyänequipaq, y creyicoq caqtana bautisayanqui Dios Yayapa, Tsurin Jesucristupa y Santu Espiritupa jutincho. Y qamcunata llapan yachatsiyashqaqcunata yachatsiyanqui pecunapis alli cäsucoq cayänanpaq” (Mateo 28:19, 20). Tsëmi rasumpa cristiänokunaqa Diospa Gobiernompita nunakunata yachatsiyänan, pero manam tsëllatatsu rurayänan, hina kallpachakuyänanmi nunakunata Cristupa qateqninman tikratsiyänampaqpis.

Pero ¿tukï religionkunachö këkaqkunaqa tsëta rurayanku? Manam rurayantsu. Diospa Gobiernompita yachatsikuyänampaqqa, tsë Gobierno ima kanqantaraqmi puntata musyayänan, pero rasun kaqchöqa, manam ni sacerdötekuna ni pastorkunapis tsë Gobierno ima kanqanta käyiyantsu o mayayantsu. Tsëmi pëkunaqa nunakunata alli sientekatsiyänanrëkur, Diospa perdonnimpaq y Jesusman markäkillapaq o yärakuyllapä iglesiankunachö parlayan. Y más nunakuna religionninkunaman yëkuyänampaqmi, tukïta qarakur yanapakuyan y waktsakunapaq hospitalkunata, colegiokunata y wayikunata ruratsiyan. Itsa tsënö rurayanqanwan iglesiankunachö hunta kayan, pero Jesus ninqannö kawayänampaqqa manam nunakunata yachatsiyantsu tsë rurë más precisëkaptimpis.

Huk teölogom kënö nirqan: “Cristiänokunachöqa casi llapan estudiösokuna y llapan yachatsikoqkunam cuentata qokuyan Jesus ninqanta wiyakurnin qateqnin këman chäyänampaq nunakunata yanapëqa alläpa precisanqanta. [...] Imanö kaptimpis, Jesusqa alli clärom willakurqan tsëta imanö rurana kanqanta. Pero noqakunaqa manam rurëkäyätsu. Ichik rurarnimpis manam shumaqqa kallpachakuyätsu. Y rasun kaqchöqa, manatsunchi imanö rurana kanqantapis musyayätsu”.

U.S. Catholic nishqan revista encuestata ruraptinmi, Estados Unïdoschö yachaqkuna casi llapan niyarqan, Diospa Gobiernompita alli willakïta musyatsikïqa cristiänokunapa rurënin kanqanta. Pero tsëta cumpliyänampaqqa, kawëninkunachö rurëninkunawan yachatsikïshi más alli, nunakunata parlapar yachatsikïpitapis. Huk tapuyanqan nunam kënö nirqan: “Evangeliotaqa manam parlarllatsu yachatsikuntsik, antis alli kawakurmi”.  Hina tsë revistallam nirqan, tsë religiösokunaqa “Iglesiachö mandakoqkuna tukï rakchakunata rurayanqan musyakashqa kaptin, y yachatsikïninkuna mana creipaqnö kaptin” wakinkunata yachatsita mana munayanqanta.

Protestante religionchö obisponam, Iglesiakunachö tukï mana allikuna pasëkanqampaq parlarqan: alläpa qayapänakilla y pantatsinakillash kan, manash ni mëqampa valornin kantsu cristiano rurëninkunata ruranampaq, y pï më religiösokunash wakin nunakunanö lluta kawakïta akrayashqa. Tsëmi llakishqa nirqan, “¿piraq Diospa Gobiernompita evangeliota willakunqa?”.

Tsë obispoqa manam tapukïnimpa respuestanta musyantsu, pero kanmi huk respuesta, y tsëtam qateqnin kaq yachatsikïchö rikärishun.

[5 kaq päginachö ninqan]

Diospa Gobiernon shamunampaq kaq y salvación kanampaq kaqmi alli willakïqa, y tsëtaqa tarishun Jesucristuman markäkurllam o yärakurllam.