¿Imataq “patsapa ushenin”?

“Que patsapa ushenin chäramonqa.” (MATEO 24:14.)

MË TSËCHÖMI kë Patsa ushakänampaq kaqta parlayan. Hina tukï pelïculakuna, librokuna y revistakunapis paqwë ushakänampaq kaqtam willakuyan, y wakinmi rasumpanö y wakinnam asikïpaqnö. Alläpa achachë o alalë kaptin, hatun guerra kaptin, peste kaptin, imapis chokamuptin o huk mundopita shayämuptin kë Patsa paqwë ushakänampaq kaqtam niyan.

Hina religiösokunapis imanö ushakänampaq kaqta parlayanmi. Mëtsikaqmi niyan ushakë chämuptin Patsachö llapan yachëkaq nunakuna ushakäyänampaq kaqta. Mateo 24:14 textopaq parlarmi huk libro kënö nin: “Kë versïculoqa, Diospa Palabranchö llapan versïculokunapita más precisaq kaqmi [...,] kanan witsan kawëkaqkunaqa paqwë ushakänapaqmi këkantsik, tsëmi wakintsiklla tsë hatun ushakë imanö kanampaq kaqman pensëta tïrantsik” (El Evangelio del Reino).

Tsënö pensaqkunaqa qonqariyanmi Patsata Dios “alli patsätsishqa” kanqanta, y mana ‘envänollatsu, sinöqa kawayänampaq’ rurashqa kanqanta (Isaías 45:18). Tsëmi ushakëpaq Jesus parlarqa, kë yachëkanqantsik Patsa ushakänampaqtsu, ni llapan nunakuna ushakäyänampaqtsu parlëkarqan. Antis mana alli nunakuna o Diosta mana wiyakïta munaqkuna ushakäyänampaq kaqtam parlëkarqan.

Tsëta käyinapaqqa o mayanapäga këman pensarishun: huk nunapa shumaq wayinchö mëtsika familiakuna mana pagakurninlla täräyanman. Wakinqa, yamë täkuyanman, vecïnonkunawan alli apanakuyanman y wayitapis shumaq  cuidayanman. Pero wakinkunana tukï problëmakunata rurayanman, vecïnonkunawan mana alli apanakuyanman, wayita imëka mana allita rurayanman y dueño ninqantapis wiyakuyanmantsu.

¿Imataraq wayiyoq nuna ruranman? ¿Wayintatsuraq ushakäratsinman? Upa këchi tsëqa kanman. Más alliqa kanman tsë mana alli nunakunata qarqurirnin wayinta altsanqanchi.

Hina tsënöllam Jehoväpis kë Patsawan ruranqa. Palabranchömi kënö nir awnikun: “Mana allita ruraqkunaqa ushakäyanqam, pero Jehoväman markäkoqkunaqa patsachömi täräyanqa. Ichik tiempollachönam mana allita ruraqkunaqa kanqanatsu, mëchö këkäyanqanta ashirpis manam tarinkinatsu. Pero manshukunapaqmi patsaqa kanqa, y tsëchömi yamë këta tarirnin kushishqa kawakuyanqa” (Salmo 37:9-11).

Apóstol Pëdrupis santo espíritu yanapaptinmi kënö nir qellqarqan: “Cäyiyantsu Diosnintsic sieluta camashqanta, ni yacullacho que patsata muneninwan camashqanta. Tsenollam jina cäyiyantsu Diosnintsic unë tiempu que patsacho cawaqcunata apäqui tamyawan ushacätsishqanta” (2 Pedru 3:5, 6). Kë textochöqa, Noëpa tiemponchö apäkï tamya kanqampaqmi Pedru parlëkarqan. Tsë tamyaqa manam Patsatatsu ushakätsirqan, sinöqa mana alli nunakunatam. Apäkï tamyaqa, mana alli nunakunatam “cuentata qoc[atsin]” shamoq tiempochö ima pasanampaq kaqta (2 Pedru 2:6).

Nïkurnam Pedru kënö nin: “Que patsata y sieluta Diosnintsic muneninwan camashqannollam shuyarëcatsin ninawan ushacäratsinanpaq”. Këyaqlla leirqa llutantachi pensashwan. Pero qateqnin kaqchömi, “mana alli ruraq nunacunam tsecho jipayanqa [“ushakäyanqa”, NM]” nin. Këchö rikanqantsiknöpis, mana alli nunakunam ushakäyanqaqa, manam kë Patsatsu. Y, ¿imaraq tsëpita pasanqa? Pëdrum kënö nin: “Peru noqantsicqa shuyaquicantsic mushoq sielutam y mushoq patsatam. Tseno cananpaqmi Diosnintsic änimarqantsic. Tse mushoq patsachoqa allicunata rurarllanam, nunacuna cawayanqa” (2 Pedru 3:7, 13).

Bibliam willakun “patsapa ushenin” këllachöna këkanqanta. Mateo 24:3-14 y 2 Timoteu 3:1-5 textokunata leirirllam tsëtaqa cuentata qokurintsik. *

Rikanqantsiknöpis, Mateo 24:14 textochö ninqanqa manam sasa käyinantsu o mayanantsu. ¡Hasta huk wambrapis käyirinmanmi! Tsëqa, ¿imanirtaq pï më nunakuna musyayantsu ima ninan kanqanta? Rasumpa kaqta mana yachakuyänanrëkur Satanás upa cuentata katsiptinmi (2 Corintios 4:4). Hinamampis, Diosqa manam permitintsu yachaqtukoq nunakuna Palabran ninqanta käyiyänanta, antis qollmi shonqu kaqkunallatam yachakuyänampaq yanapan. Tsëmi Jesus kënö nirqan: “Sieluchopis, patsachopis mandacoq Dios, ¡qamtam alabecoq! Porqui yachaq tucoqcunataqa y musyaq tucoqcunataqa manam boluntaniquita cäyiratserqonquitsu; peru qollmi shonqu nunacunataqa cäyiratserqonquim” (Mateo 11:25). ¡Imanö kushikïpaqmi Diospa Gobiernon ima kanqanta musyaqkunawan y yachatsikoqkunawan këqa! Llapantsiktam shumaq kawakï shuyämantsik.

[Päginapa ura kuchunchö willakï]

[8 kaq päginachö dibüju]

Diospa Gobiernonqa paqwëmi ushakätsimunqa llapan mana allikunata