Cristiano familiakuna imëpis listo këkäyë

“Tsemi qamcunapis mäcoq, mäcoq quecayänequi; porqui Diospita Shamushqa Nunaqa cutircamonqa qamcuna mana yarpäyanqequi öram.” (LUC. 12:40.)

1, 2. ¿Imanirtaq precisaqpaq churashwan Jesus ‘mäcoq, mäcoqmi quecayänequi’ ninqan consëjota?

¿IMANÖRAQ familiantsikkuna këkäyanqa ‘que patsaman Diospita Shamushqa Nuna cutimuptin’, y ‘üshacunata chiwacunapita raqueqno nunacunata raquiptin’? (Mat. 25:31, 32.) Mana musyanqantsik hora Jesus kutimunan kaptinmi, precisan kë consëjota wiyakunantsik: “Tsemi qamcunapis mäcoq, mäcoq quecayänequi” (Luc. 12:40).

² Punta kaq yachatsikïchömi rikarquntsik cristiano familiakuna llapankuna yanapanakurqa mäkoq mäkoqlla këkäyänampaq kaqta. Kananqa más yachatsikïkunata rikärishun llapan familia yanapanakurnin Jehoväpa kaqchö alli kayänampaq.

Imëpis “nawiquicuna alli” katsun

3, 4. a) ¿Imaman ishkïpitataq cristiano familiakuna cuidakuyanman? b) ¿Ima ninantaq alli ‘nawiyoq’ kë?

³ Cristu kutimunampaq familiantsikkuna mäkoq mäkoqlla këkäyänanta munarqa, manam permitishwantsu ni imapis Diosnintsikta servikanqantsikta haqitsimänata, alleqmi cuidakunantsik. Kapoqyoq këta munëmi atskaq cristiänokunata Diospita rakikätsishqa. Tsëmi alläpa precisan ‘nawiquicuna alli catsun’ nir Jesus consejakunqanta wiyakunantsik (lei Mateo 6:22, 23). Imanömi huk lampara paqaspa mana ishkishpa purinapaq yanapamantsik, tsënöllam alli nawiyoq kë o ‘shonquntsicchö shumaq cäyicunqantsic’ yanapamantsik Diosta servïkarnin mana allikunaman mana ishkinapaq (Efe. 1:18).

 ⁴ Nawintsik imatapis alli rikänampaqqa sänom kanan. Tsënöllam pasan shonquntsikpa nawinwan o munëninwan. Alli nawiyoqqa rikan hukllëllaman y más precisaq kaqllamanmi. Tsë ninanqa, familianta kushitseq kaqkunata o kikimpa munëninllata ashinampa rantinmi, Diospa kaqta puntaman churan (Mat. 6:33). Y kapamanqantsikllawanmi kushishqa kawakunantsik, y Jehoväpa kaqta puntaman churanantsik (Heb. 13:5).

5. ¿Imanötaq rikätsikurqan Etiopía markapita huk shipash Jehoväpa kaqta kawëninchö más precisaqpaq churanqanta?

⁵ Wambrakunata alli nawiyoq këta yachatsinqantsikqa alläpa alli rurëmi. Rikärishun tsënö kanqanta. Etiopía markapita huk shipashmi estudionta usharqan alli nötakunawan, tsëmi qarayarqan huk bëcata kikin munanqanchö mana pagashpa estudianampaq. Pero pëqa manam munarqantsu, Jehoväta llapan tiemponwan servita munarnin. Tsëpitanam, awniyarqan huk trabäjota y killachö 11.220 sölesta pagayänampaqmi niyarqan. Tsëtapis kë shipashqa manam munarqantsu precursora këta munarnin. Y manam teytankunatapis tapurqantsu tsë trabäjota mana chaskikunampaq kaqta. Tsëta ruranqampita teytankuna musyarir, ¿imanötaq sientekuyarqan? Alläpam kushikuyarqan y felicitäyarqanmi.

6, 7. ¿Imanirtaq imanö kanqantsikmampis alli yarpakachänantsik?

⁶ Mateo 6:22, 23 textom rikätsikun imëkapaqpis ërayëpaq. “Mana alli” nawi nirqa, parlëkarqan imëkapaqpis ërayaqkunapaqmi (Mat. 6:23). ¿Imataq Jehová nin kikinkunallapaq imatapis munaqkunapaq? Bibliam kënö nin: “Qamcunacho ama catsuntsu jucwan jucwan pununaquicuna, ni melanepaq mana alli rurecuna, ni quecayäpushuptiqui maspaq erayecuna” (Efe. 5:3).

⁷ Imapaqpis mallaqäkoq kayanqantaqa wakinkunachöqa fäcil-llam cuentata qokurishwan, pero kikintsikchöqa manam. Tsëmi alli kanman Jesus kënö consejakunqanta wiyakunantsik: “¡Paqtaraq yö! Mallaqäcoq cayanquiman, tsepita cuidacuyë” (Luc. 12:15). Cuentata qokunapaqqa imanöpis kanqantsikmanmi yarpakachashwan, y rikänantsikmi imata más munanqantsiktapis. Tsëmi llapan cristiano familiakuna kënö tapukuyänan: ¿Ëka tiempotaq pasä kushikïkunachö y ëka qellëtataq gastä munanqäkunata rantirnin?

8. ¿Imanirtaq imatapis manaraq rantirnin alliraq pensanantsik?

⁸ Imatapis rantita munarqa, manam qellënintsik tinkunqanllamantsu pensanantsik. Sinöqa hukkunamampis pensanantsikmi. Këtam tapukushwan: “¿Tsë rantinqäta utilizänäpaq y allillata katsinäpaq tiempö kanqatsuraq? ¿Rasllatsuraq utilïcëta yachakurishaq?”. Hina jövenkunaqa, këtam tapuyanman: “¿Röpakunata o imëkatapis alli markatanö propagandakunachö rikärirku raslla munarï y teytäkunataku mälas rantitsï?”. Joven, tsë munëkunamanqa ama ishkitsu, alli juicioyoq kë. Hina llapan familiam kënö tapukuyänan: “Imatapis rantirninqa, ¿yanapashaqtsuraq familiata Jesus chämunan hunaqpaq listo këkäyänampaq?”. Jehová kënö awnikunqanman imëpis markäkushun o yärakushun: “Manam qonqashqequitsu ni jaqirishqequitsu” (Heb. 13:5).

Jehoväpa markanchö más yanapakunapaq sinchikushun

9. Jehoväpa markanchö más yanapakuyänampaq churapakäyanqan, ¿imachötaq yanapan familiakunata?

⁹ Familiakunapa markäkïninkuna sinchi kanampaq huk rurëqa, Jehoväpa markanchö imanö yanapakuyänampaq kaqtapis alli pensëmi y pensayanqannö rurayänampaq sinchikïmi. Tsënö rurayanqanmi yanapanqa Jehoväpa kaqchö imanö këkäyanqanta y imata más precisaqpaq churëkäyanqanta musyayänampaq (lei Filipenses 1:10).

10, 11. ¿Imata rurayänampaqtaq familiëkikuna pensayashqa, y tsëpita mëqantanaraq rurayanqa?

¹⁰ Fäcil kaq rurëkunapis alläpa allim kanman llapan familia yanapanakuyaptinqa. Itsa huk rurëqa kanman Llapan Hunaqkuna Bibliapita Yachakunapaq follëtota leiyänan. Tsë texto  ninqampita llapankuna parlakuyanqanmi teytata yanapanqa familian Jehoväwan imanöpis këkäyanqanta musyanampaq. Hina alläpa allim llapan familia junto Bibliata leiyänan, tsëmi yanapanqa wambrakuna leita más yachakuyänampaq y Biblia ninqanta más entiendiyänampaq (Sal. 1:1, 2). Hina Diosman mañakunqantsik más alli kanampaqpis sinchikushwanmi. Y espïritupa wayïninta katsinapaqpis sinchikushwanmi (Gal. 5:22, 23). Huk rurëqa kanman yachatsinqantsik nunakuna imanöpis këkäyanqanta musyëmi. Tsënöpam wambrantsikkunata yachatsishun pëkunapis llakipäkoq kayänampaq, tsëqa itsa pëkunapis precursor o misionero këta munayanqa.

¹¹ ¿Ima masta ruräyänëkipaqtaq familiëkiwan churapakäyankiman? ¿Mastsuraq yachatsikoq yarquyankiman? ¿Cällekunachö y rantikuyanqankunachö mana mantsapakushpa yachatsikïtatsuraq sinchikuyankiman? ¿Y Jehoväpita yachatsikoq ëwayankimantsuraq mana Testigo kaq markakunaman? ¿Familiëkichö mëqanllapis puëdenmantsuraq huk idioma yachakïta huk idiömata parlaqkunata yachatsikunampaq?

12. ¿Imanötaq huk teyta familianta yanapanman Jehoväpa kaqchö más sinchi kayänampaq?

¹² Alläpa allim kanman huk teyta, familianta yanapanampaq kaqman y rurëta puëdeyanqan kaqkunaman pensëkur imata karpis akranan (Pro. 13:12). Awmi, rasun kaqchöqa alli rurëkunaqa tiempotaraqmi wanan. Tsëmi alläpa precisanman televisión rikëpita o huk rurëkunapita tiempota horqayänan, tsënöpa Jehoväpa kaqta rurayänampaq más tiemponkuna kanampaq (Efe. 5:15, 16). Y patsätsiyanqankunata cumpliyänampaqqa, alli sinchikuyanqanmi yanapanqa (Gal. 6:9). Tsënöpam wakinkuna “cuentata qocuyanqa waran waran  mas cabal alli nuna” tikrëkäyanqanta (1 Tim. 4:15).

Ama qonqashuntsu Familiachö Diosta Adorana Hörata

13. ¿Cada semana rurakaq reunionchö ima cambiotaq karqan y ima tapukïkunatataq rurakushwan?

¹³ 1 de enero 2009 watapita patsëmi cada semana yachakunqantsik reunión cambiakämushqa, y këqa atskaq familiakunatam yanapashqa Cristu kutimunan hunaqpaq listo këkäyänampaq. Libropita Yachakunapaq reunionqa rurakaq huk hunaqchömi, pero kananqa Yachatsikunapaq Diospa Escuëlan y Diospa Gobiernompita Yachatsikunapaq reunionkunawanmi juntakashqa. Tsënöpa familiakuna llapankuna junto cada semänachö huk paqas Jehoväta adorar más sinchi kayänampaq. Tsënö kanqampitaqa ishkë watanam pasarishqa, tsëmi alläpa alli kanman kënö tapukunantsik: “¿Familiachö Diosta Adorana Hörapaq o hapallä estudianäpaq tiempota rakikäkü? ¿Patsätsiyämunqanta rurëkäku?”.

14. a) ¿Imapaqtaq patsätsiyarqan Familiachö Diosta Adorana Hörata y hapallankunalla yachakuyänan hörata? b) ¿Imanirtaq alläpa precisan yachakunapaq huk paqasta rakinantsik?

¹⁴ Familiachö Diosta Adorana Hörataqa patsätsiyarqan Jehová Dioswan familiakuna más alli reqinakuyänampaq y pëman más witiyänampaqmi (Sant. 4:8). Llapan semänakuna Bibliata estudiashqa y Diosta más reqishqaqa, pëwan alli kënintsikmi más sinchiyanqa. Y tsëmi Jehoväta kuyashun llapan shonquntsikwan, llapan kawënintsikwan, llapan yachënintsikwan y llapan kallpantsikwan (Mar. 12:30). Hina munashunmi Dios munanqanta rurëta y Pënö këtapis tïrashunmi (Efe. 5:1). Rikanqantsiknöpis alläpam precisan Familiachö Diosta Adorana Hörata, familiakuna rurayänan, tsënöpam listo këkäyanqa ‘allapa jipaqui’ chämunan hunaqpaq (Mat. 24:21). Awmi, tsëqa alläpam precisan kawanantsikpaq.

15. ¿Imanötaq Familiachö Diosta Adorana Hora familiakunata yanapan?

¹⁵ Hina Familiachö Diosta Adorana Höraqa yanapakun familiakuna más kuyanakuyänampaqmi. Cada semana Diospita junto yachakuyanqanqa yanapakun cada uno imanöpis kayanqanta musyayänampaqmi. Këllaman yarpärishun, casädokunaqa más reqinakuyan Bibliapita mana entiendeyanqan tëmakunata junto yachakurninmi (lei Eclesiastés 4:12 *). Hina tsënöllam teytakuna y wambrakunapis Bibliapita junto yachakurqa, más reqinakur kuyanakuyan y huk ‘shonqulla cawacuyan’ (Col. 3:14).

16. ¿Imanötaq yanapashqa kimaq cristiänakunata cada semana juntakar Bibliapita yachakuyanqan?

¹⁶ Rikärishun kimaq yashqana viuda cristiänakunata imanöpis Familiachö Diosta Adorana Hora yanapanqanta. Kë cristiänakunaqa manam familiatsu kayan. Pero atska watakunapam yanasa kayashqa. Tsë markallachö tärarmi imëpis junto këta tïrayaq, pero manam kushikuyänanllapaqtsu, sinöqa Diospa kaqta rurayänampaqpis juntakäyaqmi. Tsëmi patsätsiyarqan semänachö huk paqas kimankuna junto Bibliapita yachakuyänampaq. Yachakuyarqan “Testimonio cabal” del Reino de Dios ninqan librotam. Huk kaq cristiänam kënö nin: “Tsë yachakuyänä höraqa alläpa shumaqmi këkun, tsëmi huk hörapitapis masraq yachakur quedakuyä. Unë tiempochö cristiänokuna imanöpis pasayanqanmanmi pensëta tïrayä, y parlayämi tsënö noqakunata pasayämaptin imanöpis rurayänäman. Y tsëpitanam yachatsikoq ëwarnin yachakuyanqänö rurëta sinchikuyä. Tsënö rurayaptïmï yachatsikuyanqä más alli yarqapayäman y nunakunapis más wiyayäman”. Pero manam yachakuyänanllapaqtsu ni yachatsikuyänanllapaqtsu yanapashqa, sinöqa más yanasam tikrayashqa. Y kimanmi kënö niyan: “Tsënö juntakar yachakuyanqäqa noqakunapaq alläpam precisan”.

17. ¿Familiachö Diosta Adorana Hora shumaq kanampaq imakunata ruranqantsiktaq yanapamäshun?

¹⁷ ¿Imanötaq noqantsiktaqa yanapamarquntsik huk paqas familiantsikwan yachakunqantsik  o hapallantsiklla yachakunqantsik? Puëdenqantsik höralla yachakushqaqa, manam munanqantsiknöqa yanapamäshuntsu. Y manam haqishwantsu mana precisaq rurëkuna estudiontsikta haqitsimänata. Wayichöqa llapan familiam listo këkäyänan estudio hörapaq. Hinamampis akranantsik familiantsikta yanapanampaq kaq tëmakunatam. ¿Imatataq rurashwan tsë yachakuna hora shumaq kanampaq? Shumaq yachëpa, kushishqa y respëtowanmi yachakunantsik (Sant. 3:18). *

‘Mana punucashpa’ ‘mäcoq mäcoq quecashun’

18, 19. ¿Imanötaq qamta y familiëkita yanapayäshunkiman Jesus shamunan hunaq këllachöna këkanqanta musyë?

¹⁸ Kanan witsan nunakuna pasëpa mana alli kawakuyanqanmi rikätsikun, Satanaspa mundon 1914 watapita patsë ushanan hunaqkunachöna këkanqanta. Diospa piñakïnin hunaqqa këllachönam. Jesucristuqa kutiramunqanam Jehová ninqannö mana wiyakoq nunakunata ushakätsinampaq (Sal. 37:10; Pro. 2:21, 22). Tsë pasakunqankunata mäkoq mäkoqlla këkanqantsikqa familiantsikta y noqantsiktapis yanapamäshunmi listo këkänapaq.

¹⁹ ¿Alli ‘nawiyoq’ kë nir Jesus consejakunqanta wiyakïkankiku? Mana alli nunakunaqa kapoqyoq këta y reqishqa këllatam ashiyan, pëkuna tsënö kayaptimpis, ¿qamqa sinchikïkankiku llapan familiëkiwan Jehoväpa markanchö más yanapakuyänëkipaq? ¿Familiachö Diosta Adorana Hora o hapallëki yachakunëki hora alliku yanapëkäyäshunki? ¿Pensayanqëkinöku rurëkäyanki? Punta kaq yachatsikï nimanqantsiknö, ¿familiëkikuna mäkoq mäkoqlla këkäyänampaq llapëkiku yanapanakïkäyanki? (1 Tes. 5:6.) Kë tapukïkunata, llapantam rurëkä nir contestaptikiqa, familiëkikuna listom këkäyanqa Jesucristu shamunan hunaqpaq.

[Päginapa ura kuchunchö willakïkuna]

¿Yarpankiku?

• Familiakuna listo këkäyänampaq, ¿imanötaq yanapakun . . .

alli ‘nawiyoq’ kë?

Diospa markanchö más yanapakunapaq sinchikï?

Familiachö Diosta Adorana Hörachö yachakï?

[Yachakunapaq kaqpa tapukïninkuna]

[15 kaq päginachö dibüju]

Alli ‘nawiyoq’ këmi yanapamäshun kë mundopa rurëninkunarëkur Diospa kaqta mana haqirinapaq