Cristiano familiakuna mäkoq mäkoqlla këkäyë

“Tsemi noqantsicqa alli yarpenintsicwan mäcoq mäcoq quecanantsic.” (1 TES. 5:6.)

1, 2. ¿Imatataq familiakuna rurayänan Jehoväpa kaqchö mäkoq mäkoqlla këkäyänampaq?

“JEHOVÄPA hatun mantsakëpaq piñakïnin” hunaqpaq Pablu parlarmi, Tesalönicachö këkaq cristiänokunata kënö nirqan: “Wauqicuna panicuna, qamcuna alli rureniquicunacho cawaquicayaptiqueqa, cutimurpis, manam juc suwanotsu derepentita tariyäshunqui. Tseno allicunata rurarmi, actsichonona y junaqchonona cayanqui, y manam tutapechononatsu ni paqaschononatsu cayanqui”. Tsëpitanam nirqan: “Tsemi noqantsicqa alli yarpenintsicwan mäcoq mäcoq quecanantsic, y manam punucashqa nunacunanotsu canantsic” (Joel 2:31; 1 Tes. 5:4-6).

² Tesalonicenses cristiänokunata Pablu consëjanqanqa, alläpam precisan kë ‘ushanan tiempokunachö’ kawaqkunapaqpis (Dan. 12:4). Tsëmi kë consëjokunata wiyakunantsik y mäkoq mäkoqlla këkänantsik. ¿Imanir? Mana alli nunakunapa ushakënin këllachöna kaptin, y Diospa serviqninkunata Satanás imanöpapis hutsaman ishkitsita tïraptin. ¿Imatataq rurayanman cristiänokuna Satanaspa toqllanman mana ishkiyänampaq? Tsëpaqqa, Jehová ninqannömi familiachö cada uno yanapanakuyänan. Rikärishun mä imatash rurayanman qowa, warmi y wambrakuna Jehoväpa kaqchö mäkoq mäkoqlla këkäyänampaq.

Qowakuna, “alli mitseq” ruranqanta qatiyë

3. 1 Timoteu 5:8 ninqannö, ¿imatataq huk ollqu familiampaq ruranman?

³ Diospa Palabranqa mandakun “ollqu caqcunapa mandaduncunachonam warmicuna cayänan” nirmi (1 Cor. 11:3). ¿Imatataq huk ollqu ruranman Dios munanqannö familianta rikänampaq? Bibliaqa ruranampaq kaqpita kënömi nin: “Pipis manatsun ashin kikinpa kaqkunapaq, i masraq wayinchow kaqkunapaq, kreyikiytam negashqa, i mana kreyikoqpitapis peyormi” (1 Tim. 5:8, QKW). Kë textochö rikanqantsiknömi huk ollquqa familian wananqankunapaq trabajanan. Pero manam tsëllatatsu ruranan. Familian Diosnintsikpa kaqchö mäkoq mäkoqlla kayänanta munarqa, yanapananmi markäkïninkunachö o yarakuyninkunachö alli sinchi kayänampaq y Diospa más alli amïgon tikrayänampaq (Pro. 24:3, 4). ¿Imanötaq tsëtaqa ruranman?

4. ¿Imatataq huk ollqu ruranman familian Jehoväpa kaqchö más sinchi kanampaq?

⁴ “Warmeqa qowanpa mandadunchomi canan, imeca creyicoqcuna Jesucristupa mandaduncho cayanqanno.” Tsëmi Jesus congregacionta dirigenqannö huk ollqupis familianta dirigenan (Efe. 5:23). Jesus qateqninkunawan alli këninkunata rikätsikunampaqmi huk alli mitsikoqtawan igualatsikurqan (lei Juan 10:14, 15). Awmi, pëqa “alli mitseq[mi]”, tsëmi huk ollqu Diospa kaqchö familianta yanapëta munarqa, Jesus imanö kanqampita y ruranqampita más yachakunan y pë ruranqankunatam qatinan (1 Ped. 2:21).

5. ¿Alli Mitsikoqqa congregacionta hanan hananllatsuraq reqin?

⁵ Mitsikoqwan üshakuna alli kayänampaqqa yanapan reqinakuyanqan y pëkunapura markänakuyanqanmi. Mitsikoqqa üshankunata allipam reqin, y üshakunapis mitseqnïnta reqiyanmi y markäkuyanmi, y parlariptinllanam reqiriyan y cäsoyan. Tsëmi kikin Jesus kënö nirqan: “Tsenollam noqapis üshäcunata reqï; y pecunapis noqapa carmi, reqiyäman”. Pëqa  congregacionta manam hanan hananllatsu reqin. Griego idiömachö “reqï” nirqa, “paqwëmi reqin” ninanmi. Alli Mitseqqa llapan üshankunatam reqin, y musyanmi imata wanayanqanta, imanö kayanqanta y imawan sufriyanqantapis. Llapantam rikëkan. Üshakunapis alleqmi reqiyan y alli pushakoq kanqanmanmi markäkuyan.

6. ¿Imanötaq huk ollqu qatinman Alli Mitsikoq ruranqanta?

⁶ ¿Imanötaq Jesus ruranqanta qatir huk ollqu wayinchö kaqkunata dirigenman? Kikin huk mitsikoqnö kanqanta y familiankunana üshanö kayanqantam yarpänan. Llapantam reqita sinchikunan. Pero ¿alleq reqita puëdenmantsuraq? Awmi, pero tsëpaqqa llapantapis allim parlapänan, y yarparäyanqankunapita willayaptimpis shumaqmi wiyanan. Hina Dios mandakunqannömi rurëta tïranman pëkunapis yachakuyänampaq, tsëmi shumaq patsätsinan llapankuna Familiachö Diosta Adorana Hörachö kayänampaq, hina tsënöllam patsätsinan reunionkunaman ëwayänampaq, yachatsikoq yarquyänampaq y kushikuyänampaq imata rurayänampaq kaqtapis. Patsätsinqankuna Biblia ninqannö kaptin y familiankuna imanö kayanqanmampis yarpëkur ruraptinqa, pëman masmi markäkuyanqa y llapankunapis huknöllam Jehoväta serviyanqa, tsënö familian ruraptinqa tsë teyta alläpam kushikunqa.

7, 8. ¿Imanötaq huk ollqu qatinman Alli Mitsikoq kuyëpa üshankunata rikanqampita?

⁷ Huk alli mitseqqa ushankunata manam reqinllatsu, sinöqa alläpam kuyan. ¿Imatataq yachakuntsik Jesuspa kawënimpita y yachatsikunqampita leirnin? Qateqninkunata alläpa kuyëpa tratanqantam rikantsik. Tsënö kuyarmi ‘üshancunarecur’ wanurqan. Huk ollqupis Diospa kuyëninchö këta munarqa, Jesus ruranqantam qatinan y familiantam alläpa kuyanan. Warminta mandaqlla y lluta trataqlla kanampa rantinqa, Jesucristu “peman creyicoqcunata” cuyanqannömi kuyanan (Efe. 5:25). Warmintaqa kuyëllapam parlapänan y imëpis respëtowanmi rikänan (1 Ped. 3:7).

⁸ Huk ollqu, wambrankunata Diospita yachatsirpis manam munëninkunata rurakuyänanta haqinmantsu, pero tsënö kaptimpis kuyëpam yachatsinman. Awmi, kuyëpam imapitapis piñapänan. Wakin wambrakunaqa manam rasllatsu yachakuriyan imata rurayänampaq kaqtapis. Tsënö kaptinmi teytaqa alläpa pacienciayoq kanan. Jesus ruranqankunata imëpis ruranampaq sinchikuptinqa, llapanmi familiachö yamë y shumaq kawakuyanqa, y Diospa kaqchöpis salmista ninqannömi alli cuidashqa kayanqa (lei Salmo 23:1-6 *).

9. Noëno, ¿imatataq rurayänan familiayoq ollqu cristiänokuna y imataq yanapanqa tsëta rurayänampaq?

⁹ Noe imanöpis kawanqanman pensarishun. Pëqa rikarqanmi unë mana alli nunakuna ushakäyanqanta, y pëtaqa ‘qanchis nunacunatawanmi’ Diosnintsik salvarqan (2 Ped. 2:5). Familianchöqa Noëmi mandakoq karqan, tsëmi llapankunata yanapanan karqan tsë ushakëpita salvakuyänampaq. Tsënöllam kanan tiempochöpis ollqukunaqa kë ushakë hunaqkunachö familiankuna salvakuyänampaq yanapayänan (Mat. 24:37). ¿Imanöraq tsëta rurayanman? Alleqmi yachakuyänan Alli Mitsikoq ruranqampita y sinchikuyänanmi tsënölla rurayänampaq.

Casada warmikuna wayikikunachö kaqkunata yanapayë

10. “Kasädakuna sujetakuyätsun kikinkunapa qowankunaman” ninqanqa, ¿ima ninantaq?

¹⁰ Apóstol Pablum kënö nir qellqarqan: “Kasädakuna sujetakuyätsun kikinkunapa qowankunaman” (Efe. 5:22). Kënö mandakunqanqa,  manam mana kaqpaq churëtsu karqan. Manaraq Ëvata rurarmi Jehová kënö nirqan: “Manam allitsu ollqu hapallanlla kakunan. Yanapanampaqmi huk yanaqin rurapushaq” (Gén. 2:18). Nunampa yanapaqnin y yanaqin këqa, huk warmipaq alläpa shumaq rurëmi.

11. ¿Imanötaq alli yachaq warmiqa wayinchö yanapakun?

¹¹ Alli trabajaq warmiqa imëkatam ruran wayinchö kaqkunata yanapanampaq (lei Proverbios 14:1 *). Manam, nunanta mana cäsokoq upa warmikunapaq Salomon ninqannötsu kayan, tsëpa rantinqa shonqupita patsëmi kuyan, wëllun y respetan. Kë mundochö munëninkunata ruraq y mana cäsokoq warmikunanö kanampa rantinmi, nunan ninqanta wiyakun (Efe. 2:2). Upa warmiqa mana penqakushpam nunampa wasan riman. Pero yachaq warmiqa imëkatam ruran wambrankuna y wakin nunakunapis nunanta respëtowan rikäyänampaq. Hinamampis manam nunanta mana respetaqnöqa parlapantsu ni pleitïta ashipantsu. Y, ¿imatataq ruran gastokunapaq qellëta chaskinqanwanqa? Upa warmiqa, qellë tarinan aja o sasa këkaptimpis imëkata lluta rantirmi raslla usharin. Pero yachaq warmiqa nunantam yanapan imatapis alli yarpëkur-raq rantirnin y manam nunanta más tiempo trabajanampaq nintsu.

12. ¿Imatataq huk yachaq warmiqa ruran familian Jehoväpa kaqchö mäkoq mäkoqlla kanampaq?

¹² Alli yachaq warmiqa nunantam yanapan, wambrankunata Jehoväpita yachatsir, tsënöpam yanapakun llapankuna familianö Jehoväpa kaqchö mäkoq mäkoqlla këkäyänampaq (Pro. 1:8). Familiachö Diosta Adorana Hörachö yachakuyänampaqmi yanapakun. Hinamampis nunan wambrakunata consejaptin o piñapaptinqa manam contran churakantsu. ¡Imanö hukläyam mana yanapakoq upa warmipitaqa! Upa warmiqa familiantam hipatsin y manam Jehoväpa kaqchöpis yanapakuntsu.

13. ¿Imanirtaq alläpa precisan huk warmi nunanta yanapanan Jehoväpa kaqchö trabajaptin?

¹³ ¿Imanötaq huk alli warmi sientekun nunan congregacionchö yanapakuptin? Alläpam kushikun siervo ministerialnö o anciänonö, Comité de Enlace con los Hospitales o Comité Regional de Construcción ninqanchö alli trabajanqanta rikarnin, o congregacionpaq huk rurëkunachöpis yanapakuptin. Awmi, parlëninwan y rurëninwan yanapanampaqqa alliran sinchikunan y tsëpaqqa munëninkunatapis haqinanmi. Tsënö kaptimpis musyanmi, Jehoväpa kaqchö nunan tukïta rurar yanapakuptinqa, familiampis mäkoq mäkoqlla këkänanta.

14. a) ¿Imanirtaq huk warmipaq sasa kanman nunanta yanapë, y imatataq ruranman nunata yanapëta munarqa? b) ¿Imanötaq huk warmi yanapakunman llapan familian alli kawakunampaq?

¹⁴ Huk warmipaqqa, itsa sasa o aja kanman nunanta yanapanan imatapis ruranqan pë  munanqannö mana kaptinqa.Tsënö kaptimpis “shumaq alli cawaquipaq” yarpararmi yanapan nunan ruranqankuna alli yarqapunampaq (1 Ped. 3:4). Hinamampis unë warmikuna Sara, Rut, Abigaíl y Jesuspa mamam Maria ruranqankunatam qatin (1 Ped. 3:5, 6). Y kanan witsan ‘Dios munashqanno cawacuq’ warmikunapa rurëninkunatapis qatinmi (Titu 2:3, 4). Nunanta kuyanqanwan y respetanqanwanmi yanapakun ishkan alli kawakuyänampaq, y familiankunapis wayichö yamë y kushishqa kayänampaq. Diosta kuyaq ollqupaqqa, tsënö yanapakoq warmiqa alläpa valoryoqmi (Pro. 18:22).

Wambrakuna, mana rikäyanqëki kaqkunata precisaqpaq churayë

15. ¿Imanötaq jövenkuna teytankunata yanapayanman llapan familian mäkoq mäkoqlla këkäyänampaq?

¹⁵ ¿Imanötaq qam joven teytëkikunata yanapankiman Jehoväpa kaqchö llapan familiëki mäkoq mäkoqlla këkäyänampaq? Yarpë, mäkoq mäkoqlla kaptikiqa Jehoväqa huk premiotam qoshunki. Itsa takshallaraq kanqëkipita patsë teytëkikuna rikätsiyäshurqunki huk dibüjochö imanöpis huk paraíso kanqanta, y más winaptikina Bibliawan, librokunawan, follëtokunawan y revistakunawanna yachatsiyäshurqunki tsë Paraíso imanö kanampaq kaqtapis alli musyanëkipaq. Jehoväta mana haqishpa serviptikiqa y tsëlla kawënikichö más precisaq kaptinqa, imëpis mäkoq mäkoqllam këkanki.

16, 17. ¿Imatataq jövenkuna rurayanman mana wanushpa kawëman chäyänampaq?

¹⁶ Apóstol Pablu 1 Corintios 9:24 (lei) textochö ninqanta rurë. Cörre gananëkiman yarparar. Mana wanushpa kawëman chätsikoq nänita akrë. Atskaq jövenkunam tsë nänipa cörreta haqiyashqa kë mundochö imëkayoq këta munëwan. Pero tsë rurëqa manam imapaqpis välentsu. Qellëta tarinallapaq kawëqa manam rasumpa kushikïta apamuntsu. Hinamampis kapoqyoq këqa rasllam pasarin. Más alliqa ‘mana ricanqantsic caqcunam’. ¿Imanir? Porque tsëqa manam imëpis ushakantsu (2 Cor. 4:18).

¹⁷ “Mana ricanqantsic” kaqkunachömi këkan Diospa Gobiernon awnikunqankuna. Imata ruranëkipaq kaqtapis alli patsätsi. Rasumpa kushishqa këta munarqa Jehoväta servinëkillapaq kawë. Atska rurëkunam kan, ichiklla tiempochö o atska tiempochö ruranëkipaqpis, y tsëkunata ruranëkipaqmi yarpakachänëki. * Rurëta puëdenqëkikunata akrarqa Diosta servirmi ocupado kanki, y mana wanushpa kawakïmanmi yarparanki (1 Juan 2:17).

18, 19. ¿Imanötaq huk joven musyanman Jehová munanqannö kawëkanqanta?

¹⁸ Mana wanushpa kawëman chänapaqqa, puntataqa shonqupita patsëmi Diospa yachatsikïninta kuyanantsik. ¿Tsënöku kuyanki? Kënö tapukï: “Ima rurëchöpis congregacionchö yanapakurqa, ¿kikï munarku rurä o teytäkuna niyämaptinllaku? ¿Dios munanqannö kanäpaqku sinchikïkä? ¿Mana haqishpaku Diosman mañakö, estudiä, reunionkunaman ëwä y yachatsikoq yarqö? ¿Shonqupita patsëku Jehoväta kuyä?” (Sant. 4:8).

¹⁹ Moises imanöpis kanqanta Bibliachö leirir tsëman alli yärparë. Pëqa Egiptochö huk costumbreyoq nunakunawan juntarëkarnimpis, manam faraonpa warmi wambrampa wawannötsu  reqishqa këta munarqan, sinöqa Jehoväpa sirveqninnömi (lei Hebreus 11:24-27). Yarpë qampis Moisesnömi Dioswan alli këta ashinëki, mana haqita pëta servinëkipaq. Tsënöpam kushishqa kanki y rasumpa ‘wiñe cawetapis’ chaskinki (1 Tim. 6:19).

20. ¿Pikunataq mana wanushpa kawëman apakoq nänipa correr premiota chaskiyanqa?

²⁰ Cörrer gananakoqkunapaq Pablu parlanqanchöqa hukllaqllam ganan. Pero kawëman apakoq nänipa cörreqa hukläyam. Diosqa “munan llapan nunacuna salbacuyänantam, y rasonpa caq yachatsiquicunata musyayänantam” (1 Tim. 2:3, 4). Qampa puntëkitaqa atskaqnam cörrechö ganayashqa y wakinqa qamwan paqtam cörrekäyan (Heb. 12:1, 2). Pero premioqa kanqa mana haqishpa correq kaqpaqmi. Qamqa puëdenkim tsë premio ganëta.

21. ¿Imatataq yachakushun qateqnin yachatsikïchö?

²¹ “Jehoväpa mantsakëpaq hatun piñakïnin hunaqqa” imë hora karpis chäramunqanam (Mal. 4:5). Cristiano familiakunaqa manam illaqpita mantsakätsinanta haqiyanmantsu. Tsëmi llapan familia Dios munanqanta rurar llapan yanapanakuyänan. Pero ¿tsëllatatsuraq rurayanman mäkoq mäkoqlla kayänampaq y Dioswan alli kayänampaq? Manam, mastaraqmi rurayänan. Qateqnin yachatsikïmi rikätsimäshun familiakuna imëpis listo këkäyänampaq kima yanapakïkunata.

[Päginapa ura kuchunchö willakïkuna]

¿Yarpankiku?

• ¿Imanirtaq precisan cristiano familiakuna mäkoq mäkoqlla këkäyänan?

• ¿Imanötaq huk ollqu Alli Mitsikoq ruranqanta qatinman?

• ¿Imanötaq yachaq warmiqa nunanta yanapan?

• ¿Imanötaq wambrakuna yanapakuyanman familian mäkoq mäkoqlla këkäyänampaq?

[Yachakunapaq kaqpa tapukïninkuna]

[11 kaq päginachö dibüju]

Diosta kuyaq ollqupaqqa yanapakoq warmi alläpa valoryoqmi