¡Imaläyam Diosnintsikpa yachëninqa!

“¡Diosqa imalaya allim, imalaya yachaqmi y imalaya allipa cäyicoqmi! Llapantam cäyin. Y manam llapantaqa pipis cäyiyantsu, Dios pensashqancunata ni munashqancunata.” (ROM. 11:33.)

1. Huk bautizashqa cristiänopaqqa, ¿imataq imapitapis más kushikïqa?

¿IMËLLAPIS imallaqa alläpa kushitsishurqunkiku? Itsa tsënö tapuriyäshuptikiqa, huk cargoman churayäshunqëkita o allitam rurarqunki niyäshunqëkiman yarpärinki. Tsëkuna kushikïpaq kaptimpis, bautizakushqa cristiänopaqqa manam imapis más alliqa kantsu Jehoväwan amïgo kënöqa. Rasumpam, alläpa kushikïpaqmi Diosnintsik noqantsikta reqimanqantsikqa (1 Cor. 8:3; Gal. 4:9).

2. ¿Imanirtaq imapitapis más alli Jehoväta reqinantsik y pë reqimänantsik?

² ¿Imanirtaq nintsik Jehoväta reqinan y pë reqimänantsik alläpa alli kanqanta? Manam ciëlochö y Patsachö Alläpa Puëdeq kanqanllapitatsu tsëtaqa nintsik, sinöqa kuyanqan nunakunapa tsapaqnin kanqanrëkurmi. Rasuntachi profeta Nahúm kënö nirqan: “Jehoväqa alläpa allim, hipakïnintsikkunachömi tsapämantsik. Y musyanmi tsapäkïninta pï ashinqantapis” (Nah. 1:7; Sal. 1:6). Mana wanushpa kawëta munarqa, alläpam precisan rasumpa kaq Diosta y Tsurin Jesucristuta reqinantsik (Juan 17:3).

3. ¿Ima ninantaq Diosta reqiqa?

³ Pero ¿ima ninantaq Diosta reqiqa? Reqinanqa manam shutin ima kanqanta musyëllatsu. Sinöqa alleqmi Jehoväta reqinantsik, amïgontsiktanö rikantsik, musyanantsikmi ima gustanqanta y ima melananqantapis. Hina pëpita yachakunqantsikmannömi kawanantsik (1 Juan 2:4). Y manam tsëllatatsu ruranantsik. Alleq reqinapaqqa, imanö y imarëkur llapan ruranqankunata yachakunapaqmi sinchikunantsik. Y ruranampaq kaqkunapita yachakurqa, masmi ‘imalaya yachaq’ kanqampita respetashun (Rom. 11:33).

Munënintam Jehová ruran

4, 5. a) Bibliachö ‘pensashqan’ nirqa, ¿imapaqtaq parlëkan? b) Rikätsikarami munanqantsikta imanöpapis rurëta puëdenqantsikta.

⁴ Jehoväqa imatapis ruran munëninkuna rurakänampaqnömi. Awmi, Bibliaqa ‘unepita patsa pensashqanpitam’ parlan (Efe. 3:10, 11). Bibliachö ‘pensashqa’ nirqa, ¿imapaqtaq parlëkan? Tsënöqa parlan, rurëta munanqankunata imanöpapis ruranapaqmi.

⁵ Këman yarpärishun. Huk markamanmi ëwëta huk nuna munan. Tsë markaman chëmi, pensënin o munënin. Itsachi imanö chänampaq tukï kaptimpis, akrashqana imawan y mëpa ëwanampaqpis. Akrashqana kaptimpis, itsa tamya kaptin, atska cärrokuna kichkinakushqa kayaptin o carretërapa päse mana kaptin huk lädopa yaqarinman. Pero ima pasakuptimpis chëta munanqan markamanqa imanöpapis chanmi.

6. ¿Imataq rikätsimantsik pensanqankunata Jehová ruranampaq huknöpa patsätinqanqa?

⁶ Tsënöllam Jehoväpis, unëpita pensashqankuna rurakänampaqqa tukïnöpa ruran. Nunakuna imatapis rurayänampaq kaqta akrayänanta Dios haqirpis, pensashqankunata ruranampaqqa imatapis cambiarinmi. Pensashqankunata Awnikushqa Mirëninwan imanö ruranqanta rikärishun. Punta teytantsikkunata Jehová kamarmi këta mandarqan: “Wambrëkikuna katsun y atskaqyäyë y patsa huntanqanyaq mirayë y dominayë” (Gén. 1:28). Edén huertachö Adanwan Eva Jehoväta mana cäsokuyanqanrëkur, ¿mananatsuraq Jehoväpa munënin rurakanman  karqan? Imëkanöpapis rurakänanmi karqan. Tsëmi munënin rurakänampaqqa, Jehová huknöpa patsäratsirqan. Huk ‘mirë’ shamunampaq kaqtam willakurqan, y tsë mirëmi llapan hipakïkunata ushakätsinan karqan (Gén. 3:15; Heb. 2:14-17; 1 Juan 3:8).

7. Éxodo 3:14 textochö Jehová kikin imanö kanqanta rikätsikunqanqa, ¿imatataq yachatsimantsik?

⁷ Awmi, munënin rurakänampaq huknöpa patsätsita puëdenqantaqa Jehová rikätsikushqam. Kikin imanö kanqantam rikätsikurqan Moisesta ruranampaq kaqta mandanqanchö. Pero Moises imanir rurëta mana puëdenqanta niptinmi, Jehová kënö nirqan: “‘Noqaqa munanqämi kashaq’. Tsëpitanam nirqan: ‘Israelpa tsurinkunatam këta ninëki: “Noqaqa munanqämi kashaq qamkunaman kachamashqa”’” (Éxo. 3:14). Kikimpaq kënö parlarmi, Jehoväqa rikätsikurqan llapan munëninta cumplinampaq imëkamampis tikranqanta. Apóstol Pablum këpita shumaq yachatsikurqan Romanos capítulo 11 ninqanchö, tsëchömi huk olïvopaq parlarqan. Ciëlochö o Patsachö kawanantsik kaptimpis, kë igualatsikïpita alli yachakunantsikqa alläpa allim, tsëqa yanapamäshun Jehová alläpa yachaq kanqampita más musyanapaqmi.

Jehoväpa munënin y Awnikushqan Mirë

8, 9. a) Olivo igualatsikïpita masllata musyanapaq, ¿ima chusku yachatsikïkunataq yanapamäshun? b) ¿Ima tapukïpa respuestantaraq rikäshun, y imatataq Jehoväpita yachatsimantsik?

⁸ Olïvopaq parlashqanta alleq musyëta munarqa, Awnikushqan Mirëwan Jehová munëninta ruranampaq kaqtam kë chuskun yachatsikïkunawan puntata rikärishun. Huk kaqqa, Diosnintsik Abrahanta kënö nir awninqanmi: “Mirënikiwanmi patsachö llapan nacionkuna bendecishqa kayanqa” (Gén. 22:17, 18). Ishkë kaqqa, Abrahanpa mirëninta o Israel markata “sacerdote marka” kayänampaq Jehová awninqanmi (Éxo. 19:5, 6). Kima kaqnam, israelïtakuna Mesïasta mana chaskiyanqanrëkur “sacerdote marka” kayänampaq Dios huknöpa patsäratsinqan (Mat. 21:43; Rom. 9:27-29). Y chusku kaqnam, Jesus Abrahanpa más precisaq mirënin kaptimpis, tsë mirëman wakin nunakunapis yëkuyänampaq Jehová ruranqan (Gal. 3:16, 29).

⁹ Hina këta maslla tanteanapaqmi, Apocalipsis librochö willamantsik 144.000 nunakuna Jesuswan sacerdote y rey kayänampaq ciëlota ëwayanqanta (Apo. 14:1-4). Hinamampis kë librochöqa, ‘israel nunacunapa mirenincuna’ ninmi kë nunakunapaq (Apo. 7:4-8). ¿Tsëqa 144.000 nunakunaqa Israel o judío kastallatsuraq kayänan karqan? Kë tapukïpa respuestanta musyarmi, rikäshun Jehová munanqanta cumplinampaq huknöpapis munëninta patsätsinqanta. Këpita más yachakunapaqqa, Pablu Romanos librochö qellqanqanta rikärishun.

“Sacerdote marka”

10. ¿Israel markapita imataq yarqunan karqan?

¹⁰ Rikanqantsiknöpis Israel markallatam “sacerdote marka y santo nación” kanampaq Jehová akrarqan (lei Romanos 9:4, 5). Pero ¿imaraq pasanman karqan Awnikunqan Mirë chämuptin? 144.000 ciëlopaq kaqkunapis Abrahanpa mirëninlla karqa, ¿Israel nacionllapitatsuraq yarquyänan karqan?

11, 12. a) ¿Imë watataq ciëlota ëwayänampaq Diosnintsik invitakur qallarqan? ¿Llapan judïokunatsuraq tsë invitacionta chaskikuyarqan? b) ¿Imanötaq Abrahanpa mirëninta Jehová completanman karqan?

¹¹ (Lei Romanos 11:7-10.) Judïokunaqa Jesusta manam Diospa Tsurintanö chaskiyarqantsu. Tsëmi, Abrahanpa mirëninqa pëkunallapitanatsu yarqunan karqan. Tsënö kaptimpis, Pentecostés fiesta 33 watapita patsë Dios invitakur qallaptinmi, wakin judïokunalla “[ciëlochö] sacerdote marka” kayänampaq tsë invitacionninta chaskiyarqan. Pero llapan judío nacionpitaqa ichikllam tsë invitacionta chaskikuyarqan (Rom. 11:5).

¹² Tsëqa, Abrahanpa ‘llapan’ mirëninta ëllunampaqqa, ¿imataraq Jehová ruranaman karqan? (Rom. 11:12, 25.) Kë tapukïpa respuestanta musyanapaqqa, Pablu ninqanta rikärishun: “Diosqa manam äniquininta qonqecushqatsu. Claru parlaquichoqa manam llapan Israel casta nunacunatsu lejitimu israel nunacuna cayan. Y manam Abrahampa mirenincuna carpis, llapantsu lejitimu willcancuna cayan. Masqui queta  cäyishun [...]. Tsenoqa nican Abrahampa mirenin carpis Diospa rasonpa wamrancuna mana cayanqantam, antis Diospa rasonpa wamrancunaqa cayan Dios änicushqanman marcäcoq caqcunallam” (Rom. 9:6-8). Këchö rikanqantsiknömi, ciëlopaq kaqkunaqa manam Israel nacionpitaraqtsu kayänan karqan.

Olïvowan igualatsikï

13. a) Olivo nirqa, ¿imapaqtaq parlëkan? b) ¿Pitaq watsinqa? c) ¿Pitaq tita kaq tullunqa? d) ¿Y pikunataq rämankunaqa kayan?

¹³ Pabluqa Abrahanpa mirënintam igualatsin chakrachö winashqa olïvopa rämantawan (Rom. 11:21). * Kë olïvoqa, Jehová Abrahanwan contrato ruranqanta cumplikanqantam rikätsikun. Kë olïvopa matsun o watsinqa Jehovämi, y pëmi mushoq kaq Israelta kawënin qon (Isa. 10:20; Rom. 11:16). Jesusnam tita kaq tullun, pëmi Abrahanpa más principal mirëninqa. Y rämankunanam ciëlota ‘llapan’ ëwaqkuna kayan.

14, 15. ¿Pikunataq kayan chakrachö olïvopa “muturishqa” räman cuenta, y pikunataq injertashqa rämankuna kayan?

¹⁴ Olïvowan igualatsikïchöqa, judïokunataqa “muturishqa” rämankunatawanmi igualatsin, montempita “muturishqa” karmi Abrahanpa mirëninnatsu kayan (Rom. 11:17). ¿Pikunaraq rantinkuna yëkuyänan karqan? Judïokuna Abrahanpa kastampita karnin pëkunalla nunatukuyaptimpis, mana imëpis pensayanqan nunakunam rantinkuna yëkuyänan karqan. Pero Bautizakoq Juanqa pëkunata unëpitanam willashqa karqan, Jehová munarqa rumikunapitapis Abrahanpa mirëninta yuritsinampaq kaqta (Luc. 3:8).

¹⁵ Tsëqa, ¿imataraq Jehová rurarqan munënin rurakänampaq? Pablu ninqannömi, chakrachö winashqa olïvopa muturishqa rämankunapa rantin lluta winakoq olïvopa rämankunata Jehová injertarirqan (lei Romanos 11:17, 18). Kë texto ninqannömi tukï nacionpita ciëlopaq cristiänokuna, hasta Roma congregacionpita mana judío  kaqkunapis olivo monteman injertakäyarqan. Tsënöpam Abrahanpa mirënin këman chäyarqan. Lluta winakoq olivo cuenta karnin, puntallapitana Abrahanpa kastanman mana yëkïta puëdeyaptimpis, Jehoväqa invitarqanmi mushoq Israel këman chäyänampaq (Rom. 2:28, 29).

16. ¿Imanö huk mushoq nación yurinqantataq Pedru yachatsikurqan?

¹⁶ Mushoq israelïtakunachöqa mana judío kaqkunapis kayarqanmi, pëkunaman apóstol Pedru cartakurmi këta yachatsikurqan: “Noqantsic creyicoqcunapaqqa allapa baleq ruminomi Jesucristu quecan; peru mana creyicoqcunapaqqa Diosnintsicpa palabranmi queno nican: ‘Wayi perqaqcuna “Manam allitsu que rumeqa” nir, jitariyanqanmi, cananqa mayestra rumino churacärishqa quecan’ nir. Y quenopis nicanmi: ‘Tse rumichomi trompisayanqa’ nishpa [...]. Peru noqantsictaqa Diosnintsic acramarqantsic pe mandacoqta sirwinantsicpaqmi, y pellapaqna canantsicpaqmi. Tsemi Diosnintsic alli rurashqancunata willacunantsic. Pemi jorqamarqantsic paqaschono quecashqantsicpita, actsichonona alli cawanantsicpaq. Nopataqa manam Diospatsu carqantsic; cananmi si pepana quecantsic. Nopataqa Diosnintsic manam ancupämarqantsictsu; peru cananqa ancupämantsicnam” (1 Ped. 2:7-10).

17. ¿Imanirtaq nintsik, olivo murukoqkuna rurayanqannö Jehová ruranqanta?

¹⁷ Jehoväqa mana pipis pensanqantam rurarirqan. Pablum këta yachatsikun olivo murukoqkuna tsënö mana rurana këkaptimpis rurayanqanwan (Rom. 11:24). ¿Imanirtaq këta nintsik? Alli olïvopa tullunmanqa, manam lluta winakoq olïvopa rämantaqa injertayanllatsu. (Pero tsë witsan wakin nunakunaqa tsëtash rurayaq.) * Tsënöllam hina Diospis rurarqan. Judío kaqkuna, mana judío kaqkunata mana alli wayoq montetanö rikäyaptimpis, Jehoväqa alli wayoq huk mushoq nación kayänampaqmi qayarqan (Mat. 21:43). 36 watachömi Corneliu shutiyoq mana judío nuna, cristiano këman chärir santo espïrituta chaskirqan. Tsëpita patsëmi, huk näni cuenta kichakärirqan  mana judío kaqkunapis tsë alli olïvoman injertakäyänampaq (Hech. 10:44-48). *

18. 36 wata ushariptimpis, ¿ima rurëtataq Israel nunakuna puëdeyarqan?

¹⁸ Tsëqa, 36 wata ushariptin, ¿mananatsuraq mëqan judïokunapis yëkuyanmanna karqan Abrahanpa mirënin kayänampaq? Yëkïta puëdeyanmanraqmi karqan. Tsëpaqmi Pablu kënö nin: “Jesucristuman creyiquicuyaptenqa, israel nunacunata Dios yapemi troncunman laqarcoq cuenta cutircatsenqa. Porqui Diosqa puedeq queninwanmi tseta rurarita puedin. Sitsun qamcuna imeca juc lluta olibuspa räman cuentalla quecar, alli caq olibus plantaman laqacashqalla quecayanqui; tsetsuraq israel caqcunatanäqa alli caq olibuspa lejitimu räman quecayaptin mas aleri quiquinpa troncunman laqarcunman” (Rom. 11:23, 24). *

Llapan Israelmi salvakunqa

19, 20. Olïvowan igualatsikïchö rikanqantsiknö, ¿imatataq Jehová ruran?

¹⁹ Awmi, “rasonpa israel” nunankunapaq Jehová munanqanqa shumaqmi cumplikëkan (Gal. 6:16). Pablu ninqannömi “llapan israel [...] salbacuyanqa” (Rom. 11:26). Jehová patsätsinqan hora chäramuptinmi, “llapan Israel” o llapan akrashqakuna ciëlochö rurëninkunata rurayanqa. Awmi, reykunanö y sacerdötekunanömi serviyanqa. ¡Manam pipis ni imapis Jehová munëninta ruranampaqqa michanqatsu!

²⁰ Jesucristu y 144.000 Abrahanpa ‘mirëninrekurmi’, ‘jinantin munducho mana israel nunacuna’ atska bendicionta chaskiyanqa, tsënöpam Diospa awnikïnin cumplikanqa (Rom. 11:12; Gén. 22:18). Rikanqantsiknömi, Diospa llapan markan kë bendicionkunataqa chaskinqa. Awmi, Jehoväpa munënin cumplikaqta rikarmi, noqantsikpis kushishqa kënö nintsik: “¡Diosqa imalaya allim, imalaya yachaqmi y imalaya allipa cäyicoqmi! Llapantam cäyin” (Rom. 11:33).

[Päginapa ura kuchunchö willakïkuna]

¿Yachakurquntsikku?

• Jehová munëninta imanö ruranqampita, ¿imatataq yachakuntsik?

• Romanos 11 capïtulonchö, ¿ima ninantaq . . .

olivo?

watsin o matsun?

tita kaq tullun?

rämankuna?

• ¿Imanirtaq nintsik, olivo murukoqkuna tsënö mana rurana këkaptimpis rurayanqannömi Jehoväqa rurarqan?

[Yachakunapaq kaqpa tapukïninkuna]

[26 kaq päginachö dibüju y recuadru]

 ¿Imapaqtaq lluta olïvopa rämankunata injertayanman?

▪ Römapita Lucio Junio Moderato Columela shutiyoq nunaqa, soldado y cristiänokuna kawayanqan witsan chakrachö trabajaq nunam karqan, y chunka ishkë La labranza qellqanqan libronkunapitam reqishqa karqan.

Pitsqa kaq libronchömi unë versopaq kënö parlan: “Olïvonta uryapaqqa wayunantam mañëkan, wanun hichaq nunaqa wayunampaqmi rogakïkan; y rämankunata mutoqqa wayunampaqmi obliguëkan”.

Tsëpitanam kënö nin: “Wakin montekuna shumaq moqllallëkarpis o lataykarpis, manam wayuyantsu. Këkunataqa allim huk taladrowan uchkurir, uchkunman lluta olïvopa rämankunata chachaq watarkunantsik. Tsënöpam, kë rama laqakärir kë montita más wayutsinqa”.

[25 kaq päginachö dibüju]

¿Käyintsikku o musyantsikku olïvowan igualatsikïta?