Jesus kawanqan
Jesus kawanqan
“Noqapa miquinïqa cachamaqnïpa munenincunata ruranämi y llapan mandamashqancunata cumplinämi.” (JUAN 4:34.)
¿IMANIRTAQ Jesus tsënö nirqan? Qepanchö y puntanchö këkaq textokunam más musyanapaq yanapamäshun. Jesusqa qateqninkunawanmi Samaria hirkakunapa qoyapita patsë yachatsikuyarqan (Juan 4:6). Y Jesus mallaqanqanta pensarmi imallatapis mikurinampaq qateqninkuna niyarqan (Juan 4:31-33). Tsëmi qallanan textochö contestanqanwan Jesus rikätsikurqan imapaq kawanqantapis. Pëpaqqa, mikunqampitapis más precisaqqa karqan Dios mandanqanta rurëmi. Parlanqankunawan y ruranqankunawanmi rikätsikurqan Dios munanqannö kawanqanta. ¿Imakunatataq rurarqan? Rikärishun.
▪ Diospa Gobiernompitam yachatsikurqan. Bibliam kënö nir willamantsik: “Tsepitanam Galilea probinsiacho jinantin marcacunapa purirnin, [...] Jesus yachatsicorqan Diospa Munenincho canapaq alli willaquicunata” (Mateo 4:23). Rikanqantsiknömi, pëqa manam llutallatsu nunakunata yachatseq, sinöqa Diospa Palabran ninqannömi kë Gobierno ima kanqantapis alli yachatsikoq.
Jesusqa qateqninkunata allim willarqan Diospa Gobiernon ima kanqanta y imakunata ruranantapis. Qateqnin pärrafokunachö rikärishun Jesuspa wakin yachatsikïninkunata y mëqan textokunachö kanqantapis.
▪ Diospa Gobiernonqa ciëlochömi, y Jesustam Jehová akrashqa Rey kanampaq (MATEO 4:17; JUAN 18:36).
▪ Kë Gobiernoqa Diospa shutintam respetatsinqa y Diospa munënintam ciëlochönölla kë Patsachöpis ruratsimunqa (MATEO 6:9, 10).
▪ Diospa Gobiernonchöqa llapan Patsam huk shumaq paraïsoman tikranqa (LUCAS 23:42, 43).
▪ Diospa Gobiernonqa ichikllachönam chäramunqa y Patsapaq Dios munanqankunatam ruramunqa (MATEO 24:3, 7-12). *
▪ Milagrokunatam rurarqan. Jesustaqa qateqninkuna qayayaq “Mayestrullä” nirmi (Juan 13:13). Tsënö kaptimpis, kima wata pullan yachatsikunqanchö milagrokunata ruranqampitawanmi reqiyaq. ¿Imanirtaq milagrokunata rurarqan? Diospa Tsurin kanqanta rikätsikunampaq, y Gobiernonchö ruramunampaq kaqkunata rikätsikunampaqmi (Mateo 11:2-6). ¿Ima milagrokunatataq rurarqan?
▪ Lamar laqcheqsaqta y vientotam päraratsirqan (MARCOS 4:39-41).
▪ Wiskukunata, mana wiyaqkunata, cöjokunata y tukïläya qeshyayoqkunatam kachakätsirqan (▪ Milagrota rurëkurmi atskaq nunakunata mikutsirqan (MATEO 14:17-21; 15:34-38).
▪ Kima wanushqakunatam kawaritsirqan (LUCAS 7:11-15; 8:41-55; JUAN 11:38-44).
¡Tsënö alli Gobiernochö kawëqa imanö shumaqraq këkunqa!
▪ Jehová imanöpis kanqantam rikätsikurqan. ¿Diospa Tsurin Jesusnöqa piraq Jehoväpita más alli yachatsimashwan? Pëqa karqan ‘llapan kamashqankunapa punta kaq’ Tsurinmi, tsëmi wakin angelkunapitapis más watakuna Diosnintsikwan kawarqan (Colosenses 1:15, QKW). Tsëchömi yachakurqan Teytampa munënin ima kanqantapis, y musyarqanchi ruranqankunata, pensanqankunata y imanö kanqantapis.
Rasuntachi Jesus kënö nirqan: “Dios Yayallam noqata reqiman, y noqallam Dios Yayäta reqï y noqa reqitsiptïllam waquincunapis Dios Yayata reqiyanqa” (Lucas 10:22). Jesusqa nunakunata Teytampita yachatsita alläpam munaq, y kushikoqmi tsëta rurar. Rasun kaqchöqa, manam pipis pënöqa yachaq karqantsu, pëqa ciëlochömi Teytampita tukïta yachakurqan (Juan 8:28).
Y nunakunataqa, Teytampita yachakunqankunatam fäcil-lla y kawëninkunachö rurayänampaqnölla yachatsirqan.
Jehová imanö kanqantapis musyanapaq, ¿imanötaq Jesus yachatsikurqan?
▪ Jesusqa alleqmi yachatsikurqan Jehová pï kanqanta, shutinta, munëninta y rurënintapis (JUAN 3:16; 17:6, 26).
▪ Rurëninkunawanmi Jesus rikätsikurqan Diosnintsik alläpa alli kanqanta. Jesusqa huk espëjonömi Teytan imanö kanqantapis alleq rikätsikurqan. Këta neqnömi karqan: “Teytä imanö kanqanta musyëta munarqa, noqallata rikäyämë” (JUAN 5:19; 14:9).
Awmi, Jesus kawanqannöqa manam ni pipis kawashqatsu. Pero ¿imanirtaq wanunan karqan? Kë tapukïpa respuestanta musyanantsikqa alläpam precisan, kanan tsëpaq yachakurishun.
[Päginapa ura kuchunchö willakï]
^ par. 9 Diospa Gobiernompita y këllachöna kanqantaqa más yachakunki Rasumpëpaqa, ¿imatataq Biblia yachatsikun? libropa 8 y 9 capïtulonkunachömi, y tïtulonkunaqa kayan: “¿Imataq Diospa Reinon?” y “¿‘Ushanan tiempokunachöku’ kawëkantsik?”, kë librotaqa Jehoväpa testïgonkunam rurayämushqa.