Diospa üshankunata cuidayë

“Üshancunata cuidaqno qamcunapis Diosman creyicoqcunata cuidayë. [...] Peru ama pipis mandayäshuptiquillaqa, tseno rurayëtsu; sinoqa [...] ganas ganaslla rurayë.” (1 PED. 5:2.)

1. ¿Imanötaq cristiänokuna këkäyarqan Pedru punta kaq cartanta qellqanqan witsan?

APÓSTOL Pedru punta kaq cartanta qellqanqan witsanqa, ichikllanam pishirqan mandakoq Nerón Römachö cristiänokunata imëkata rurar qatikachänampaq. Diablu imëka león cuenta cristiänokunata ushakätsita munaptinmi, Pëdruqa wawqinkunata y paninkunata Jehoväman más markäkuyänampaq o yärakuyänampä yanapëta munarqan. Tsarakuyänampaqqa ‘alli pensenincunawan cabal nunanam’ kayänan karqan, y “puedeq Diosman” humillakuyänanmi alläpa precisarqan (1 Ped. 5:6, 8). Hinamampis huk shonqullam kayänan karqan. Manam “quiqui[ncuna] pura jaqchinacur pelyar micunacur” kakïkäyänantsu karqan. Tsënö karqa ‘waqtsacarmi ushacäriyanman’ karqan (Gal. 5:15).

2, 3. ¿Pitataq chikinantsik, y ima tapukïkunapa respuestantataq yachakushun kë yachatsikïchö y qateqnin kaqchö?

² Kanan witsampis tsënöllam pasan. Diabluqa tukïnöpam ushakäratsimënintsikta munëkan (Apo. 12:12). Hinamampis, “allapa jipaquimi [ichikllachöna] canqa. Tseno jipaqueqa manam imepis cashqaraqtsu que patsa camacashqanpita” patsë (Mat. 24:21). Punta cristiänokunanömi noqantsikpis kikintsik puraqa chikinakunantsiktsu. Y tsënö mana chikinakunapaqqa anciänokuna yanapamänantsiktam wanantsik.

³ ¿Imaraq anciänokunata yanapanqa ‘Diosman creyicoqcunata cuidayänampaq’ cargota chaskiyanqanta precisaqpaq churayänampaq? (1 Ped. 5:2.) ¿Imanötaq tsë cargonkunata cumpliyänan? Kë ishkan tapukïkunapitam kë estudiochö yachakushun. Y huknin kaq yachatsikïchönam rikäshun, “yachatsiyäshoqniquicunata [“dirigiyäshoqninkikunata”, NM] estimecuyän[qui]” neq consëjota llapan cristiänokuna imanöpis wiyakunapaq kaqta (1 Tes. 5:12). Këkunata yachakunqantsikmi yanapamäshun chikimaqnintsikpa makinman mana ishkinapaq, y cristiano mayintsikkunata chikinapa rantin Diablupa contran churakänapaq (Efe. 6:12).

“Diosman creyicoqcunata cuidayë”

4, 5. ¿Imanötaq Diospa üshankunata anciänokuna rikäyänan? Huk igualatsikïwan yachatsikarami.

⁴ Apóstol Pëdruqa, unë witsan kaq anciänokunatam nirqan Diosnintsikpa üshan cuenta cristiänokunata shumaq rikäyänampaq (lei 1 Pedru 5:1, 2). Kë textochö rikanqantsiknöpis, Pedru llapan congregacionkunata dirigirnimpis, manam precisaq kanqantatsu rikätsikurqan cartanta qellqarnin, antis wakin anciänokunanölla kanqantam rikätsikurqan (Gal. 2:9). Hina tsënöllam Jehoväpa Testïgonkunata Pushaqkunapis llapan anciänokunata niyan Diospa üshan cuenta cristiänokunata shumaq cuidayänampaq.

⁵ Pëdruqa anciänokunatam nirqan cargonchö këkaq cristiänokuna Diospa ‘üshancuna’ kayanqanta. Yarpäyänanmi karqan tsë üshakunaqa Jehoväpawan Jesuspa kanqanta, y imanöpis atiendiyanqampita cuentata qoyänampaq kaqta. Këman pensarishun: huk amïgontsik karuta viajarnin wambrankunata umpakamashwan o paytakamashwan. Tsëqa, ¿manatsuraq shumaq cuidapushwan y mikïnimpis qarashwan? Y mëqanllapis qeshyaptinqa, ¿manatsuraq tsë hora hampitsishwan? Hina tsënöllam anciänokunapis musyayan ‘Jesucristupa yawarninpa chaninwan’ Dios rantinqan congregacionta cargonchö katsiyanqanta (Hech. 20:28). Manam qonqayantsu Diospa üshankunaqa Jesucristupa yawarninwan  rantishqa kayanqanta. Y cuentata qoyänampaq kaqta musyarmi alli qarayan, imëkapita tsapäyan y cuidayan.

6. ¿Imakunatataq rurayaq üshankunarëkur unë witsan mitsikoqkuna?

⁶ Anciänokunapa rurëninkunaqa, unë witsan mitsikoqkunapa rurëninkunanömi. Pëkunaqa achachëchö y alalëchömi hipayaq üshankunata mitsirnin (Gén. 31:40). Höraqa üshankunarëkurmi kawëninkunatapis peligroman churayaq. Tsënömi David rurarqan, joven këkarmi leonpa y ösopa shimimpitana üshankunata salvarqan. Tsëpaq parlarmi huk kuti kënö willakurqan: “Shimimpita tsarirkurmi nitirkur wanuratsirqä” (1 Sam. 17:34, 35). ¡Imanö valoryoqraq karqan mantsëpaq animalkunawan peleanampaqqa! Clärom këkan, üshankunata salvananrëkurqa manam ni imatapis mantsaqtsu.

7. ¿Imatataq anciänokuna rurayan huk üsha Satanaspa makinman ishkiptinqa?

⁷ Hina tsënöllam kanan witsan anciänokunapis mäkoq mäkoqlla këkäyan üshakunata Satanás imamampis ishkitsinampita. Mëqan üshapis kë mallaqashqa leonpa shiminman ishkiptinqa, Davidnömi mana mantsashpa salvëta tïrayan. Y mëqan cristiänotapis Satanaspa toqllanman ishkinaqtanöna rikarqa, hinan höram cuentata qokunampaq yanapayan (lei Judas 22, 23). Y mëqan üshapis pakikushqa cuenta këkaptinqa, herïdanta shumaq wataqnö y hampin hichapoqnömi Diospa Palabranwan yanapariyan. Pero musyanqantsiknöpis, manam tsëkuna rurëta puëdeyanmantsu Jehová mana yanapaptinqa.

8. ¿Mëmantaq anciänokuna üshakunata pushayan y imanötaq tsëta rurayan?

⁸ Imanömi mitsikoqkunapis üshankunata verderaq pastokunaman y yaku kanqankunaman pushayaq, tsënöllam anciänokunapis cristiänokunata congregacionman pushayan. ¿Imanötaq tsëta rurayan? Reunionkunaman mana haqita ëwayänampaq shumaq parlaparnin, tsënöpa tsëchö “miquinincuna örancho” chaskir sinchi kayänampaq (Mat. 24:45). Hinamampis, tiemponkunatam rakiyan Diospa kaqchö qeshyëkaq cuenta këkaqkunata yanapayänampaq y Diospa Palabrampita imëpis yachakïta mana haqiyänampaq. Y, ¿imatataq rurayan waqtsakashqa üsha congregacionman kutimïta munaptinqa? Mantsakätsiyänampa rantinmi kuyëpa tratayan, y rikätsiyan  Biblia ninqanta kawëninkunachö imanöpis rurayänampaq kaqta.

9, 10. ¿Imanöraq anciänokuna yanapayanman Diospa kaqchö qeshyëkaq cuenta këkaqkunata?

⁹ Qeshyarninqa, ¿doctor imanö atiendemänatataq munantsik? ¿Hukta atiendenanrëkur shumaq manaraq wiyamarnintsik raslla ima hampiwampis kachakänapaq nimaqnintsik doctortaku? O, ¿shumaq wiyaramarnintsik imawan qeshyanqantsikta y imanö kachakänapaq willamaqnintsik doctortaku? Clärom këkan mëqanta akranapaq kaqtapis.

¹⁰ Kë igualatsikïchöqa alläpa shumaq yachatsikïmi anciänokunapaq kan. Diospa kaqchö qeshyëkaq cuenta cristiänota yanapayänampaqqa, shumaqmi wiyayänan y Diospa kaqchö saludnin alliyänampaqmi “ Jehoväpa “jutincho aseitiwan llushi[yänan]” (lei Santiagu 5:14, 15). Tsënöpam, Diospa Palabrampita consëjokunawan yamë këta tarinqa imëka Galaadpita aceitewan llushishqa cuenta (Jer. 8:22; Eze. 34:16). Tsë qeshyëkaq nuna Biblia ninqanta wiyakurqa, rasllam Diospa kaqchö sinchiyärinqa. Anciänokuna üshakunata wiyayanqan y pëkunawan Diosman mañakuyanqanqa, ¡alläpa allim!

‘Ama pipis mandayäshuptiquillaqa, sinoqa ganas ganaslla rurayë’

11. ¿Imataq anciänokunata yanapan cristiano mayinkunata gänas gänaslla shumaq serviyänampaq?

¹¹ Hina Pëdruqa congregacionchö anciänokunata nirqanmi Diospa üshankunata mitsir imata rurayänampaq kaqta y imata mana rurayänampaq kaqtapis. Puntataqa, “ama pipis mandayäshuptiquillaqa, tseno rurayëtsu; sinoqa [...] ganas ganaslla rurayë” nirqanmi. ¿Imataq anciänokunata yanapanman cristiano mayinkunata gänas gänaslla shumaq serviyänampaq? Këman pensarishun, ¿imataq Pëdruta yanaparqan Jesuspa ushankunata alli mikutsir mitsinampaq? Llapampitapis masqa Jesusta shonqumpita patsë kuyanqanmi (Juan 21:15-17). Kuyakoq karmi anciänokunapis ‘kikinkunapaq kawayannatsu, sinowqa peykunareykur wanoqpaq’ (2 Cor. 5:14, 15, QKW). Diosta, Jesusta y cristiano mayinkunata kuyarmi kallpankunawan, kayäpunqankunawan y tiemponkunawan Diospa üshakunata serviyan (Mat. 22:37-39). Y tsëkunataqa kushishqam rurayan, manam mana munëkartsu.

12. ¿Imanötaq cristiano mayinkunata Pablu servirqan?

¹² ¿Ima mastataq anciänokuna rurayan Diospa ushankunarëkur? Apóstol Pablupis Jesusta qatirmi Diospa üshankunata shumaq cuidarqan, y tsënöllam kanan witsan anciänokunapis rurayan (1 Cor. 11:1). Pabluwan yanaqinkunaqa alläpam kuyayaq Tesalónica markachö täraq cristiano mayinkunata, tsëmi kënö nirqan: “Teyta Diospa alli willaquininllatatsu willayarqoq; qamcunarecorqa asta wanurpis wanuriyämanmi carqan”. Y shumaq kuyakïpam imëpis cristiano mayinkunata tratayarqan “imeca juc mamä wamrancunata cuidaqno” (1 Tes. 2:7, 8). Pablu ninqannöpis, huk mamaqa llullunta alläpam kuyan y tsëmi përëkur imëkatapis ruran, hasta pullan paqaspis shärikurirmi llullunta chichirin.

13. ¿Ima ishkë cargonkunatataq anciänokuna igualpa cumpliyänan?

¹³ Tsënö karpis, anciänokunaqa congregacionchö cargonkunata rikäyanqannöllam familiankunatapis rikäyanman (1 Tim. 5:8). Ama qonqashuntsu familiankunawan kayänampaq kaq tiemponkunata congregacionta qoyanqanta. Ishkan cargonkunata shumaq cumpliyänampaqqa yanapanqa, Familiachö Diosta Adorayänan Höraman cristiano mayinkunata invitayanqanmi. Tsëtam Japonchö yachaq Masanaowan familian rurayan. Kë anciänoqa mëtsika watakunanam wayinman invitan soltërokunata y mana Testigo teytayoqkunata. Y tiempowanqa anciano këmanmi wakinqa chäyashqa, y Masanao ruranqannöllam rurayan.

“Ganas ganaslla rurayë, qellepaq mana erayashpa”

14, 15. ¿Imanirtaq anciänokunaqa “qëllepaq mana erayashpa” congregacionta rikäyänampaq kallpachakuyanman, y imanötaq Pablu ruranqanta qatiyanman?

¹⁴ Hina Pëdruqa anciänokunata nirqanmi Diospa üshankunata mitsirnin “ganas ganaslla ruray[änampaq], qellepaq mana erayashpa”.  Anciänokunaqa congregacionchö rurëninkuna atska kaptimpis, manam tsëpita pagayänanta shuyaräyantsu. Tsënö kaptimpis, Pëdruqa anciänokunata consejarqanmi “qellepaq mana eraya[yänampaq]”. Rasllam ishkiriyanman cargonkunapita imatapis chaskita munëman, tsëman ishkiyanqantam rikätsikuyan ‘jatun Babiloniachö’ mandakoq religiösokuna. Iglesiankunaman ëwaqkuna paqwë waktsa këkäyaptinmi, pëkunaqa tukï riqueza hananchö täräyan (Apo. 18:2, 3). Anciänokunaqa tsëman mana ishkitam tïrayänan.

¹⁵ Pablunömi kayänan. Apóstol këkarqa, Tesalönicachö cristiänokunata ‘afanarchi’ imëkata mañarnin kakunman karqan. Tsëpa rantinqa, “paqasta junaqta uryarmi” karqan, tsëmi kënö nirqan: “Manam debalditaqa imequicunatapis micucurcuyarqätsu” (2 Tes. 3:8). Hina kanan witsampis tsënöllam kayan llapan anciänokuna y superintendente viajantekunapis. Cristiano mayinkuna atiendeyänanta haqirpis, manam pëkunarëkur alläpa ‘afanacuyänantaqa’ shuyaräyantsu (1 Tes. 2:9).

16. ¿Imanötaq anciänokuna cargonkunata cumpliyanqanta rikätsikuyan?

¹⁶ Hina anciänokunaqa rurayänampaq kaqta “ganas ganaslla[m]” rurayan. Awmi, pëkunaqa kushishqam cristiano mayinkunarëkur imëkatapis rurayan. Tsënö alläpa yanapëta munarpis, manam niyantsu ni exigiyantsu wakinkunapita más alli këta tïrayänampaq (Gal. 5:26). Musyayanmi üshakunaqa llapampis hukläya kayanqanta, y Jehoväta kushishqa serviyänampaqmi yanapayan.

“Ama patronnoqa [...] antis alli ruraq cayë pecunapaq”

17, 18. a) ¿Imanirtaq apostolkunapaqpis alläpa sasaraq karqan humilde kayänan? b) ¿Imatataq yachakuntsik mana alliman ishkiyanqampita?

¹⁷ Rikanqantsiknöpis, anciänokunaqa manam qonqayänantsu üshakunaqa Jehoväpa kayanqanta. Tsënöpam, Dios ‘cuentankunaman’ churanqan üshakunata allqutsayantsu (lei 1 Pedru 5:3). Höraqa Jesuspa apostolninkunapis más precisaq këta munarmi cargota chaskita paqwë munayarqan. Itsachi tsë witsan gobernantekunanö pëkunapis puëdeq këta munayarqan (lei Marcos 10:42-45).

¹⁸ Kanan witsampis congregacionchö “mandacoq queta” o cargoyoq këta munaq cristiänoqa, imarëkur tsëta munanqantam tapukunan (1 Tim. 3:1). Hina tsënöllam anciano këman chashqana kaqkunapis shonqunkunapita patsë kënö tapukuyänan: “¿Apostolkunata pasanqannötsuraq noqatapis pasëkäman?”. Apostolkunapaqpis puëdeq këta munëman mana ishkiyänampaq tsarakuyänan sasaraq o ajaraq kashqa kaptinqa, tsënöllam pasarinman anciänokunawampis. Tsëmi, tsëman mana ishkiyänampaq alli kallpachakuyänan.

19. ¿Imatataq anciänokuna yarpäyänan üshakunata mana allipita tsapäyänanrëkur imatapis rurayänan kaptinqa?

¹⁹ Höraqa anciänokunapis mana mantsakoqmi kayänan. Y tsënömi kayänan “mallaqashqa atoq[cuna]” üshakunata ushakätsita munayaptinnäqa (Hech. 20:28-30). Hina mana mantsakoqllam kayänan apóstol Pablu Tïtuta kënö ninqanta rurayänampaqpis: “Piñapey i qayapey llapan awtoridäwan” (Titu 2:15, QKW). Pero tsëta rurayänan kaptimpis, respëtowanmi rurayänan. ¿Imanir? Pëkunaqa musyayanmi pipa shonqunmampis chäyänampaq y alliyätsiyänampaqqa, qayapëpa mana rurayänanta, sinöqa kuyëllapa.

20. ¿Imanirtaq anciänokuna Jesuspa kawënimpita yachakuyanman?

²⁰ Jesus ruranqanmi rikätsikun rurënintsikwan  yachatsikïqa alläpa yanapakunqanta. Huk anciano, Jesuspa kawëninta willakoq librokunata leirninqa, pëpita yachakurmi üshakunata kuyëpa tratëta munanqa (Juan 13:12-15). Rasun kaqchöqa, shonquntsikpis alläpam kushikurin Jesus qateqninkunata imanö yachatsinqanta leirirqa. Jesus alläpa qollmi shonqu kanqanta rikarmi, qateqninkunapis tsënö këta yachakuyarqan y ‘waquintapis mas presisaqpaq churar’ qallëkuyarqan (Fili. 2:3). Kanan witsampis Jesus imanö kawanqanqa anciänokunata yachatsinmi, pëkunapis pënö kayänampaq, tsënöpa ‘alli ruraq’ këninkunawan üshakunatapis yachatsiyänampaq.

21. ¿Ima qarëtataq anciänokuna chaskiyanqa shamoq tiempochö?

²¹ Pëdruqa tsë consejakunqanta ushanampaqmi, shamoq tiempochö imata chaskiyänampaq kaqtapis willakurqan (lei 1 Pedru 5:4). Ciëlopaq ëwaq anciänokunaqa, chaskiyanqa huk ‘premiutano gloriancho wiñepa wiñenin cawayänampaqmi’, y tsëqa kanqa ciëlochö Jesucristuwan gobernayämunampaq kaqmi. Kë Patsachö kawaqpaq kaq anciänokunaqa, Jehoväpa wakin ‘üshäncunatam’ mitseq cuenta cuidayanqa Jesus gobernamuptin (Juan 10:16). Qateqnin yachatsikïchömi rikäshun anciänokunata tukïnöpa yanapanapaq kaqta.

Yarpänapaq

• Apóstol Pedru yarpätsikunqan, ¿imanirtaq alläpa alli karqan cargonchö këkaq cristiänokunata anciänokuna shumaq tratayänampaq?

• ¿Imanötaq anciänokuna yanapayanman Diospa kaqchö qeshyëkaq cuenta cristiano mayinkunata?

• ¿Imataq anciänokunata yanapan cargonchö këkaq cristiano mayinkunata shumaq cuidayänampaq?

[Yachakunapaq kaqpa tapukïninkuna]

[23 kaq päginachö dibüju]

Unë tiempochö mitsikoqkunanöllam, kanan tiempochö anciänokunapis cargonchö këkaq cristiänokunata cuidayan