Diosqa kuyakoq kanqantam rikätsimantsik

“Tsenollam Diosnintsic alli queninwan [...] alli ruraqta ticratsimarnintsic pushamantsic wiñe caweta qoycaman[antsicpaq].” (ROM. 5:21.)

1, 2. ¿Ima ishkë qarëkunatataq nunakuna chaskiyashqa, y mëqantaq más alli kaq qarë?

AUSTRALIA nacionchö Universidad de Melbourne nishqanchö David J. Williams profesor y Bibliata traduceqmi këta nirqan: “Romänokunapa más alli qarëninkunaqa karqan, patsätsiyanqan leykunam y ley ninqanmannö kawakunapaq yachatsikuyanqankunam”. Kë nuna kënö niptimpis, kanmi huk más alli kaq qarë. Tsë qarëqa kikin Dios qaramanqantsikmi, tsë qarëninwanmi pëpa kuyëninchö kashun, salvakushun y mana wanushpa kawakïta chaskishun.

² Jehová kë qarëta qomarnintsikqa Leynin ninqanmannöllam rurarqan. Këpaqqa Romanos pitsqa kaq capïtulonchömi Pablu más yachatsikun, pero manam nunakuna leyninkuna patsätsiyanqampaqnötsu parlan. Tsëpa rantinqa kushitsimantsikmi këta willakunqanwan: “Jesucristuman creyir marcäconqantsicrecurmi  allitanopis Diosnintsic ricamarqontsic pewan shumaq cawacunantsicpaq”. Diospa qarëninta chaskikoq nunakunaqa, ¿imanötaq kë qarëta rikäyan? Jehoväpa kuyakïnintanömi, tsëmi pëkunapis tsënölla kuyayanqanta rikätsita munayan. Tsëtam Pablu y atskaq nunakunapis rurayarqan, tsëmi këta qellqarqan: “Diosnintsic qomashqantsic Santu Espiritum, Diospa cuyaquininta musyatsimantsic” (Rom. 5:1, 5).

3. ¿Ima tapukïkunatataq rurakushwan?

³ Pero ¿alläpaku precisarqan kuyakïninchö Diosnintsik tsë llapanta qarëkamänantsik? ¿Imanirtaq chaninmannö y alli kaqta qarakurqan? ¿Imatataq rurashwan chaskinapaq? Biblia këpaq ima ninqanta, y Jehoväpa kuyakïninta imanö rikätsimanqantsikta rikärishun.

Hutsata rurëkäyaptimpis Diospa kuyakïnin

4, 5. a) ¿Imakunata rurartaq Jehová kuyakïninta rikätsimarquntsik? b) ¿Ima pasakunqampaqtaq Romanos 5:12 willakun?

⁴ Jehoväqa alläpa kuyamarnintsikmi hapallan Tsurinta yanapamänantsikpaq kë Patsaman kachamurqan. Rasuntachi Pablu kënö nirqan: “Jesucristum siqa jutsa rurellacho caquicashqa noqantsicpaq wanorqan. Tsenopam musyantsic Diosqa allapa cuyamashqantsicta” (Rom. 5:8). Këwanmi musyantsik “jutsa rurellacho caquicashqa” Jesus noqantsikpaqrëkur wanunqanta. Tsëmi alläpa precisan imanöpa hutsayoq tikranqantsikta musyanantsik.

⁵ Unë pasakunqankunawanmi Pablu këpita yachatsikur qallëkurqan: “Adanmi jutsata rurecorqan, y tsenopam jutsa rure qallecorqan. Tserecurmi wani shamorqan. Tsemi que munducho llapan nunacuna jutsata rurarnin, wanuyan” (Rom. 5:12). Bibliapa wakin textokunachömi këpita más musyanapaq Diosnintsik yanapamantsik. Musyanqantsiknöpis, Jehovämi Adantawan Ëvata kamarqan y pënömi hutsannaq kayarqan. Tsëpitanam huk rurëta mana rurayänampaq mandarqan, y willarqanmi tsëta rurarninqa wanuyänampaq kaqta (Gén. 2:17). Pero punta teytantsikkunaqa Jehová mandakunqanta manam wiyakuyarqantsu, tsënöpam pëlla Ley churaq y Ciëlochö y Patsachö Autoridad kanqanta chaskiyarqantsu (Deu. 32:4, 5).

6. a) ¿Imanirtaq Adanpa tsurinkunaqa hutsata mana rurëkar wanuyänampaq yuriyarqan, y Diosnintsik Leyta qonqan yanaparqantsuraq? b) ¿Imanirtaq hutsata huk muyakoq qeshyatawan igualatsishwan?

⁶ Edén huertachö hutsaman ishkiyanqanchönam Adanpa tsurinkunaqa yuriyarqan. Tsëmi teytankunapita tukï hipakïkuna apamoq hutsata chaskiyarqan. Pero Jehoväqa manam Adanpa hutsampita wambrankunata culpatsarqantsu, hinamampis tsë witsampaqqa manam ni ima leypis karqanraqtsu (Gén. 2:17). Tsënö karpis, hutsataqa teytankunapitam chaskiyarqan. Tsëpita patsëmi wanïqa llapan nunakunachö këkarqan, y manam hutsayoq kayanqanta musyayarqantsu hasta israelïtakunata Diosnintsik Leyta qonqanyaq, tsë Leymi nunakunata rikätsirqan hutsayoq kayanqanta (lei Romanos 5:13, 14). Adanpa hutsantaqa igualaratsishwan huk muyakoq qeshyantawanmi. Huk teytapa y mamapa muyakoq qeshyanman yarpärishun. Itsa llapan wambrankunata muyayanman, pero tsënö karpis wakin wambrankunalla tsë qeshyawan qeshyayanman. Pero Adanpa hutsampitaqa manam ni mëqan tsurimpis librakashqatsu. Llapantsikmi teytantsikkunapita hutsata chaskintsik y wambrantsikkunatapis muyantsik, y tsëwanmi llapantsikpis tukïta hipantsik. ¿Imëllapis këpita librakäshuntsuraq?

¿Imatataq Jesusrëkur Dios qomarquntsik?

7, 8. ¿Imatataq chaskirquntsik Adan ruranqampita y Jesus rurayanqampita?

⁷ Kuyakoq Diosnintsikqa hutsapita horqamänapaqmi tukïta rurashqa. Pabluqa willakurqan ‘qepa caq Adanwan’ hutsapita libre këta chaskinapaq kaqtam, pëqa punta kaq Adannömi hutsannaq karqan (1 Cor. 15:45). Kanan yachakunqantsikmi rikätsimäshun kë ishkan nunakuna hukläya kayanqanta, y rurëninkunawan imata qomanqantsikta (lei Romanos 5:15, 16).

⁸ Pablum rikätsikun “Adanpa jutsan [...] Diospa  qareninwan” mana igualanqanta. ¿Imatataq “Adanpa jutsan” apamurqan? Hutsata ruranqampitaqa kikinmi culpayoq karqan, tsënöpam wanunampaq condenakärirqan. Pero Pablu ninqannömi pëllatsu wanurqan, sinöqa ‘atscaq nunacunam condenacäriyarqan’. Diospa Leynin ninqannömi, Adanpa llapan hutsayoq tsurinkuna wanuyänan karqan. Tsënö kaptimpis, hutsannaq Jesus ruranqanwanmi huk alli qarëta noqantsikpaq apamushqa. ¿Ima qarëtaq tsëqa? Pablum nin: “Diosnam alli queninwan alli nunatana llapantsicta ticraratsimarqantsic, llutepa jutsasapa caquicashqapis”. Kë ruranqanwanqa, ¿imataraq shamoq tiempokunachö tarishun? Pablum kënö willakun: “Jesucristupa alli rureninrecurna llapan nunacunata alli nunatanona Dios ticratsimantsic wiñepa cawacunantsicpaq” (Rom. 5:18).

9. Romanos 5:16, 18 texto ninqannö, ¿imanötaq “alli nunatanona Dios ticratsimantsic”?

⁹ ¿Ima ninantaq “alli nunatanonam Diosnintsik ticratsimantsic” ninqanqa? Punta kaq pärrafochö Bibliata traduceq nunapaq parlanqantsikmi këta qellqarqan: “Juezkuna rurayanqantanömi këchöqa igualëkätsin. Manam nunapa shonqun cambianqantatsu rikätsikun, sinöqa Diospa rikëninchö imanöpis këkanqantam [...]. Kë yachatsikïchöqa Diosmi juez cuenta këkan, y hutsa ruraq nunanam hutsanrëkur Dios juzgananta shuyaran, pero Diosqa llapan hutsankunapitam librarin”.

10. ¿Imatataq Jesus rurarqan llapan nunakunata alli nunakunatanöna Jehová rikänampaq?

¹⁰ ¿Allitsuraq “llapan patsapa Juezninqa” hutsayoq nunata hutsa ruranqampita libranqan? (Gén. 18:25.) Tsëtaqa ruran hatun kuyakïninchö hapallan Tsurinta kë Patsaman kachamurmi, tsënöpa pëwan alli këta tarinapaq. Jesusqa hutsaman ishkitsita munëkäyaptin, ankupëpaq o llakipëpaq burlakïkäyaptin y tukïta rurëkäyaptimpis, Teytan llapan munanqantam rurarqan. Qeruchö wanutsiyanqanyaqmi tsarakurqan (Heb. 2:10). Tsënöpam, hutsannaq kawëninwan Adanpa tsurinkunata hutsapita y wanïpita librarqan (Mat. 20:28; Rom. 5:6-8).

11. ¿Pipa kawëninllataq Adanpa hutsannaq kawëninman igualarqan?

¹¹ Huk textochöqa Jesus ruranqampaqmi “pägacurgan” nin Pablu (1 Tim. 2:6, NTCN). ¿Imapitataq pagakurqan y ëkataq chanin karqan? Pasaq publicacionkunachömi nirqan, hutsallakurmi Adanqa hutsatawan wanïta tsurinkunapaq apamurqan. Hina nirqanmi Jesus hutsannaq këkarqa, itsa atska waranqa millón hutsannaq tsurinkuna kanman karqan. Tsëman yarpëkurmi, Jesuspa y hutsannaq tsurinkunapa kawëninqa tinkunmanmi karqan Adanta y hutsayoq tsurinkunata salvayänampaq nirqan. * Pero ¿Biblia parlanku Cristupa hutsannaq tsurinkunapis salvamänantsikpaq kaqta? Manam. Romanos 5:15-19 textom rikätsimantsik ‘Jesucristulla’ salvamanqantsikta. Këchö rikanqantsiknömi, Jesuspa hutsannaq kawëninlla Adanpa hutsannaq kawëninman igualarqan. Awmi, Jesucristullam kë llapanta rurarqan. ‘Jesucristupa alli rurenincunarecurllam’ llapan  nunakuna ‘Diospa qarenin’ kawëtaqa chaskiyarqan (2 Cor. 5:14, 15; 1 Ped. 3:18). Tsënö kaptinqa, ¿imanötaq Jesucristupa wanïninwan Dios libramantsik?

Jesusmi hutsapita libramarquntsik

12, 13. ¿Alli rurëninkunarëkurku nunakunata Diosnintsik hutsapita librarqan?

¹² Jehoväqa Tsurimpa wanïnimpa chanintam chaskirqan (Heb. 9:24; 10:10, 12). Tsënö kaptimpis, ¿imanötaq Cristupa qateqninkunaqa Diospa rikënimpaq kë Patsachö këkäyarqan? Apostolninkunawan llapan nunakunaqa hutsayoqllam këkäyarqan. Alli kaqta rurëta munarnimpis, manam puëdeyaqllatsu. ¿Imanir? Hutsata chaskishqa karninmi (Rom. 7:18-20). Pero tsënö këkaptimpis, Diosqa altsëta puëderqanmi. Jesus wanunqampa chaninta chaskirmi sirveqninkunata hutsapita librarqan.

¹³ Jehoväqa manam alli rurëninkunallapitatsu apostolkunata ni wakin nunakunatapis wambrampa chaninwan librarqan. Tsëpa rantinqa, tsëtaqa rurarqan kuyakïnin y ankupäkïnin o llakipäkuynin alläpa hatun kaptinmi. Jehoväqa kikin munarmi Adanpa tsurinkunata hutsapita librarqan, y alli nunakunatanöna rikarnin qallëkurqan. Tsëmi Pablu kënö nirqan: “Alli queninwan[mi] Teyta Diosnintsic marcäcuriyaptiquilla salbecuyäshorqonqui, y manam cuestayäshorqonquitsu, Diosnintsicpa qareninlla car” (Efe. 2:8).

14, 15. ¿Ima këmantaq chäyänan karqan Jehoväpa qarëninta chaskikoqkunaqa, pero tsëpaqqa imataraq rurayänan karqan?

¹⁴ ¡Imanö shumaq qarëtam llapan puëdeq Diosnintsik qomantsik hutsapita perdonamarnintsikqa! Awmi, manaraq cristiano karnin hutsa rurayanqankunata llapampata yupashqaqa, mëtsikaraq këkunman. Pero Jesus wanunqanrëkurmi llapan hutsantsikkunapita Dios perdonamashqantsik. Pablu këchö ninqannömi: “Peru Diosnam alli queninwan alli nunatana llapantsicta ticraratsimarqantsic, llutepa jutsasapa caquicashqapis” (Rom. 5:16). Awmi, apostolkunata y wakin nunakunata allitana Jehová tikratsishqa kaptimpis, pëllatam llapan markäkïninkunawan o yärakuyninkunawan imëpis adorëkäyänan. Tsëqa, ¿imataraq shamoq tiempochö chaskiyanqa? “Mas alliran reynayanqa kaweychow japallan Jesukristupa, atska grasyata [...] i qarey justisyata” chaskeqkuna. Adan haqipamanqantsik herenciaqa Jehoväpa qarëninwan manam igualantsu. Adan haqipamanqantsikqa wanïmanmi apamantsik, pero Jehoväpa qarëninqa kawëmanmi apamantsik (Rom. 5:17, QKW; lei Lucas 22:28-30).

¹⁵ Diospa qarëninta chaskeqkunaqa Diospa tsurin këmanmi chäyan. Jesuswanmi ciëlopita paqta gobernayämunqa, y tsëpaqqa wanurirmi espïritullana kawariyanqa (lei Romanos 8:15-17, 23).

Wakin nunakunatapis Diosqa kuyanqantam rikätsin

16. ¿Ima qarëtataq chaskiyanqa Cristuwan mana gobernaqpaq kaq cristiänokuna?

¹⁶ Pero manam llapantsu shonqupita patsë Diosta sirveqkuna ciëlochö Cristuwan gobernayämunqa. Diosnintsikta unë sirveq nunakunanöllam, kanampis atskaq nunakuna shuyaräyan kë Patsachö kawëta. Hutsannaqtanöna rikarnin, ¿Jehová awnishqanatsuraq kë Patsachö kawakuyänampaq? Awmi, tsëtam Pablu romänokunaman qellqanqanchö rikätsikurqan.

17, 18. a) Markäkunqanrëkur, ¿imatataq Abrahan chaskirqan? b) ¿Imanirtaq Abrahanta alli nunatanö Jehová rikarqan?

¹⁷ Pabluqa huk alli nunapaqmi parlan. Tsë nunaqa Abrahanmi, pëqa kawarqan israelïtakunata Jehová manaraq Leyta qoptinmi y ciëlota ëwayänampaq Jesus nänita manaraq kichaptinmi (Heb. 10:19, 20). Pablum nin: “Manam leycunata cumplenqanrecurtsu Abrahamta y mirenincunata Dios änerqan enteru patsata erensiatano qoycunanpaq, sinoqa alli cawacurnin änishqanman marcäcuyaptinllam” (Rom. 4:13; Sant. 2:23, 24). Rikanqantsiknömi, Diosqa Abrahanta alli nunatanöna rikarqan (lei Romanos 4:20-22).

¹⁸ Tsëwanqa manam Abrahan hutsata mana ruraq kanqantatsu rikätsikïkarqan. Manam tsëpaqtsu parlëkarqan (Rom. 3:10, 23). Sinöqa, llapanta rikaq Jehoväqa markäkïninta y  llapan alli rurënintam rikëkarqan. Abrahanqa markäkurqanmi kastampita huk salvakoq yurinanman. Tsë mirëqa Akrashqa Cristum karqan (Gén. 15:6; 22:15-18). Cristu Jesuspa wanïnimpa chaninwanmi, llapan Patsapa Juezninqa Abrahanpa y unë sirveqninkunapa hutsankunata perdonashqa, tsënöpam shamoq tiempochö kawariyämunqa (lei Romanos 3:24, 25; Sal. 32:1, 2).

Kanampis Diosnintsikqa alli nunatanömi rikämantsik

19. ¿Abrahan imanö reqishqa kanqantaq kanan cristiänokunata kushitsin?

¹⁹ Diosnintsik kuyakïninchö Abrahanta alli nunatanö rikanqanqa noqantsiktapis kushitsimantsikmi. Jehoväqa manam Ciëlochö Cristuwan gobernamoq kaqkunatanötsu Abrahanta rikarqan. Tsë wallkaqlla cristiänokunaqa ‘Jesucristupa acrashqancunam’ kayarqan, y pëkunaqa “Diospa wamrancunanam cayan” (Rom. 1:7; 8:14, 17, 33). Pero Abrahanqa Diospa amïgon këmanmi charqan, y tsëqa karqan Cristu noqantsikrëkur manaraq wanuptinmi (Sant. 2:23; Isa. 41:8). Tsëqa, ¿kë Patsachö täraqpaq kaq nunakuna imanö reqishqaraq kayanqa?

20. Abrahannöpis, ¿imatataq kanan tiempo nunakuna rurayänan Diosnintsik alli nunatanöna rikänampaq?

²⁰ Kë cristiänokuna Jesucristurëkur hutsankunapita librashqa karpis, manam ciëlopita Cristuwan gobernayämunampaqtsu Diospa qarëninta chaskiyashqa (Rom. 3:24; 5:15, 17). Tsënö kaptimpis Diosman y awnikunqankunamanqa alläpam markäkuyan. Y këtaqa rikätsikuyan alli rurëninkunawanmi, huk kaqqa: ‘Mana mantsacushpa nunacunata Diospa mandaquininpaq y Teyta Jesucristupaq’ yachatsikuyanqanmi (Hech. 28:31). Tsëmi Abrahantanöpis Jehoväqa alli nunakunatanöna rikan. Ciëlopaq ëwaqkunapanö qarëninkuna mana kaptimpis, Abrahannömi alläpa kushishqa Dioswan amigo këta chaskikuyan.

21. ¿Imatataq chaskintsik Leynin ninqanmannö Jehová ruranqampita y kuyakoq kanqampita?

²¹ Mana wanushpa kë Patsachö kawakunapaq Jehová awnikunqanqa, manam polïticokunapa awnikïninkunanötsu. Tsëpa rantinqa Ciëlochö y Patsachö Mandakoqpa munëninmi. Awmi, awnikunqankunata cumplinampaqqa Jehová tukïtam rurashqa. Y kikin Ley churanqanmannömi tsë llapantaqa rurashqa. Hinamampis, këwanqa hatun kuyakïnin kanqantam rikantsik. Kë llapanta musyarmi apóstol Pabluqa këta qellqarqan: “Peru Jesucristum siqa jutsa rurellacho caquicashqa noqantsicpaq wanorqan. Tsenopam musyantsic Diosqa allapa cuyamashqantsicta” (Rom. 5:8).

[Päginapa ura kuchunchö willakï]

¿Këkunata yarpantsikku?

• ¿Imatataq Adanpita chaskirquntsik, y imanötaq kanan kawantsik?

• Willakaramï, ¿pitaq hutsantsikpita pagakurqan y ëkataq chanin karqan?

• ¿Imatataq shuyarantsik alli nunatanöna Diosnintsik rikämanqantsikrëkur?

[Yachakunapaq kaqpa tapukïninkuna]

[17 kaq päginachö dibüju]

Hutsannaq nuna Adanmi hutsallakurqan. Hutsannaq Jesusnam “pägacurgan”

[19 kaq päginachö dibüju]

¿Willakuntsikku Jesucristurëkur alli nunana tikranantsikpaq kaq “alli willaquita”?