Waktsakunapaq alli noticiakuna

DIOSPA Palabranmi këta awnimantsik: “Waktsaqa manam imëyaqpis qonqashqatsu kanqa” (Salmo 9:18). Hina Jehoväpitapis këtam nin: “Makikita kicharmi llapan kawaqta munanqanwan bendecinki” (Salmo 145:16). Kë awnikïkunaqa manam ardëllatsu. Llapanta Puëdeq Diosqa tukïtam rurëta puëden waktsayëta ushakätsinampaq. ¿Ima tukï rurëkunata?

Huk nacionpa tukïnin kapunqanta rikaq o estudiaq warmim këta nin: “Waktsa nacionkuna alli kawayänampaqqa, alläpam precisanman huk ankupäkoq o llakipäkoq mandakoq kanan”. Tsënö ninqanmi rikätsikun waktsayë ushakänampaqqa, puëdeq y alli munëninwan gobernakoq nunata wananqantsikta. Paqwë waktsa këqa kan llapan nacionkuna munëninkunallata ashikuyaptinmi, tsëmi alli gobernakoqqa hinantin Patsachö mandakunman waktsayë paqwë ushakänampaq. Hinamampis, kë gobernakoqqa nunakuna kikinkunallaman yarparäkuyanqantam ushakätsinman. ¿Mëchöraq tsënö alli gobernakoqta tarïkushwan?

Diosmi Tsurinta kachamurqan waktsakunapaq alli willakïkunawan. Jesusqa rikätsikurqan kë Patsachö imata ruranampaq kaqtapis Diospa Palabranchö këta leirninmi: “Diospa Espiritunmi noqacho. Pemi acramashqa wactsacunata alli willaquita willapänäpaq” (Lucas 4:16-18).

¿Imataq tsë alli noticiakuna?

Diosmi Tsurinta Rey kanampaq churashqa, y tsëqa alli noticiam. Këkunarëkurmi Jesusqa alläpa alli gobernakoq: 1) pëpaqa autoridadnin kanmi llapan nunakunata alli gobernanampaq, 2) waktsakunatam alläpa ankupan o llakipan y qateqninkunatapis waktsakunata yanapayänampaqmi yachatsin, 3) hina imatapis kikintsikllapaq munanqantsikkunatapis ushakätsita puëdenmi. Kë kiman rikärinqantsikpita yachakurishun.

1. Nacionkunata mandakunampaqmi Jesuspa autoridadnin kan. Diospa Palabranmi Jesus chaskinqampaq kënö nin: “Pëtam qorqan mandakïta [...] llapan markakuna, llapan nacionkuna y tukï idioma parlaqkuna pëta serviyänampaq” (Daniel 7:14). Ichikllapis pensarishun, ¡imëkankunaraq nunakunapa kanqa huk gobernakoqlla kaptinqa! Kë Patsachö imëkatapis qochinakur o qechunakur guërrakunata rurayanqanqa ushakärinqam, y llapankunapam imëkankunapis igualpa kayäpunqa. Kikin Jesusmi rikätsikurqan hinantin Patsachö autoridadninwan gobernanampaq kaqta këta nirnin: “Diosmi churamashqa, sieluchopis y que patsachopis mandacunäpaq” (Mateo 28:18).

2. Waktsakunata ankupanqan. Jesus Patsachö yachatsikur purinqanchöqa, waktsa kaqkunata alläpam llakiparqan. Huk warmim alläpa qeshyarnin tukïninta rantikurqan mëdicokuna kachakëkatsiyänampaq, pëmi Jesuspa röpanta yatëkurqan kachakëta munëwan. Chunka ishkë watana yawar ëwëwan qeshyarchi anemia qeshyawanna karqan. Jehová Moisesta Leyninkuna qonqanchöqa, tsënö qeshyayoq warmi pitapis yatëkuptinqa rakcham tikrareq. Pero Jesusqa kuyëpam parlaparqan. Kënömi nirqan: “Ija, noqaman marcäcurmi cachacärerqonqui. Canan cushishqana euquï. Mananam mas jipanquinatsu” (Marcos 5:25-34).

Jesuspa yachatsikïninkunaqa nunakunapa shonqunta tumatsita puëdenmi, tsënöpa pëkunapis wakinkunata kuyëpa rikäyänampaq. Diosta kushitsinampaq imata ruranampaq kaqta huk nuna tapuriptin Jesus ima ninqantapis yarpärishun. Kë nunaqa musyaqmi nuna mayinta kuyanampaq Dios mañanqanta, tsënö karpis Jesustam kënö tapurqan: “¿Pitaq tse nuna mayïqa?”.

Jesus kë tapukïninta contestanampaqmi, Jerusalenpita Jericöman ëwarëkaq nunata suwakuna maqëkur ‘wanuquicaqtana’ haqiriyaptin Samariapita nuna yanapanqampaq willakurqan. Tsë nänipa huk sacerdote pasëkar tsë nunata rikëkarpis, huk lädopam pasakurqan, y tsënöllam huk levïtapis rurarqan. “Peru  Samaria nuna tsepa euquicarnam, nunata taririr, allapa ancuparqan.” Herïdankunata hampipurmi shumaq watarapurqan, tsëpitanam huk posädaman aparqan y tsëchö cuidanampaqmi posadatsikoqta pagarqan. Jesusmi kë nunata kënö tapurqan: “Que quimanpeq ¿meqan caqtaq nuna mayintano tratarqan tse suwacuna golpiquicushqa nunata?”. Pënam kënö nirqan: “Tse ancupaq caqchi”. Tsënam Jesus pëta nirqan: “Canan qampis ewar, tsenolla ancupäcoq canqui” (Lucas 10:25-37).

Jehoväpa testïgonkuna këman chaqkunapis waktsakunata yanapayänampaq Jesus yachatsikunqannömi rurar qallëkuyan. Maslla tantearinapaq rikärishun Letonia markachö Women in Soviet Prisons (Union Soviëtica carcelkunachö warmikuna) nishqan librota qellqaq warmi, Potma nishqan carcelchö 1960 watakuna trabajëkar qeshyanqampaq kënö willakunqanta: “Qeshyanqä witsanmi, warmi kaq Testïgokuna alläpa yanapayämarqan. Manachi pëkunanöqa pipis atiendemanmantsu karqan”. Hina këtapis nirqanmi: “Jehoväpa testïgonkunapaqqa, ima religionpita kayaptin o më markapita kayaptimpis llapan nunakunata yanapëqa alläpam precisan”.

Ecuador nacionpa Ancón nishqan markanchömi wakin testïgokuna illaqpita trabäjonnaq tikrariyarqan, tsëmi wakin testïgokunaqa qellëwan yanapayänampaq mikïkunata cocinayarqan patsa manaraq waraptin kutimoq pescadorkunata rantikuyänampaq. Congregacionchö llapan kaqkunam yanapanakuyarqan, hasta wambrakunapis. Una de la mañänam cocinar qallëkuyaq, tsënöpam bötekuna 4 de la mañana chärinampaqqa chätsikushqana kayaq. Y tsë qellë ganayanqantaqa Testigo mayinkuna wanayanqanmannömi rakiyarqan.

Kë pasakunqanmi rikätsimantsik Jesuspa yachatsikïninkunaqa, waktsakunata yanapayänampaq nunakunapa pensëninkunata cambiëta puëdenqanta.

3. Kikinkunallapaq munëninkunata Jesus cambiëta puëdenmi. Kikintsikllapaq imatapis rurëta munanqantsiktaqa llapan nunakunam musyayan. Kënö kanqantsiktam Bibliaqa “jutsa” nishpa qayan. Kikin apóstol Pablupis këtam qellqarqan: “Noqatam imanirchi cadalla queno pasaman: Allita rureta munecaptïpis, mana alli rurenïcunam yurircamun”. Hina nirqanmi: “¿Pillaraq libreconqa condenasionpita jutsasapa etsalläta! [...] Peru ¡grasias Diosta! ¡Pemi Jesucristurecur cananqa librecamashqa!” (Romanos 7:21-25). Këchöqa Pablu rikätsikïkarqan rasumpa cristiänokunata mana alli munëkunata haqiyänampaq Diosnintsik yanapanampaq kaqtam, y huk mana alli munëqa kikintsikllapaq imatapis munanqantsikmi. ¿Imanöraq tsëtaqa ruranman?

Jesus bautizakunqampita wallka tiempo pasarinqanllachömi Juan Bautista Jesuspaq këta nirqan: “¡Ricayë, taqemi Diospa achcasnin. Pemi jinantin munducho nunacunapa jutsancunarecur wanonqa!” (Juan 1:29). Ichikllachönam hinantin Patsachö llapan nunakuna hutsapita librashqa kayanqa, y mananam kikinkunapa munëninkunallatatsu ashiyanqa (Isaías 11:9). Tsënöpam waktsayëta paqwë Jesus ushakätsinqa.

¡Alläpam kushikuntsik imëkantsikpis mana pishimänapaq kaq hunaq chämunampaq kaqman yarparnin! Diospa Palabranmi këta awnikun: “Uvas y higos plantankuna hawanchömi täkuyanqa, y manam pipis mantsakätsinqatsu” (Miqueas 4:4). Këchö ninqanmi rikätsimantsik llapantsikpa alli trabajo kapamänata, mana imatapis mantsashpa kawanata y mana imapis pisheq Patsachö täränapaq kaqta, y kë llapanqa kanqa Jehová alabashqa kanampaqmi.