“Mana qelanashpa” cörrishun

“Corir llallinacoq nunacuna[nö]pis [...] mana qelanashpa Dios munanqanno cawaquita tïrashun.” (HEB. 12:1.)

1, 2. ¿Imawantaq Pablu igualatsirqan cristiänokunapa kawëninta?

WATA watam atska nacionkunachö cörrir llallinakuyan. Wallkaqllam (akrashqa kaqkunalla) ganëta munëwanqa cörriyan, pero wakinkunaqa cörriyan, cörrir ushayänan sitioman chäyanqanta kushishqa willakuyänanllapaqmi.

² Cristiänokunapa kawëninkunata igualatsinanrëkurmi atska kuti Bibliachöqa cörrir llallinakoqkunapaq parlan. Tsëmi corintiokunapaq punta kaq cartakunqanchö Pablu kënö nirqan: “Qamcuna allim musyayanqui corir llallinacoqcunacho jucllella llallenqanta, y tse llalleqllam premiuta chasquin. Qamcunapis tse corir llallinacoq cuenta cayë” (1 Cor. 9:24).

3. ¿Ima nïtataq munarqan Pablu llallinakur cörrichöqa hukllaqllam ganan nirqa?

³ Awmi, apóstol Pabluqa manam huk cristiänolla mana wanushpa kawakïta chaskinampaqtsu nikarqan. Tsënö kaptinqa, wakinkuna sinchikuyanqanqa en vänollachi kanman. Tsëqa, ¿ima nïtataq munëkarqan? Llallinakur cörreqkunanö sinchikuyänampaqmi. Cörreqkunaqa cada ünom alleq alistakuyaq y mana utinashpa cörriyaq ganëta munarnin. Tsënöllam cristiano kaqkunapis mushoq Patsaman chëta munarqa, cörreqkunanö mana utishpa sinchikuyänan. Pero kë llallinakïchöqa, cörrir chäyänan sitioman chaqkunaqa llapanmi premiota chaskiyan.

4. Mana wanushpa kawanapaq cörrinqantsikchö, ¿imakuna kanqantataq yarpänantsik?

⁴ Mana wanushpa kawëpaq llallinakoqnö cörrikaqkunataqa, Pablu ninqan alläpam kushitsimantsik, pero hina yarpakachätsimantsikmi. ¿Imanir? Ciëlochö kar o Patsachö karpis tsë premio mana imawampis igualaptinmi, y tsëtaqa manam oqrëta munantsiktsu. Musyantsikmi tsë näniqa karu, sasa o aja, tukï problëmakunayoq y peligrokunayoq kanqanta (Mat. 7:13, 14). Hina musyantsikmi wakinkuna qepapäriyanqanta, manana cörriyanqanta o haqiriyanqantapis. ¿Ima toqllakunatataq y problëmakunatataq tarishun? ¿Imanötaq tsëkunapita tsapäkushwan? ¿Imatataq rurashwan tsë carrërata ushanqantsikyaq cörrir gananantsikpaqqa?

Gananapaqqa precisan alleq tsarakunantsikmi

5. Hebreus 12:1 textochö, ¿imapaqtaq Pablu yapë yarpärirqan?

⁵ Jerusalenchö y Judëachö këkaq hebreo cristiänokunaman cartakurnin, Pabluqa yapë yarpäratsikurqan cörreqkuna y pukllaqkuna rurayanqanta (lei Hebreus 12:1). Mana wanushpa kawëta chaskiyänanrëkur cörrikäyanqanta mana haqiriyänampaq kaqta nirirmi, willakurqan ganayänampaq imatapis rurayänampaq kaqta. Pero consejakunqankunapita manaraq yachakurnin y ninqannö manaraq rurarnin, rikärishun imarëkur cartakunqanta y rurëninkunawan imakunata rikätsikuyänampaq consejanqantapis.

6. ¿Imanötaq religioso autoridadkuna cristiänokunata tratayarqan?

⁶ Jerusalenchö y Judëachö wakin apostolkuna kawayanqan witsan cristiänokunaqa tukï problëmakunapa y hipakïkunapam pasëkäyarqan. Judío religioso autoridadkunam imë hörapis chikipäyaq, pëkunam hinantin markata pasëpa dominayaq. Wallka watakunallaran pasashqa karqan gobiernopa contranmi churakashqa nir Jesusta condenayanqan y mana alli nunatanö wanutsiyanqampita. Hina tsënöllam pasëpa chikiyaq qateqninkunatapis. Hechos nishqan librochömi willamantsik, 33 wata Pentecostés fiestachö milagrokuna pasarinqanchö tukïnöpa hipatsiyanqanta. ¡Manam fäciltsu karqan tsë  witsankunachö cristiano këqa! (Hech. 4:1-3; 5:17, 18; 6:8-12; 7:59; 8:1, 3.)

7. ¿Imanö tiempochö cristiänokuna kawëkäyaptintaq Pablu cartakurqan?

⁷ Tsë cristiänokunaqa judïokuna ushakäyänampaq wallka tiempollana pishïkaqchömi kawayarqan. Jesusmi willakurqan Jehoväta mana wiyakuyanqanchö ushakäyänampaq kaqta. Hina willarqanmi Jerusalenta manaraq ushakätsiyaptin imakuna pasakunampaq kaqta y kawëkar quedayänampaq imata rurayänampaq kaqtapis (lei Lucas 21:20-22). Kënö ninqantam imë hörapis yarparäyänan karqan: “Cuidacuyë shonqiquicuna munanqan mana alli bisiucunapita, machaquicunapita, y que bidacho imecapaqpis yarpacachecunapita. Tseno quecayaptiqui, paqtataq tse junaqcuna imeca trampa animalta tsareqno tsapuyäshunquiman” (Luc. 21:34, 35).

8. Kawëman apakoq nänipa cörrichö, ¿wakin cristiänokunata imakunaraq utiratsirqan o haqiratsirqan?

⁸ Hebreo cristiänokunaman Pablu cartakunqan witsanqa, kima chunka watakunanönam pasashqa karqan tsënö pasakunampaq kaqta Jesus willakunqampita. ¿Kë cristiänokunaqa yarparëkayarqanllatsuraq Jesus willakunqanta? Wakinkunaqa tukï problëmankuna kaptin y kawëninkunachö imëkata rurayänan kaptinmi Diospa kaqta haqiyarqan, tsënöpam poqu cristiano këmanqa chäyarqantsu (Heb. 5:11-14). Y wakinkunanam pensayaq hukkuna rurayanqanta qatir alli kayänampaq kaqta. Itsachi pëkunaqa pensayaq tsë judïokuna Diosta paqwë mana haqiyanqanta y wakin wakinllataqa leykunatapis cumpliyanqanta. Hinamampis wakin discïpulonkunataqa creitsiyashqa o mantsakätsiyashqa ley ninqanta cumpliyänampaq y religioso costumbrekunata rurayänampaq niyanqankunam. ¿Imataraq ninqa Pablu cristiano mayinkuna Jehoväpa kaqchö mäkoq mäkoq kayänampaq y mana wanushpa kawëman apakoq nänita mana haqiyänampaq?

9, 10. a) ¿Hebreus libropa 10 kaq capïtulonchö ima nirnintaq apóstol Pablu animarqan? b) ¿Imanirtaq Pablu parlarqan unë ‘atsca nunacuna Diosman marcäcuyanqampita’?

⁹ Rikärishun Jehová qonqan consëjokunawan Pablu hebreo cristiänokunata imanö yanapëta tïranqanta. Cartampa chunka kaq capïtulonchömi rikätsin, “Moises escribishqan leycunaqa” ‘que patsaman biennintsic naqana yequecamonqanta cuentata qocunallapaq’ kanqanta, y Cristu wanunqa alläpa valoryoq kanqanta. Y kë capítulo ushananchönam kënö nin: “Tserecur sufrirninpis, mana qepaman cutirishpa pe munashqanllata rurar cawacuyë. Tseno cawacuyaptiqueqa, äniyäshonqequitam chasquiyanqui. Porqui Diospa palabranpis quenomi escribirëcan: ‘Naqana[m] örayäramunna Salbador chämunanqa, y manam allapa illacämonqanatsu [pishinnatsu]’” (Heb. 10:1, 36, 37).

¹⁰ Qateqninmannam Hebreus libropa 11 kaq capïtulonchö Pabluqa shumaq yachatsikun Diosman markäkï o yärakuy ima kanqantapis. Y këtaqa yachatsikun unë tiempo ollqukuna y warmikuna Diosman imanöpis markäkuyanqanwanmi. Kënö yachatsikurqa, ¿alli tsarakuyänampaq parlëkartsuraq hukpaq parlar qallëkurqan? Manam. Pëqa yarpätsïta munan cristiano mayinkuna markäkïninkunata alli valorwan y mana qelanashpa rikätsikuyänampaq kaqtam. Pëqa musyanmi unë tiempochö Jehoväta wakin nunakuna serviyanqan tukï problëmakunata y sasa kawëkuna pas ayanqanchö yanapanampaq kaqta. Tsë nunakuna markäkïninkunarëkur imata rurayanqanta rikäratsirmi, sinchi tsarakuyänampaq yapë parlapan kënö nir: “Tsemi tse atsca nunacuna Diosman marcäcuyanqannolla noqantsicpis Diosman alli marcäcushun. Imanomi corir llallinacoq nunacunapis imapis mana atajäyänanpaq jinella coriyan; tse cuenta noqantsicpis jutsantsiccunata tapsicuricur, mana qelanashpa Dios munanqanno cawaquita tïrashun” (Heb. 12:1).

“Atsca nunacuna Diosman marcäcuyanqannolla [...] marcäcushun”

11. ¿Imachötaq yanapamantsik unë “atsca[q] nunacuna Diosman” markäkuyanqanman yarparë?

¹¹ “Atsca nunacuna Diosman” markäkoqkunaqa manam upällalla rikäkoqkunatsu kayarqan. Campotaqa ëwayashqa manam equipon ganananta musyëta munarllatsu, sinöqa equiponkunata animar yanapayänampaqmi. Y pëkunaqa  allim animëta puëdeyan, pëkunapis tiemponkunachö alli cörreqkuna kayashqa kar y ganashqa kayarnin. Wanushqana kayaptimpis, imëka kawëkar animëkaqkunatanömi Bibliaqa rikätsikun. ¿Imanötaq mushoqkunata yanapan alli cörreqkuna rikëkäyanqanta musyë? Alli cörreq kayänampaqmi yanapan, o hasta pëkunapita más alli cörreq kayänampaqmi. Pëkunataqa rikarëkäyan unë “atsca nunacuna Diosman” markäkoqkunam, tsëmi yanapan tukï sasa o aja pruëbakunapa pasëkarpis alli tsarakur ganayänampaq kaqta. Tsë unë nunakuna rurayanqankunaman yarpararqa “mana qelanashpa” cörrirmi alli tsarakuyanqa. Kë consëjoqa alläpam precisarqan hebreu cristiänokunapaq y tsënö precisaqllam noqantsikpaqpis.

12. ¿Imanirtaq noqantsikpaq alläpa precisan unë cristiänokunapaq Pablu parlanqan?

¹² Pablu qellqanqan unë cristiänokunaqa tukïtam pasayarqan, y tsënöllam noqantsikpis kanan witsan pasantsik. Rikärishun pëkuna pasayanqankunata. Noëqa kawarqan diluvio kanampaq ichikllana pishikaptinmi. Tsënölla noqantsikpis ushanan tiempokunachöna kawëkantsik. Abrahantawan Särataqa Jehová mandarqan markankunapita huk markaman ëwakuyänampaq y tsëchö awninqan cumplikänanta shuyarar pëta adorar kawayänampaqmi. Hina tsënöllam noqantsiktapis mañamantsik munënintsikkunata haqirir Diospa munëninta rurar sinchikunapaq, y llapan awnikïninkuna cumplikänanta shuyararnin këkänapaq. Moisesnam tukï peligrokunapa pasarqan Dios awninqan markaman ëwarnin. Tsënöllam noqantsikpis kanan witsan tukï mana allikunapa pasantsik, shumaq kawakïman apakoq nänipa ëwarnin. Tsëmi alläpa precisan kë alli nunakunapa kawëninkunapita yachakunantsik, tsënöpam rikäshun alli rurëninkunata, imakunachö pantayanqankunata y imakunata mantsayanqantapis (Rom. 15:4; 1 Cor. 10:11).

¿Imataq ganayänampaq yanaparqan?

13. ¿Noëpaq fäciltsuraq karqan Jehová mandanqanta rurë y imataq yanaparqan tsë llapanta ruranampaq?

¹³ Apóstol Pablu parlanqan cristiänokuna cörrita mana haqiyänampaq y ganayänampaqqa yanaparqan markäkininkunam o yärakuyninkunam. Rikärishun Noe imanö rikätsikunqantapis (lei Hebreus 11:7). “Mantsakëpaq tamyawan manam alli nunakunata” ushakätsinampaqmi Jehová awnirqan (Gén 6:17). ¿Imanirtaq tsëpaq “mana imepis ricanqan” nirqan Pablu? Tsënöqa nirqan imëpis mana pasakushqa kaptinmi. Tsënö kaptimpis Noëqa shonqupita patsëmi creirqan Dios ninqannö pasanampaq kaqman. Y tsënöqa creirqan Diosman markäkurmi. Creirqanmi Dios llapan awnikunqanta cumplinampaq kaqta, tsëmi mandanqanta rurarqan alläpa sasa o aja kaptimpis. Y Dios “ninqannömi rurarqan” (Gén. 6:22). Y arcata ruranan, pëkunapaq y animalkunapaq mikïninkuna churanan y llapan animalkunata yëkatsinampis manam fäciltsu karqan, hinamampis nuna mayinkunatam willanan karqan mantsakëpaq tamya shamunampaq kaqta y familiantapis Diospa kaqchö alli sinchi kayänampaqmi yanapanan karqan. Pero Noe tsënö markäkunqanqa manam en vänotsu karqan, tsëpa rantinqan llapan familianwanmi salvakuyarqan tsë ushakëpita y atska bendicionkunatam chaskiyarqan.

14. ¿Ima sasa o aja kawëkunapataq pasayarqan Abrahanwan Sara y imatataq pëkuna rurayanqampita yachakuntsik?

¹⁴ Abrahanwan Särapis këkäyanmi “atsca nunacuna Diosman” markäkoqkunachöqa. Pëkunapaqa Ur shutiyoq markam markankuna karqan y tsëchöqa allim kawakuyarqan, tsëpita yarqukuyaptinqa shamoq tiempochö imanö kayänampaq kaqtapis manam musyayarqantsu. Tsënö këkaptimpis, alli markäkïyoq kayanqantam y imëkapa pasëkarnimpis Diosta wiyakuyanqantam rikätsikuyarqan. Diosta servinanrëkur tukïta pasanqampitam “marcäcoq caqpaqqa imeca tëtancuna cuenta ticrarishqa” nin Biblia (Rom. 4:11). Pëpaqqa Pablu parlarqan wakin wakin pasanqankunallatam, porque wiyaqnin nunakunaqa alleqmi musyayaq llapan pasanqankunata. Tsënö karpis huk alli yachatsikïtam rikätsikurqan, kënö nir: “Tse llapan nunacunam Dios änicushqanta manaraq chasquirnin wanucuyarqan. Tse nunacunaqa  marcäcoq carninmi, carupita ricayarqan allapa cushicur, y cuentatam qocuyarqan que bidachoqa forasterunolla cayanqanta” (Heb. 11:13). Clärom këkan ushananyaq cörriyänampaqqa markäkïninkuna y Dioswan alli këninkuna yanapanqanqa.

15. ¿Imataq yanaparqan Moisesta sasa o aja rurëkunata aguantanampaq?

¹⁵ “Atsca nunacuna” Diosman markäkoqkunapita huk kaqqa Moisesmi karqan. Egipto markachö kapoqyoq y precisaq nuna kanampa rantinmi, “pëqa munarqan Diospa israel nunancunawan juntu allqutsashqa jipar” kawakïta. ¿Imanir? Pablu ninqannöpis “pëqa mas marcäcorqan Diospita premiuta chasquinanpaq” kaqmanmi y “Diosta mana riquecarninpis, marcacurmi rurananpaq caqta seguracorqan” (lei Hebreus 11:24-27). Manam “etsanpa muneninta rurar juc ratu que patsacho gosacuritaqa” munarqantsu. Pëqa rasumpam Dios kawanqanman creeq y awnikunqankuna cumplikänan kaqmampis. Tsëmi alläpa valoryoq y alli tsarakoq kanqanta rikätsikurqan. Mana qelanëtam trabajarqan Israel markata Egiptopita libranampaq y Dios awnikunqan markaman chätsinampaq.

16. Jehová awnikunqan markaman yëkunanta mana haqiptin, ¿imanirtaq Moisesqa llakikurqantsu?

¹⁶ Abrahannöpis, Moisesqa manam rikarqantsu Jehová awnikunqankuna cumplikanqanta. Awnikunqan Patsaman israelïtakuna yëkuyänampaq ichikllana pishikaptinmi, Jehová kënö nirqan: “Karullapitam tsë Patsata rikanki, pero manam israelïtakunapa tsurinkunata qonqa Patsamanqa yëkunkitsu”. ¿Imanirtaq tsënöqa castigarqan Moisestawan Aaronta? Mana wiyakoq israelïtakunawan piñashqa këkar, Jehoväta mana respetayanqampitam. Tsëmi Jehová kënö nirqan: “Meribá yaku kuchunchö israelïtakunawan këkarmi qamkunaqa yarpäyamarqëkitsu” (Deu. 32:51, 52). ¿Tsërëkurku Moisesqa Jehová servita haqirirqan y piñakurqan? Manam. Llapan markata bendicinqanchömi kënö nir usharirqan: “¡Alläpa kushishqam kanki, oh Israel! ¿Ima markataq qamnö kanman Jehoväta salvaqnintanö  katseq? Pëqa tsapäshoqniki escudom y precisaq espädëkim” (Deu. 33:29).

Noqantsikpaq yachatsikïkuna

17, 18. a) ¿Imatataq yachakuntsik unë ‘atscaq nunacuna’ Diosman markäkuyanqampita? b) ¿Imapitataq yachakushun qateqnin yachatsikïchö?

¹⁷ Llapan shonquntsikwan Diosman y awnikunqankunaman markäkunantsikpaqqa, unë tiempochö ‘atscaq nunacuna Diosman marcäcuyanqanta’ yarpëmi yanapamantsik (Heb. 11:6). Markäkïnintsiktaqa manam ichikllapaq churashwantsu, sinöqa alläpa precisaqtanömi rikänantsik. Diosta mana reqeq nunakunaqa kapoqyoq këllatam precisaqpaq churayan, pero noqantsikqa Diosta “mana riquecarninpis” pëpa kaqtam precisaqpaq churantsik, tsëmi yanapamantsik cörrikanqantsikta mana haqinapaq (2 Cor. 5:7).

¹⁸ Cristiänonö kawëqa sasam o ajam. Tsënö kaptimpis, llapantsikmi carrërata ushanqantsikyaq cörrita puëdentsik. Qateqnin yachatsikïchömi rikäshun carrërata ushanqantsikyaq cörrinapaq ima yanapakïkuna kanqanta.

Yarpärishun

• ¿Imanirtaq Pabluqa alläpa parlarqan unë “astcaq nunacuna” Diosman markäkuyanqampita?

• ¿Imanötaq yanapamantsik Diosman markäkoq “atscaq nunacuna” rikarëkamanqantsikta musyë?

• ¿Imatataq yachakuntsik Noe, Abrahan, Sara y Moises Diosman markäkuyanqampita?

[Yachakunapaq kaqpa tapukïninkuna]

[22 kaq päginachö dibüju]

Abrahanwan Säraqa Ur markachö imëkankunatam haqiyarqan