Diospa Palabrampita yachatsikïkuna

¿Imanöraq Diosman witishwan?

Kë yachatsikïmi yanapashunki wakin tapukïkunapa respuestanta Bibliëkichö tarinëkipaq, y tsë tapukïkunataqa itsa qampis rurakushqanki. Munaptikiqa, Jehoväpa testïgonkuna yanapariyäshunkimanmi kë tapukïkunapa respuestanta más yachakurinëkipaq.

1. ¿Llapampa mañakïninkunatatsuraq Dios wiyan?

Jehoväqa hinantin nacionkunachö nunakunatam nin mañakurnin pëman witiyänampaq (Salmo 65:2). Pero manam llapan nunakunapa mañakïnintatsu wiyan. Yarpäshun, israelïtakuna kutin kutin mana allikunata rurëkarnin Diosman mañakuyaptinqa, manam wiyaqtsu (Isaías 1:15). Hina warminta huk ollqu mana alli tratëkar mañakuptimpis, Diosqa manam wiyantsu (1 Pedru 3:7). Tsënö kaptimpis, wanakuyaptinqa hatun hutsakunata rurashqa nunakunatapis Diosqa wiyanmi. (Lei 2 Crónicas 33:9-13.)

2. ¿Imanötaq mañakushwan?

Mañakïqa huk hatun bendicionmi y Diosta adorëmi, tsëmi Jehovällata mañakunantsik (Mateo 4:10; 6:9). Hutsa ruraq karmi, Jesuspa shutinchö mañakunantsik, pëlla Diosman chätsikoq “näni cuenta” kaptin (Juan 14:6). Jehoväqa manam munantsu qellqëkur o yachakïkur kanqanllata kutin kutin mañakunataqa, antis shonqupita patsë kanantam munan. (Lei Mateo 6:7 y Filipenses 4:6, 7.)

Kamamaqnintsikqa shonquntsikllachö mañakunqantsiktapis wiyanmi (1 Samuel 1:12, 13). Imë hörapis mañakunapaqmi nimantsik: shärikunqantsik hora, patsäkunqantsik hora, mikunqantsik hora y mana allikunapa pasanqantsik hörapis. (Lei Salmo 55:22 y Mateo 15:36.)

3. ¿Imanirtaq cristiänokuna ëllukäyan?

Kanan witsankunaqa kawantsik Diosman mana markäkoq y yamë këta Patsaman apamunampaq kaqpita burlakoq nunakunapa tiemponchömi, tsëmi Diosman witiqa sasaraq (2 Timoteu 3:1, 4; 2 Pedru 3:3, 13). Tsënöpam wanantsik cristiano mayintsikkunawan ëllukëta o gorikayta. (Lei Hebreus 10:24, 25.)

Diosman wititaqa puëdentsik, pëta kuyaqkunawan amigo karmi. Y Jehoväpa testïgonkunapa reunionninkunaqa yanapakun hukpa markäkïninkunapita yachakunapaqmi. (Lei Romanos 1:11, 12.)

 4. ¿Imanöraq Diosman witinkiman?

Palabrampita yachakunqëkiman yarpararmi. Pensë rurëninkunaman, yachatsikïninkunaman y awnikïninkunaman. Yachakunqantsikkunaman yarpachakurir mañakïqa yanapamantsik kuyakïnimpita y yachënimpita Diosta más kuyanapaqmi. (Lei Josué 1:8 y Salmo 1:1-3.)

Diosmanqa markäkur o yärakurllam witita puëdentsik. Pero markäkïnintsikqa imëka planta cuentam, huk planta winanampaqqa yakutaran wanan. Tsë cuentallam markäkïnintsikpis, más winanampaqqa yakun winaq cuentam imanir imamampis creinqantsikta alleq musyanantsik. (Lei 1 Tesalonicenses 5:21 y Hebreus 11:1, 6.)

5. ¿Ima bendicionkunataraq tarinki Diosman witinqëkipita?

Jehoväqa yarparanmi pëta kuyaqkunapaqqa. Imapis markäkïninkunata y mana wanushpa kawakïta shuyaräyanqanta ushakätsinampitam tsapan (Salmo 91:1, 2, 7-10). Saludnintsikta y kushikïnintsikta ushakätseq rurëkunapitam tsapämantsik, y imanö más alli kawakunapaqmi yachatsimantsik. (Lei Salmo 73:27, 28 y Santiagu 4:4, 8.)

Maslla yachakïta munarqa, Rasumpëpaqa, ¿imatataq Biblia yachatsikun? libropa 17 kaq capïtulonta leirï, kë librotaqa Jehoväpa testïgonkunam rurayämushqa.