‘Shonqunkunachö nanatsikïkaqkunatam shoqanantsik’

“Jehovämi akramashqa [...] shonqunkunachö nanatsikïkaqkunata shoqanäpaq” (ISA. 61:1, 2).

1. ¿Imanötaq Jesus yanaparqan hipëkaqkunata y imanötaq tsëta rurarqan?

JESUSMI kënö nirqan: “Noqapa miquinïqa cachamaqnïpa munenincunata ruranämi y llapan mandamashqancunata cumplinämi” (Juan 4:34). Tsëta ruranqanchöqa, Teytan imanö kanqantam imëpis rikätsikurqan y masqa nunakunata alläpa kuyanqantam (1 Juan 4:7-10). Jehoväqa tukïnöpam kuyakïninta rikätsimantsik, y shoqamarnintsikpis tsëtam rikätsimantsik. Tsëmi apóstol Pabluqa “shoqacoq Diosmi” nirqan Jehoväpaq (2 Cor. 1:3). Jesuspis tsënö kuyakoq kanqantam rikätsikurqan profeta Isaías unëpitana willakunqannö rurarnin (lei Isaías 61:1, 2). * Kë profecïataqa Jesus leirqan Nazaret markachö Leykunata leiyänan wayichömi, y nïkurmi kë profecía pëchö cumplikanqanta nirqan (Luc 4:16-21). Y tsëtam  imëpis rurarqan. Yachatsikunqan witsankunaqa shumaq y shoqëpam llakishqa nunakunata parlaparqan.

2, 3. ¿Imanirtaq cristiänokunaqa Jesus ruranqanta qatinantsik y nunakunata shoqanantsik?

² Jesuspa qateqninkuna karmi hipëkaqkunata shumaq parlapar shoqashwan (1 Cor. 11:1). Pablupis kënömi nirqan: “Balorta y callpata qonacur quecayanqequinolla jucniqui jucniquicuna quecayë” (1 Tes. 5:11). Kanan witsan alli shonquyoq nunakunaqa alläpam wanayan llakikïninkunachö y nanatsikïninkunachö shoqanantsikta. ¿Imanir? Porque kë “allapa sasa cawaqui tiempucuna[chöqa]” nunakunaqa parlakïninkunachö y rurëninkunachö pasëpa chiki kayanqantam rikätsikuyan (2 Tim. 3:1).

³ Profecïakuna willakunqannömi, kë ushanan hunaqkunachöqa más nunakuna “codisiosu, qellellapaq locuyäcoq, orgullosu, musyaq tucoq, Teyta Diospa contran parlaq, papänintapis mamantapis mana cäsoq, agradesiquita mana yachaq, Teyta Diospa yachatsiquininta mana cäsoq, mana ancupäcoq, perdonaqui mana yachaqcuna, cuentusteru, llutan rurecunata mana teqñaq, allapa mana baleq, alli rurecuna mana gustaq, amiguncunata lebantar ranticoq, allapa lisu, yachaq tucoq, Diosnintsic munashqanta mana cäsushpa quiquincunapa munenincunallata ruracoq” tikrakïkäyan. Y tiempo pasanqanmanömi nunakunaqa más mana alliman chäkïkäyan, Biblia ninqannöpis, “mana alli ruraqcunaran y engañacoqcunaran mas peor mana allimanqa ishquiyanqa” (2 Tim. 3:2-4, 13).

4. ¿Imataq pasakïkan kë Patsachö imëka cosaskunawan?

⁴ Nunakuna tsënö kayanqanqa manam mantsakätsimantsiktsu, porque Bibliachömi nin ‘que munducho Diospa mana caqcunaqa diablupa munenincho caquicayanqanta’ (1 Juan 5:19). “Que munducho” nirqa, parlëkan polïticokunapaq, religiösokunapaq, negociantekunapaq y tukï propagandankunapaqmi. Tsëchi Bibliaqa Satanaspaq “mana alli ruraqcunapa mandacoqnin” y “que patsacho mandacoq” kanqanta nin (Juan 14:30; 2 Cor. 4:4). ¿Imanirtaq kë Patsachö imëkapis más mana alliman chäkïkan? Diablu ushakänampaq ichikllana pishinqanta musyarnin alläpa piñashqa tukï mana allikunata ruraptinmi (Apo. 12:12). Jehoväqa ichikllachönam Satanastawan kë Patsachö pëpa kaqkunata ushakäratsimunqa, y tsënömi rikätsikunqa Dios mana alli Gobernanqanta Satanás tumpanqan ulikï o llullakuy kanqanta. ¡Imanö kushikïpaqraq tsëqa kanqa! (Gén., cap. 3; Job, cap. 2.)

Hinantin Patsapam alli willakïkunata willakïkantsik

5. ¿Imanötaq kë ushanan hunaqkunachö Diospita yachatsikïpaq profecía cumplikëkan?

⁵ Kanan witsan sasa kawëkunachömi cumplikëkan Cristu kënö ninqan: “Tsemi llapan nunacunata alli willaquinïta willayänequi presisan; tsenopa nunacuna Diospa mandaquininman yecuyänanpaq, y jinantin nasioncunacho tse alli willaquita musyariyaptinnam, que patsapa ushenin chäramonqa” (Mat. 24:14). Hinantin Patsachö yachatsikunqantsikqa cada hunaqmi más miran. Kanan witsankunaqa 7.500.000 nunakunapitapis  masmi yachatsikur puriyan, y pëkunaqa këkäyan 107.000 congregacionkunachömi, y hinantin nacionkunachömi Diospa Gobiernompita willakïkäyan, tsë Gobiernopitam Jesuspis willakurqan y yachatsikurqan (Mat. 4:17). Tsëmi tukïpita llakishqa këkaqkuna shoqakïta chaskikäyan. Tsënöpam ishkan pasaq watakunallachö 570.601 nunakuna bautizakurnin Jehoväpa testïgon këman chäyashqa.

6. ¿Ima ninkitaq Diospita yachatsikï más winanqanta rikar?

⁶ Hina Diospita yachatsikï mirëkanqantaqa rikätsikun pitsqa pachak idiömakunachö publicacionkunata traducinqantsik y horqamunqantsikmi. ¡Manam imëpis tsënöqa rurakashqatsu! Jehoväpa Patsachö këkaq markan mana ushakanqan y más winëkanqanqa mantsakäkïpaqmi. Kanan witsankuna Satanaspa mundon contrantsikchö këkaptinqa, manachi tsëkunata lograshwantsu karqan santo espíritu mana yanapamashqaqa. Hinantin nacionkunaman alli willakïkuna chaptinmi, mëtsika nunakuna Diospa Gobiernompita yachakïkäyan, y pëkunapis noqantsiknömi shoqashqa këkäyan.

Cristiano mayintsikkunata shoqashun

7. a) ¿Imanirtaq huk cristiänoqa shuyaranmantsu llapan hipakïninkunata Jehová ushakätsinanta? b) ¿Imanötaq musyantsik nunakuna qatikachämashqa y tukï pruëbakunapa pasashqapis tsarakïta puëdenqantsikta?

⁷ Kanan witsankunaqa manam pipis yarpachakïninnaq kawakïta puëdentsu, porque kë Patsachöqa imëka mana allikuna y hipakïkunam kan. Tsëkunata Diosnintsik ushakätsinqanyaqqa, pasashunran tukï yarpachakïkunapa y llakikïkunapa. Hina Biblia ninqannömi nunakuna qatikachämashqapis tsarakïkänantsik, tsëkunata pasanqantsikqa Jehoväta mana haqinqantsikta y pëlla alli Gobernante kanqanman creinqantsikta rikätsikunapaqmi yanapamantsik (2 Tim. 3:12). Jehoväpa yanapakïninwan y shoqakïninwanqa, unë witsan Tesalonica markachö cristiänokunanömi kashun, pëkunaqa ‘chiquir qaticachëcayaptimpis y sufrimientucunata pasecarpis, Teyta Diosman marcäcurmi tsaracuyarqan’, tsënöpam alli ejemplo kayarqan (lei 2 Tesalonicenses 1:3-5).

8. ¿Biblia pikunapaq parlanqantaq rikätsikun Jehová sirveqninkunata kallpata qonqanta?

⁸ Jehoväqa sirveqninkunata imëpis qonmi wanayanqan kallpata. Eliaspaq parlarishun. Mana alli reina Jezabel wanutsita munaptinmi alläpa mantsakarnin safakurqan o qeshpikuran, y hasta wanïta munanqantapis nirqanmi. Pero Jehoväqa manam qayaparqantsu tsëta ruranqampita y ninqampita, tsëpa rantinqa sinchiyätsirqanmi y willakur sïguinampaqmi kallpata qorqan (1 Rey. 19:1-21). Awmi, Jehoväqa markanta imëpis kallpata qonmi, y tsëtam rikätsikun punta cristiänokuna pasayanqampis. Bibliapa huk textonchömi kënö nin: “Tsepitaqa llapan Judea, Galilea y Samaria marcacunacho creyicoqcuna pipis mana ultrajashqanam cawacuyarqan. Y Santu Espiritupa poderninwan mas firmi cayaptinmi, Teyta Jesusman creyicur pecunaman mas yapaquecuyarqan, Diosnintsicta mantsacur” (Hech. 9:31). ¡Imanö kushikïpaqmi noqantsikpis pëkunanölla “Santu Espiritupa poderninwan mas firmi” këta puëdenqantsikta musyëqa!

9. ¿Imanirtaq nintsik Jesus ruranqankunapita yachakïqa kallpata qomanqantsikta?

⁹ Hina cristiänokunataqa alläpam kallpata qomantsik Jesuspa kawënimpita yachakunqantsik y pënö këta tïranqantsik. Kikinmi kënö nirqan: “Llapequipis utishqa y llaquishqa carnenqa, noqaman shayämï. Shayämuptiqueqa, noqam jamaratsiyashqequi. Imeca yugucho noqalla arsuta apaq cuentam qamcunawan purishun. Noqam qollmi shonqu car y umildi car, llapan nacaquiniquicunapita jamaratsiyashqequi. Noqapa yugoqa manam lasantsu. Yanapayäpteq ancashllam canqa” (Mat. 11: 28-30). Musyanqantsiknöpis, Cristuqa kallpata qokïpa y kuyakïpam nunakunata trataq. Y pë ruranqankunata yarpärinqantsik y pënö këta tïranqantsikllapis, kallpatam qomantsik cada hunaq tukïpaq yarpachakïnintsikkunachö alli tsarakunapaq.

10, 11. ¿Pikunataq congregacionchö kallpata qokïta puëdeyan?

¹⁰ Hina cristiano mayintsikkunapis alläpam kallpata qomantsik. Congregacionta rikaqkunanäqa, alläpam yanapamantsik imëka sasakunata pasanqantsik tiempokunachö. Tsëmi discípulo Santiäguqa kënö nirqan: “Qamcunapita  meqequipis [Diospa kaqchö] qeshyarnenqa, inglisiacho mandacoqcunata [“anciänokunata”, NM] qayatsiyë. Pecunanam [...] Dios Yayaman mañacuyanqa”. ¿Imanötaq tsëta rurayanqan yanapakunan karqan? “Dios Yayaman marcäcur mañacuyaptinmi, tse qeshyaq cachacärenqa. Teyta Jesusmi cachacätsir sharcaratsenqa; jutsacunata rurashqa captinpis, perdoneconqam” (Sant. 5:14, 15). Y manam pëkunallatsu yanapakïta puëdeyan, hina congregacionchö llapan këkaqkunapis huknintsik huknintsik yanapanakïta puëdentsikmi.

¹¹ Hina panikunapis tukï problëmakunapam pasayan, y warmi mayinkuna yanaparinantam munayan. Tsëqa más edäyoq kaq panikunam joven kaqkunata shumaq consejarita y yacharatsita puëdeyan. Pëkunaqa itsa tsë problëmakunapa pasayashqana. Kuyapäkoq kayanqan y warmipura shumaq tratanakuyanqanmi alläpa yanapakunqa (lei Titu 2:3-5). Hina anciänokuna y wakin cristiänokuna “qepaman cuticaqcunata callpata qor yanapecuyän[anpis]” precisanmi (1 Tes. 5:14, 15). Ama qonqashuntsu, Diosnintsikmi ‘shoqamantsic ima nacaquinintsiccunachopis’. Y, ¿imapaq? “Noqantsicpis nacacoqcunata shoqecu[napaq]” (2 Cor. 1:4).

12. ¿Imanirtaq alläpa precisan reunionkunaman ëwanantsik?

¹² Bibliapita shumaq yachatsikayämuptinmi reunionkunapis alläpa yanapamantsik kallpata tarinapaq. Jüdaspaqwan Silaspaqmi Biblia kënö nin: “Diospa profetan carninmi, allapa shumaq willapäquicuyarqan. Tsemi tsecho creyicoqcuna allapa marcäquiyoq ticrariyarqan” (Hech. 15:32). Hinamampis, reunión manaraq qallaptin y ushariptinmi cristiano mayintsikkunawan shumaq parlakurintsik. Tsëmi ima problëmapapis pasarqa cristiano mayintsikkunapitaqa rakikäkurinantsiktsu, porque rakikäkurinqantsikqa manam imachöpis yanapamäshuntsu (Pro. 18:1). Tsëpa rantinqa, santo espíritu yanapaptin Pablu kënö ninqantam qatinantsik: “Jucnintsic jucnintsic yanapanacur cuyanacur alli rureta tïrashun. Diosta alabanantsic wayicho imepis ellucashun ama waquincunanoqa mana ewashpa quecashuntsu. Antis jucnintsic jucnintsic callpata qonacur quecashun, Teytantsic Jesucristu prontuna cutimunanpaq caqta yarpäcurcur” (Heb. 10:24, 25).

Diospa Palabranqa shoqamantsikmi

13, 14. ¿Imanötaq Biblia kallpata qomantsik?

¹³ Mëtsika watakunana bautizado kashqa o Jehoväpita y awnikïninkunapita yachakur tsëraq qallëkashqapis, llapantsikpam Diospa alläpa shoqakoq Palabran Bibliaqa kapamantsik. Tsëmi Pablu kënö nirqan: “Diosnintsicpa palabrancho unepita patsa escribirëcaqcuna yachatsimantsic imecata sufrirninpis pasensiacunantsicpaq, y tse palabranta leyicurmi shumaq marcäquinintsicwan shuyaquicantsic” (Rom. 15:4). Diospa Palabranqa kallpatam qomantsik, y tsëpita yachakurmi ‘listuna quecatsic allicunallatana ruranapaq’ (2 Tim. 3:16, 17). ¡Imanömi kallpata qoykämantsik Patsapaq Diospa munëninta musyanqantsik y kushishqa kawakïta shuyaranqantsikqa! Tsëmi  Bibliapita y tsëpaq yachatsikoq publicacionkunata alli estudianantsik. Tsëqa kallpatam qomäshun y maskunachöpis yanapamäshunmi.

¹⁴ Jesusmi tsë rurëtaqa alli yachatsimarquntsik. Pëqa Diospa Palabranwanmi yachatsirqan y shoqarqan nuna mayinkunata. Kawariramurmi ishkë qateqninkunata yuripurqan y “Diospa palabranta willapar cäyitsi[rqan]”, y tsënöpam yachatsikïninkunawan shonqunkunaman charqan (Luc. 24:32). Apóstol Pablupis allim qatirqan Jesus ruranqanta. Atska kutichömi “Diospa palabranta willapäcur, cäyitserqan” wiyaqninkunata. ¿Imatataq rurayarqan tsë wiyakoqkuna? Berëachö täraqkunaqa “allapa cushicurmi chasquiyarqan tse alli willaquicunata. Y cada junaqmi estudiayarqan Diospa palabranta” (Hech. 17:2, 10, 11). Tsëchömi rikantsik cada hunaq Bibliata leinantsik alläpa precisanqanta. Bibliata y publicacionnintsikkunata leinqantsikmi yanapamäshun kallpata tarinapaq y shumaq kawakïta shuyakur kë mana alli tiempokunachö alli tsarakunapaq.

Huknöpa shoqakïta puëdenqantsik

15, 16. ¿Imakunata rurartaq edäyashqa cristiano mayintsikkunata yanapëta y kallpata qoyta puëdentsik?

¹⁵ Tukïnöpam cristiano mayintsikkunataqa yanapëta puëdentsik. Itsa qeshyëkaqkuna o edäyashqakuna tiendata rantipakoq ëwëta puëdeyantsu, tsëqa ¿manatsuraq noqantsik ëwarishwan rantipakaramunapaq? Hina kuyakoq kanqantsiktaqa rikätsikïta puëdentsik cristiano mayintsikkunapa wayinchö ima rurëpis kaptin yanapakurninmi (Fili. 2:4). Hina allitam rurashun llapankunata kuyakoq kayanqampita, yachaq kayanqampita, sinchi kayanqampita, alli markäkïyoq kayanqampita o tukïchö alli kayanqampita y alli rurayanqampita shumaq parlaparninqa.

¹⁶ Edäna cristiano mayintsikkunataqa kallpata qoyta puëdentsik watukarnin, y watukashqa tukï pasayanqanta y Jehová bendecinqankunata willamashqa shumaq wiyarnin. Tsëta rurarqa noqantsikmi más kallpata tarishun. Watukaq ëwarninqa allim kanman Bibliata y publicacionkunata leirapunqantsikqa. Alläpa allichi kanman tsë semana Täpakoq revistapita Yachakunapaq kaqta o Bibliapita Yachakunapaq reunionchö estudianapaq kaqta leirapushqaqa. Hina allim kanman Jehoväpa markan horqamunqan vidëokunata pëkunawan rikärishqa o publicacionnintsikkunachö shumaq experienciakuna yarqamunqanta cuentarishqaqa.

17, 18. ¿Imanirtaq Jehoväpa sirveqninkunaqa markäkuntsik pë yanapamänapaq y kallpata qomänapaq kaqman?

¹⁷ Mëqan cristiano mayintsiktapis kallpata wanaqta rikarqa, allim hapallantsik kanqantsik hora Diosnintsikta pëpaq shutimpa mañakurishwan (Rom. 15:30; Col. 4:12). Wakinkunata yanapanapaq yarpachakurnin o kikintsik tukï pruëbakunapa pasarnimpis, salmistanömi Diosman llapan shonquntsikwan markäkunantsik, pëqa kënömi cantarqan: “Qepi cuenta lasäshoqnikita kikin Jehoväman churë, y pëqa yanapashunkim. Alli ruraq nuna mana alliman ishkinantaqa manam haqinqatsu” (Sal. 55:22). Jehoväta mana haqishqaqa, lädontsikchömi imëpis këkanqa yanapamänapaq y kallpata qomänapaq.

¹⁸ Unë witsanchöqa, “Noqa... noqam shoqëkäyäshoqnikikuna kä” nirqanmi Jehová sirveqninkunata (Isa. 51:12). Kanan witsampis kallpata qomantsikmi y yanapamantsikmi llakishqa këkaqkunata parlakïnintsikwan y rurënintsikwan yanapanantsikrëkur sinchikushqaqa. Ciëlopaq kashqa o Patsapaq kashqapis, llapantsiktam shoqamantsik ciëlota ëwaqpaq kaqkunaman Pablu kënö nir qellqanqan: “Jesucristum y Dios Yayantsicmi alli queninwan cuyamarnintsic, alli marcäcoqta wiñepa wiñenin cushishqata catsimantsic. Pe yanapecuyäshï shonqiquicunacho callpata tsarir alli tsaracur cayänequipaq, y llapan imapis parlayanqequi y rurayanqequi allilla cananpaq” (2 Tes. 2:16, 17).

[Päginapa ura kuchunchö willakï]

¿Yarpankiku yachakunqantsikta?

• ¿Mëkamayaqtaq chashqa llakishqa këkaqkunata shoqakoq willakïnintsik?

• ¿Imakunata rurartaq wakinkunata shoqashwan?

• ¿Bibliapa mëqan textonkunataq rikätsikun Jehová sirveqninkunata shoqanqanta?

[Yachakunapaq kaqpa tapukïninkuna]

[26 kaq päginachö dibüju]

¿Shoqëta tïrëkantsikku llakikoqkunata?

[28 kaq päginachö dibüju]

Joven kar o edäna karpis puëdentsikmi cristiano mayintsikkunata kallpata qoytaqa