3 Vengakoqmi Diosqa ¿Rasumpatsuraq o manatsuraq?
3 Vengakoqmi Diosqa ¿Rasumpatsuraq o manatsuraq?
Wakinkuna niyanqan: “Nunakunapa llapan hutsankunatam Diosqa yarparëkan y infiernochömi nunakunata rupatsin”.
“Patsachö imëka desgraciakunawanmi Diosqa hutsasapa nunakunata castigan”.
Biblia yachatsikunqan: 2 Pedru 3:9 texto ninqannöpis, Jehoväqa “manam munantsu pipis condenacunanta; antis shuyarëcan nunacuna jutsancunata jaqiriyänantam”. Pëqa manam rikarëkantsu mana alli rurënintsikkunata, sinöqa shonquntsik imanö kanqantam. Awmi, “nawinkunaqa hinantin patsapam rikarëkan pëllata llapan shonqunkunawan kuyaqkunata kallpanwan yanapanampaq” (2 Crónicas 16:9).
Infiernochö nunakunata Diosnintsik rupatsinqantaqa manam Biblia yachatsikuntsu. Rasun kaqchöqa, tsë rurëta pensëllatapis Diosqa melananmi. Diospa más hatun castïgonqa pitapis kawëninta qochirinqanmi (Jeremías 7:31; Romanos 6:7). Desgraciakuna karnin imëkatapis ushakätsinqanqa manam Diospa culpantsu, antis tsëkunaqa mana yarpanqantsik hörakunam pasakun (Eclesiastés 9:11).
¿Imanötaq yanapashunki rasumpa kaqta musyë? Dios ‘perdonamänapaq listo këkanqanta’ y mana ras piñakunqanta musyëqa yanapamantsik pëman más witinapaqmi (Salmo 86:5). Manam mana allikunata ruranqantsikrëkurllatsu ni castigamänata mantsarllatsu Diostaqa servinantsik. Tsëpa rantinqa, kuyarninmi pëmanqa más markäkuntsik. Y tsënö kuyanqantsikmi yanapamantsik imëka ruranqantsikchöpis kushitsita tïranantsikpaq (Mateo 22:36-38; 1 Juan 5:3).
Llapan nunakuna alli kaqllata rurayänanta munarpis, Diosqa musyanmi atskaq nunakuna tsëta rurëta mana puëdeyänampaq kaqta. Hutsankunapita mana wanakoqkunata mana ushakätsirqa, imëka leykunata churarir mana cumplitseq gobernantenöchi kanman, y tsënö mana cumplitsiptinqa, imëka mana alli rurëkuna y llakikïkunaqa manachi ni imëpis ushakanmantsu (Eclesiastés 8:11). Mana alli rurëkunata imëyaqpis mana rikaräkunampaq kaqta musyëqa, yanapamantsik shamoq tiempota kushishqa shuyanapaqmi. Pëqa awnikushqa mana alli rurëllata munaqkunata ushakätsinampaqmi. Tsënöpam, qallananchö Diosnintsik munanqannö mana wanushpa kë Patsachö kawakuyanqa qollmi shonqu kaq nunakunaqa (Salmo 37:10, 11, 29). *
[Päginapa ura kuchunchö willakï]
^ par. 7 Kë Patsata Diosnintsik huk Paraïsoman tikratsimunampaq kaqtaqa willakun, Rasumpëpaqa, ¿imatataq Biblia yachatsikun? libropa 3 y 8 kaq capïtulonkunam.
[6 kaq päginachö ninqan]
¿Castigamänantsikta mantsarlla adoranantsiktatsuraq Diosqa munan?
[6 kaq päginachö pikunapa kanqan]
Doré shutiyoq nunapa dibüjon
