4 Diosqa mana allita ruraqmi ¿Rasumpatsuraq o manatsuraq?

Wakinkuna niyanqan: “Diospa makinchömi kë Patsa këkan y pë munaptinmi imëkapis pasakun. Kë Patsachö chikinakïkuna, mana alli rurëkuna y nunapura tukïnöpa hipatsinakuyanqanqa Diospa culpanmi”.

Biblia yachatsikunqan: Jehovätsu mana culpayoq imëka mana allikuna kanampaqqa. Antis pëpaqqa Biblia kënömi nin: “Rurëninkunaqa hutsannaqmi, näninkunaqa alli kaqllam. Mana haqikoq Dios, pëchöqa manam ima mana alli rurëkuna kantsu” (Deuteronomio 32:4).

Diosqa llapan nunakunapaqmi imëkatapis ruran, hasta mana wiyakï munaqkunapaqpis. Këllaman yarpärishun, pëqa “intinta intitsimun alli nunapaq y mana alli nunapaq[mi]. Y tamyantapis tamyatsimun llapanpaqmi” (Mateo 5:45). Hinamampis, tukï color y tukï costumbreyoq nunakunatapis igualpam pëqa rikan, tsëtam rikätsikun Hechos 10:34, 35 texto kënö nirnin: “Allim noqa cäyicurerqö llapan nunatapis Dios iwallla ricamanqantsicta. Porqui jinantin marcacho pipis allicunata rurar y Diosta respetar cacuyaptenqa, pëqa chasquinmi”.

Tsëqa, ¿imanirtaq tukï mana alli rurëkuna kan? Wakinkunaqa Diosta mana wiyakïta akrarmi tukï mana allikunata rurarnin kawakuyan (Deuteronomio 32:5). Hinamampis Bibliaqa rikätsikun chikeqnin Diablu huk tiempopa kë Patsata gobernanampaq Dios haqishqa kanqantam (1 Juan 5:19). * Tsënö kaptimpis, ichikllachönam Diablupa makimpita kë Patsata Diosnintsik qochirinqa. Awmi, tiempotapis patsätsishqanam “Diablupa rureninta ushacäratsinanpaq” (1 Juan 3:8).

¿Imanötaq yanapashunki rasumpa kaqta musyë? Itsa suwanakïta, allqutsanakïta y tukï mana alli rurëkunata noticiakunachö rikarnin o wiyarnin alläpa llakikunki. Tsënö karpis, imanöpa tukï problëmakuna kanqanta musyanqëkiqa yanapashunkim, imanir kë Patsachö imëka mana allikuna kanqanta, y nunakuna altsayänanrëkur tukïta rurayaptimpis imanir mana allillachö ushanqanta musyanëkipaqmi (Salmo 146:3). Hinamampis, ushakaqpaq kaqkunallachö tiempïkita y kallpëkita ushanëkipa rantinqa, shamoq tiempopaq Dios awnikunqanta ruramunampaq kaqta shuyäkurmi kawakunki (Apocalipsis 21:3, 4).

Imëka desgraciapis kikintsikta pasamashqaqa, alläpam yanapamantsik imanöpa tsëkuna pasanqanta musyanqantsik. Pipis ima mana allitapis ruramashqaqa, itsa Diospa unë profëtan Habacucnö sientekushwan, pëqa kënömi nirqan: “Leyta tumaratsiyan, y alli rurëqa imëpis kantsu” (Habacuc 1:4). Diosqa manam Habacucta castigarqantsu tsëta ninqampita. Antis tsëkunata ushakätsinampaq huk tiempota patsätsishqana kanqantam rikätsirqan, y imëkata pasarpis kushishqa kawakunampaqmi yanaparqan (Habacuc 2:2-4; 3:17, 18). Hina tsënöllam Diosnintsik imëka mana allikunata ushakätsimunampaq kaqman markäkunqëkiqa yanapashunki, tukïta pasarpis mana alläpa llakinänëkipaq y shonqïkichö yamë këta tarinëkipaq.

[Päginapa ura kuchunchö willakï]

[7 kaq päginachö ninqan]

¿Diospa culpankutsuraq mana alli rurëkuna y hipakïkuna?

[7 kaq päginachö pikunapa kanqan]

© Sven Torfinn/Panos Pictures