Jehoväpa kaqchö poquyänampaq ollqukunata yanapashun

“Cananpitam nunacunata noqapaq pescamunqui.” (LUC. 5:10.)

1, 2. a) ¿Imatataq atskaq ollqukuna rurayarqan Jesus yachatsikuptin? b) ¿Imakunatataq rikäshun kë yachatsikïchö?

HUK kutim hinantin Galileapa yachatsikur puriramurnin, Jesuswan qateqninkuna hamayänampaq huk barcoman lloqarqur karuta ëwakuyarqan. Pero nunakunaqa chakipam qatiyarqan. Y tsë qateq nunakunachöqa “ollqullam pitsqa waranqano (5,000) [kayarqan], y manam warmicunatawan wamracunataqa yupayarqanpistsu” (Mat. 14:21). Y huk hunaqchönam mëtsikaq nunakuna witiyarqan hampishqa këta munar y yachatsikunqanta wiyayänanrëkur. Y “cayarqan chuscu waranqam (4,000) ollqulla. Warmicunatawan wamracunataqa manam yupayarqanpistsu” (Mat. 15:38). Awmi, mëtsikaq ollqukunam Jesusman ëwayarqan y yachatsikunqanta chaskikuyarqan. Y pëqa más nunakuna tsënö rurayänantam munarqan. ¿Imanötaq tsëtaqa musyantsik? Discïpulonkuna mëtsika pescädokunata sutarayämunampaq milagrota rurarmi, Simonta kënö nirqan: “Cananpitam nunacunata noqapaq pescamunqui” (Luc. 5:10). Tsënö nirmi rikätsikurqan qateqninkunaqa pescaq cuenta nunakunata yanapayänampaq kaqta. Y tsënö rurarmi mëtsikaq ollqukunata yanapayänan karqan.

² Kanan witsampis, kanmi Bibliapa yachatsikïninta chaskikoq y más yachakïta munaq ollqukuna (Mat. 5:3). Tsënö kaptimpis, wakinkunaqa tsënöllam kakuyan y manam Jehoväpa kaqchö más poquyantsu. ¿Imataraq rurashwan pëkunata yanapanapaq? Musyëmi, Jesusqa manam ollqu kaqkunallata yachatsinampaqtsu shamurqan, tsënö karpis, pëkunapa tukï yarpachakïninkunapaqmi parlarqan. Noqantsikpis pënöllam nunakunata imëkapaq yarpachakuyanqanchö yanapanantsik. Ollqukuna más yarparäyanqan kima cösaskunata rikärishun: 1) wanayanqankunapaq trabajayänan, 2) wakinkuna imatapis niyänanta mantsayanqan y 3) imatapis alli rurëta mana yachayänampaq kaqta pensayanqan.

Wanayanqankunapaq trabajayänan

3, 4. a) ¿Imapaqtaq atskaq ollqukuna más yarpachakuyan? b) ¿Imanirtaq wakin ollqukunaqa Diospa kaqpitapis trabäjonkunata más precisaqpaq churayan?

³ Huk kutim leykunata qellqaq nuna Jesusta kënö nirqan: “Mayestru, meta tseta ewaptiquipis, noqaqa qatishqequim”. Tsënam Cristuqa kënö nirqan: “Diospita Shamushqa Nunapaqa manam ni iman cantsu jamarinanllapaqpis”, tsëmi tsë nunaqa qatita munarqannatsu. Tsë nunaqa mëchö mikunampaq kaqta y mëchö pununampaq kaqta yarpakachartsunchi Jesusta qatirqannatsu, Bibliaqa manam willakuntsu Jesuspa qateqninman tikranqanta (Mat. 8:19, 20).

⁴ Mëtsikaq ollqukunam imëkayoq këta puntaman churar Jehoväpa kaqta qonqariyan. Masqa yarpachakuyan alli estudiashqa këpaq y alli pagashqa trabäjokunata taripaqmi. Dioswan amigo këpitaqa, atska qellëyoq kë más precisanqanta y más alli kanqantam pensayan. Itsachi Bibliapita yachakïtaqa gustayan, pero ‘que patsacho imapaqpis yarpacachar, y capoqyoq quepaq locuyarmi’ llapan yachakuyanqantapis qonqariyan (Mar. 4:18, 19). Diospa kaqta puntaman churayänampaq Jesus qateqninkunata yachatsinqanta rikärishun.

5, 6. ¿Imataq yanaparqan Andresta, Pëdruta, Santiäguta y Juanta trabäjonkunata haqïkur Diospita yachatsikïta puntaman churayänampaq?

⁵ Andreswan wawqin Simon Pëdrum pescar  trabajayaq, hina tsënöllam Juan, wawqin Santiagu y teytan Zebedeupis trabajayarqan. Tsë trabäjonkunachöqa allitsunchi ganayaq, tsëchi más trabajadorkunatapis contratayaq (Mar. 1:16-20). Juan Bautista yanapaptinmi, Andreswan Juanqa Jesusta reqiriyarqan y creiyarqan pë Mesias kanqanta. Andresqa wawqin Simon Pëdrutam willarqan, y itsachi Juanpis wawqin Santiäguta willaq ëwarqan (Juan 1:29, 35-41). Tsëpita qateqnin killakunaqa chuskunmi Jesusta yanaqäyarqan Galilëachö, Judëachö y Samariachö yachatsikur puriptin, pero tsëpitaqa pescar kayanqan trabäjonkunamanmi kutikuyarqan. Diospa kaqta kuyarpis, pëpita yachatsikïtaqa manam precisaqpaqtsu churayarqan.

⁶ Tiempo pasariptinnam, qateqninkuna kayänampaq y ‘nunacunata pescayänanpaq’ Pëdrutawan Andresta Jesus invitarqan. ¿Imatataq rurayarqan? “Tse öram atarayancunata jaqiricur, Jesusta qatircur eucuyarqan”. Y Santiäguwan Juanpis “tse öra papänin Zebedeuta lanchatawan jaqiricur, Jesusta qatircur eucuyarqan” (Mat. 4:18-22). ¿Imataq yanaparqan llapan tiemponkunawan Diospita yachatsikur puriyänampaq? ¿Shumaqtanö rikarllaku tsëta rurayarqan? Manam. Jesuswan kayanqan killakunam yachatsikunqanta wiyayarqan y milagrokuna ruranqanta rikäyarqan, alli kaqta kuyanqanta y yachatsikuptin nunakuna shumaq chaskikuyanqantapis. Tsënöpam Jehoväman más markäkuyarqan o yärakuyargan.

7. ¿Imanötaq Bibliapita yachakïkaqkunata yanapashwan Jehová markanta cuidanqanman más markäkuyänampaq?

⁷ Jesus ruranqampita yachakurnin, ¿imanötaq Bibliapita yachakïkaqkunata yanapashun Jehoväman más markäkuyänampaq? (Pro. 3:5, 6.) Masqa imanöpis yachatsikunqantsikwanmi. Imapitapis alli yachatsirqa, Diospa gobiernonta puntaman churarqa atska bendicionkunata chaskinampaq kaqtam imëpis rikätsishwan (lei Malaquías 3:10 * y Mateo 6:33). Jehová markanta cuidanqanta tuki textokunawan rikätsirpis, rurënintsikwanmi masqa yanapashun. Markäkïninkuna más sinchiyänampaqqa yanapashun kawënintsikchö Jehová imanö yanapamanqantsikta willarmi. Hina allim kanqa publicacionnintsikkunachö yarqamoq experienciakunata willarishqapis. *

8. a) ¿Imanirtaq alläpa precisan Bibliapita yachakïkaqkuna ‘Jehová alli kanqanta rikäyänan y kushikuyänan’? b) ¿Imanötaq Bibliapita yachakïkaqkunata yanapantsik Jehoväpa kuyakïninta kikinkuna rikäyänampaq?

⁸ Pero Bibliapita yachakïkaqkunaqa manam pipis Diospa bendicionninta chaskinqanta wiyayanqanllapitatsu o leiyanqanllapitatsu Jehoväman más markäkuyanqa. Kikinkunam Diospa kuyakïninta rikäyänan. Tsëmi salmota qellqaq kënö nirqan: “Jehová alli kanqanta rikäyë y kushikuyë; pëpa tsapäkïninchö kaq nunaqa alläpa kushikutsun” (Sal. 34:8). ¿Imanötaq Bibliapita yachakïkaqta yanapashun Jehová alli kanqanta rikänampaq? Këman pensarishun, itsa qellëta pishipakur këkanman y hinamampis kallpachakïkanman cigarro shoqï o washku upyë o ima viciotapis haqinampaq (Pro. 23:20, 21; 2 Cor. 7:1; 1 Tim. 6:10). Tsëqa yachatsinantsik tsë vicionkunata haqinanrëkur  Jehoväta kallpata mañakunampaqmi. Tsënömi yanapashun Diospa kuyakïninta rikänampaq. Hina allim kanqa Diospa kaqta puntaman churarnin Bibliata estudianampaq, reunionkunapaq preparakunampaq y Yachatsikuyänan Wayiman ëwanampaq animashqaqa. Kallpachakunqanta Jehová bendecinqanta kikin rikarmi pëman más markäkunqa.

Wakinkuna imatapis niyänanta mantsayanqan

9, 10. a) ¿Imanirtaq Nicodëmuwan Arimatëapita Jose musyatsikuyarqantsu Cristuman creiyanqanta? b) ¿Imanirtaq wakin ollqukunaqa Cristuta qatita mantsayan?

⁹ Nunakuna imatapis niyänanta mantsarmi wakin ollqukunaqa Cristuta qatita mantsayan. Tsënöllam Nicodëmuta y Arimatea markapita Josëta pasarqan. Ishkampis manam musyatsikuyarqantsu Jesusman creiyanqanta judïokuna imatapis niyänanta o rurayänanta mantsar (Juan 3:1, 2; 19:38). Y manam ardëtsu mantsapakuyaq. Judïokunata pushaq religiösokunaqa Jesusta alläpa chikirmi pëman markäkoqkunata o yärakoqkunataga leyta yachatsikuyänan wayikunapita yarquyaq (Juan 9:22).

¹⁰ Kanan witsampis tsënöllam pasan më tsëchö. Huk ollqu Diospita más yachakïta munaptin, Biblia yachatsikunqanta wiyakuptin o huk religionman ëwar qallëkuptinqa, trabajaq mayinkuna, amïgonkuna y kastankunam pëpaq mana allita parlayan. Wakin markakunachönäqa huk religionchöna kanampaq kaqta niriptinllam kawënin peligroman churakärin. Y huk ollqu ejercitochö, polïticachö o comunidächö trabajaptinnäqa más sasaran. Alemania nacionpita huk nunam kënö nirqan: “Qamkuna Testïgokuna Bibliapita yachatsikuyanqëkiqa rasun kaqllam. Pero kanan Testigo tikrariptïqa warëpaqqa llapan nunakunanam musyariyanqa. ¿Ima niyanmanraq noqapaqwan familiäpaq trabäjöchö, markächö reqimaqnïkuna? Manachi aguantëta puëdëmantsu”.

11. ¿Imanötaq Jesus qateqninkunata alistarqan nunakuna chikir qatikachäyaptin alli tsarakuyänampaq?

¹¹ Jesuspa qateqninkunaqa nunata mantsëninkuna mana vencinampaqmi kallpachakuyarqan (Mar. 14:50, 66-72). ¿Imanötaq Jesus yanaparqan marka mayinkuna contranchö kayaptin tsarakuyänampaq? Chikishqa kayänampaq kaqta willarmi alistarqan. Puntataqa nirqan qateqninkuna kayanqanrëkur nunakuna pëkunapaq mana allita parlayänampaq kaqtam, kënömi nirqan: “Cushicuyë, nunacuna chiquiyäshuptiqui, qarquyäshuptiqui y allqutsayäshuptiqui, mana alli ruraqtano lebantayäshuptiqui, tseqa Diospita Shamushqa Nunaman creyicuyanqequirecurmi” (Luc. 6:22). Hinamampis Diosman mañakurqa kallpata y valorta tariyänampaq kaqtam nirqan (Luc. 12:4-12). Hina yachatsikunqanta wiyakoqkunatapis animarqanmi discïpulonkunawan parlayänampaq y amigo kayänampaq (Mar. 10:29, 30).

12. ¿Imanötaq tsëraq Bibliapita yachakïkaqkunata yanapashwan nunata mantsëninkuna mana vencinampaq?

¹² Noqantsikpis Bibliapita yachakïkaqkunatam yanapanantsik nunata mantsëninkuna mana vencinampaq. Awmi, puntallapitana tsëkuna pasakunampaq kaqta willarqa alli tsarakuyänampaqmi yanapantsik (Juan 15:19). Allichi trabajaq mayinkuna o pipis imatapis tapupäyaptin Bibliapita shumaq y entiendeyänampaqnölla contestayänampaq  yachatsishwan. Pëkunapa amïgonkuna karnimpis, congregacionchö wakin cristiänokunatam reqitsishwan y pëkuna pasëkäyanqanta pasashqa cristiänokunatam reqitsishwan. Hina yachatsinantsikmi imëpis shonqunkunapita patsë Jehoväta mañakuyänampaq. Tsënö rurashqam Jehoväman más witiyanqa y qaqa cuenta tsapäkoq kanqantam rikäyanqa (lei Salmo 94:21-23 * y Santiagu 4:8).

Rurëta mana yachayänampaq kaqta pensayanqan

13. ¿Imanöraq wakin ollqukunataqa imatapis rurëta mana yachayänampaq kaqta pensayanqan yanapanmantsu Diospa kaqchö más poquyänampaq?

¹³ Wakin ollqukunaqa alleqlla mana leir, parlëta watakar o alläpa mantsakoq karninmi Diospa kaqchö más yanapakïta tïrayantsu. Wakinkunaqa alläpam mantsakuyan atska nunakunachö imatapis pensayanqanta o creiyanqanta parlëta. Itsachi estudiëta, reunionkunachö parlëta y Diospita yachatsikïta alläpa sasatanö rikäyan. Huk wawqim kënö nin: “Wambra kanqä witsanqa punkuman raslla witirirninmi timbreta ardë tocaqtukoq kä, y nïkurmi yachëllapa witikureq kä, pipis mana rikämänan o wiyamänanrëkur”, y nïkurmi “wayin wayin yachatsikïqa qeshyaratsimaqmi” nin.

14. ¿Imanirtaq Jesuspa qateqninkuna puëdeyarqantsu huk jövenpita supëta qarqïta?

¹⁴ Pensarishun demonioyoq wambrata hampita mana puëder Jesuspa qateqninkuna imanö sientekuyanqanman. Tsë jövenpa teytanqa Jesusman witïkurmi kënö nirqan: “Tëte, tsurilläta ancupëcullë; ataqui tsarirninmi, allapa jipatsin, öratanäqa yacumanpis o ninamampis seqirinmi. Disipuliquicunamanpis apamorqömi, peru pecuna manam puediyashqatsu cachacätsimita”. Cristuqa supëta qarqurirmi tsë jöventa kachakäratsirqan. Tsëpitanam qateqninkuna Jesusta kënö tapuyarqan: “¿Imanirtaq noqacunaqa puediyarqötsu wamrapita supë qarqita?”. Pënam kënö nirqan: “Porqui qamcunaqa manam alleqllaqa marcäcuyanquiraqtsu noqaman. Rasontam niyaq: Sitsun marcäquiniquicuna canman mostasa muruno ichicllanllapis; que jircata ‘Juc laduman witicurï’ niyaptiquipis, que jirca witicurinmanmi, y imapis ruracärinmanmi” (Mat. 17:14-20). Tsëqa rasunmi, Jehoväman markäkunqantsikmi yanapamantsik hirkatsikan problëmakuna kaptimpis alli tsarakunapaq. Pero tsëta qonqëkur pipis kikinllapita problëmankunata altsëta tïrarqa, manam altsëta puëdenqatsu, tsënöpanam kikinmampis markäkunnatsu o yärakunnatsu.

15, 16. ¿Imanötaq yanapashwan Bibliapita yachakïkaqkuna imatapis alli rurëta mana yachayänampaq kaqta pensayaptinqa?

¹⁵ Bibliapita yachakïkaqkuna imatapis alli rurëta mana yachayänampaq kaqta pensayaptinqa, kikinkunallaman pensayänampa rantin Jehoväta cuentaman churayänampaq animarninmi yanapashwan. Tsëta rurayänampaqmi Pedru kënö nirqan: “Umillaquicuyë puedeq Diosman, dispunishqan öra chämuptin qamcunata mas baleqman churayäshunequipaq. Imapis yarpacachëniquicunata Diosnintsicpa muneninman jaqiriyë” (1 Ped. 5:6, 7). Tsëta lograyänampaqqa yachatsinantsik Jehoväpa kaqchö imanö poquyänampaq kaqtam. Diospa kaqta puntaman churaq nunaqa Bibliatam kuyan, y ‘Santu Espirituyoqcuna’ imanö kayanqantam kawëninchö rikätsikun (Gal. 5:22, 23). Mana haqitam mañakun (Fili. 4:6, 7). Y ima problëmata altsanampaq o ima cargoyoq karpis Jehovätam kallpata mañakun (lei 2 Timoteu 1:7, 8).

 ¹⁶ Bibliapita wakin yachakïkaqkunaqa leita, parlapänakïta o atskaq nunakunachö parlëtam yachakuyänan. Wakinkunanam Jehoväta manaraq reqir imëka mana allikunata rurashqa karnin alläpa hutsayoqnö sientekuyan, y Jehoväta serviyänampaq mana väliyanqantam pensayan. Tsënö sientekoqkunataqa kuyëpa y shumaqlla yachatsinqantsikmi alläpa yanapanqa. Jesus ninqannöpis: “Qeshyaqcunallam medicutaqa nesitayan; sanu caqcunaqa manam” (Mat. 9:12).

Más ollqukunata Diospita yachatsishun

17, 18. a) ¿Imanötaq yachatsikïnintsikwan más ollqukunaman chashwan? b) ¿Imatataq qateqnin kaq yachatsikïchö yachakushun?

¹⁷ Alläpam munantsik Diospa kaqchö yakunaq cuenta këkaq ollqukuna Bibliapa yachatsikïninta wiyakuyänanta (2 Tim. 3:16, 17). Tsëqa, ¿imanöraq yachatsikurnin más ollqukunaman chashwan? Wayinkunachö kayanqan hörakuna yachatsikurmi, itsachi tardekunapa, ampikunapa, semana ushëkuna o feriädokunapa. Allichi kanman wayichö teyta kaqpaq tapukurinqantsikqa. Allinö kaptinqa, ama haqishuntsu mëchö tsëchö këkarpis ollqukunata yachatsita, ni congregacionchö cristiänakunapa mana creikoq majankunawan parlëtapis.

¹⁸ Llapan nunakunatam yachatsir siguinantsik, alli shonquyoq karqa wiyakïta munayanqam. Hina rasumpa yachakï munaqkunataqa shumaqllapa yachatsishun. Y, ¿ima nishwanraq bautizakushqa ollqukunapaqqa? Diospa markanchö más ollqukuna yanapakuyänampaqqa, ¿imanöraq yanapashwan? Tsëtam qateqnin kaq yachatsikïchö rikäshun.

[Päginapa ura kuchunchö willakïkuna]

¿Imatataq contestashwan?

• ¿Ima yanapakïtataq ollqukuna chaskiyanman Diospa kaqchö más yanapakuyänampaq?

• ¿Imanöraq yanapashwan tsëraq yachakïkaqkunata tapupäyaptin imanöpis contestayänampaq?

• ¿Imaraq wakin ollqukunata yanapanqa imatapis alli rurëta mana yachayänampaq kaqta pensayaptinqa?

[Yachakunapaq kaqpa tapukïninkuna]

[25 kaq päginachö dibüju]

¿Imëkanöpapis ollqukunata yachatsita tïrëkantsikku?

[26 kaq päginachö dibüju]

¿Imanötaq yanapantsik Bibliapita yachakïkaqkuna tukï pruëbakunata pasarnin alli tsarakuyänampaq?