Rasumpa kaqqa kawënikita altsaramunmanmi

ITSACHI kë revistachö rikanqantsiknöpis, wiyashqanki o yachatsishqa kayäshunki Diospita mana rasumpa kaq yachatsikïkunata. Tsënö kaptimpis, itsa tsë creinqëkikunata haqinanqa sasaraq kanman, unë tiempopita creishqa kaptikinäqa.

Tsëqa pasakunmi. Wakin religionkunachöqa manam pushaqninkuna nunakunata niyantsu yachakikäyanqankunata Bibliawan igualatsiyänampaq. Wakinkunanam, mana alli yachatsikïninkunata tsapëta tïrayan Bibliapa yachatsikïninkunaqa alläpa sasa o aja entiendenan kanqanta nir, o llapankuna entiendeyänampaqtsu qellqashqa kanqantam niyan. Pero këman yarpärishun, Jesuspa qateqninkunaqa manam alläpa estudiashqatsu kayarqan, tsënö karpis pë yachatsikunqantaqa rasllam käyiyarqan o mayayaran (Hechos 4:13).

Itsa creinqëkikuna alli o mana alli kanqanta musyëta tïrankitsu tsëta rurarqa Diosman mana markäkunqëkita rikätsikïkanqëkita pensar. Pero ¿Diosnintsikqa piñakunmantsuraq noqantsikpaq imata munanqanta musyanantsikrëkur Bibliata estudiashqaqa? Manam. Bibliaqa nunakunapaq Diospa cartan cuentam, y pëqa munan llapan nunakuna tsëpita yachakuyänantam. Romanos 12:2, Mushog Testamento Conchucos Quechua - Sur Bibliam kënö nin: “Yarpachacuyay Teyta Dios munanganman[nö] cawacuyänayquipä. Tsaynö cawarmi tantiyayanki Tayta Dios munangannö caway alli caway canganta”.

Diospita yachakunqantsikqa manam musyanantsikllapaqtsu, sinöqa kawënintsikchö más alli kawakunapaqmi yanapamänantsik (Juan 8:32). Tsënömi pasarqan qallananchö parlanqantsik Deanne shutiyoq warmita. Kanan witsanqa Diospa Palabrampita yachakushqa kaptinmi Diosman markäkïninqa sinchi. Kënömi nin: “Biblia llapanta alli claro willakunqantaqa manam musyarqätsu hasta estudiar qallanqäyaq. Kananqa Jehoväta reqïmi y musyämi mana reqipaqnö Dios mana kanqanta, antis ciëlochö këkaq kuyakoq Teytä kanqantam musyä. Y musyänam imapaq kawanqätapis”.

Itsa qamqa kënö ninkiman: “Noqapis Bibliataqa estudiarqömi, pero manam alläpaqa yanapamashqatsu”. Tsënö pensarpis ama qelanëtsu. Diospita mana rasumpa kaqkunata yachakushqa këkar, Biblia yachatsikunqanta entiendïta tïrëqa, imëka huk llaveta mana candädonman yakëkur kichëta tïrënöchi kanman. Itsa lläveqa candädoman yëkunman, pero ajanankimanchi candädota mana kichamuptinqa.

¿Rasumpa kaqta yachakur Diosta reqita munankimantsuraq? Tsënö kaptinqa, markëkichö Jehoväpa testïgonkunawan parlarinëkipaq, o kë revistata qellqamoqkunaman Bibliapita debaldilla yachatsiyäshunëkipaq qellqarinëkipaqmi niriyaq (4 kaq päginanchömi atska direccionkuna këkan).

[9 kaq päginachö ninqan]

“Yarpachacuyay Teyta Dios munanganman[nö] cawacuyänayquipä. Tsaynö cawarmi tantiyayanki Tayta Dios munangannö caway alli caway canganta.” (ROMANOS 12:2, MTCS.)