¿Imanirtaq Diospa espïritun pushamänata wanantsik?

“Qammi Diosnï kanki, munëniki rurëta yachatsimë. Espïritïkiqa alläpa allim; [...] pushamätsun.” (SAL. 143:10.)

1. ¿Ima igualatsikïtaq rikätsikun mana rikanqantsik pushamënintsikta puëdenqanta?

¿IMËLLAPIS huk brüjulawan mëchö kanqëkita musyëta tïrarqunkiku? Huk brüjulaqa reloj niraqllam y huk agujanllam kapun, tsë agüjanqa imëpis norte kaq lädonmanmi apuntaran. ¿Imanir? Tsë norte kaq lädochömi imëka huk imanpa kallpan cuenta kan, tsëmi brüjulapa agüjantaqa tsëllaman imëpis apuntarätsin. Atska pachak watakunapanam imatapis estudiayänampaq asheqkuna y më tsëpa viajaqkuna, Patsapa y lamarpa ëwayänampaq brüjulata utilizäyashqa.

2, 3. a) ¿Ima alläpa puëdeq kallpatataq Jehová utilizarqan tukïta kamarnin? b) ¿Imanötaq musyantsik santo espíritu pushamänapaq kaqta?

² Pero kanmi huk mana rikakoq precisaq kallpa kawënintsikchö pushamënintsikta puëdeq. ¿Imaraq? Bibliapa qallanan versïculonkunachömi tsëpaqqa willakun. Mëtsika waranqa watakunachö Jehová tukïta ruranqampaqmi Génesis libro kënö nin: “Qallananchömi Dios rurarqan ciëlokunata y patsatapis”. Y qateqnin versïculollachönam willakun tsëta ruranampaq huk alläpa puëdeq kallpata utilizanqanta, kënömi nin: “Diospa kallpanqa wakman këmanmi kuyïkarqan” (Gén. 1:1, 2). ¿Imataq wakman këman kuyïkarqan? Santo espïritum, tsë kallpawanmi Patsachö imëka kaqkunata kamarqan. Awmi, noqantsikpa kawënintsikpis Jehová kë espïrituta utilizar tukïta kamanqampitam (Job 33:4; Sal. 104:30).

³ Tsënö kaptimpis, Diospa espïritun shütanapaq y kawanapaq yanapamanqantsikta musyëllawanqa manam kushikushwantsu. Tsë kallpa huknöpa yanapamänantsiktapis haqinantsikmi. Diospa Tsurimpis tsëtam rikätsikurqan qateqninkunata kënö nirnin: “Santu Espiritu[m] [...] rason caqllata cäyitsiyäshunqui” (Juan 16:13). Rasun kaqchöqa, ¿imataq santo espíritu y imanirtaq alläpa alli kanqa pushamänantsikta haqishqaqa?

Santo espíritu imanö kanqan

4, 5. a) ¿Imataq niyan santo espïritupaq Kima Dios Hukllëllachö kanqanta creeqkunaqa? b) ¿Imanöraq yachatsikushwan santo espíritu imanö kanqanta?

⁴ Yachatsikur purinqantsikchöqa mëtsikaq nunakunatam tarintsik, Kima Dios Hukllëllachö kanqanman creeqta. Tsëmi santo espíritu Teytanö y Tsurinnö igual-lla kanqanta creiyan (1 Cor. 8:6). Tsënö yachatsikuyaptinmi, wakin Bibliakunachöqa santo espïrituta mayúscula letrakunawan qellqayashqa. Tsënö karpis, griego idiömata yachatsikoq alläpa reqishqa Joan F. Mira shutiyoq profesorqa, España nacionchö 2006 watam, Mateo, Marcos, Lucas, Juan, Hechos y Apocalipsis  librokunata horqamurqan, tsëchömi santo espïrituta minúscula letrakunawan qellqarqan. Y tsënöqa qellqanaq santo espíritu huk nuna mana kanqanta Biblia rikätsikuptinshi. *

⁵ Tsëqa, ¿imanötaq santo espíritu? Traducción del Nuevo Mundo de las Santas Escrituras (con referencias) Bibliaqa, Génesis 1:2 textopaq päginampa ura kuchunchömi kënö nin: “Espíritu nir traducishqa karpis [Hebreo idiömachö] rú·aj palabraqa ‘viento’ nishpapis traducikanmi, hina huk palabrakunawan traducikarpis mana rikakoq kallpa kanqantam rikätsikun” (Génesis 3:8 y 8:1 textokunapa päginampa ura kuchunchö neqtawan igualaratsi). Imanömi viento kuyoqta rikantsiktsu pero imëkata kuyutseqtaqa rikantsik, tsënöllam santo espïrituta mana rikarpis yanapakoq kanqantaqa mäkuntsik. Tsëqa nunakunaman o imëka kaqmampis munënin rurakänampaq Dios kallpanta churanqanmi. ¿Sasaraqku alläpa puëdeq y santo Diospita tsë kallpa shamunqanta creinan? Manam (lei Isaías 40:12, 13 *).

6. ¿Imatataq David rogakur Jehoväta mañakurqan?

⁶ Awmi, Jehoväqa espïritunta utilicëta puëdenmi pushamänapaq. Tsëtam awnirqan Davidta: “Käyikïnikim [yachënikim] qoshqëki, y alli nänipa purinëkipaqmi yachatsishqëki” nirnin (Sal. 32:8). Pero, ¿kë salmista Jehoväpa pushakïninta chaskita munarqanku? Awmi, kënömi rogakurqan: “Qammi Diosnï kanki, munëniki rurëta yachatsimë. Espïritïkiqa alläpa allim, alli rurëlla kaq patsapa pushamätsun” (Sal. 143:10). Noqantsikpis salmistanöllam santo espíritu pushamänata munanqantsikta rikätsikunantsik. ¿Imanir? Yachakurishun santo espíritu pushamänapaq chusku yachatsikïkunata.

Kikintsikllaqa manam pushakïta puëdentsiktsu

7, 8. a) ¿Imanirtaq kikintsiklla pushakïta puëdentsiktsu? b) ¿Ima igualatsikïtaq rikätsikun kë mana alli mundochö kikintsiklla pushakï upa kë kanqanta?

⁷ Puntataqa, hutsasapa karninmi Jehoväpa santo espïritun pushamänata wanantsik, kikintsikllapitaqa manam ima rurëta puëdentsiktsu. Pushë palabraqa, “nanïta rikätsi” hina “käyitsi, consejë” ninanmi (Diccionario Anaya de la Lengua). Awmi, nunaqa manam kikinlla pushakunampaqtsu kamashqa kashqa y masran hutsayoq kanqampitanäqa. Tsëmi Jeremías kënö qellqarqan: “Alleqmi musyä Teyta Jehová, nunapa nänin kikimpa mana kanqanta. Ni kikinllapita mana purinqanta” (Jer. 10:23). Hinamampis, Jehoväqa tsë profëtata nirqan hutsasapa kar kikintsik pushakïta mana puëdenqantsiktam, kënömi nirqan: “Shonquqa imëkapitapis más traicionërom, y imatapis rasllam munan. ¿Pitaq reqinman?” (Jer. 17:9; Mat. 15:19).

⁸ Reqipakur pureq nuna mana reqinqan y mana ni pï täranqan sitiopa mäpan mana këkäpuptin ëwaqman pensarishun. Mana reqikar hapallanlla,  mana ni pï pushaqnin këkaptin o brüjulanllapis mana këkäpuptinqa, upa këtachi rurëkanman. Imapis mana kaqchö kawëta mana yacharqa wanurinmampischi. Tsënöllam pasan kë mana alli mundochö Diospa yanapakïninta mana ashishpa kikinlla imatapis rurëta munaq nunawanqa. Kanan witsankuna kawënintsikchö Jehovällapaq imëkatapis rurëkänapaqqa, David rogakunqannömi mañakushwan: “Nänikichö chakï alli tsarakunampaq yanapëkamë y tsëchöqa chakï manam ishkikachanqatsu” (Sal. 17:5; 23:3). Pero ¿imatataq rurashwan chakintsik Diospa näninchö tsarakunampaqqa?

9. 14 kaq päginachö këkaq fötochö rikanqantsiknöpis, ¿imanötaq Diospa santo espïritun pushamantsik kawënintsikchö kushishqa kanapaq?

⁹ Humilde kashqa y Jehoväman markäkushqaqa, kawënintsikchö pushamänantsikpaq espïritunta qomäshunmi. Pero ¿imanötaq tsë kallpaqa yanapamantsik? Jesusmi qateqninkunata kënö nir entiendetsirqan: “Noqapa rantïmi Dios Yaya cachamonqa yanapayäshoqniqui Santu Espiritunta. Pemi llapanta yachatsiyäshunqui. Y yachatsiyashqaqcunatapis yarpätsiyäshunqui” (Juan 14:26). Dios yanapamänapaq y Bibliapita estudianapaqmi imëpis mañakushwan, tsëchömi Cristupa yachatsikïninkuna qellqarëkan. Tsënö rurashqam santo espíritu yanapamäshun Jehoväpa yachëninta más entiendenapaq, tsënöpam llapan mandamanqantsikta cumplïta puëdeshun (1 Cor. 2:10). Hina kawënintsikchö imapis cambiariptinqa, santo espïritum mëpa ëwanapaq kaqtapis rikätsimäshun. Tsë kallpam Bibliapa consëjonkunata yachakunqantsikta yarpätsimäshun, hina pasëkanqantsikkunachö imanö ruranapaq kaqtapis rikätsimäshun.

Espïritupa pushakïnintam Jesusqa chaskirqan

10, 11. ¿Imatataq Diospa Tsurin alläpa munarqan, y imanötaq santo espíritu yanaparqan?

¹⁰ Ishkë kaqchöqa santo espïritupa pushamänata wanantsik, tsë kallpawan Dios Tsurinta pushashqa kaptinmi. Manaraq Patsata shamurninmi, Jesusqa kikimpaq kë profecía kënö ninqanta musyarqanna: “Jehoväpa espïritunqa pëchömi kanqa, musyëyoq kanampaq, willapäkoq [yätsikog] kanampaq, kallpayoq kanampaq, yachëyoq kanampaq, y Jehoväta respetanampaq” (Isa. 11:2). ¡Mëraq santo espíritu yanapananta munëkurqan y tsë kallpapa yanapakïninwanmi Patsachö imëkata pasarpis alli tsarakunan karqan!

¹¹ Jesusqa rikarqanmi Jehová awninqankuna cumplikëkanqanta. Bautizakuriptin ima pasanqantam Mateo, Marcos, Lucas y Juan librokuna willakun, Lücasmi kënö nin: “Bautisacurirnam Jesus Santu Espiritupa poderninwan Jordan mayupita cuticorqan. Tsenam Santu Espiritu pusharqan tsunyaq jircaman” (Luc. 4:1). Tsëchömi ayunarqan, Diosta mañakurqan y yarpachakurqan, hina itsachi Patsachö imata y imanö ruranampaq kaqta Jehová willarqan. Diospa imëkata ruraq kallpanmi Cristupa peqanta y shonqunta yanaparqan allillata ruranampaq y pensanampaqpis. Tsëmi imëkachöpis imanö ruranampaq kaqta musyarqan y Teytan munanqanmannömi imatapis rurarqan.

12. ¿Imanirtaq alläpa precisan espïritun pushamänapaq Diosta mañakunantsik?

¹² Jesusqa, santo espíritu kawëninchö alläpa precisanqanta alli musyarmi, qateqninkuna imëpis mañakuyänampaq y kawëninkunachö pushananta haqiyänampaq nirqan (lei Lucas 11:9-13). ¿Imanirtaq alläpa precisan santo espíritu pushamänata haqinantsik? Porque Diospa kallpanqa yanapamënintsikta puëdenmi Cristupanölla pensënintsik kanampaq (Rom. 12:2;  1 Cor. 2:16). Kawënintsikchö pushamänata haqishqaqa, Cristupanömi pensënintsikkuna kanqa y pënö kawëtam tïrashun (1 Ped. 2:21).

Kë mundopa espïritunqa mana allimanmi apamashwan

13. ¿Imataq mundopa espïritun y imatataq nunakunata ruratsin?

¹³ Kima kaqchöqa, santo espíritu pushamänataqa wanantsik kanan witsan mana alli nunakunapa pensënin y rurënin mana allikunaman mana ishkitsimänapaqmi. Pëkunataqa huk alläpa puëdeq mana alli espïritum imëka mana allikunata ruratsin, y tsë espïrituqa Diospa santo espïritumpa contranmi, tsëmi nunakunata munanqanmannö imatapis ruratsin. Cristu pensanqannö allillaman pensatsinampa rantinmi, kë mundota gobernaq Satanasnö pensatsin y mana allikunata ruratsin (lei Efesios 2:1-3 y Titu 3:3). Tsë espíritu munanqannö kawaq y ëtsankunapa munëninkunata rurar kawakoq nunakunaqa, llapampis mana allimanmi heqayan. Y Diospa mandakïninman manam yëkuyanqatsu (Gal. 5:19-21).

14, 15. ¿Imanöraq kë mundopa espïritumpa contran churakashwan?

¹⁴ Jehoväqa tukïnöpam yanapamantsik tsë mundopa espïritunman mana heqanapaq. Tsëmi apóstol Pablu kënö consejamantsik: “Wauqicuna panicuna, callpata tsariyë Jesucristuman marcäcur. Pepa podernenqa allapa jatunpam. [...] Mana alli tiempucuna chämuptin alli firmi tsaracuyänequipaq” (Efe. 6:10, 13). Santo espïritunwanmi Jehoväqa yanapamantsik Satanás imëkamampis ishkitsimënintsikta munaptin alli tsarakunapaq (Apo. 12:9). Awmi, kë mundopa espïritunqa alläpa puëdeqmi y paqwëqa manam libre këta puëdentsiktsu, tsënö karpis pasëpaqa manam dominamäshuntsu, porque Diospa santo espïritunmi más puëdeqqa y tsë kallpam yanapamäshun.

¹⁵ Diosta haqishqa punta cristiänokunapaq parlarmi apóstol Pedru kënö nirqan: “Allicuna rureta jaqirirmi, oqracashqano puriquicayan” (2 Ped. 2:15). Pero “nogantsicga manam cay mundupa espïrituntatsu chasquishcantsic, sinöga quiquin Dios Yayapita shamug Espïrituntam”. ¡Tsëtam alläpa kushikuntsik! (1 Cor. 2:12, NTCN.) Diospa espïritun pushamänata haqishqa y tukïnöpa Jehová yanapamanqantsikta wiyakushqaqa, alli nänichömi këkäshun y Satanaspa mundonchö këkaq espïritutapis vencishunmi (Gal. 5:16).

Santo espïrituqa alli kaqtam wayutsin

16. ¿Imanö kanapaqtaq santo espíritu yanapamantsik?

¹⁶ Chusku kaqchönam, santo espíritu pushamänataqa wanantsik alli nuna kanapaq (lei Galatas 5:22, 23). ¿Pï cristiänoraq mana munanmantsu más kuyakoq këta, kushishqa këta y shumaq parlakoq këta? ¿Piraq mana pishipantsu pacienciakoq këchö, kuyakoq këchö y alli shonquyoq këchö? Y, ¿piraq mana pishipantsu Diosman markäkïchö, manshu nuna këchö y peqanta alli tsarëchö? Santo espïritum alli nuna kanapaq yanapakun, tsënö kanqantsiknam familiantsikta y congregaciontapis yanapan. Pero santo espíritu munanqannö kawanapaq sinchikïqa manam ushakantsu, noqantsikqa puëdentsikmi y tïranantsikmi tsë espíritu munanqannö más alliyëta.

17. ¿Imatataq rurashwan santo espíritu munanqanmannö kawanapaq?

¹⁷ Allim kënö tapukushwan: “¿Parlakïnï y rurënïkuna rikätsikunku santo espíritu pushakunqannö kawëkanqäta y munanqanmannöku más alliyëka?” (2 Cor. 13:5a; Gal. 5:25). Itsa kawënintsikchö rikantsik santo espíritu munanqannö llapanchö mana rurëkanqantsikta. Tsënö kaptinqa, ¿imataraq rurashun? Santo espíritu munanqannö más alli kawanapaq yanapamänantsiktam haqinantsik. ¿Imanö? Bibliachö y publicacionnintsikkunachö tsëkunapaq parlaqpita yachakurnin, kawënintsikchö yachakunqantsiknölla ruranapaq kaqta rikarnin y munanqannö más alliyëkanqantsikta rikätsikurnin. * Noqantsikta y wakintapis imanö yanapamanqantsikta rikarninmi, cuentata qokushun imanir pushamänantsikta alläpa wananqantsikta.

Santo espíritu pushamänata haqishun

18. ¿Imanötaq Jesus santo espíritu yanapanampaq haqirqan?

¹⁸ Ciëlota y Patsata Jehová kamaptinqa, ‘obrata ruraq maestronömi’ Jesus yanapakurqan. Tsëmi  pëqa alli reqirqan Patsapa norte kaq lädonchö imëka iman cuenta huk kallpa kanqanta, tsëwanmi nunakuna musyayan inti ullumunan y heqanan mëpa kanqanta hina norte y sur më lädopa kanqanta (Pro. 8:30; Juan 1:3). Tsënö kaptimpis, Jesus Patsachö këkarnin kë kallpata mëpa ëwanampaq kaqta musyanampaq utilizanqantaqa manam musyantsiktsu. Imam sïqa, kë Patsachö kawëkarmi rikarqan Diospa santo espïritun alläpa puëdeq kanqanta y kawëninchö yanapanqanta, tsëtam Biblia willakun. Santo espïritupa yanapakïnintaqa imëpis chaskikoqmi, tsëmi imatapis ruranampaq yanapaptinqa kushishqa ruraq (Mar. 1:12, 13; Luc. 4:14). ¿Tsënöllaku noqantsikpis rurantsik?

19. ¿Imatataq rurashwan kawënintsikchö santo espíritu pushamänapaq?

¹⁹ Santo espïrituqa pensënintsikchö y shonquntsikchö yanapamantsik kikintsik haqishqallam. ¿Imatataq rurashwan yanapamänapaq y alli nänipa pushamänapaq? Jehovätam imëpis mañakunantsik tsë kallpanta qomänapaq y tsë espíritu munanqannö kawanapaq yanapamänapaq (lei Efesios 3:14-16). Tsëpitanam mañakunqantsiknö Biblia consejakunqanta ashinantsik, tsëmi santo espïritupa yanapakïninqa (2 Tim. 3:16, 17). Kushishqam Diospa palabran yachatsikunqanta wiyakunantsik y mana piñakushpam santo espïritupa yanapakïninta chaskikunantsik. Awmi, kë mana alli mundochöqa Jehová santo espïritunwan pushamënintsikta puëdenqantam imëpis markäkunantsik.

[Päginapa ura kuchunchö willakïkuna]

¿Alliku yachakurquntsik?

• ¿Imanötaq santo espíritu yanapamantsik?

• ¿Ima chusku yachatsikïkunataq rikätsikmarquntsik santo espïrituta wananqantsikta?

• ¿Imatataq ruranantsik santo espíritu llapan kawënintsikchö pushamänapaq?

[Yachakunapaq kaqpa tapukïninkuna]

[17 kaq päginachö dibüju]

Diospa santo espïritun pushanqanmannömi Jesusqa imatapis ruraq

[19 kaq päginachö dibüju]

Pensënintsik y shonquntsik alli kanampaqmi santo espïrituqa yanapamantsik