¿Imanirtaq wiyakunantsik Biblia ninqanta?

PUNUNAKÏPAQ Biblia ninqanqa, ¿mananatsuraq kanan witsankunapaqnönatsu? Hinamampis, ¿alläpa michäkoqtsuraq? Manam. Antis wiyakoq kaqkunaqa, manam chäyantsu . . .

▪  . . . pununakur muyanakuyanqan qeshyakunaman

▪  . . . mana munëkar qeshyaq tikrëman

▪  . . . majanwan rakikëman

▪  . . . mana alli concienciayoq këman

▪  . . . kikinta manana kuyakïman

Jehová Diosqa * Kamamaqnintsik karmi llapan qomanqantsikwan kushishqa kawanata munan. Isaías 48:17 textochömi willamantsik pë yachatsimanqantsikqa alli y kushishqa kawakunapaq kanqanta. Tsëmi Biblia ninqanta wiyakoq nunaqa kushikun...

▪  . . . Diospa rikëninchö alli kar

▪  . . . yamë këta tarir

▪  . . . majanwan alli kawakur

▪  . . . nunakunapa rikënimpaq alli kar

▪  . . . kikinwan kushishqa karnin

Y, ¿Biblia ninqanta mana wiyakur kawëkashqaqa? ¿Puëdeshwantsuraq kawënintsikta cambiëta? ¿Punta ruranqantsikkunata Diosnintsik yarpätsimäshuntsuraq?

Yarpärishun punta cristiänokunaman. Wakinkunaqa manaraq cristiano tikrarmi, manaraq casakurnin, mana majanwan y ollqupura o warmipura pununakuyaq, tsënö karpis pëkunaqa cambiayarqanmi, y tsënö rurayanqampitam Dios perdonarqan (1 Corintios 6:9-11). Kanan witsampis tsënöllam atskaq nunakuna hinantin Patsachö kawëninkunata cambiëkäyan. Kë nunakunaqa churakäyashqa pununakïpaq Biblia ninqanta wiyakuyänampaqmi, y punta kawëninkunatam haqiriyashqa. Y llapankunam kawëninkunata  altsayashqa, hina tsënöllam Särapis rurashqa, y tsënö rurayanqampitam alli kawakïta tariyashqa.

“Tsë höram ankash sientekurirqä”

Säraqa cuentata qokurqan munanqannö kawakï y munanqanta rurakïqa rasumpa kushishqa këta tarinampaq mana yanapanqantam. Kënömi nin: “Concienciäqa ima alli kanqanta o mana alli kanqantapis manam willamaqnatsu. Tsënö kaptimpis, penqakushqallam kawakoq kä y qeshyaq tikrarita o ima qeshyatapis muyëkayämänantam mantsaq kä. Diosman creitaqa manam imëpis haqirqätsu, y musyarqämi mana alli rurënïkunawan pëta llakitsinqäta. Y alläpa rakcha kanqäta yarparmi shonqüchö nanatsikoq kä”.

Tiempo pasariptinmi Säraqa kallpata tarirqan kawëninta paqwë altsanampaq. Jehoväpa testïgon teytankunata y Testïgokunapa congregacionninchö anciänokunatam yanapayänampaq mañarqan. “Alläpa kushishqam sientekurqä teytäkuna y anciänokuna mana yarpäkunqänö kuyëpa y llakipëpa tratayämanqampita. Tsë höram ankash sientekurirqä”, ninmi Sara.

Kanan witsanqa ishkë wambrayoqnam Säraqa. “Kikïmi unë witsan imanö kawakunqäta wambräkunata willarqö. Pununakïpaq Biblia ninqanta mana wiyakï imakunaman chätsimanqanta pëkuna cuentata qokuyänantam munä, y wiyakïqa cuerpontsikpaq, yarpënintsikpaq y shonquntsikpaq alli kanqanta musyayänantapis. Allim musyä Diosqa hiparnin llakishqa mana kawakunantsikrëkur leyninkunata qomanqantsikta.”

Llapantsikmi kuyakoq Diosnintsik mandamanqantsikkunata wiyakur alli kawakïta puëdentsik. Tsëmi Bibliaqa kënö nin: “Jehoväpa mandakïninkunaqa alläpa allim, shonqutam kushitsin”, hina “Jehoväpa mandakïninqa tsuyam, nawitam chipapätsin”. Hina awnimantsikmi wiyakoqkunapaqqa ‘alli pago’ kanampaq kaqtapis (Salmo 19:8, 11). *

[Päginapa ura kuchunchö willakïkuna]

[8 kaq päginachö ninqan]

Biblia ninqankunata mana wiyakoqkunaqa alläpa llakikïkunapam pasayan

[9 kaq päginachö ninqan]

Biblia ninqankunata wiyakoqkunaqa alli concienciayoq karmi kushishqa kayanqa y majankunawampis mana rakikashpam kawakuyanqa