Punta y kanan cristiänokunatam Diospa espïritun pushan
Punta y kanan cristiänokunatam Diospa espïritun pushan
“Llapan nunacunatam yachenincuna qon segun quiquin japallan Santu Espiritu munanqanmanno.” (1 COR. 12:11.)
1. ¿Imakunapitataq këchö yachakushun?
PENTECOSTÉS. ¡Alläpa kushikïpaq pasakunqankunatam kë shutiqa yarpätsimantsik! (Hech. 2:1-4.) Tsë fiesta witsanchömi punta kaq cristiänokunaman santo espíritu ramakarqan, tsëpita patsëmi Jehoväqa espïritunta sirveqninkunawan huknöpana utilizarqan. Qepa kaq yachatsikïchömi rikarqantsik, punta cristiänokuna manaraq kayaptin Jehoväpa santo espïritun pëman markäkoq unë nunakunata sasa y mana käyipaq rurëkunata rurayänampaq yanapanqanta. Pero punta cristiänokuna kayanqan witsanqa, huknöpanam Diospa imëkata ruraq kallpan yanapakurqan. ¿Imanötaq huknöpana yanapakurqan? Y kananqa, ¿imatataq rurashwan tsë kallpa yanapamänapaq? Rikärishun.
“Noqaqa Diospa sirweqninmi cä”
2. ¿Santo espíritu imanö yanapakunqantataq Maria rikashqa karqan?
2 Jerusalenchömi huk wayipa hatun sälanchö Diosman markäkoq nunakunawan Marïapis ëllurëkarqan, tsëmanmi awnikunqan santo espïritunta Dios ramarqan (Hech. 1:13, 14). Pero musyanqantsiknöpis, Marïaqa unëpitanam rikashqa karqan santo espíritu tukïnöpa yanapakunqanta. Kima chunka wata qepatanönam Jehoväqa ‘Santu Espiritupa poderninwan’, Marïapa pachanman ciëlochö këkaq Tsurimpa kawëninta churashqa karqan (Mat. 1:20).
3, 4. ¿Imanö kanqantataq Maria rikätsikurqan y imanötaq ruranqanta qatishwan?
3 ¿Imanirtaq Maria akrashqa karqan tsënö yanapakunampaq? Tsëtaqa rikantsik Diospa angelnin pëwan ima pasanampaq kaqta willariptin kushikur kënö nishqanchömi: “Noqaqa Diospa sirweqninmi cä. Qam nimanqequino callätsun” (Luc. 1:38). Tsënö contestanqanwanmi pëqa rikätsikurqan shonqupita patsë Diospa munënin rurëta munanqanta, y tsënö kanqanta Dios reqirqannam. Manam mantsarqantsu qeshyaqta rikëkur vecïnonkuna imata niyänampaq kaqta, ni casakunampaq nuna haqirinanta o mana allita pensanantapis manam yarpachakurqantsu. “Diospa sirweqninmi cä” nirqa, rikätsikïkarqan Jehoväman paqwë markäkunqantam.
4 Höraqa sasanömi kanman noqantsikpaqpis Diospa kaqchö cargokunata cumplinanqa. Tsënö sientekurqa allim kënö tapukushwan: “¿Llapan shonqüwanku Jehová munanqannö llapampis allilla yarqunampaq kaqman markäkö? ¿Mañamanqankunata ruranäpaq listo kanqätaku rikätsikö?”. Manam imëpis qonqanantsiktsu Jehoväqa pëman llapan kawënintsikwan markäkushqa, ciëlochö y Patsachö autoridad kanqanta yarpashqa y munanqannö imatapis rurashqaqa, santo espïritunwan yanapamänapaq kaqta (Hech. 5:32).
Santo espïritupa yanapakïnintam Pedru chaskirqan
5. 33 wata Pentecostés fiesta manaraq chaptin, ¿imanötaq santo espíritu Pëdruta yanaparqan?
5 Marïanöpis 33 wata Pentecostés fiesta manaraq chaptinmi, Pëdruqa kikin rikarqan santo espïritupa kallpan alläpa puëdeq kanqanta. Këllaman yarpärishun, Jesusqa pëtawan wakin apostolkunatam podernin qorqan nunakunapita supëkunata qarquyänampaq (Mar. 3:14-16). Tsëpaq Biblia alleqlla mana willakuptimpis tukïmi rikätsimantsik tsë kallpata Pedru utilizanqanta. Hina Diospa santo espïritumpa kallpanqa rikakarqan, Jesusta cäsornin Galilea lamar yaku hanampa pë kaqman ëwanqanchömi (lei Mateo 14:25-29). Awmi tsë milagrokunataqa Pedru rurarqan santo espíritu yanapaptinmi. Pero Diospa santo espïritunqa Pëdruta y wakin discïpulokunatapis huknöpana yanapanampaqmi këkarqan.
6. ¿Pedru imata ruranampaqtaq santo espíritu yanaparqan Pentecostés fiestachö y huk kutikunachöpis?
6 Pentecostés fiestachöpis, Pëdrutawan wakin discïpulokunatam santo espíritu yanaparqan Jerusalén fiestaman tukï nacionkunapita ëwaqkunata idiömankunachö parlapäyänampaq. Tsënam Pëdruqa mëtsikaq nunakuna ëllurëkaqta o goriraykagta parlapar qallëkurqan (Hech. 2:14-36). Unëqa imatapis ras parlareq y mantsallïshum pëqa karqan, tsënö kaptimpis santo espïritupa yanapakïnintam chaskirqan chikir qatikachäyaptimpis mana mantsakushpa Diospita yachatsikunampaq (Hech. 4:18-20, 31). Hinamampis santo espïritum musyatsirqan mana reqinqan yachatsikïkunata (Hech. 5:8, 9). Hina huk wanushqa nunata kawariratsimunampaqpis podernin qorqanmi (Hech. 9:40).
7. ¿Jesuspa ima yachatsikïninkunatataq Pedru entienderqan santo espïritupa yanapakïninwan?
7 Pentecostés fiesta manaraq chaptinmi, Pëdruqa Jesuspa atska yachatsikïninkuna ima ninan kanqanta entiendirishqana karqan (Mat. 16:16, 17; Juan 6:68). Tsënö kaptimpis, kima hunaqchö Cristu espïritunö kawarinqanta, ciëlopita patsë Gobernamunampaq kaqta y wakin yachatsikïkunataqa, manam alleqllaqa entienderqanraqtsu (Juan 20:6-10; Hech. 1:6). Hina wakin nunakuna espïrituman tikrayänampaq kaqta y ciëlopita gobernayämunampaq kaqtapis manam entienderqanraqtsu. ¿Imëtaq tsëkunata entienderqan? Santo espïrituwan bautizakurir y ciëlota ëwanampaq kaqta musyarir-ran.
8. ¿Ima yanapakïkunataq kan ciëlopaq akrashqa kaqkunapaq y wakin ‘üshäcunapaqpis’?
8 Santo espïrituta chaskirirmi Jesuspa qateqninkunaqa Diospa yachatsikïninkunata más entienderiyarqan. Jehová santo espïritunwan yanapaptinmi Escrituras Griegas Cristianas nishqanta qellqayarqan, tsëchömi rikätsikuyarqan Jehoväpa munënin imanö cumplikänampaq kaqta (Efe. 3:8-11, 18). ¡Alläpam kushikuntsik tsëkunata qellqayanqampitaqa! Kanan witsampis ciëlopaq akrashqa kaqkuna y wakin kaq “üshäcunapis” tsë yachatsikïllapitam yachakuntsik (Juan 10:16). ¿Diospa Palabranta entiendenapaq santo espíritu yanapakunqanta agradecikunqantsikta rikätsikuntsikku?
Pablupis santo espïritutam chaskirqan
9. ¿Imatataq Pablu rurarqan santo espíritu yanapaptin?
9 Pentecostés fiestapita huk watanöna pasarishqanchömi santo espïritupa yanapakïninta Saulu chaskirqan, tsëpitaqa apóstol Pablu nishpanam reqiyarqan. Pëtaqa tukïnöpam santo espíritu yanaparqan, tsënö yanapaptin wakin ruranqankunaqa kanan witsanyaqpis yanapamantsikmi. Santo espïritupa yanapakïninwanmi Bibliachö këkaq chunka chusku kaq librokunata qellqarqan. Y Pëdrutanöllam ciëlochö mana ushakaq y limpio kawëta chaskinampaq kaqta entiendetsirqan, hina yanaparqanmi tsëpaq alleq claro qellqanampaq. Hinamampis yanaparqanmi qeshyëkaqkunata hampinampaq, nunakunapita supëkunata qarqunampaq y wanushqakunata kawaritsinampaqpis. Tsënö kaptimpis santo espïrituqa yanaparqanmi más precisaq rurëta ruranampaq, kanan witsankunapis tsënöllam Diosqa kallpata qomantsik mandamanqantsikkunata ruranapaq.
10. ¿Imanötaq santo espíritu Pabluta yanaparqan Diospita yachatsikunampaq?
10 Chipre markachö këkanqan witsanmi, santo espíritu yanapaptin Pabluqa mana mantsashpa huk brüjota mana allita rurëkanqanta nirqan. Tsë islata gobernaqpis Pablu parlanqanta shumaqmi wiyakurqan. Awmi, ‘Diospa Palabran willacungan imaläya shumag canganta wiyarmi’ espantakurqan y creikurqan (Hech. 13:8-12, NTCN). Pabluqa alleqmi musyarqan rasumpa kaqpita yachatsikunampaqqa santo espïritupa pushakïninta wananqanta (Mat. 10:20). Tsëmi Ëfesochö cristiänokunata “parlanä öra yacheninta qoycamänanpaq” Diosta mañakuyanki nishpa mañakurqan (Efe. 6:18-20).
11. ¿Imanötaq Diospa santo espïritun Pabluta pusharqan?
11 Wakin markakunachö Pabluta santo espíritu yachatsikunampaq yanapashqa kaptimpis, wakinchöqa micharqanmi. Hina misionëronö viajanqanchöpis pusharqanmi (Hech. 13:2; lei Hechos 16:6-10). Kanan witsankunapis Jehoväqa santo espïritunwanmi yachatsikïchö pushamantsik. Noqantsikpis Pablunöllam mana mantsakushpa y kushishqa Dios mandamanqantsikta rurantsik. Awmi, manam Pablupa tiemponkunachönötsu santo espíritu pushamanqantsik paqwë rikakun, pero tsënö kaptimpis alleqmi musyantsik rasumpa kaqta musyëta munaqkunaman pushamanqantsikta (Juan 6:44).
“Imecata equecatam rureta yacha[tsimantsic]”
12-14. ¿Diosta llapan sirveqkunataku igualpa santo espíritu yanapan? Imanir tsënö ninqëkita willakaramï.
12 Unë tiempochö ciëlota ewaqpaq cristiänokunata Jehová imanöpis bendicenqanta yarpanqantsikmi, yanapamantsik kanampis Diospa yanapakïninta chaskinapaq kaqman markakunapaq. Corintiokunaman cartakurmi santo espïritupa qarënin milagrokunapaq parlar Pablu këta nirqan: “Santu Espiritullam cada nunata yachenintsic qomantsic, segun tse yachenintsicmanno Diosnintsicta sirwinantsicpaq. Tuquilaya yachecunawan Jesucristuntsicta sirwinantsicpaqmi Santu Espiritu yanapamantsic, peru juc Diosllatam sirwintsic. Imecata equecatam rureta yachantsic Diosnintsic yanapamashqa; peru llapantsictapis Diosnintsicllam yanapamantsic, tse yachenintsicwan peta sirwinantsicpaq” (1 Cor. 12:4-6, 11). Rikanqantsiknöpis, Jehová imatapis rurëta munanqanmannömi santo espïritun cada ünota tukïnöpa yanapamënintsikta puëden. Awmi, Cristupa ‘wallkaqlla ushankunata’ y ‘huk kaq üshankunatapis’ yanapanmi (Luc. 12:32, NM; Juan 10:16, NM). Tsënö kaptimpis, congregacionchö këkaqkunataqa manam igualpatsu imachöpis yanapan.
13 Këllaman yarpärishun, anciänokunaqa akrashqa kayan santo espïritupa yanapakïninwanmi (Hech. 20:28). Tsënö kaptimpis, manam llapan ciëlota ëwaqkunatsu anciano këta puëdeyan. Tsëmi rikätsikun congregacionchö cristiänokunata hukläyapayan Diospa santo espïritun yanapanqanta.
14 Jehoväpa santo espïritunqa ciëlopaq ëwayänampaq akrashqakunatam ‘ricatsin pepa wamrancuna cuenta’ kayanqanta. Tsëtaqa santo espïritunwanmi ruran y tsë espïritullawanmi hapallan Tsurinta kawaritsimurqan y ciëlochö mana ushakaq kawëta qorqan (lei Romanos 8:11, 15). Hina tsë espïritullawanmi ciëlochö y patsachö tukïta kamarqan (Gén. 1:1-3). Y tsëllawanmi, Bezalel tabernäculota ruranampaq, Sansón wakin nunakuna mana rurayanqanta ruranampaq, y yaku hanampa purinampaq Pëdruta yanaparqan. Pero ama këta pantashuntsu: alläpa hukläyam Diospa espïritun huk nunata pushanqanwan ciëlota ëwanampaq akranqanwanqa. Rasumpa kaqchöqa, espïritupa rurëninllam ciëlota ëwayänampaq pitapis akrëqa. Y Jehovällam musyan pitapis akranampaq kaqtaqa.
15. ¿Imëyaqpis santo espïrituwan Diosnintsik bautizëkanqallatsuraq? Willakaramï.
15 Rikanqantsiknöpis, unëpita patsënam Patsachöqa kayashqa Diosta sirveq nunakuna y Jehoväqa santo espïritunwanmi tukï rurëkunachö yanapashqa. Ollqutapis y warmitapis santo espïrituwan bautizarnin akrëqa, 33 wata Pentecostés fiestachöran qallarqan y këqa imë karpis ushakärinqanam. Tsënö kaptimpis, Diosnintsikqa imëpis sirveqninkunata kallpata qoyqanqaran munëninta rurayänampaq.
16. ¿Imatataq santo espïritupa yanapakïninwan cristiänokuna rurëkäyan?
16 ¿Imatataq Diosta sirveqkuna rurëkäyan santo espïritupa yanapakïninwan? Apocalipsis 22:17 textom kënö nir musyaratsimantsik: “Santu Espiritum y Achcaspa nobian cuenta shuyaquicaqcunam niyan: ‘Cuticamïna, Teyta’ nir. Y queta wiyaqcuna jina niyätsun ‘Cuticamïna Teyta’ nir. Y pipis yacunaqcunaqa shayämutsun, mana pagashpam cawatsicoq yacuta debaldilla upuyanqa”. Santo espíritu yanapaptinmi ciëlopaq akrashqa kaqkunaqa, ‘pipis yacunaqcunata’ Jehová qonqan kawatsikoq yakuta upuyänampaq invitakuyan. Ciëlota ewaqpaq kaqkunam kë rurëchöqa punta puntachö kayan y wakin kaq üshakunanam pëkunata yanapayan. Tsë espïritulla pushaptinmi imëkachöpis yanapanakuyan. Mëchö kawayänampaq kaptimpis, Jehovällatana serviyänampaqmi bautizakuyashqa “Dios Yayapa, Tsurin Jesucristupa y Santu Espiritupa jutincho” (Mat. 28:19). Y llapankunam santo espíritu pushananta haqiyan y munanqannö kawakuyan (Gal. 5:22, 23). Ciëlota ewaqpaq kaqkuna y Patsachö kawayänampaq kaqkunam Dios mandakunqanta imëpis rurayänampaq sinchikuyan (2 Cor. 7:1; Apo. 7:9, 14).
Santo espïrituta mañakïkäshunlla
17. ¿Imanötaq rikätsikuntsik santo espíritu noqantsikchö këkanqanta?
17 Tsëmi ciëlochö o Patsachö kawanantsik kaptimpis, Jehoväqa ‘poderninta’ qomantsik imakunachöpis alli tsarakunapaq y mana wanushpa kawëta tarinapaq (2 Cor. 4:7). Höraqa nunakuna burlakuyanmi Diospa Gobiernompita imëpis yachatsikushqa. Yarpäshun, ‘Jesucristuman creyicunqantsicpita pipis ashëcämanqantsicta’. Mana haqishpa imëpis yachatsikurqa kushishqam kashun, y rikätsikushunmi ‘Diosnintsicpa puedeq Espiritun’ noqantsikchö këkanqanta (1 Ped. 4:14).
18, 19. ¿Imachötaq Jehová santo espïritunwan yanapamantsik, y imata ruranapaqtaq churapakarquntsik?
18 Shonqupita patsë mañakushqaqa santo espïritutam chaskishun, tsë kallpam imata ruranqantsikchö y Jehoväta llapan kallpantsikwan servinapaqpis yanapamäshun. Rasuntam Biblia kënö nin: “Quiquin Dios Yayam tsaynö shumag alli cawacuyänayquipagga yanapayäshunqui”. Tsëmi alläpa precisan “rasumpa salvacashga cayänayquipag, Dios Yayapita mantsacurnin pay munangannölla shumag cawacuyay” ninqanta wiyakïkänantsik. ¿Imanötaq tsëtaqa lograshwan? Santo espïritupa yanapakïninta ashirnin y “Alli Willacuyninta mana juc gelanarnin willacurmi” (Fili. 2:12, 13, 16, NTCN).
19 Santo espïrituman paqwë markäkushqaqa Jehoväpa kaqchö yanapakunapaq nimashqam llapan shonquntsikwan imatapis rurashun, hina sinchikushunmi más allipa ruranapaq y Jehová yanapamänapaqmi mañakushun (Sant. 1:5). Pëmi tukïnöpa yanapamäshun Palabranta entiendenapaq, kawënintsikchö imëkata pasar alli tsarakunapaq y imëpis alli willakïta yachatsikunapaq. Diospa santo espïritunta mañakurnin kë consëjota imëpis yarpäshun: “¡Imatapis mañacuyaptiqueqa, Dios qoyäshunquim! ¡Asherqa, tariyanquim; puncuta tsactacuyaptiquipis, quichapuyäshunquim!” (Luc. 11:9, 13). Awmi, ama imëpis rogakïta haqishuntsu Jehoväpa santo espïritun unë tiempochö pushakunqannölla kanan witsampis pushamänapaq.
¿Willakaramunkimantsuraq?
• Bendicionkunata chaskita munarqa, ¿Maria imanö kanqantataq qatinantsik?
• ¿Imanöpayantaq Diospa santo espïritun Pabluta pusharqan?
• ¿Imanötaq kanan witsankuna santo espíritu pushamantsik?
[Yachakunapaq kaqpa tapukïninkuna]
[27 kaq päginachö dibüju]
Santo espíritu yanapaptinmi Pabluqa mana alli espïritukunapa makinchö këkaq nunata vencirqan
[28 kaq päginachö dibüju]
Ciëlochö o Patsachö kawanantsik kaptimpis Diosqa llapantsiktam espïritunta qomantsik
