¿Wiyakunantsikku Biblia ninqanta?

“Chunka watayoqllaraq këkarmi chölokunawan purikur qallëkurqä. Puntataqa makillapitaran tsarinakuyaq kayä y mutsanakuyaq kayä, pero tsëpitaqa partëkunata yatapänakurnam qallëkuyarqä. Trabajar qallanqä witsanqa 15 watayoqllaran karqä, pero ollqukunaqa pëkunawan pununäpaqmi niyämar qallëkuyarqan. Mana penqakoq këta y trabajaq mayïkuna rurayanqankunatam rurëta munaq kä. Tsëmi pëkunawan amigo kanärëkur lluta pununakur karqä.” (AUSTRALIA NACIONPITA SARA) *

¿ESPANTAKUNKIMANTSURAQ cristiano wayichö Sara winashqa kanqanta musyar? Biblia ninqannö limpio kawakunampaq teytankuna yachatsiyashqa kayaptimpis, Säraqa kikin munanqannö kawakïtam akrarqan.

Itsa Sara ruranqantaqa wakinkuna allitanö rikäyanman, tsënö pensaqkunaqa Biblia ninqan tiempontsikkunachö manana ni imapaqpis sirvenqantam creiyan. Wakinkunanam niyan, religioso këkarnimpis hukwan hukwan pununakuyanqanqa allilla kanqanta.

¿Precisantsuraq piwampis pununakïpaq Biblia ima ninqanta musyanantsik y ninqanta wiyakunantsik? Kikin Bibliachömi kënö nin: “Teyta Diospa palabranqa quiquinpitam shamun, y allim yachatsicunantsicpaq” (2 Timoteu 3:16). Tsëmi Dios kamakoq kanqanman y Biblia Palabran kanqanman creirqa, ima ninqantapis alläpa precisaqpaq churanantsik.

Llakikïpaqmi mëtsikaq nunakuna pununakïpaq Biblia ima ninqanta mana musyayanqanqa. Hasta pushakoq religiösokunapis Bibliapa yachatsikïninta respetayanqanta nikarmi, Biblia ninqannötsu pununakïpaq yachatsikuyan. Y hukta hukta yachatsikuyanqanmi mëtsika hatusaq religionkunata rakikätsishqa.

Pero wakinkuna niyanqanllaman creinapa rantinqa, ¿manatsuraq más alli kanman kikintsik Biblia ima ninqantapis yachakïta tïranantsik? Qateqnin kaq yachatsikïchömi tsëpaq parlaq chunka tapukïkunata rikäshun y tsëkunapaq Biblia ima ninqantam yachakushun. Y ushanan kaq yachatsikïchönam rikäshun Biblia ninqanta wiyakunantsik imanir alläpa precisanqanta.

[Päginapa ura kuchunchö willakï]