¿Imanirtaq alläpa desgraciakuna kan?

TUKÏ desgracia pasakunqankunaqa seguïdom yarqëkamun noticiakunachö. Kanan witsan desgraciakunachönöqa manam ni imëpis mëtsika nunakuna wanuyashqatsu. Bélgica nacionchö Centro de Investigación sobre la Epidemiología de los Desastres nishqanmi willakun 2010 watallachö 373 desgraciakuna pasakunqanta, y tsëchö 296.000 nunakunanö wanuyanqanta.

Kë pasaq watakunachöqa masmi tukï desgraciakuna kashqa. 1975 watapita 1999 watayaqqa manam 300 desgraciakunaman charqantsu, pero 2000 watapita 2010 watayaqqa ichikllanam pishishqa 400 desgraciakuna kanampaq. Tsëmi pï më tapukuyan kanan witsankuna imanir alläpa desgraciakuna kanqanta.

Desgraciakuna pasakunqampaq “Diospa castïgon” niyaptimpis, tsëqa manam rasumpatsu. Kanan witsankuna desgraciakunawan nunakuna hipayänampaq o ñakayänampagga manam Diostsu causan. Imam sïqa, Bibliaqa willakushqanam karqan tiempontsikchö tsënö desgraciakuna kanampaq kaqta. Mateo 24:7, 8 textom willakun Jesus kënö ninqanta: “Mechopis mallaqäqui watacunam canqa y patsam temblorwan allapa cuyonqa. Tsecunaqa imeca juc warmi qeshpicunanpaq nanatsicushqannollaran canqa y sufrimientucunapa qallananllaran”. ¿Imanirtaq tsëkuna pasanampaq kaqta Jesus willakurqan, y imatataq tsëkuna rikätsikunan karqan?

“[¿]Ima señaltaq rikätsikunqa [...] hinantinchö imëkapis imanö këkanqampa ushënin witsanna kanqanta?” nir tapuyanqantam Diospa Tsurinqa contestëkarqan (Mateo 24:3, NM). Imëka desgraciakuna pasakunampaq kaqta willakurirmi, hina kënö nirqan: “Canan willayanqaqcuna susedicuptin[mi], musyayanqui Diospa mandaquinin chämunanpaq ichicllana pishicanqanta” (Lucas 21:31). Tsëmi noqantsikpaqqa alläpa precisan imanir tukï desgraciakuna pasëkanqanta musyanantsik. Tsëkunam rikätsimantsik Diospa Gobiernon këllachöna kanqanta.

¿Imataq causan alläpa desgraciakuna kanampaq?

Itsa wakin nunakunanölla qampis kënö tapukunki: “Tukï desgraciakuna pasakunampaq Dios mana causëkaptinqa, ¿pitaq tsë llapanta causan?”. Kë tapukïpa respuestantaqa musyashun Biblia kënö ninqan rasumpa kanqanta creirllam: “Que munducho Diospa mana caqcunaqa diablupa muneninchomi caquicayan” (1 Juan 5:19). Kë versïculom rikätsikun kanan witsan desgraciakuna pasanqampita Dios mana culpayoq kanqanta. Höraqa, chikeqnin “diablupa” culpanmi wakin desgraciakunaqa (Apocalipsis 12:9, 12).

Diosta chikeq Diabluqa alläpa mana alli karmi nunakuna wanuyaptimpis ankupantsu o llakipantsu. Tsëmi nunakunata makinchö katsirnin imëka mana allikunata ruratsin. Rasun kaqchöqa, ushanan hunaqkunachö nunakuna “codisiosu, qellellapaq locuyäcoq, orgullosu, musyaq tucoq” kayänampaq kaqtam Bibliaqa willakushqana karqan (2 Timoteu 3:1, 2). Tsëmi espantakïpaqtsu nunakuna tsënö kayänampaq y imëka mana allikuna kanampaq Diablu causëkanqanqa. Pëmi causan nunakuna codicioso kar y imëkayoq kayänanrëkur Patsachö tukï këkaqkunata lluta utilizar nunakunapa kawëninta peligroman churayänampaq.

¿Imanötaq más desgraciakuna kanampaq causan nunakuna qellëllapaq löcoyäkoq kayanqan? Naciones Unidas nishqanmi imëka desgraciakuna pasakunqampaq kënö willakun: “Nunakunaqa imëpis aluvión chänan pampakunachömi más täräyan. Hinamampis, montekunata y oqu pampakunata ushakätsiyanqanmi causan más desgraciakuna kanampaq. Hina nunakuna imëkata rurar Patsata más achachätsiyaptinmi tiemponchötsu tamyan o usyan y lamarpis más huntakïkan”. Más qellë y más trabajo kanampaq ‘nunakuna imëkata rurayaptimpis’, tsë rurayanqanqa rikätsikun kikinkunallapaq imatapis ashiyanqanta y alläpa mallaqashqa kayanqantam.

Atskaq estudiöso nunakunam cuentata qokuyashqa, nunakuna Patsachö imëka këkaqkunata lluta ushakätsiyaptin más desgraciakuna kanqanta. Rasun kaqchöqa, desgraciakuna kanampaq causarmi nunakunaqa Diabluta yanapëkäyan.

Rikanqantsiknöpis, wakin desgraciakunataqa nunallam causan. Pero höraqa, mana alli sitiokunachö täräyanqampitam desgraciakunawan nunakuna más hipayan. Mëtsika nacionkunachömi mallaqashqa  nunakunapa mana alli rurënin desgraciakunapa pasaq nunakunata más hipatsishqa. Hina mëtsikaq nunakunam waktsa kar o chikishqa kar desgraciakuna pasakunan sitioman täraq ëwayashqa. Pero wakinkunaqa manam nunakuna causayanqanrëkurtsu hipayan, sinöqa “llapankunatam imapis pasan mana musyayanqan tiempochö” (Eclesiastés 9:11).

Tsënö kaptinqa, ¿imataraq rurankiman ima desgraciakunapis pasakuptin? Rikärishun imata ruranëkipaq kaqta.