Llapan nunakunata yanapaq gobernaqkuna y sacerdötekuna

“Acrashganö carmi, juc santa naciun marcachö imayca mandacug [gobernaq] sacerdötinö Dios Yayapa car imaypis serviycäyanqui.” (1 PED. 2:9, NTCN.)

¿YARPANKIKU?

¿Imëtaq Jehová awnikur qallarqan mandakoq sacerdötekuna kanampaq?

¿Imanötaq Jehová patsätsinqan mushoq contrato yanapakun gobernaq sacerdötekuna kanampaq?

¿Ima bendicionkunatataq gobernaq sacerdötekuna nunakunapaq apayämunqa?

1. ¿Imanirtaq ‘Santa Senataqa’ Jesuspa Wanïnin Yarpë nirpis reqintsik?

JESUCRISTUWAN chunka ishkë apostolninkunam 33 watachö 14 de nisán paqas Pascua mikïta celebrayarqan, y tsë mikïtaqa tsë kutillanam celebrayarqan. Tsëpitanam traicionaqnin Judas Iscarioteta qarqurirnin huk mushoq celebracionta patsätsirqan, y tiempo pasariptinqa tsëtam ‘Santa Sena’ nir reqiyarqan (1 Cor. 11:20). Tsë paqas ishkë kuti “queno imepis rurayanqui, noqata yarpäyämarnï” nishqa kaptinmi, tsë mushoq celebraciontaqa Jesuspa Wanïnin Yarpë nirpis reqintsik (1 Cor. 11:24, 25). Y Jesus ninqanta wiyakurmi Jehoväpa testïgonkunaqa hinantin Patsachö llapan watakuna tsëta celebrayan. Judïokunapa calendarionchöqa, 2012 watachö 14 de nisanqa Jueves 5 de abrilmi Inti o Rupay heqarkuptin qallanqa.

2. ¿Ima nirqantaq Jesus tantapaqwan vïnopaq?

² Discípulo Lücasmi ishkë versïculochö willakun tsëpin Jesus imata ninqanta y imata ruranqantapis, kënömi nin: “Tsepitanam tantata Jesus tsarircur Diosta ‘Grasias’ nicurir tantata paquirir, disipuluncunata qorqan, queno nishpa: —Queqa noqapa cuerpümi [“cuerpö cuentam”, NM]. Qamcunapaqrecurmi entregashqa canqa. Tsemi queno imepis rurayanqui, noqata yarpäyämarni. Tsenollam jina senacuriyaptin, binuwan quecaq copata tsarircur, queno nerqan: —Que copacho quecaq binoqa yawarnïmi [“yawarnï cuentam”, NM]; y tse yawarnïwanmi Dios mushoq contratuta patsacäratsin nunacunawan. Tsemi qamcunapaqrecur ramashqa canqa” (Luc. 22:19, 20). Jesus tsënö ninqanta, ¿imanötaq apostolninkuna entiendeyarqan?

3. Tantapaqwan vïnopaq Jesus parlaptin, ¿imatataq apostolkuna entiendeyarqan?

³ Judío karmi apostolkunaqa alleq musyayaq Jerusalén templochö sacerdötekuna animalkunata pishtëkur Jehoväpaq kayayänan alläpa precisanqanta. Tsëtaqa rurayaq  Jehoväpa rikëninchö alli këta munar y hutsankunapita perdonananta munarmi (Lev. 1:4; 22:17-29). Tsëqa, cuerponta qonampaq kaqta y yawarnin ramashqa kanampaq kaqta Jesus niptinqa, mëraq apostolkuna entiendeyarqan hutsannaq kawëninta nunakunarëkur sacrificänampaq kaqta. Tsëta Jesus ruranqanqa animalkunapa yawarnimpitapis más valoryoqmi karqan.

4. ¿Ima ninantataq Jesusqa “yawarnïwanmi Dios mushoq contratuta patsacäratsin” ninqan?

⁴ Y, ¿ima ninantataq Jesusqa “yawarnïwanmi Dios mushoq contratuta patsacäratsin” ninqan? Apostolkunaqa musyayaqmi Jeremías 31:31-33 (lei *) texto huk mushoq conträtopaq parlanqanta. Tsëmi Jesus ninqanqa rikätsikurqan Jehová israelïtakunawan ruranqan conträtota, huk mushoq conträtowanna tsë hörachö trokëkätsinqanta. ¿Imallachöpis igualarqanku kë ishkan conträtokuna?

5. Israelïtakunawan conträtota patsätsir, ¿imatataq Jehová awnikïkarqan?

⁵ Rasun kaqchöqa, Jehoväqa tsë ishkan conträtotapis rurarqan huk munënin cumplikänanrëkurmi. Israelïtakunawan conträtota patsätsirmi Jehová kënö nirqan : “Si qamkunakush llapan ninqäta mana pantashpa wiyakuyanki y awninakunqantsikta respetayanki, tsëqa, llapan markakunapitapis, noqallapanam kuyanqä marka kayanki, porque hinantin Patsapis noqallapam. Y qamkunaqa gobernaq sacerdötekuna y santo nacionmi noqapaq kayanki” (Éxo. 19:5, 6). Jehová tsënö ninqanqa, ¿alläpatsuraq israelïtakunapaq precisarqan?

GOBERNAQ SACERDOTE KAYÄNAMPAQ AWNIKUNQAN

6. ¿Jehoväpa ima awnikïnin cumplikänampaqtaq yanapakurqan israelïtakunawan contrato ruranqan?

⁶ Unë abuëlonkuna Noëwan y Abrahanwampis Jehová conträtota rurashqa kaptinmi, israelïtakunaqa musyayaqna pëkunawan conträtota rurëkanqan imapaq kanqanta (Gén. 6:18; 9:8-17; 15:18; 17:1-9). Abrahanwan conträtota rurarmi Jehová kënö nir awnirqan: “Mirënikiwanmi patsachö llapan nacionkuna bendecishqa kayanqa, ninqäta wiyakunqëkirëkur” (Gén. 22:18). Israelïtakunawan conträtota ruranqanmi tsë awnikunqan cumplikänampaq yanapakunan karqan. Tsëmi Israel nacionqa, “llapan markakunapitapis” Jehoväpa kuyë markan tikranan karqan. ¿Imapaq? Jehoväpa gobernaq sacerdötenkuna kayänampaq.

7. Jehová ‘gobernaq sacerdötekunapaq’ parlar, ¿ima nïtataq munëkarqan?

⁷ Israelïtakunaqa wiyashqam kayarqan gobernaqkunapaq y sacerdötekunapaq parlaqta, pero unë tiempochö kawashqa Melquisedecllatam Jehoväqa churarqan tsë ishkan cargoyoq kanampaq (Gén. 14:18). Israelïtakunataqa Jehová awnikarqan pëkunapita “gobernaq sacerdötekuna” yarqunampaqmi. Y Escrituras Griegas Cristianas rikätsikunqannöpis, tsë nunakunallam kayänan karqan gobernaqkuna y sacerdötekunapis (1 Ped. 2:9, NTCN).

8. ¿Imataq Dios churanqan sacerdötekunapa rurënin?

⁸ Musyanqantsiknöpis, huk gobernaqpa trabäjonqa mandakïmi. Pero huk sacerdötepaqa, ¿imataq trabäjon? Hebreus 5:1 textom kënö nin: “Une tiempu mas mandacoq saserdoteqa llapan israel nunacunapita acrashqam carqan. Tsemi tse saserdoteqa israel nunacunapaq imeca qaretano sacrifisiuta rurarnin, Diospa puntanman churarqan jutsancunapita perdonashqa cayänanpaq”. Kë texto ninqannöpis, Jehová churanqan sacerdöteqa sacrificiokunata rurarmi hutsa ruraq nunakunapaq perdonta Diosta mañakun. Hina Jehoväpa shutinchömi nunakunata yachatsin Diospa leyninkunata (Lev. 10:8-11; Mal. 2:7). Sacerdote kayänampaq cargota chaskishqakunaqa, rurëninkunawanmi Dioswan amishtakuyänampaq nunakunata yanapayan.

9. a) ¿Imataraqtaq israelïtakuna rurayänan karqan pëkunapita “gobernaq sacerdötekuna” yarquyänampaqqa? b) ¿Imanirtaq israelïtakunapaq sacerdötenkuna Jehová churarqan? c) ¿Imanirtaq Israel nacionpita “gobernaq sacerdötekuna” yarqïta puëdeyarqantsu?

 ⁹ Tsëmi Jehoväpa conträtonqa karqan Israel nacionpita “gobernaq sacerdötekuna” yarqurnin ‘llapan markakunata’ yanapayänampaq. Tsënö kaptimpis, Jehová ‘llapan ninqanta mana pantashpa wiyakur y awninakuyanqanta respetar-ran’ tsënö këman chäyänan karqan. ¿Israelïtakuna puëdeyanmantsuraq karqan Jehová llapan ninqanta wiyakïta? Puëdeyanmanmi karqan. Pero manam paqwëpaqa (Rom. 3:19, 20). Tsënö mana cumpliyänanta musyarmi Jehoväqa sacerdötekunata churarqan israelïtakunapa hutsankunapita animalkunata sacrificäyänampaq, y pëkunapaqa tsë rurëllam cargonkuna karqan (Lev. 4:1–6:7). Y tsë sacrificiokunataqa kikinkunapa hutsankunapaqpis sacerdötekunaqa rurayaqmi (Heb. 5:1-3; 8:3). Jehoväqa chaskeqmi tsë sacrificiokunata, pero tsëllaqa manam nunakunapa hutsankunapita chipyëpaqa pagakïta puëdeqtsu. Israelchö sacerdötekuna sacrificiokunata rurayanqanqa manam wiyakoq israelïtakunallatapis yanapaqtsu Jehoväwan paqwëpa amishtayänampaqqa. Tsëmi Pablu nirqan: “[Manam] pensayänantsu chiwacunapa torucunapa yawarnincunarecurlla jutsäcunapita perdonashqa cayanqanta” (Heb. 10:1-4). Antis Leykunata mana wiyakuyanqampitam israelïtakunaqa maldecishqa kayarqan (Gal. 3:10). Tsënö këkarqa manachi ni imanöpa llapan nunakunata yanapayänampaq gobernaq sacerdötekuna këman chëta puëdeyanmantsu karqan.

10. ¿Imachötaq yanapakurqan israelïtakunawan Dios conträtota ruranqan?

¹⁰ Tsëqa, ¿ardëllatsuraq Jehová israelïtakunata awnirqan pëkunapita “gobernaq sacerdötekuna” yarquyänampaq? Manam. Llapan shonqunkunawan wiyakuyaptinqa pëkunapita “gobernaq sacerdötekuna” yarquyanmanmi karqan, pero tsëpaqqa manam Leynatsu yanapanan karqan. ¿Imanir? (Lei Galatas 3:19-25.) Wiyakoqkunataqa Ley yanaparqan mana alli kaq dioskunata mana adorayänampaqmi. Hina hutsasapa kayanqanta y sumo sacerdötepita más alli sacrificiokunata ruraqta wanayanqantam rikätsirqan. Hinamampis, pushaq cuentam chätsinan karqan Cristuman o Mesïasman (tsëqa “Akrashqa” ninanmi). Pero Mesias chäramurqa, Jeremías willakunqannöllam huk mushoq conträtomannam pëkunata yëkatsinan karqan. Cristuta chaskeqkunaqa tsë mushoq conträtomannam yëkuyänan karqan y tsënöpam pëkunapita “gobernaq sacerdötekuna” yarquyänan karqan. ¿Imanöraq tsëqa kanman karqan? Rikärishun.

MUSHOQ CONTRÄTOWANQA GOBERNAQ SACERDÖTEKUNAM YARQUYAN

11. ¿Imanötaq Jesus punkuta kichaq cuenta karqan wakinkunapis gobernaq sacerdote kayänampaq?

¹¹ Nazaret markapita Jesusmi 29 watachö Mesias këman charqan. 30 watayoq këkarmi, Teytampa munëninta rurananrëkur yakuchö bautizakurqan. Tsënam, “quemi noqapa cuyë Tsurï” nirqan Jehová. Hinamampis, manam aceiteta hichartsu akrarqan, sinöqa santo espïritunwanmi (Mat. 3:13-17; Hech. 10:38). Tsënömi Jesusqa cargota chaskirqan Sacerdötekunapa Mandaqnin kanampaq y llapan wiyakoq nunakunapa Gobernaqnin kanampaq (Heb. 1:8, 9; 5:5, 6). Tsënömi pëqa punkuta kichaq cuenta karqan wakinkunapis gobernaq sacerdote këman chäyänampaq.

12. ¿Imakunachötaq Jesuspa wanïnin yanapakun?

¹² Sacerdötekunapa Mandaqnin tikrarirqa, ¿imatataq Jesus sacrificänan karqan wiyakoq nunakuna hutsankunapita perdonta chaskiyänampaq? Wanïninta yarpäyänampaq patsätsinqan paqas ninqannöpis, hutsannaq kawënintam sacrificänan karqan (lei Hebreus 9:11, 12). Y 29 watachö bautizakurir Sacerdötekunapa Mandaqnin kanampaq cargota chaskinqampita witsëpam, Jesusqa imëka pruëbakunapa pasarqan y tsë  cargota cumplinampaq yachakurqan wanunqan hunaqyaq (Heb. 4:15; 5:7-10). Tsëpita kawarirkamurnam ciëlota kutikurqan y kawënimpa valorninta Jehoväman chätsirqan (Heb. 9:24). Tsëpita witsëpam Jesusqa Diosta mañakun pëman markäkoqkunapa hutsankunata perdonëkunampaq, hina yanapanmi Diosta alli servirnin mana wanushpa kawëta tariyänampaqpis (Heb. 7:25). Hinamampis, Jesus wanunqanmi yanapakurqan mushoq contrato valoryoq kanampaq (Heb. 8:6; 9:15).

13. ¿Ima allikunatataq tariyänan karqan mushoq conträtoman yëkuyänampaq invitacionta chaskeqkuna?

¹³ Hina tsë mushoq conträtoman yëkuyänampaq invitacionta chaskeqkunapis santo espïrituwanmi akrashqa kayarqan (2 Cor. 1:21). Puntataqa Judïokunam y nïkurnam huk nación nunakuna (Efe. 3:5, 6). ¿Ima allikunatataq tariyänan karqan? Hutsankunapitam paqwë perdonashqa kayänan karqan. Jehovämi kënö awnikushqa karqan: “Pantayanqankunatam perdonashaq y mananam imëpis hutsankunata yarpäshaqnatsu” (Jer. 31:34). Nïkurnam, hutsankunapita chipyëpa perdonashqa karnin “gobernaq sacerdötekuna” këman chäyänan karqan. Ciëlota ëwaqpaq cristiänokunaman cartakurmi Pedru kënö nirqan: “Gamcunaga juc ayllu acrashganö carmi, juc santa naciun marcachö imayca mandacug sacerdötinö Dios Yayapa car imaypis serviycäyanqui. Tsaypagmi tutapaychönö cawaycäyaptiqui gayar imayca cushicuy actsiman jipiyäshushcanqui. Tsaymi gamcunaga Dios Yaya alläpa poderöso canganta willacurnin alabayanqui” (noqakunam kinkishätsiyarqö; 1 Ped. 2:9, NTCN). Tsëpinqa Pedru parlëkarqan Israelïtakunata Jehová Leykunata qornin ninqantam, pero kananqa mushoq conträtoman yëkoqkunatanam parlapëkarqan (Éxo. 19:5, 6).

LLAPAN NUNAKUNATA YANAPAQ GOBERNAQKUNA Y SACERDÖTEKUNA

14. ¿Mëchötaq serviyänan karqan gobernaq sacerdötekunaqa?

¹⁴ ¿Mëchötaq serviyänan karqan mushoq conträtoman yëkoqkuna? Patsachömi, tsëchömi huk grupo sacerdötenö Jehoväpa shutinchö llapan nunakunata pëpa hatun këninta yachatsiyan y mikïninkuna tiemponchö qarayänan karqan (Mat. 24:45; 1 Ped. 2:4, 5). Wanuyanqampita kawariramurnam, gobernantenöna y sacerdötenöna Cristuwan paqta ciëlochö serviyanqa (Luc. 22:29; 1 Ped. 1:3-5; Apo. 1:6). Tsënö kanqantam rikätsikun ciëlochö Jehoväpa trönon lädonchö espïritukuna këkaqta Juan rikanqan. ‘Achcaspa nopanchömi’ “juc mushoq cantuta” kënö cantayan: “Yawarniquiwan[mi] rescatarqonqui jinantin marcacho imana caq nunatapis, y ima idioma parlaqtapis Diospa wamrancuna cayänäpaq. Pecunatam churarqonqui mandaquiniquicho cayänanpaq, tsenopa saserdoticunano Diosnintsicta sirwiyänanpaq y patsacho nunacunata mandayänanpaq” (Apo. 5:8-10). Y huk visionta rikärirnam tsë gobernaqkunapaq Juan kënö nin: “Saserdoticuna cuentana[m] Diosta y Jesucristuta sirwiyanqa, y waranqa watam Jesucristuwan juntu mandacuyanqa” (Apo. 20:6). Cristuwan paqtam llapan nunakunata yanapaq gobernantekuna y sacerdötekuna kayanqa.

15, 16. ¿Ima bendicionkunatataq apayämunqa gobernaq sacerdötekuna llapan nunakunapaq?

¹⁵ ¿Ima bendicionkunataraq kë Patsaman apayämunqa 144.000 akrashqakuna? Apocalipsis libropa 21 kaq capïtulonchömi rikätsikun huk markanö ciëlochö këkäyanqanta, y mushoq Jerusalén y ‘Achcaspa nobian’ nirmi qayan (Apo. 21:9). Ishkëpita chusku kaq versïculoyaqmi kënö nin: “Riquecorqäqa mushoq santu Jerusalen marcatam, quiquin Diospa nopanpita uräquecamoqta. Tse marcam allapa cuyellapaq carqan. Imeca casacunanpaq shumaq bistishqa shipash nobiunta shuyarëcaqno. Tsepitanam wiyecorqä tronupita fuertipa queno nimoqta: ‘Cananpitaqa Diospa wayincho wamrancuna juntunam pewan cawacuyanqa. Pellatam llapan nunacuna sirwiyanqa, y pellam Diosnincunapis canqa. Cananqa mananam waqayanqanatsu  ni llaquiyanqanatsu, mananam imancunapis nananqanatsu, ni wanuyanqanatsu. Porqui tse sufrimientucunaqa ushacärishqanam’”. ¡Ima shumaq bendicionkunam tsëkunaqa! Wanï ushakäriptinqa mananam kanqanatsu waqë, llakikï ni nanatsikï. Y wiyakoq nunakunaqa hutsannaq këmanmi chäyanqa y tsënöpam Dioswan paqwë amishtashqa kayanqa.

¹⁶ Apocalipsis 22:1, 2 textonam willakun tsë gobernaq sacerdötekuna más bendicionkunata apayämunampaq kaqta, kënömi nin: “Tsepitanam tse anjel riquecatsimarqan wiñepa cawatsicoq cristalyäquicaq mayuta. Tse mayoqa yarqaquecamorqan Dios y Achcas tëcayashqan tronupitam. Tse marcapa presisaq caq callinpa chopinpam tse mayu pasarqan. Tse mayupa cuchuncunachomi wiñepa cawatsicoq monticuna carqan. Tse monticunapitam watacho chunca ishque (12) cuti frutanta cosechayaq. Raprannäqa jinantin nasion nunacunapa qeshyenintam cachacätseq”. Tsë igualatsikïwanmi Biblia rikätsikun ‘jinantin nasion nunacuna’ Adan muyanqan hutsapita chipyëpa hampishqa kayänampaq kaqta. Tsënöpam llapan sufrimientokuna ushakärinqa.

GOBERNAQ SACERDÖTEKUNAQA LLAPAN RURËNINKUNATAM USHAYANQA

17. Tiempowanqa, ¿ima rurëninkunataraq sacerdötekuna ushayanqa?

¹⁷ Gobernaq sacerdötekunaqa, waranqa watakuna ushanampaqqa llapan nunakunatanam hutsannaq këman chäyänampaq yanapashqa kayanqa. Tsënam Sacerdötekunapa Mandaqnin y Gobernaq Cristuqa, hutsannaq nunakunata Jehoväta entreganqa (lei 1 Corintios 15:22-26). Tsëchömi llapan rurëninkunata gobernaq sacerdötekuna ushariyanqa.

18. Gobernaq sacerdötekuna rurëninkunata ushariyaptinqa, ¿imachönaraq Jehová utilizanqa?

¹⁸ Tsëpita witsëpaqa, ¿ima rurëkunachöraq Jehová utilizanqa Cristupa yanapaqninkunata? “Tsechomi wiñepa wiñenin mandacuyanqa” ninmi Apocalipsis 22:5 textoqa. ¿Pikunataraq mandayanqa? Bibliaqa manam willakuntsu. Pero mana ushakaq kawëman chäyanqan, y hutsasapa nunakunata hutsannaq këman chätsita yachayanqanqa, Jehoväpa munëninchö precisaq cargonkunachö imëpis kayänampaqmi yanapanqa.

19. ¿Imatataq yarpänantsik Jesuspa Wanïninta Yarpana reunionman ëwaqkuna?

 ¹⁹ Jesuspa Wanïninta Yarpänapaq 2012 watachö 5 de abril ëllukarnin, ama qonqashuntsu kë Bibliapa yachatsikïninkunata. Ciëlopita gobernaqpaq kaqkunapita wakin Patsallachöraq këkaqkunaqa tantatam mikuyanqanqa y vïnotam upuyanqa, y tsënömi rikätsikuyan mushoq conträtochö këkäyanqanta. Tsë tantawan vïnom yarpätsimäshun Diospa munëninchö Jesuspa precisaq cargonta. Llapan nunakunata yanapayänampaq Jehová gobernaq sacerdötekunata patsätsinqanman yarpar, ¡llapantsik kushishqa y agradecikur ëwashun Jesuspa Waninïta Yarpäna reunionman!

[Päginapa ura kuchunchö willakï]

[Yachakunapaq kaqpa tapukïninkuna]

[31 kaq päginachö dibüju]

Gobernaq sacerdötekunaqa mana ushaq bendicionkunatam nunakunapaq apayämunqa