Traducción del Nuevo Mundo Bibliapita quechuaman tikratsishqa textokuna

1 Samuel 15:22, 23: Tsënam Samuelqa kënö nirqan: “¿Ninqankunata wiyakuyanqampitapis mastsuraq Jehoväqa kushikun animalkunata wanïkatsir kayapuyaptin? ¡Rikë! Wiyakïqa animalkunata wanïkatsir kayëpitapis más allim, y ninqankunata rurëqa carnërokunapa wirampitapis más allim; porque mana wiyakoq këqa suerte qatitsikï cuentam, y yachaqtukur imatapis ras rurëqa magia rurë y ïdolokunata adorë cuentam. Jehoväpa palabranta wiyakïta mana munanqëkipitam, pëpis rey kanëkita munannatsu”.

Salmo 1:1-3: Mana alli nunakunapa yachatsikïninta mana wiyashqa nuna, hutsa ruraq nunakunapa näninchö mana shärashqa nuna, y burlakoqkuna hamakuyänanman mana hamakushqa nunaqa, alläpa kushishqam kawakun. Pëpaqqa Jehoväpa leyninmi alläpa mishkin, y paqasta hunaqta leyta leirmi leinqanman yarpachakun. Y yaku kuchunchö plantaraq montenömi tiemponchö wayunqa, y manam raprankunapis tsakinqatsu; llapan ruranqanmi allilla yarqunqa.

Salmo 51:17, 19: Diospaqqa huk sacrificiom espïrituchö llakishqa këqa, paqwë llakishqa y nanatsikoq shonqutaqa, manam despreciankitsu Diosllä. [...] Tsënö kaptinqa, alli kaq rurëkuna sacrificiokunawanmi kushikunki, kayashqa sacrificiokunawan y llapan qarëkunawan, tsënö kaptinqa, törokunatam altarnikiman apayämunqa.

Salmo 119:97-101: ¡Imanömi leynikita kuyëkö! Paqasta hunaqtapis tsëllamanmi yarparëkä. Mandamientïkikunaqa imëyaqpis noqapa karmi, chikimaqnïkunapitapis más yachaqta tikratsiman. Llapan yarpätsikïnikikunata alläpa kuyarninmi, yachatsimaqnïkunapitapis más yachaq tikrarqö. Nimanqëkikunata wiyakurninmi, más mayor nunakunapitapis más yachaq kanqäta portakïnïchö rikätsikö. Mana alli rurëkunaman chakï halunanta manam munätsu, palabrëkita cäsukunärëkur.

Jeremías 31:31-33: Kënömi nin Jehová: “¡Rikë! Shamoq hunaqkunachömi Israel nunakunawan y Juda nunakunawan huk mushoq conträtota rurashaq; tsë conträtoqa manam Egipto nacionpita horqamunqä hunaq abuelïtonkunawan ruranqänötsu kanqa, ‘qowan [runan] cuenta këkaptïmi pëkunaqa tsë conträtota ushakäratsiyarqan’, ninmi Jehová. Kënömi nin Jehová: “Këmi tsë contrato tsë hunaqkuna pasariptin Israelwan ruranäpaq kaq. Leynïtam kikinkunaman churashaq, shonqunkunamanmi qellqashaq. Y noqam Diosninkuna kashaq, y pëkunanam markä kayanqa.”

Malaquías 1:6-8, 13: “‘Huk wambraqa teytanta respetanmi, y huk servipakoqpis patronninta respetanmi. Tsëqa, shutïta despreciaq sacerdötekuna, noqa teytëkikuna këkaptïqa, ¿imanirtaq respetayämankitsu? Y huk alli patronnikikuna këkaptïqa, ¿imanirtaq mantsayämankitsu?’, nishqam tröpakunata mandaq Jehová.

”‘Y qamkunanam niyarqunki: “¿Imanötaq shutikita despreciayarqö?”.’

”‘Altarnïman rakcha tantata apamur.’

”‘Y qamkunanam niyarqunki: “¿Imanötaq qamta rakchatäyarqoq?”.’

”‘Kënö nirnin: “Jehoväpa mësanqa despreciashqam kanan”. Y sacrificiopaq huk wisku animalta apayämuptiki: “Manam ni ima mana allitsu”. Y cojo o qeshyëkaq animalta apayämuptiki: “Manam ni ima mana allitsu”.’”

“Mä gobernadornikiman aparillë. ¿Kushikurtsuraq shumaq chaskirishunki?”, nishqam tröpakunata mandaq Jehová. [...] Y, ‘¡rikë! ¡Imanö ajayëpaqmi!’ nirmi piñatsiyämarqunki, nishqam tröpakunata mandaq Jehová. Y suwakuyanqëkita, y cöjota y qeshyaqtam apayämurqunki, awmi, qarayämänëkipaqmi tsëta apayämurqunki. ¿Kushikömantsuraq tsëkunata apayämunqëkipita?”, nishqam Jehová.