Diospa Palabrampita yachatsikïkuna

¿Biblia willakunku shamoq tiempochö pasakunampaq kaqkunata?

Kë yachatsikïmi yanapashunki wakin tapukïkunapa respuestanta Bibliëkichö tarinëkipaq, y tsë tapukïkunataqa itsa qampis rurakushqanki. Munaptikiqa, Jehoväpa testïgonkuna yanapariyäshunkimanmi kë tapukïkunapa respuestanta más yachakurinëkipaq.

1. ¿Biblia willakunku profecïakuna imanö y ëkanö cumplikänampaq kaqta?

Alläpa puëdeq Diosllam shamoq tiempochö imakuna pasanampaq kaqta willakïta puëden (Amós 3:7). Yarpärishun, nunakuna kawar qallayanqan witsankunallanam willakurqan Mesias o Cristu chämunampaq kaqta. Hina willakurqanmi Diosta sirweq Abrahanpa kastampita kanampaq kaqta, y llapan nunakunata hutsannaq këman chäratsiptin qeshyakunapis manana kanampaq kaqta (Génesis 22:18; Isaías 53:4, 5). Hina Diosqa willakurqanmi Belenchö Mesias yurinampaq kaqtapis. (Lei Miqueas 5:2.)

Jesus yurikunampaq qanchis pachak watakunanöraq pishikaptinmi Bibliaqa willakushqana karqan Mesias huk virgenpita yurikunampaq kaqta, chikishqa kanampaq kaqta, nunakunapa hutsankunarëkur wanunampaq kaqta y rïcokunawan pampashqa kanampaq kaqta (Isaías 7:14; 53:3, 9, 12). Y pitsqa pachak watakunapitapis masraq pishikaptinmi willakurqan, ashnun montakushqa Jerusalenman yëkunampaq kaqta, y kima chunka qellërëkur traicionashqa kanampaq kaqta. Tsë llapanmi paqwë cumplikarqan. (Lei Zacarias 9:9 y 11:12.)

2. ¿Imapis imë cumplikänampaq kaqta Dios willakunku?

Pitsqa watakuna pishikaptinran Bibliaqa willakurqan ima watachö Mesias yurimunampaq kaqta. Mesias chämunqanyaq ëka tiempo pasanampaq kaqtaqa, ‘semänakunapaq’ parlarmi willakurqan, y cada semänam qanchis watakuna kanan karqan. Tsë profecïaqa willakun ishkë tiempokunapaqmi: huk tiempon qanchis semänakuna kanan karqan y huknin kaqnam hoqta chunka ishkë semänakuna. Tsë ishkanta yuparishqanam hoqta chunka isqun semänakunaman rataramun, huk parlakïchöqa 483 watakunam. ¿Imëpita qallëkurtaq tsë watakuna yupakänan karqan? Bibliaqa willakun Diosta sirweq Nehemías Jerusalenman chärir perqankunata altsatsir qallëkunqampita kanqantam. Persa nacionchö unë pasanqanta  willakuyanqankunam rikätsikun 455 watachö tsë kanqanta (Nehemías 2:1-5). Tsë watapita 483 watakuna pasarinqanchömi 29 watachö Jesus bautizakurirqan. ¡Biblia willakunqannöllam karqan! (Lei Daniel 9:25.)

3. ¿Kanan witsankuna cumplikëkanku Biblia ninqan profecïakuna?

Jesusqa willakurqan kanan witsankuna imëkakuna pasanampaq kaqtam. Diospa Gobiernompita alli willakïkunata alli nunakunaman chätsiyänampaq kaqta y tsë willakïkuna Diosta kuyaq nunakunapa shonqunta kushitsinampaq kaqtam willakurqan. Tsë Gobiernoqa ichikllachönam mana allikunata ushakäratsimunqa. (Lei Mateo 24:14, 21, 22.)

Profecïakunaqa clärom willakun llapan mana allikuna ushakänampaq ichikllana pishikaptin imakuna pasakunampaq kaqta. Imëkakunata rurayänan tiempochö alli kawakï kanampa rantin nunakuna Patsata ushakätsiyänampaq kaqtam nirqan. Guërrakuna kaptin, mikïkuna mana kaptin, Patsa alläpa kuyuptin y tukï qeshyakuna yurimuptinmi más hipakïkuna kanan karqan (Lucas 21:11; Apocalipsis 11:18). Alli kaqkunata rurëqa paqwëmi ushakärinan karqan. Y tsë sasa tiempokunachömi Cristuta qateqkunaqa llapan nacionkunachö Diospa Gobiernompita willakuyänan karqan. (Lei Mateo 24:3, 7, 8; 2 Timoteu 3:1-5.)

4. ¿Imamanraq nunakuna chäyanqa?

Llapanta puëdeq Diosqa wiyakoq nunakunata bendecinampaqmi listo këkan. Diospa gobiernonchömi Jesucristuwan wakin akrashqa nunakuna waranqa wata Patsata gobernayämunqa. Wanushqakunapis kawariyämunqam y puëdeyanqam Dios munanqannö mana wanur kawakïta. Llapan nunakunam nanapäkïninkunapita kachakäriyanqa, qeshyawan wanïpis mananam kanqanatsu. (Lei Apocalipsis 5:10; 20:6, 12; 21:4, 5.)

Maslla yachakïta munarqa, Rasumpëpaqa, ¿imatataq Biblia yachatsikun? libropa 23-25 y 197-201 päginankunata leiri.