¿Imanötaq congregación alli kanampaq yanapakushwan?

“Señor Jesucristopa llaquipäcuyninwan cuyacuy yanapacuynin, gamcunachö caycullätsun.” (FILI. 4:23, NTCN.)

¿IMANÖTAQ CONGREGACIÓN ALLI KANAMPAQ YANAPAKUNTSIK...

... cristiano mayintsikkunawan këkarnin?

... yachatsikoq yarqurnin?

... pipis hutsata rurashqa kanqanta musyarirnin?

1. ¿Imanirtaq Pabluwan Jesus Filipos y Tiatïra congregacionkunapaq allita parlayarqan?

FILIPOS punta congregacionchö cristiänokunaqa manam atska qellëyoqtsu kayarqan, tsënö kaptimpis qarakoq y cristiano mayinkunata alläpa kuyaqmi kayarqan (Fili. 1:3-5, 9; 4:15, 16). Tsëmi apóstol Pablu santo espíritu yanapaptin pëkunaman cartakurnin kënö nirqan: “Señor Jesucristopa llaquipäcuyninwan cuyacuy yanapacuynin, gamcunachö caycullätsun” (Fili. 4:23, NTCN). Hina Tiatïra congregacionchöpis tsënöllam kayarqan. Tsëmi Jesucristu ciëlochöna këkar alli rurayanqampita kënö nirqan: “Musyämi llapan rurayashqequita. Musyämi cuyaquiniquicunata, marcäquiniquicunata y imecata equecata awantarpis sirwiyämanqequita. Jina musyämi punta rurayanqequipitapis cananpis masraq rurecayanqequita” (Apo. 2:19).

2. ¿Imanöpis kanqantsik yanapakunmantsuraq congregación alli kanampaq?

² Kanan witsampis Jehoväpa testïgonkunapa congregacionninkunaqa hukläyapayanmi alli kayanqanta rikätsikuyan. Wakin congregacionkunaqa kuyakoq y shumaq chaskikoq kayanqampitam reqishqa kayan, wakinnam Diospita yachatsikoq más yarquyanqampita y llapan tiemponkunawan Diosta sirwita kuyayanqampita. ¿Imanötaq yanapakushwan congregacionchö huk shonqunölla kanapaq y Jehoväpa kaqchö más poqunapaq? Cada ünom Dios sirwita kuyanantsik (1 Cor. 1:10). Tsëkunata mana rurashqaqa congregacionpa kuyakïninchi ushakärinman y hatun hutsakunatapis rikaräkuyanmanchi (1 Cor. 5:1; Apo. 3:15, 16). Tsënö kaptinqa, ¿imanö kanqampitataq congregacionnintsik reqishqa y imanötaq kushishqa kanapaq yanapakushwan?

 ¿IMANÖTAQ CONGREGACIÓN ALLI KANAMPAQ YANAPAKUSHWAN?

3, 4. ¿Imanötaq congregacionchö Jehoväta alabëta puëdentsik?

³ Davidmi Jehoväpaq kënö cantarqan: “Hatun congregacionchömi alabashqëki, atska nunakuna rurinchömi alabashqëki” (Sal. 35:18). Rikärinqantsiknöpis pëqa Diosta wakin sirweqkunawan këkarpis Jehoväta alabëkaqllam. Y, ¿noqantsikqa? Cada semana reunionkunachö cristiano mayintsikkunawan këkarnin Täpakoq revistapita yachakïchönöpis, comentanqantsikwanmi rikätsikuntsik Jehoväta kuyanqantsikta y markäkïyoq kanqantsikta. ¿Kushishqaku parlakurintsik tsë reunionkunachö? ¿Puntallapitana alli yachakurïkurku shumaq parlakurintsik? Familiayoq ollqu karqa, ¿yanapantsikku wamrantsikkunata alli preparakuyänampaq y entiendeyanqanmannö parlakuriyänampaq?

⁴ Huk salmota David qellqanqanchömi kënö nirqan: “Shonqöqa imëpis qamllapaqmi, Diosllä, shonqöqa imëpis qamllapaqmi. Awmi, qampaqmi cantamushaq y müsicata tocamushaq” (Sal. 57:7). Këchö ninqanwanmi rikätsimantsik imanö cantanqantsikwan Jehovällapaq kanqantsikta rikätsikunqantsikta. Reunionkunachömi Jehoväpaq sinchi y llapan shonquntsikwan cantëta puëdentsik. ¿Kanku manaraq cantëta yachanqantsik canticokuna? ¿Imanirtaq Familiachö Diosta Adorana Hora cantëta yachakurintsiktsu? Noqantsikpis Davidnölla pensashun, pëmi kënö qellqarqan: “Llapan kawënïchömi Jehoväpaq cantashaq, [...] kawanqäyaqqa Diosnïpaqmi müsicata tocashaq” (Sal. 104:33).

5, 6. ¿Imanötaq kuyakoq y qarakoq kanqantsikta rikätsikuntsik, y imanötaq tsënö kanqantsik congregacionchö yanapakun?

⁵ Congregacionchö llapantsikpis kuyakoq kanapaqqa, alläpam precisan qarakoq kanantsik. Hebreokunapaq cartakunqanchömi ushanan capïtulonchö Pablu këta consejakurqan: “Jucniqui jucniqui shumaq cuyanacur cawacuyë. Forasterucunata wayiquicunaman chämuptin, posadaquecatsiyë” (Heb. 13:1, 2). Kë consëjokunata qatikanqantsiktaqa rikätsikushun, congregacionkunata watukaq wawqitawan warminta y llapan tiemponkunawan Jehoväta sirweq cristiänokunata imallatapis mikuriyänampaq wayintsikman invitarmi. Hina manam qonqanantsiktsu majankunata wanupakushqa cristiänokunata, wamrankunata hapallankunalla  qeshpitseqkunata y wakin cristiano mayintsikkunata mikoq o Familiachö Diosta Adoranapaq wayintsikman invitëta.

⁶ Pablum Timoteuta nirqan cristiano mayinkunata kënö consejanampaq: “Allicunallata rurar nuna mayincunata imecachopis yanapayä[tsun]. Ama micha cayätsuntsu; sinoqa alli shonquncunawan nuna mayincunata yanapecuyätsun. Tseno rurarqa, Diosnintsiccho rasonpa caq fortunatam quiquincunapaq ashicayan, y wiñe cawetam tariyanqa” (1 Tim. 6:17-19). Pabluqa qarakoq kayänantam munarqan. ¿Imanötaq qarakoq kanqantsikta rikätsikushwan qellëta tarinan sasa këkaptimpis? Itsa cärroyoq karqa reunionkunaman y Diospita yachatsikïman wakinkunata apashwan. Y tsënö yanapamashqaqa, ¿imanötaq agradecikunqantsikta y congregación alli kananta munanqantsikta rikätsikushwan? Itsachi puëdenqantsikmannö ëkallawampis yanapamaqnintsikta yanaparishwan. Hina huknöpaqa cristiano mayintsikkunata kuyanqantsikta rikätsikushun pëkunawan más tiempo karninmi. ¿Imatataq lograntsik ‘Jesusman marcäcoq mayintsiccunapaq’ allikunata rurarnin, pëkunawan karinapaq tiempota horqarnin y kapamanqantsikkunata rakiparninqa? Cristiano mayintsikkunatam más kuyantsik y congregacionchö llapankunapis kushishqa kayänampaqmi yanapakuntsik (Gal. 6:10).

7. ¿Confiakamanqantsikta mana willakïqa imanötaq yanapakun congregacionchö huk kastanölla kanapaq?

⁷ Hina amigo kanqantsik y confiakamanqantsikkunata mana willakunqantsikmi cristiano mayintsikkunawan más kuyanakunapaq yanapamäshun (lei Proverbios 18:24 *). Rasumpa kaq amïgokunaqa confianakuyanqanta manam willakuyantsu. Cristiano mayintsik imallatapis willaramashqa y wakinkunata mana musyatsinapaq kaqta markäkamashqaqa, pëwan amigo kënintsikmi más sinchi tikrarinqa. Tsëmi alläpa precisan markäkïpaq amigo kanantsik, tsënöpam congregacionchö huk kastanölla kuyanakunapaq yanapakushun (Pro. 20:19).

YACHATSIKÏCHÖ MÁS YANAPAKUSHUN

8. ¿Ima consëjotataq Laodicea congregación chaskirqan y imanirtaq wanarqan?

⁸ Laodicea congregaciontam Jesus kënö nirqan: “Noqa musyämi llapan rurayashqequicunata. Jina musyämi mana alalaq y mana achachaq cayanqequita. Juc paqwe cacuyanquiman, alalaq car, o achachaq carpis. Tsemi mana achachaq ni alalaq car, qoñoqlla cayanqequirecur shonqüpita jitarayämushqequi” (Apo. 3:15, 16). Laodicea congregacionchö cristiänokunaqa yachatsikïchö más rurëtam qelanëkäyarqan, tsënö kayanqanchi kikinkunapura shumaq kawakuyänampaq yanapakurqantsu. Tsëmi Jesus kuyakïpa kënö consejarqan:  “Noqaqa llapan cuyashqäcunatam alli cösa piñaparcuryan willapä [anyä]. Tsemi noqaman cutimorqa, llutan rureniquicunata jaqiriyänequi” (Apo. 3:19).

9. ¿Imanötaq yachatsikïman más yarqunqantsik congregacionta yanapan?

⁹ Congregacionchö llapantsikpis kushishqa kanapaqqa, Diospita yachatsikoqmi más yarqunantsik. Atska congregacionkunaman rakikashqaqa këkantsik alli shonquyoq nunakunata ashinapaq y rasun kaqta yachatsikunapaqmi. Tsëmi alläpa precisan Jesus ruranqanta qatirnin Diospita yachatsikur kushishqa purinantsik (Mat. 28:19, 20; Luc. 4:43). ‘Diospa mincancunam cantsic’, y yachatsikïman más yarqurninqa masmi huk shonqunölla kashun (1 Cor. 3:9). Cristiano mayintsikkuna mana mantsakurlla yachatsikuyanqanta y Diospa kaqta kuyayanqanta rikarmi, más respetashun y kuyashun. Yachatsikïchö “huknölla yanapanakur” purinqantsikmi congregacionchö huk shonqulla kanapaq yanapamäshun (lei Sofonías 3:9 *).

10. ¿Imanötaq congregacionchö kaqkunata yanapan yachatsikïchö más alli rurëta tïranqantsik?

¹⁰ Hina cristiano mayintsikkunataqa yanapanqa yachatsikur purinqantsikchö más alli rurëta tïranqantsikmi. Nunakunata más kuyanqantsik y yachatsikïta shonqunkunaman chätsita tïranqantsikmi yanapamäshun más kushishqa yachatsikur purinapaq (Mat. 9:36, 37). Y kushishqa yachatsikur purishqaqa, noqantsikwan këkaqkunapis tsënö rurëtam munayanqa. Këman yarpärishun: ¿imanirtaq Jesus qateqninkunata ishkaqpayan yachatsikoq kacharqan? (Luc. 10:1.) Manam yanapanakuyänanllapaqtsu, sinöqa yachatsikïchö más rurëta munayänampaqmi. ¿Piraq mana kushikunmantsu yachatsikïta kuyaq cristiänokunawan yachatsikurnin purita? Kushi kushi kayanqanmi yanapamantsik Diospa Gobiernompita imëpis yachatsikur sïguinapaq (Rom. 1:12).

WASA RIMAQ NI HUTSAKUNATA RIKARÄKOQQA KASHUNTSU

11. ¿Ima mana allimantaq Moises kawanqan witsan israelïtakuna ishkiyarqan?

¹¹ Mushoq nacionman tsëraq tikrarishqa këkarmi israelïtakunaqa wasata rimar qallëkuyarqan. Kapuyanqankunawan mana kushishqa karmi Jehoväpa contran churakarnin Moisespaqwan Aaronpaq rimar qallëkuyarqan (Éxo. 16:1, 2). Tsënö wasa rimaq kayanqanrëkurmi Egiptopita yarqoqkunapitaqa huk ishkëlla Jehová Awnikunqan Patsaman yëkuyarqan. Hasta Moisespis manam yëkurqantsu israelïtakunapa culpanrëkur parlakïninchö pantarinqampita (Deu. 32:48-52). ¿Imataraq rurashwan tsënö parlëkunaman mana ishkinapaq?

12. ¿Imata rurartaq wasa rimaq këman ishkishuntsu?

¹² Wasa rimaq këpitaqa alläpam cuidakunantsik. Tsëpaqqa humildem kanantsik y congregacionchö cargoyoqkunatam respetanantsik, hina pikuna amïgontsikkuna kanqantam rikänantsik. Kushikunantsikrëkur mana allikunata akrashqa o Biblia ninqannö mana kawaq estudiaq o trabajaq mayintsikkunawan atska tiempo pasashqaqa, imë karpis mana allikunamanmi chäshun. Tsëmi imëka allitapis mana allitanölla rikaqkunawan y munayanqanmannö kawakoqkunawanqa ardëpa juntakunantsiktsu (Pro. 13:20).

13. ¿Ima mana allitataq congregacionta ruranman wasa rimaq kë?

¹³ Wasa rimaq këqa congregaciontam mana alliman chätsinman: yamë y huknölla kawakïtam ushakäratsinman. Cristiano mayintsikkunapaq mana allita parlarqa, manam llakitsishunllatsu, sinöqa tumpakoq y wasa rima këmanmi chäshun (Lev. 19:16; 1 Cor. 5:11). Punta congregacionkuna  patsakanqan witsanmi, wakin cristiänokuna congregacionchö ‘mandacoqcunatapis mana cashqan cuentapaq churariyarqan. Y shimincunaman chanqanta lluta parlayarqan’ (Jud. 8, 16). Y tsëta rurayanqanqa Diostam piñatsirqan.

14, 15. a) ¿Imaraq congregacionta pasanman hutsakunata mana atiendeyaptinqa? b) ¿Imataraq rurashwan pipis hutsata rurëkur mana willakuptinqa?

¹⁴ Tsënö kaptimpis, ¿imataraq rurashwan mëqan cristiano mayintsikpis machakunqanta, warmipis ollqupis qalapächu mana allita rurëkaqkuna rikanqanta o mana alli kawakunqanta musyarirqa? (Efe. 5:11, 12.) Tsëkuna pasakïkanqan imapis mana qokamashqaqa, Jehoväpa santo espïritunmi congregacionchö kanqanatsu y yamë kawakïmi ushakärinqa (Gal. 5:19-23). Congregación yamë y shumaq kanampaqqa corintiokunanömi kanantsik, mana alli rurëkuna congregacionchö kanantaqa manam haqinantsiktsu. ¿Imanötaq tsëta rurashwan?

¹⁵ Tsëllaran yachakurirquntsik cristiano mayintsikkuna confiakamarnintsik imatapis willaramanqantsikkunata mana willakunapaq. Paqwë mana allichi kanman confiakamanqantsikkunata willakïqa. Tsënö kaptimpis, yarpänantsikmi congregacionchö anciänokunaqa hutsa ruraq cristiänokunata rikäyänampaq kaqta. Tsëmi hutsakuna kanqantaqa musyayänan alläpa precisarqan (lei Levítico 5:1 *). Awmi, pipis hutsata rurashqa kanqanta musyarqa, anciänokunapa yanapakïninta ashinampaqmi ninantsik (Sant. 5:13-15). Pero ninqantsik tiempochö mana willakuptinqa, noqantsikmi willakunantsik.

16. Congregacionpa alli kënin mana ushakänampaqqa, ¿imanirtaq hutsakuna kaptin ras willakunantsik?

¹⁶ Congregacionqa Jehoväpa kaqchö alli kanapaqmi tsapämantsik, y tsënölla kanampaqmi hutsakuna kaptinqa willakunantsik. Hutsata ruraq cuentata qokur arrepentikuptin y consejayanqanta chaskikuptinqa, congregacionpa alli kënin manam ushakanqatsu. Pero anciänokuna kuyakïpa consejayanqanta mana wiyakuptin y hutsankunata mana haqiptinqa, congregacionpitam qarqushqa kanqa. Tsënö ‘qarquriyaptinmi’ congregacionpa yamë kënin tsapashqa kanqa (lei 1 Corintios 5:4, 5). Tsëmi congregacionpa yamë kënin mana ushakänampaqqa, imapis mana alli kaptinqa anciänokunata raslla willanantsik, tsënöpam cristiano mayintsikkuna alli kayänampaq yanapëkäshun.

“JUC SHONQUNOLLA” KAWAKÏTA TÏRASHUN

17, 18. ¿Imatataq wanantsik congregación “juc shonqunolla” kanampaq?

¹⁷ Punta cristiänokunaqa “apostolcuna yachatsicuyanqanta cäsucurmi” congregacionchö huk shonqunölla kayänampaq yanapakuyarqan (Hech. 2:42). Anciänokuna consejayanqanta y yachatsiyanqantaqa alläpam valorayaq. Kanan witsampis mäkoq mäkoq cumplido sirweqtam anciänokunaqa yanapayan ninqankunata rurarnin. Tsënöpam congregación huk shonqunölla kanampaq yanapakuyan (1 Cor. 1:10). Hina tsënöllam llapantsikpis Jehoväpa markan Bibliawan yachatsimanqantsikta y anciänokunapa pushakïninta wiyakïkantsik, tsënöpam rikätsikuntsik ‘Santu Espiritu yanapamashqa, imecanopapis juc shonqunolla shumaq pasaquicho cawaquita’ tïrëkanqantsikta (Efe. 4:3).

¹⁸ Këchö yachakurinqantsiknöpis congregacionpa alli kënin mana ushakänampaqqa, imëkanöpapis yanapakunantsikmi. Tsënömi “Señor Jesucristopa llaquipäcuyninwan cuyacuy yanapacuynin, gamcunachö caycullätsun” neq textota wiyakïkäshun (Fili. 4:23, NTCN).

[Päginapa ura kuchunchö willakïkuna]

[Yachakunapaq kaqpa tapukïninkuna]

[24 kaq päginachö dibüju]

¿Comentanantsikpaq puntallapitana alli yachakurïkurku congregación alli kanampaq yanapakïkantsik?

[25 kaq päginachö dibüju]

Congregación alli kanampaqqa puntallapitana canticokunata alli yachakurmi yanapakushwan