¿Imëraq Armagedón guerra qallanqa?

“Tsepitanam riquecorqä mana yupetapis puedipaq, mantsaquepaq alli shuyni nunacunata. Pecunam jinantin nasionpita tuquilaya nunacuna y tuqui idioma parlaq cayarqan. [...] [Pëcunaqa ] cayan imeca nacaquicunatapis pasashqa caqcunam.” (APOCALIPSIS 7:9, 14.)

LLAPAMPIS listonam këkan Armagedón qallëkunampaq. ¿Imanötaq tsëta musyantsik?

Kanan witsanqa mëtsika millón nunakunam Jehoväta sirwikäyan y imanö kawayänampaqpis Biblia ninqantam wiyakïkäyan. Më tsë nacionkunapita, tukï kasta y tukï idioma parlaqmi kayan, y llapampis kuyanakurmi huk familianölla kayan. Jehoväpa testïgonkunam tsënöqa kawakuyan (Juan 13:35).

Ichikllachönam Satanasqa tröpankunawan Diospa manshu markanta hapallantanö rikëkur ushakätsita tïranqa (Ezequiel 38:8-12; Apocalipsis 16:13, 14, 16). ¿Imanirtaq tsënö pasanampaq kaqta musyantsik? Bibliaqa clärom willamantsik Armagedón qallëkunampaq imakuna pasanampaq kaqta, y tsë willakunqankuna cumplikëkaqtaqa rikëkantsiknam.

Bibliapa cumplikëkaq willakïninkuna

Jesustam qateqninkuna tapuyarqan “hinantinchö imëkapis imanö këkanqampa ushënin witsanna kanqanta” nunakuna imanö musyayänampaq kaqta (Mateo 24:3, NM). Ichikllachöna imakuna pasakunampaq kaqta willakurmi Jesus kënö nirqan: “Juc marca nunacunam juc marca nunacunawan wanutsinacuyanqa. Mechopis mallaqäqui watacunam canqa y patsam temblorwan allapa cuyonqa”. Nïkurnam, “tsecunaqa imeca juc warmi qeshpicunanpaq nanatsicushqannollaran canqa y sufrimientucunapa qallananllaran” nirqan (Mateo 24:7, 8). Hina apóstol Pablupis tsë tiempopaq parlarmi ‘ushanan hunaqkuna’ nirqan, y ‘alläpa sasa y mantsakëpaq tiempokuna’ kanampaq kaqtam nirqan (2 Timoteo 3:1, NM). ¿Manaku kanan witsan pasëkanqankunaqa Biblia willakunqannölla?

Pero ¿imanirtaq alläpa sasa o aja kanan karqan ushanan hunaqkunaqa? Tsëpa respuestantam apóstol Juan rikätsikun Satanaswan demonionkuna “pocu tiempullana” kë Patsachö tukï  mana allikunata ruratsinampaq kaqta willakur. Hina willakurqanmi Satanás “allapa piñashqa” kanampaq kaqtapis (Apocalipsis 12:7-12). Y, ¿manaku nunakuna alläpa chiki y piñashqalla kayanqanqa hinantin Patsachö rikakun?

Hina Jesusqa willakurqanmi tsë sasa tiempokunachö huk alläpa precisaq rurëpis cumplikänampaq kaqta, kënömi nirqan: “Tsemi llapan nunacunata alli willaquinïta willayänequi presisan; tsenopa nunacuna Diospa mandaquininman yecuyänanpaq, y jinantin nasioncunacho tse alli willaquita musyariyaptinnam, que patsapa ushenin chäramonqa” (Mateo 24:14). Jehoväpa testïgonkunaqa, Diospa Gobiernompita alli willakïkunata 235 nacionkunapitapis masmannam chätsiyashqa, y 500 idiömakunapitapis maschömi publicacionninkuna kan. Bibliapita yachatsikoq ishkë revistakunatam horqayan, Täpakoq y ¡Despertad! nishqan revistakunata, y tsë revistakunaqa hinantin Patsachömi alläpa reqishqa kayan. Hina Bibliatapis 100 idiömakunamannömi traduciyashqa. Y tsëkunataqa kikinkunapa voluntadninkunapitam rurayan, y tsërëkurmi qellëninkunatapis shonqunkuna ninqanmannö churayan. Tsënö hinantin Patsachö yachatsikuyanqanchöqa, ¿Jesus ninqantsuraq cumplikëkan?

Hina Bibliaqa willakunmi Jehová Dioswan chikeqninkuna guërraman yëkuyänampaq imakuna puntata pasanampaq kaqta. Rikärishun manaraq cumplikaq kima profecïakunata.

Ichikllachöna cumplikänampaq kaq profecïakuna

Huk kaq profecía. Bibliaqa willakun entero Patsapita gobiernokuna, hatun problëmankunata altsashqana kayanqanta pensarnin, “segurunam y alli pasaquichonam cantsic” niyänampaq kaqtam. Pero tsëta niriyaptin pasanqankunaqa manam ni ichikllapis alli pasakïtsu kanqa (1 Tesalonicenses 5:1-3).

Ishkë kaq profecía. Tsëpitanam llapan gobiernokuna entero Patsachö religionkunata ushakätsir qallëkuyanqa. Bibliaqa parlan huk achachïpaqmi, y tsëqa gobiernokunam kayan, hina huk achachïtana huk warmi montarëkanqantam nin, y tsë warmiqa entero Patsachö mana alli religionkunam (Apocalipsis 17:3, 15-18). Tsë achachïqa Diosta sirweqtukoq llapan mana alli religionkunatam ushakäratsimunqa, y manam musyanqatsu Diospa munëninta rurëkanqanta.

Imanö pasanampaq kaqtam huk igualatsikïwan apóstol Juan kënö willakun: “Y tse achachimi y chunca waqracuna ricashqequim compinchacarcur, tse lluta pulicoq warmipa contran shäricurcuyanqa. Tsemi püru wactsata dejarir, qalapachecur etsanta micucurcuyanqa, y ninawanmi cayecuyanqa. Diosmi permitenqa tse achachiwan llapan reycuna jucnolla ticrarir, Dios dispunishqanno llapantapis rurayänanpaq” (Apocalipsis 17:16, 17).

Kima kaq profecía. Mana alli kaq religionkunata gobiernokuna ushakäratsiyaptinmi, Satanasqa Jehoväpa sirweqninkunata ushakätsiyänantana tïranqa (Apocalipsis 7:14; Mateo 24:21).

¿Qamqa salvakunkitsuraq?

Bibliata shumaq mana estudiashqa kaptikiqa itsa sasaraq këkuna cumplikänanman creinëki kanman. Pero tukïmi rikätsimantsik ichik tiempollachöna tsëkuna cumplikänampaq kaqta. Bibliachö mëtsika profecïakuna cumplikashqana kanqanmi rikätsikun tsënö kanampaq kaqta. *

¿Imanirtaq Jehoväpa testïgonkunaqa paqwë markäkuyan ichikllachöna ‘dia del juisiu’ kanampaq kaqman, y imanirtaq mantsayantsu? ¿Imanirtaq tiempïkita rakirinkitsu Bibliawan maslla tsëpita yachakurinëkipaq? Jehová salvanqan kaqkunawan kanantsikrëkur imata ruranapaq kaqta Bibliawan yacharatsiyäshunëkipaq mañakï (Apocalipsis 16:14). Yachakurinqëkiqa itsa yanaparishunki shamoq tiempota hukläyana rikänëkipaq.

[Päginapa ura kuchunchö willakï]

[8 kaq päginachö dibüju]

¿Biblia willakunqantatsuraq Jehoväpa testïgonkunaqa cumplikäyan?