Precisaq rurënintsikta raslla rurëkäshun

“Palabrata willakï, raslla tsëta rurë.” (2 TIM. 4:2, NM.)

¿WILLAKARAMUNKIMANKU?

¿Imanirtaq alläpa precisarqan punta cristiänokuna raslla yachatsikuyänan?

¿Imanötaq rikätsikuntsik raslla yachatsikïta munanqantsikta?

¿Imanirtaq imëpitapis más precisan Diospa Gobiernompita raslla yachatsikunantsik?

1, 2. ¿Ima tapukïmantaq apamantsik Pablu “Palabrata willakï, raslla” ninqan?

NUNAKUNATA salvar trabajaqkunaqa rasllam trabäjonkunata rurayan. Këllaman pensarishun, nina upitseq bombërokunaqa rasllam ëwayan qayayanqan sitiokunaman, y tsënöqa rurayan nunakunapa kawëninkuna peligrochö kanqanta musyarmi.

² Jehoväpa testïgonkunapis salvakuyänampaqmi nunakunata yanapëta munantsik. Tsëmi alli willakïkunata musyatsikunapaq chaskinqantsik cargota alläpa precisaqpaq churantsik. Tsënö kaptimpis, manam ras ruranantsikrëkurllaqa lluta ni piñashqaqa ruranantsiktsu. Tsëqa, ¿ima ninantataq “Palabrata willakï, raslla tsëta rurë” nirqan apóstol Pablu? (2 Tim. 4:2, NM.) ¿Imanötaq raslla yachatsikuntsik? Y, ¿imanirtaq raslla ruranantsik precisan?

¿IMANIRTAQ YACHATSIKUNANTSIK ALLÄPA PRECISAN?

3. ¿Imanirtaq yachatsikunantsik precisan?

³ Yachatsikunqantsikpita nunakuna salvakuyänanman o mana salvakuyänanmampis pensarqa, itsachi cuentata qokurishun nuna mayintsikta alli willakïkunapita yachatsinantsik alläpa precisanqanta (Rom. 10:13, 14). Palabranchömi Dios kënö nin: “Mana alli nunata ‘wanunkim’ niptï, pë hutsanta haqirir rasun kaqta y alli kaqta rurarqa, [...] kawëkanqallam. Manam wanunqatsu. Ima hutsa ruranqampis manam yarpashqanatsu kanqa” (Eze. 33:14-16). Hinamampis, Jehoväqa kënömi nin Gobiernompita yachatsikoqkunata: “Tsecunata imepis rurarnenqa, mana allicunapitam salbacunqui, y wiyayäshoqniquicunapis salbacuyanqam” (1 Tim. 4:16; Eze. 3:17-21).

4. ¿Imanirtaq punta cristiänokunapa tiemponchö Diospita yachatsikï alläpa precisarqan?

⁴ Apóstol Pablu Timoteuta raslla yachatsikunampaq imanir ninqanta musyanapaqqa, kë yachatsikïchö rikänapaq kaq textopa qepan kaq y puntan kaq versïculokunata rikärishun.  Kënömi nin: “Ime öra eque örapis, alli tiempucho y mana alli tiempuchopis, shumaq pasensiequiwan Diospa palabranta willapäcunequipaq, mana alli yachatsiquicunata jaqiyänanpaq nunacunata cäyitsinequipaq, mana allicunata rurayaptin piñapänequipaq, y Jesusman alli marcäcur quecayänanpaq yanapanequipaq. Porqui chämonqam tiempucuna rasonpa caq yachatsiquicunata nunacuna wiyeta manana munayänanpaq. Masbienmi atscaq yachatsicoqcunata qatiyanqa pecunapaqnollata yachatsicuyaptin; y Diospaq rasonpa yachatsiquicunataqa manam wiyetapis munayanqatsu” (2 Tim. 4:2-4). Jesusqa willakurqannam Diospa contran tikrashqakuna llutanta yachatsikuyänampaq kaqta (Mat. 13:24, 25, 38). Ichikllachöna tsëkuna yurinampaq kaptinmi, Timoteupaqqa alläpa precisarqan nunakunata y cristiano mayinkunatapis Diospa ‘Palabranta’ willanan, tsënöpa tsë mana alli yachatsikïninkuna shumaqnö kaptimpis mana creiyänampaq. Nunakunapa kawëninmi peligrochö këkarqan. ¿Kanan witsampaqqa ima nishwanraq?

5, 6. ¿Nunakuna imanö pensayanqantataq yachatsikur tarintsik?

⁵ Kanan witsanqa paqwëmi mirashqa y më tsëchömi kan tsë llutan yachatsikïkuna (2 Tes. 2:3, 8). ¿Ima yachatsikïkunatataq nunakuna wiyëta munayan? Më tsëchömi imëkapis kikinlla rurakashqa kanqantaqa Diospita yachatsikïtanö yachatsikuyan. Y llapampis kikinlla rurakanqanta tukïta estudiayanqanwan rikätsikïta tïrayaptimpis, tsë creenciaqa Diosninnaq religionpa creenciannömi tikrashqa. Hina huk alläpa reqishqa yachatsikïqa, noqantsikpaq Dios mana yarpanqanmi, tsëmi noqantsik yarpänantsikpis mana precisanqanta niyan. ¿Imanirtaq Diospa kaqchö punukëkätsiptimpis atska millón nunakuna tsëkunam creiyan? Kë ishkan yachatsikïkunam kënö pensatsikuyan: “Munanqëkita rurakï, manam pipis cuentata mañashunkitsu”. Y tsëtam nunakunaqa más wiyëta munayan (lei Salmo 10:4 *).

⁶ Hina huknöpapis nunakuna wiyëta munayänampaqnölla yachatsikï kanmi. Iglesiaman ëwaq wakin nunakunaqa, “imata ruraptikipis Diosqa kuyashunkillam” niyänantam gustayan. Munayanqanllata wiyatsiyänanrëkurmi sacerdötekuna y pastorkunaqa niyan misakuna, fiestakuna y santokuna Diospa bendicionninta tariyänampaq yanapakunqanta. ¡Pëkunaqa manam ichikllapis musyayantsu peligrochö kawëninkuna këkanqanta! (Sal. 115:4-8.) Tsënö kaptimpis, noqantsikqa Diospa kaqchö riyakuyänampaq y Bibliapa rasumpa kaq yachatsikïninkunata musyayänampaq yanapëta puëdentsikmi, tsënöpa Diospa Gobiernon apamunqan bendicionkunata chaskiyänampaq.

¿IMANÖTAQ RASLLA YACHATSIKUNTSIK?

7. ¿Imanötaq raslla yachatsikïkanqantsikta rikätsikuntsik?

⁷ Huk alli doctor pitapis operarninqa, tsë nunapa kawënin makinchö këkanqanta musyarmi rurëkanqanllaman pensan. Tsënöllam Diospita yachatsikurnimpis raslla ruranqantsiktaqa rikätsikushun, imapita yachatsikunapaq, ima tapukïkunata ruranapaq o ima publicacionpita yachakïta munayänampaq kaqman yarparar. Hina hukmampaqa tsëta rikätsikushun nunakuna wiyamänapaqnö këkäyanqan hora kutinapaq tiempontsikta patsätsirmi (Rom. 1:15, 16; 1 Tim. 4:16).

8. ¿Imanötaq rikätsikuntsik imatapis raslla rurëkanqantsikta?

⁸ Yachatsikunqantsikta raslla rurëta munarqa, tsëtam puntaman churashun (lei Génesis 19:15 *). Këman pensari, atiendeshoqniki doctor análisis rurayäshunqëkita rikärir, qayaratsishurniki claro kënö nirishunkiman: “Rasmi hampikunëki. Huk killallachömi tukïta ruranëki qeshyëkipita kachakänëkipaq”. Musyënam, tsënö nishuptikiqa manachi nina upitseq bombëronötsu raslla yarqur ëqikunkiman. Tsëpa rantinqa, imata ruranëkipaqpis doctor nishunqëkitachi wiyakunkiman, wayikita kutinkiman y puntata imata ruranëkipaq kaqman pensankiman.

9. ¿Imanirtaq nintsik Ëfesochö këkarnin Pablu raslla yachatsikunqanta?

 ⁹ Pablupis precisaq rurëninta raslla ruranqantaqa rikätsikurqan Efeso anciänokunaman cartakunqanchö Asia nishqan distrïtochö imanö yachatsikunqampaq parlarmi (lei Hechos 20:18-21). Efeso markaman chanqan hunaqllapitatsunchi alli willakïkunata wayin wayin musyatsikur karqan. Hinamampis, ishkë watapam ‘Tiranu niyanqanpa yachatsicuna wayinchö cada junaq yachatsicorqan’ (Hech. 19:1, 8-10). Këchö rikanqantsiknöpis, cada hunaq rurëninkunachömi rikätsikurqan precisaq rurëninta raslla ruranqanta. Manam nitipakashqanö sientekunantsikrëkurtsu Bibliaqa nimantsik Diospita ras yachatsikunapaq. Tsënö kaptimpis, kawënintsikchöqa yachatsikïmi puntachö kanan.

10. ¿Imanirtaq alläpa kushikuntsik pasashqa pachak watana cristiänokuna ras yachatsikur qallayanqampita?

¹⁰ Manaraq 1914 wata kaptin Biblia Estudiaqkuna alli willakïkunata musyatsikur qallëkuyanqanmi rikätsikun imatapis raslla rurë imanö kanqanta. Huk ishkë waranqallaraq këkarpis, ushanan tiempokunachöna kayanqanta cuentata qokurmi Diospa Gobiernompita alläpa kushishqa yachatsikur qallëkuyarqan. Periödicokunapam mëtsika yachatsikïkunata horqayämurqan y “Foto-Drama de la Creación” nishqan videowanmi pï mëta yachatsiyarqan. Tsënöpam mëtsika millón nunakunaman alli willakïkunata chätsiyarqan. Tsënö raslla mana rurayaptinqa, ¿mëqantsikllapis yachakushwantsuraq karqan Diospa Gobiernompita willakïkunata? (Lei Salmo 119:60. *)

PAQTATAQ RAS RURËTA QELANÄRINKIMAN

11. ¿Imanöpataq wakinkunaqa raslla rurayänampaq kaqta qonqariyashqa?

¹¹ Tukï rurëkunaqa qonqaratsimashwanmi yachatsikunantsik alläpa precisanqanta. Satanaspa makinchö këkaq mundoqa kikintsikpa munënintsikllata ashinata y mana precisaq kaqkunata ruranatam munan (1 Ped. 5:8; 1 Juan 2:15-17). Unë witsan Jehoväpa kaqkunata puntaman churashqa karpis, wakinkunaqa ushanan tiempochöna kawëkanqantsiktam qonqëkuyashqa. Tsënömi pasarqan punta cristiänokunapa tiemponchö Diospa sirweqnin Dëmasta. Pablupa yanapaqnin këkarpis, mundochö kaqkunatam puntaman churar qallëkurqan. Pablu tukï mana allikunapa pasanqan höra kallpata qonampaq pëwan këkänampa rantinmi haqirirqan (File. 23, 24; 2 Tim. 4:10).

12. ¿Ima precisaq rurënintsiktaq kanan witsan kan, y Diospa Gobiernonchöqa imanötaq kawakushun?

¹² Diospa kaqta puntaman churëta mana qelanäriyänampaqqa, llapan cristiänokunam kë mundochö kaqkunata alli provechëpita cuidakuyänan. Y ‘Diosnintsiccho rasonpa caq fortunatam quiquincunapaq ashiyanan wiñe caweta tariyananpaq’ (1 Tim. 6:18, 19). Musyanqantsiknöpis Diospa Gobiernon chäramuptinqa manam wanushunnatsu, tsëmi imëkata ruranapaq tiempontsik kanqa. Pero Armagedonchö mana ushakäyänanrëkur nunakunata yanapanqantsiktaqa manam ni imëpis yapëqa rurashunnatsu.

13. Cristiänona këkarqa, ¿imatataq ruranantsik precisaq rurënintsikta mana qonqëkunapaq?

¹³ Kanan witsanqa casi llapan nunakunam Diospa kaqchö punukashqa cuentanö kakïkäyan, tsëqa, ¿imatataq ruranantsik precisaq rurënintsikta mana qonqëkunapaq? Yarpäshun, unë witsanqa noqantsikpis Diospa kaqchö punukashqa cuentam këkarqantsik, pero huk hunaqqa riyakunapaqmi o rikchakunapagmi yanapamarqantsik. Tsëmi Pabluta pasanqannölla Cristupa yachatsikïnin noqantsikman atsikyëkamurqan. Y kananqa noqantsikman tsë aktsita wakinkunaman kushishqa apantsik (lei Efesios 5:14). Tsëta willakurirmi apóstol Pablu këta qellqarqan: “Tseno quecaptenqa shumaq portacuyë. Ama upacunanoqa cawaquicayëtsu; sinoqa yachaq nunacunano cawacuyë. Que tiempu nunacunam llutan rurellacho caquicayan, peru qamcunaqa ama tiempiquicunata perdiyëtsu tsecunacho” (Efe. 5:15, 16, noqakunam kinkishätsiyarqö). ‘Ama tiempota perdishuntsu’, tsëpa rantinqa tiempontsikta shumaq patsätsishun precisaq rurëkunata puntaman churarnin, kë mana alli mundochö riyaqlla o rikchalla këkänapaq.

 PRECISAQ TIEMPOKUNACHÖMI KAWËKANTSIK

14-16. ¿Imanirtaq kanan witsankunaqa imëpitapis más precisan Diospa Gobiernompita yachatsikunantsik?

¹⁴ Diospita yachatsikïqa alläpam imëpis precisashqa, y kanannäqa masran. Biblia willakunqankuna cumplikëkanqanqa 1914 watapita qallëkurmi rikakashqa (Mat. 24:3-51). Kanan witsanqa imëpitapis masmi nunakunapa kawëninkuna peligrochö këkan. Qepallataraq acuerdokunata rurashqa karpis, puëdeq nacionkunaqa pashtatsiyänampaqmi listo këkätsiyan ishkë waranqanö bombakunata. Autoridadkunam willakuyan bombakunata rurayänan materialkuna mëtsika “illarinqanta o illakanqanta”. ¿Terroristakunapa makinmantsuraq tsëkuna chashqa? Wakin estudiösokunaqa niyan huk terroristallapis guërrata qallaptinqa llapan nunakuna ushakätsinakurita puëdeyanqantam. Pero nunakunapa kawënintaqa manam guërrallatsu peligroman churan.

¹⁵ Kanan witsampaq parlarmi, The Lancet nishqan revista y Londreschö University College nishqan 2009 watachö kënö niyarqan: “Patsa alläpa achachanqan y alläpa alalanqanmi llapan nunakunapaq más hatun kaq peligro”. Hina kënöpis willakuyarqanmi: “Shamoq watakunachöqa Patsa alläpa alalanqan y achachanqanmi huk hatun peligro kanqa mëtsikaq millón nunakunapa kawënimpaq y saludnimpaq”. Y tsë niyanqanqa rasunmi, lamar más huntanqan, mana tamyanqan o alläpa tamyanqan, más qeshyakuna yurimunqan, shukukï vientokuna kanqan y imëkapis wallkaptin nacionkuna qochinakur guërrata rurayänanmi llapan nunakunapa kawëninta peligroman churan.

¹⁶ Itsa wakinkunaqa pensayanman hinantin Patsachö huk guerra kariptin Jesus willakunqan señalkuna cumplikar qallanampaq kaqta. Awmi, nunakunaqa manam musyayantsu tsë profecïakuna cumplikanqan imata rikätsikunqanta. Rasun kaqchöqa, tsëkunaqa unëpitanam cumplikëkan, y tsëmi rikätsikun Cristu këkämunqantana y hinantinchö imëkapis imanö këkanqampa ushënin witsanna kanqanta (Mat. 24:3, NM). Kanan witsannöqa manam imëpis tsë señalkuna cumplikashqatsu. Kananmi tiempo Diospa kaqchö punïkaq cuenta këkaq nunakuna riyakuyänampaq o rikchayänampaq, y tsëpaqqa Diospita yachatsikunqantsikmi yanapakun.

17, 18. a) ¿Imachötaq yanapamantsik “ima tiempucunachona” kawëkanqantsikta musyanqantsik? b) ¿Imataq nunakunata yanapanman Diospa kaqman yarpachakur qallëkuyänampaq?

¹⁷ Alläpa wallka tiempollanam kapamantsik Jehoväta kuyanqantsikta rikätsikurnin, kë ushanan hunaqkunachö pëpita yachatsikunapaq mandamanqantsikta willakur ushanapaq. Römachö cristiänokunaman Pablu qellqanqantam kanan witsankuna imëpitapis más wiyakunantsik, kënömi nirqan: “Ima tiempucunachona quecanqantsictapis cuentata qocushun y punonqantsicpita riyacoq cuenta mäcoq mäcoqllana quecashun; porqui cananqa Jesucristuman creyiconqantsicpita salbacunantsic öra chäramunnam” (Rom. 13:11).

¹⁸ Itsa wakin nunakunaqa ushanan hunaqkunapaq Biblia willakunqan cumplikaqta rikarnin Diospa kaqman yarpachakur qallëkuyanman. Wakin nunakunanäqa waktsa këta, hinantinchö guerra qallëta puëdenqanta, maqanakïkunata, wanutsinakïkunata, Patsachö imëkata ushakätsiyanqanta gobiernokuna altsëta mana puëdeyanqanta rikarmi, cuentata qokuyan Dioslla nunakunata yanapëta puëdenampaq kaqta. Y wakinkunanam Diospa yanapakïninta ashir qallayan, familiankunachö pipis alläpa qeshyakurkuptin, casado këkar rakikäkurirnin o mëqan kuyashqa kastampis wanukïkuptin. Diospita yachatsikur purinqantsikchömi tsënö nunakunata yanapëta puëdentsik.

RASLLA RURANANTSIK PRECISANQANTA MUSYËMI YANAPAMANTSIK

19, 20. ¿Imanötaq atskaq cristiänokunapa kawëninta cambiashqa Diospita yachatsikïta raslla ruranantsik precisanqanta musyë?

¹⁹ Raslla ruranantsik precisanqanta yarpëmi mëtsikaq cristiänokunata yanapashqa Diospita yachatsikïchö masta rurayänampaq. Ecuador nacionchömi, 2006 wata “Mantengamos el ojo sencillo” tïtuloyoq huk hunaqlla kaq asamblëachö yachatsikayämunqanta wiyakurir, tsëllaraq casakushqa wawqiwan paniqa wanayanqanllawan kawayänampaq parlayarqan. Manana wanayanqankunatam  huk listaman churayarqan, y kima killallatam, kima cuartoyoq wayipita yarqukurir, huk cuartoyoqllana wayiman ëwakuyarqan, hina haqa këninkunata paqwë kutitsiyänampaqmi wakin cösasninkunata rantikuyarqan. Ichik tiempollachömi precursor auxiliar tikrariyarqan, y congregacionkunata watukaq wawqita wiyakurmi publicadorkunata más wanayanqanman congregacionman yanapakoq ëwakuyarqan.

²⁰ América del Norte nishqampita wawqinam kënö qellqarqan: “2006 watachö asamblëaman warmïwan ëwayanqä witsanqa kima chunka wata bautizakushqanam kayarqä. Autökunawan wayïkunata kutikarmi más wallkallawanna kawakuyänärëkur imata rurayänäpaq kaqman pensayarqä (Mat. 6:19-22). Kima wayïkuna, chakräkuna, lujo autökuna, huk lanchäkuna y puritsina wayïkunam kapayämaq. Upa cuenta kawëkäyanqäta cuenta qokurirmi, llapan tiempökunawan Jehoväta sirwiyänäpaq churakäyarqä. 2008 watam warmi wamräkunanö precursor tikrariyarqä. ¡Imanö kushishqam sientekuyä cristiano mayïkunawan Jehoväpa kaqchö más yanapakuriyanqäpita! Publicadorkuna más wanayanqan sitiokunachömi yanapakuyarqö, y Jehövapaq masta rurayanqäqä pëman más witiyänäpaqmi yanapayämashqa. Llapampitapis masqa kushitsiyäman Diospa Palabrampita wiyarir, y rasumpa kaqta yachatsikunqanta musyarir, nunakuna alläpa kushikuyanqanta rikäyanqämi”.

21. ¿Imata musyanqantsiktaq yanapamantsik raslla yachatsikunapaq?

²¹ Musyantsikmi ‘juisiu junaq’ y ‘mana alli ruraq nunacunapa’ ushakënin këllachöna këkanqanta (2 Ped. 3:7). Diospa Palabranta reqinqantsikmi yanapamantsik hatun hipakï o alläpa ñakay tiempo këllachöna këkanqanta, y tsë pasariptin kë Patsa mushoqyänampaq kaqta llapan kallpantsikwan willakunapaq. Rasumpa shoqakoq willakïkunata nunakunam raslla chätsinantsik precisanqantam imëpis yarpantsik. Kë precisaq rurënintsikta raslla rurarmi rikätsikuntsik Diosta y nuna mayintsikta kuyanqantsikta.

[Päginapa ura kuchunchö willakïkuna]

[Yachakunapaq kaqpa tapukïninkuna]