Punukashqa cuenta këkaqkunata riyatsishun
Punukashqa cuenta këkaqkunata riyatsishun
“Ima tiempucunachona quecanqantsictapis cuentata qocushun y punonqantsicpita riyacoq cuenta mäcoq mäcoqllana quecashun.” (ROM. 13:11.)
¿WILLAKARAMUNKIMANKU?
¿Imanirtaq alläpa precisan cristiänokuna riyaqlla o rikchalla këkänantsik?
¿Imanirtaq Diospita yachatsikoqkunaqa nunakuna imata pensayanqanta cuentapaq churayänan?
¿Imanötaq yachatsikunqantsikchö yanapamashwan kuyakoq kanqantsik?
1, 2. ¿Imachötaq punukashqa cuenta mëtsikaq nunakuna këkäyan?
LLAPAN watakunam mëtsika waranqa nunakuna wanuyan cärrota manejëkar punukäyanqanchö. Y wakinkunatanam trabäjonkunapita qarquriyan punukurnin hunaqäyanqampita o trabäjonkunachö punukäyanqampita. Tsënö kaptimpis, Jehoväpa kaqchö punukëqa más mana allimanmi chäratsimashwan. Tsëmi, “¡cushicuyätsun allita rurar mäcoq mäcoq shuyecayamaqcuna!” nin Bibliaqa (Apo. 16:14-16).
2 Jehoväpa hatun piñakïnin hunaq chämunanna këkaptinmi nunakunaqa punukashqa cuenta kakïkäyan. Tsëmi cristiänotukoq religionkunachö pushakoqkunapis religionninchö kaqkuna punukashqa cuenta kakïkäyanqanta niyan. ¿Imataq Diospa kaqchö punukäriqa? ¿Imanirtaq alläpa precisan rasumpa kaq cristiänokuna mäkoqlla o mayaqlla këkäyänan? ¿Imanötaq tsënö punukashqa këkaqkunata riyakuyänampaq o rikchakuyänampag yanapashwan?
¿IMATAQ DIOSPA KAQCHÖ PUNUKÄRIQA?
3. ¿Imanötaq kayan Diospa kaqchö punukashqa këkaqkunaqa?
3 Punukashqa këkaqkunaqa manam imatapis rurëta puëdeyantsu. Pero Diospa kaqchö punukashqa këkaqkunaqa itsa imëka rurëkunachö këkäyan. Imëka rurëkunayoq karmi tukïpaq yarpachakuyan y ëtsankunapa munëninkunata, reqishqa këta o imëkayoq këta ashirlla kawakuyan. Imëka rurëkunayoq karmi Diospa kaqta rurayänampaqqa tiempota tariyantsu. Pero Diospa kaqchö riyaqlla o rikchalla këkaqkunaqa “patsa ushacänan junaqcuna[chöna]” këkäyanqantam musyayan, tsëmi llapan tiemponkunawan Diosta sirwiyan (2 Ped. 3:3, 4; Luc. 21:34-36).
4. ¿Imanirtaq alläpa precisan “manam punucashqa nunacunanotsu canantsic” nir Pablu consejakunqanta wiyakunantsik?
4 (Lei 1 Tesalonicenses 5:4-8.) Kë textochöqa “punucashqano” mana këkäyänampaqmi cristiano mayinkunata apóstol Pabluqa nin. Tsënö këmanqa chärishwan imanö kawanapaqpis Jehová mandakunqankunata mana cuentapaq churarninmi. Hina huknöpaqa Diospa kaqchö punukärishwan mana wiyakoq nunakunapa ushakënin këllachöna kanqanta qonqarirmi; tsëmi alläpa precisan imanöpis pensayanqanta y rurayanqankunata mana qatinantsik.
5. ¿Imanötaq wakinkunaqa rikätsikuyan Diospa kaqchö punukashqa cuenta kakïkäyanqanta?
5 Wakin nunakunaqa manam creiyantsu huk Dios kanqanman y pitapis cuentata mana qoyänampaq kaqtam niyan (Sal. 53:1). Wakinkunanam niyan Dios nunakunapaq mana yarpanqanta, y tsënöpa Diosman yarpëpis mana precisanqanta. Y wakinkunanam creiyan ima religionchöpis karqa Diospa amïgonna kayanqanta. Diospa kaqchöqa tsë llapan nunakunam punukashqa cuenta kakïkäyan. ¿Imanöraq pëkunata riyatsishwan o rikchatsishwan?
RIYAQLLAM O RIKCHALLAM KËKÄNANTSIK
6. ¿Imanirtaq alläpa precisan huk cristiano Diospa kaqchö riyaqlla o rikchalla këkänan?
6 Wakinkunata riyatsinapaqqa o rikchatsinapagga, kikintsikpis riyaqllam këkänantsik. ¿Ima ninantaq tsëqa? Diospa Palabranqa rikätsimantsik Diospa kaqchö punukashqanö këkaqkunaqa, fiestan fiestan purikur, machakur, hukwan hukwan punukur, mana penqakur, piñakur y chikikur y maskunata rurar “paqaschono jutsa rurecuna[chö]” këkäyanqantam (lei Romanos 13:11-14). Tsënö mana alli rurëkunaman ishkïpita tsarakunanqa sasaraqmi o ajaraqmi kanman. Tsëmi alläpa precisan riyaq riyaq o mayaq mayaqlla këkänantsik. Carrota manejaq punukärita puëdenqanta ichikllapaq churarqa, kawënintam peligroman churan. Tsëmi huk cristiänopaqpis alläpa precisan Diospa kaqchö punukärirqa kawëninta oqrarinanman yarpänan.
7. ¿Imaraq pasakunman markantsikchö nunakunata yachatsita qelanashqaqa?
7 Huk cristiänoqa markanchö nunakuna wiyakïta manana munayanqanta itsa pensanman (Pro. 6:10, 11). Itsa kënö ninman: “Pipis wiyakïta mana munëkaptinqa, ¿imapaqnataq yanapanärëkur kallpachaköman?”. Rasumpam wakinkunaqa Diospa kaqchö punukashqa cuenta kakïkäyan, pero kawëninkuna y pensëninkunaqa cambiarinmanmi. Mëtsikaq nunakunam riyakurirqa Diospita wiyakïta munariyashqa. Tsëmi pëkunata yanapanapaqqa riyaq cuentalla karnin puntallapitana yachakunantsik tukïnöpa shumaq yachatsikunapaq. Rasun kaqchöqa, riyaqlla karqa musyashunmi yachatsikunantsik imanir alläpa precisanqanta.
¿IMANIRTAQ ALLÄPA PRECISAN YACHATSIKUNANTSIK?
8. ¿Imanirtaq alläpa precisan Diospita yachatsikunantsik?
8 Manam qonqanantsiktsu yachatsikurninqa nunakuna wiyamashqa o mana wiyamashqapis Jehoväta alabëkanqantsikta y munënin cumplimunampaq yanapakïkanqantsikta. Ichik tiempollachönam Diosqa condenarinqa alli willakïkunata mana wiyakoq kaqkunata. ¿Imatataq rikanqa tsëta ruranampaqqa? Yachatsikunqantsikta wiyakuyanqanta o mana wiyakuyanqantam (2 Tes. 1:8, 9). “Alli ruraqtapis y mana alli ruraqtapis Teyta Dios [cawaritsinan]” këkaptin yachatsikunantsik manana precisanqanta pensëqa alläpa mana allichi kanman (Hech. 24:15). Diospa Palabranqa nimantsik ‘chiwa’ cuenta kaqkuna paqwë ushakäyänampaq kaqtam. Pero yachatsikunqantsikqa nunakunatam yanapan “wiñe cawaquiman” chäyänampaq, y tsëta ruranapaq mandamanqantsikchömi Diosqa kuyakoq kanqanta rikätsikun (Mat. 25:32, 41, 46; Rom. 10:13-15). Yachatsikoq mana yarqushqaqa, ¿imanöraq nunakuna yachakuyanman salvakoq willakïkunapita?
9. Diospita yachatsikunqantsikqa, ¿imanötaq kikintsikta y hukkunatapis yanapan?
9 Alli willakïkunata yachatsikunqantsikqa kikintsiktapis yanapamantsikmi (lei 1 Timoteu 4:16). ¿Cuentata qokushqantsikku Jehoväpita yachatsikurqa pëman más markäkunqantsikta y kuyanqantsikta? ¿Manaku alläpa yanapamantsik más alli cristiano tikranapaq? ¿Manaku yachatsikurnin Diosta kuyanqantsikta rikätsikurqa más kushishqa kantsik? Mëtsikaq cristiänokunam cuentata qokuyashqa nuna mayinkunata rasumpa kaqta yachatsiyaptin santo espïritupa yanapakïninwan hukläyana kawakuyanqanta rikëqa alläpa kushikïpaq kanqanta.
IMATA PENSAYANQANTA MUSYËTA TÏRASHUN
10, 11. a) ¿Imanötaq Jesuswan Pablu rikätsikuyarqan nunakuna imata pensayanqanta cuentapaq churayanqanta? b) ¿Imakunatataq rikänantsik más alli yachatsikunapaqqa?
10 Alli willakïkunata chaskikuyänampaqqa tukïnöpam nunakunata yanapëta puëdentsik. Tsëmi Diospita yachatsikoqkunaqa nunakuna imata pensayanqanta musyëta tïrayänan. Jesusmi tsëta yachatsimantsik. Nunakuna imata pensayanqanta musyarmi cuenta qokurqan huk fariseo shonqunllachö paqwë piñashqa këkanqanta, huk warmi hutsampita rasumpa wanakunqanta y waktsa këkarpis huk viuda qarakoq kanqanta (Luc. 7:37-50; 21:1-4). Tsënöpam cada nunata wananqanmannö Diospa kaqchö yanaparqan. Tsënö kaptimpis, Diosta sirweqkunaqa manam Jesusnö shonquta rikaqraqtsu kayänan nunakuna imata pensayanqantapis musyayänampaqqa. Tsëtam yachakuntsik apóstol Pablupita, pëqa tukï rikoq y tukï pensëyoq nunakunata yachatsinanrëkurmi, pëkuna wanayanqanmannö yachatsirqan (Hech. 17:22, 23, 34; 1 Cor. 9:19-23).
11 Jesusnö y Pablunö nunakuna imata pensayanqanta musyëta tïrarqa, itsa cuentata qokurishun wiyakïta munayänanrëkur imanö parlapänapaqpis. Këllaman pensarishun, pitapis parlaparqa më markapita kanqanta, imata munanqanta o imanö familiapita kanqanta musyëtam tïranantsik. Itsa shumaq rikärishwan parlapanqantsik hora imata rurëkanqanta y nïkurna tsëpita parlapaqnölla shumaq yacharatsishwan.
12. ¿Imanirtaq altanto këkänantsik shumaq yachatsikunata imapis mana pantatsimänapaq?
12 Nunakuna ima pensayanqanta musyëta tïraqqa manam hukkunaman yarparantsu. Yachatsikunqantsikchö yanaqintsikwan parlariqa allim. Pero vecïnontsikkunawan parlanantsik más precisanqantam yarpänantsik (Ecl. 3:1, 7). Tsëmi altantolla këkänantsik huk punkupita huk punkuman ëwanqantsikyaq parlanqantsik shumaq yachatsikunantsikta mana pantatsimänapaq. Imakunapita yachatsikunapaq kaqta yanaqintsikwan parlarinqantsikqa, yanapamäshun shumaq yachatsikunapaq kaqman yarpänapaqmi. Celularkuna alläpa yanapakuptimpis, yarpänantsikmi nunakunawan shumaq parlakurinata mana pantaratsimänapaq kaqta.
NUNAKUNATA RASUMPA YANAPËTA TÏRASHUN
13, 14. a) ¿Imanötaq musyashwan pipis imapaq yarpachakunqanta? b) ¿Imaraq pitapis yanapanman Diospa kaqpita yachakïta munarinampaq?
13 Riyaqlla o rikchalla Diospita yachatsikoqkunaqa shumaqmi wiyayan parlapäyanqan nunakuna imata niyanqantapis. ¿Imataraq markantsikchö nunakunata tapurishwan imapaq yarpachakuyanqanta parlakarayämunampaq? ¿Mëtsika religionkuna, chikinakïkuna, mana alli gobierno kanqantsuraq yarpakachätsin? Diospa kaqpita más yachakïta munayänampaq, ¿manatsuraq yanaparishwan tukï kawëkaqkuna imanö rurashqa kayanqampaq parlapar, o kawënintsikchö Biblia imanö yanapamanqantsikta rikätsir? Diosman mañakïpaqqa më tsëpita nunakunam parlëta munayan, hasta Dios kanqanman mana creeqkunapis. Pï mëmi tapukuyan mañakïninkunata pillapis wiyanqanta o mana wiyanqanta. Wakinkunanam musyëta munayan llapan mañakïkunata Dios wiyanqanta o mana wiyanqanta, o wiyanampaq imata rurayänampaq kaqta.
14 Nunakunata shumaq parlapar qallanapaqqa yanapamäshun atska watakunana Diospita yachatsikoqkunata rikanqantsikmi. Alläpa tapupäkoqtanö o musyachatanö mana rikäyänampaq imanö yachatsikuyanqanta altanto kashun. ¿Imanötaq parlëninchö y qaqllanchö rikätsikuyan nunakunata rasumpëpa yanapëta munayanqanta? (Pro. 15:13.)
KUYAKÏPA SHUMAQ YACHATSIKUSHUN
15. ¿Imanirtaq kuyakïllapa imëpis yachatsikushwan?
15 ¿Kushikuntsikku pillapis paqwë punukashqa këkaqta mantsakätsipa riyarkatsimashqa o rikcharatsimashqa? Pï më nunakunam tsënö riyatsiyaptinqa piñakuyan, pero shumaqlla riyatsiyaptinqa manam. Hina tsënöllam pasan Diospa kaqchö punukashqa cuenta këkaqkunawampis. Këllaman pensarishun, pipis wayinman chärishqa piñakuptinqa, ¿imata ruranantsikraq más alli kanman? Imanö sientekunqanmanmi pensanantsik, claro niramanqantsikpitam agradecikunantsik y shumaqllam ëwakunantsik (Pro. 15:1; 17:14; 2 Tim. 2:24). Kuyëllapa tratashqaqa itsa yapëchö huk Testigo chaptimpis wiyarinqa.
16, 17. ¿Imanötaq yachatsikushwan nunakuna maslla wiyaramänapaq?
16 Höraqa itsa pipis mana wiyakïta munar imatapis niramäshun. Wakinkunaqa mana parlapänata munarllam “Amaraq, noqapaqa kannam religionnï” o “Manam imatapis musyëta munätsu” niyan. Pero musyëta munanampaqnö kuyakïllapa y shumaqlla imapaqpis tapurishqaqa, itsa wiyakïta munariyanqa (lei Colosenses 4:6).
17 Imëka rurëyoq këkanqanta pipis nimashqaqa, itsa höraqa más alli kanman ëwakunantsik. Tsënö kaptimpis, höraqa alli pensëkur imatapis raslla yacharatsinqantsikmi más alli kanman. Wakin wawqikuna o panikunaqa huk minütollachö o más wallkallachömi Bibliata kichëkur huk texto leirapuyan y huk tapukïta haqiriyan. Hina wakinkunanam ichikllachö shumaq parlapäriyan, tsëmi nunakunaqa maslla yachakïta munariyan. ¿Imanirtaq tsënö rurëta tïrantsiktsu?
18. ¿Imatataq ruranantsik mëchö tsëchö këkarpis shumaq yachatsikunapaq?
18 Imëka rurënintsikchöpis pï më nunakunawanmi tinkuntsik. Pëkunata parlapänapaq puntallapitana alistakurqa, alli willakïkunapita yachakïta munariyänampaqmi yanapashun. Atskaq cristiänokunam bolsïllonkunachö o cartërankunachö publicacionkunata puritsiyan. Y itsa ima textotapis peqankunallachöna katsiyan tsëpita pitapis parlapäriyänampaq. Hina tsënö yachatsikunapaq yanapakïta wanarqa allim superintendente de servicio nishqanta y precursorkunata imanö yachatsikunapaqpis tapurishwan.
SHUMAQLLA PARLAPÄSHUN KASTANTSIKKUNATA
19. ¿Imanirtaq haqirishwantsu kastantsikkunata Diosta reqiyänampaq yanapëta?
19 Llapantsikpis munantsikmi familiantsikkuna alli willakïkunata chaskikuyänantaqa (Jos. 2:13; Hech. 10:24, 48; 16:31, 32). Pero qallananchö mana cäsomashqaqa itsa qelanärishwan. Itsa imata rurashqa o nishqapis manana wiyamänata pensashwan. Pero rasun kaqchöqa, itsa imallapis pasarinqan yanapanman hukläyapana pensayänampaq. O itsa kananqa más allina rasumpa kaqpita yachatsikïta yachantsik y tsëqa wiyakuyänampaq más allina yanaparishwan.
20. ¿Imanirtaq alläpa precisan kastantsikkunata yachëllapa parlapänantsik?
20 Kastantsikkuna imanö sientekuyanqantaqa imëpis cuentamanmi churanantsik (Rom. 2:4). Tsëmi yachatsikur purinqantsikchö nunakunata shumaq parlapanqantsiknölla pëkunatapis parlapashwan. Mana raslla piñakurnin y respëtowanmi tratashwan. Mana qayapëllapa rikätsishun rasumpa kaq yachatsikïkuna kawënintsikchö imanö yanapamanqantsikta (Efe. 4:23, 24). Hina más alli kawakunapaq Jehová imanö yanapamanqantsikta y biennintsikpaq yachatsimanqantsiktapis rikätsita tïrashun (Isa. 48:17). Kawënintsikchö rikäyätsun rasumpa cristiänokuna imanö kayanqanta.
21, 22. Willakaramï familiantsikkuna mana munaqnö kayaptimpis yachëkätsinantsik precisanqanta huk pani imanö rikätsimanqantsikta.
21 Qepallataran huk pani këta qellqarqan: “Chunka kima turïkunatawan nanäkunatam parlaparnin y rurënïkunawan imëpis yachatsita tïrarqö. Llapan watakunam pëkunaman cartakö. Tsënö kaptimpis, kima chunka watanömi familiächö hapallälla Testigo karqä”.
22 Nïkurmi kënö nin: “Huk hunaqmi alläpa karuchö täraq nanäta telëfonopa qayarqä. Tsëmi willaramarqan Bibliapita yachatsinampaq pastorninta mañëkaptin mana yanapanqanta. Tsënam kikï yachatsita munanqäta niriptï kënö nimarqan: ‘Allim kanqa, pero noqaqa manam imëpis Jehoväpa testïgon kashaqtsu, tsëta musyanëkitam munä’. Tsënam, Rasumpëpaqa, ¿imatataq Biblia yachatsikun? librota aparatsirnin cada huk ishkë hunaqllata qayarqä. Pero pëqa librota ni huk kutillapis mana kichashqa kaptinmi, huk kutiqa tsëta ruranampaq nirqä, y chunka pitsqa minütonömi telëfonopa pärrafokunata y tsëchö textokunata leiyarqä y tsëpaq parlakuriyarqä. Huk ishkë kuti qayariptïqa chunka pitsqa minütopitapis masnam estudiëta munarirqan. Tsëpitaqa kikinnam yachakuyänäpaq qayamar qallëkurqan, y höranäqa hasta manaraqpis shärikuptï y hunaqchö ishkë kutim qayamaq. Huk watallatam bautizakurirqan y tsëpita huk wata masllatam precursora tikrarirqan”.
23. ¿Imanirtaq Diospa kaqchö punïkaq nunakunata riyatsita utishwantsu?
23 Diospa kaqchö punukashqa cuenta këkaqkunata riyatsinapaqqa yachëpaqraq y imëpis kallpachakïpaqraqmi. Tsënö kaptimpis, kanran yachatsikunqantsikta chaskikoq manshu nunakuna. Tsëmi cada killa chunka ishkë waranqapitapis más nunakuna Jehoväpa testïgonkuna kayänampaq bautizakuyan. Tsëmi apóstol Pablu, “nicuyë Arquiputa Teyta Jesucristuta sirwinanpaq änenqanta cumplir procurecunanpaq” nir qellqanqanta wiyakunantsik (Col. 4:17). Qateqnin kaq yachatsikïmi alleq entiendetsimäshun Diospita yachatsikï imanir alläpa precisanqanta.
[Yachakunapaq kaqpa tapukïninkuna]
[13 kaq päginachö recuadru]
¿IMANÖTAQ RIYAQLLA O RIKCHALLA KËKASHWAN?
▪ Diospa munëninta imëpis rurë
▪ Paqaschönö hutsa rurëkunaman ishkitsu
▪ Diospa kaqchö punakärita puëdenqëkita ama qonqëtsu
▪ Markëkichö alli shonquyoq nunakuna kayanqantaraq yarpë
▪ Tukïnöpa shumaq yachatsikïta tïrë
▪ Diospita yachatsikï alläpa precisanqanta ama qonqëtsu
