Diosman witi

“Kutikallämushaq, yapë chaskïkallämë”

¿Jehoväpa markampitaku yarqukushqanki? Itsa kutita pensanki, pero Jehová yapë chaskishunëkita o mana chaskishunëkitapis alleqqa musyankitsu. Tsëqa allichi leirinkiman kë yachatsikïta y qateqnin kaqtapis, yanapashunëkipaqmi qellqakämushqa.

JUK warmim kënö nirqan: “Lädonman kutinäta jaqimänampaq y llakitsirnin tukï mana allikunata ruranqäpita perdonamänampaqmi imëpis Diosman mañakurqä”. Pëqa wamra kanqampitam Jehoväta reqishqa karqan, pero tsëpitam rakikäkurirqan. ¿Mana allikunata pasanqanta pensar llakipankiku? Tsëqa, “¿pëkunata Diosnintsik yarpantsuraq o pëman kutiyänanta munantsuraq?” nir itsa tapukunki. Tsënö sientekuptikiqa profeta Jeremías ninqankunam yanaparishunki (lei Jeremías 31:18-20).

Qallarinapaqqa, puntata rikärishun imakuna pasakïkaptin tsëta qellqanqanta. Atskaq watakuna Jeremías yurinampaq pishikaptinmi, 740 watachö norte kaq lädomampa chunka kastakunata, asiriokuna ushakätsiyänampaq y preso apakuyänampaq Jehová permitirqan. * Pëkunaqa alläpa mana allikunatam rurakïkäyarqan, y profëtakuna willakuyanqanta mana casokuyaptinnam alli kaq rurëta yachakuyänampaq Jehová castigarqan (2 Reyes 17:5-18). ¿Israelïtakunaqa mana alli rurëninkunata jaqiyarqanku Diospita y markankunapita karuchö këkar? ¿Qonqëkurqantsuraq Jehová? ¿Yapë chaskinmanraqtsuraq karqan?

‘Alläpam llakikurqä’

Israelïtakunaqa preso apakuyaptinran cuentata qokuyarqan y mana alli rurëninkunapita wanakuyarqan. Y Jehoväqa cuentata qokurqanmi shonqunkunapita patsë wanakuyanqanta. Tsënö Efraín llakikunqampitaqa musyantsik Jehová parlanqanta leirninmi.

“Mana allikunata ruranqampita Efraín alläpa llakikoqtam wiyarqö.” (Versículo 18.) Jutsata rurayanqanrëkur mana alliman chäyanqampita israelïtakuna llakikuyanqantaqa Jehová wiyarqanmi. Juk hebreo diccionario ninqannöpis “ruranqampita [...] llakikoqtam” nirqa rikätsikun juk mana wiyakoq wamra ruranqankunapita mana allikunaman charnin, wayinman kutita munar “peqanta o umanta awir” pësakunqantam (Lucas 15:11-17). ¿Imanötaq israelïtakuna rikätsikuyarqan wanakushqana kayanqanta?

“Imëka manaraq yapyaq törota mansaqnömi alli kaqllata ruranäpaq piñapämarqunki.” (Versículo 18.) Kikin israelïtakunam cuentata qokuyarqan imëka manaraq yapyaq töronöpis mana alli portakuyanqanta y tsënöpa castïgota chaskiyanqanta. Y tsëchi juk libro ninqannöpis “tuksipar” pushayänantaraq wanayarqan.

“Kutikamunäpaq yanapëkamë, y rasllam kutikamushaq, qammi Diosnï Jehová kanki.” (Versículo 18.) Paqwë wanakushqa karninmi Diosman yapë mañakur qallayarqan. Rasumpam pëpita rakikäkurir tukï mana allikunata rurayashqa kayarqan. Tsënö karpis Dios perdonëkunantam munayarqan, tsëmi mañakuyarqan. Tsënö rogakuyanqampaqmi juk Bibliapis kënö nin: “Yapë chaskïkallämë, kutikamunäta jaqïkallämë, oh  YHWH qammi [Diosnï] kanki” (Versión Israelita Nazarena).

“Alläpa[m] llakikurqä [...] penqakurqä y humillashqa sientekurqä.” (Versículo 19.) Israelïtakunaqa jutsa rurayanqampita alläpam nanatsikuyarqan y rurayanqan mana alli kanqanta cuentata qokuyarqanmi. Alläpa llakishqa y yarpachakurllam kakuyaq (Lucas 15:18, 19, 21).

Wanakushqa kayanqanqa clärom këkarqan. Alläpa penqakushqa karmi jutsa rurayanqanta Diosta willayarqan y tsë rurëninkunata paqwë jaqiriyarqan. Pero ¿tsërëkurllatsuraq Diosqa jutsankunata perdonëkunman karqan y markankunaman kutitsinman karqan?

‘Pëtaqa imëpis llakipäshä o ankupäshaqmi’

Jehoväqa israelïtakunata alläpam kuyarqan. Jeremías 31:9 textom nin: “Israelpaqa teytanmi kä, y Efrainqa mayor tsurï cuentam”. Tsënö këkarqa, ¿manatsuraq kuyashqa tsurin wanakur kutiptin Jehová chakinman karqan? Qateqninchö Jehová ninqanmi rikätsikun imëka teyta cuenta markanta kuyanqanta.

“¿Manaku Efrainqa noqapaq alläpa shumaq wamra o kuyapanqä wamra? Pëpaq mana allita parlashqa karpis, mana qonqëtam pëpaq más yarpäshaq.” (Versículo 20.) Kë ninqanwanqa, ¡alläpa kuyakoq Teyta kanqantam rikätsikun! Tsënö karnimpis mana alli rurëninkuna mëman chätsinampaq kaqtaqa israelïtakunata clärom willarqan. Tsëmi, imëpis consejëkanqanta mana wiyayaptin, preso apakuyänampaq jaqir castigarqan. Tsënö karpis, juk teyta tsurinta mana qonqaqnömi Pëpis israelïtakunata qonqarqantsu. Tsëqa, ¿imanötaq Jehová sientekurqan israelïtakuna jutsankunapita paqwë wanakushqata rikar?

“Pëpaqqa shonqöpis paqwë[mi] nanarin. Pëtaqa imëpis ankupäshaqmi [llakipäshämi].” (Versículo 20.) Jehoväqa munëkarqan israelïtakuna wanakur pëman kutiyänantam. Mana alli rurëninkunapita wanakur llakikuyanqanmi Jehoväpa shonqunta kushiratsirqan y pëman kutiyänanta alläpam munarqan. Jesus juk igualatsikïchö parlanqan kutikamoq wamranta chaskeq teytanömi Jehoväpis alläpa “ancuparqan” o llakipargan (Lucas 15:20). Alläpa kushishqam shuyarëkarqan israelïtakuna pëman kutikuyänanta.

“Jehovämi kutinäta jaqimarqan”

Jeremías 31:18-20 textochö ninqanmi yanapakun, Diosnintsik alläpa ankupäkoq o llakipäkog kanqanta musyanapaq. Pëqa manam qonqantsu pëpita rakikäkurishqa kaqkunata. Y kutita munaqkunata ‘perdonanampaq listom këkan’ (Salmo 86:5). Jutsa rurayanqampita wanakur kuteqkunataqa manam mana allipa rikantsu (Salmo 51:17). Antis kushishqam chaskin (Lucas 15:22-24).

¿Qallananchö parlanqantsik warmipaq yarpankiku? Pëqa Diospa nöpanman kutita munarmi, täranqan markachö Testïgokunapa congregacionninchö yanapakïta ashirqan. Qallananllachöqa mantsakurqanmi. Kikinmi kënö willakun: “Mananachi Diosqa perdonamanqanatsu nirqämi”. Pero anciänokunam Diospa kaqchö y maskunachöpis alliyänampaq yanapayarqan. ¿Imataq pasarqan? Kikinmi kënö willakun: “Jehovämi kutinäta jaqimarqan y alläpam agradecikö”.

Qampis Jehoväpita rakikashqa kaptiki y kanan pëman kutita munaptikiqa täranqëkichö Jehoväpa testïgonkunapa congregacionninchö yanapakïta ashinëkipaqmi niriyaq. Yarpë, jutsankunata jaqirir, “kutikallämushaq, yapë chaskïkallämë” neqkunataqa Diosqa alläpam ankupan y llakipan.

[Päginapa ura kuchunchö willakï]