¿Ima ninmanraq Jesus?

¿Allitsuraq religionwan política takukäyanman? Mëtsikaq Diosman creikoqkunam niyan religionqa polïticachö yanapakïta puëdenqanta, y manam puëdenqanllatatsu niyan, sinöqa nunakunapa o runakunapa problëmankunata altsayänampaq tsëta rurayänan alläpa precisanqantam. Tsënö kaptimpis, wakinkunaqa religionwan política takukäyanqan mana alli kanqantam pensayan. Y qamqa, ¿ima ninkitaq? ¿Allitsuraq takukäyanman?

JESUCRISTU “religión asuntochö imëpitapis más [...] respetashqa kanqantam” pï më niyan. ¿Ima ninmanraq religionwan política takukäyanqan alli o mana alli kanqanta tapuyaptin? ¿Musyarqëkiku Patsachö kanqan witsanna kë tapukïta contestanqanta? Y manam tsëllatsu, pëqa imata pensanqantapis rurëninwanmi rikätsikurqan. Jirkapita Yachatsikurmi pëqa rikätsikurqan qateqninkuna markankunata imakunallachö yanapayänampaq kaqta. Rikärishun wakinkunallata.

 Alli kawakurmi yanapakuyänan

Jesusmi nirqan qateqninkuna nunakunata o runakunata imanö yanapayänampaq kaqta, kënömi nirqan: “Qamcunaqa que patsacho imeca cachi cuentam nunacunapaq quecayanqui; peru sitsun cachi qamläcurenqa, ¿imanepanaraq yape mishquinta cutitsinman? Tseno carqa, tse cachi mananam imapaqpis sirwinnatsu. Tsemi nänimanna jitarintsic jarucuyänanpaq. Qamcunaqa que patsacho imeca actsi cuentam nunacunapaq cayanqui. [...] Lamparin actsicoq cuenta qamcunapis allicunata rurar cawacuyë. Tseno alli ruraq cayanqequita ricarmi, nunacuna sielucho quecaq Dios Yayantsicta alabecuyanqa” (Mateo 5:13-16). ¿Imanirtaq Jesusqa qateqninkunata nirqan kachi cuenta y aktsi cuenta kayanqanta?

Jesusqa manam wakin nunakunallapaq qateqninkuna kachi cuenta y aktsi cuenta kayänampaq kaqtatsu nirqan. Antis pëqa nirqan llapan nunakunapaq kachi cuenta y Diosta reqita munaqkunapaq aktsi cuenta kayänampaq kaqtam. Rikanqantsiknöpis, Jesusqa manam qateqninkuna nunakunapita rakikäyänantatsu munarqan.

Këkunallaman pensarishun: ¿imanöraq guardashqa ëtsa kurunmantsu mana kachitashqa këkarqa? ¿O imanöraq juk lamparin aktsinman mana ampiraqchö o tsakaraqchö këkarqa? Tsëmi Jesusqa ni imëpis qateqninkunata nirqantsu ni pï täränan sitiokunapa ëwëkur tsëchö täräyänampaq. Ni manam nirqantsu jatun wayikunata rurëkur tsëpita mana yarqurlla Diosta sirwiyänampaq. Ëtsa mana kurünampaqqa kachitashqaran kanan, jina lamparimpis aktsinampaqqa ampichöraqmi o tsakaychöraqmi kanan. Tsënöllam cristiänokunapis alli kawakïninkunawan yanapakuyänampaqqa wakinkunapita rakikäyänantsu.

‘Mundupa munayninchöga mananam cawayannatsu’

Awmi, tsëkunam wakinkunataqa pensatsin cristiänokuna polïticata imanö rikäyänampaq kaqman. ¿Imanir? Porque wanunampaq ichikllana pishikaptinmi qateqninkunapaq Jesus Teytanman kënö mañakurqan: “Manam cay mundupita jipinayquipagtsu [jorqanëkipaqtsu] mañacug, sinöga llapan imayca mana allicunapita tsaparnin cuidanayquipagmi. Noga cay mundupita mana cangänöllam, paycunapis cay mundupa munayninchöga manana ni imay cawayannatsu” (Juan 17:15, 16, NTCN). Tsëqa, ¿imanötaq cristiänokunaqa mundopa munëninchö mana kawakurlla nunakunata allipaq yanapayänan karqan? Tsëta musyanapaqqa, kima tapukïkunapa respuestantaraq rikärishun.

• ¿Imatataq Jesusqa polïticapaq nirqan?

• ¿Imatataq rurayanman kanan witsan kaq cristiänokuna?

• ¿Imanötaq cristiänokuna yachatsikuyanqan marka mayinkunata yanapan?

[4 kaq päginachö ninqan]

Jesusqa manam qateqninkuna nunakunapita rakikäyänantatsu munarqan