Diospa Palabrampita yachatsikïkuna

¿Imanirtaq Diospa jutinta parlanantsik?

Kë yachatsikïmi yanapashunki wakin tapukïkunapa respuestanta Bibliëkichö tarinëkipaq, y tsë tapukïkunataqa capaz qampis rurakushqanki. Munaptikiqa, Jehoväpa testïgonkuna yanapariyäshunkimanmi kë tapukïkunapa respuestanta más yachakurinëkipaq.

1. ¿Imanirtaq jutiyoq këta Dios akrarqan?

Llapantsikpis jutintsikpa qayashqa këtam munantsik. ¿Imanir? Porque respetamarnintsik “señor” o “señora” nir nunakuna o runakuna qayamashqapis, jutintsikqa wakinkunawan pipis mana pantamänantsikpaqmi sirwin. Tsënöllam Diostapis “Ciëlochö y Patsachö Autoridadyoq”, “Llapanta Puëdeq” y “Kamakoq” nirnin qayayan (Génesis 15:2; 17:1; Eclesiastés 12:1). Pero más reqinantsikpaq y amïgon këman chänapaqmi jutiyoq këta akrarqan. Castellänochö jutinqa Jehovämi. (Lei Isaías 42:8.)

Bibliata juk idiömaman tikratseqkuna Diospa jutinta churayänampa rantin o trukan “Dios” o “Teyta” nir churashqa kayaptimpis, rasumpa jutinqa casi 7.000 kutinömi hebreo idiömachö qellqayanqan Bibliakunachö yurin. Clärom këkan jutinta musyanantsikta Dios munanqanqa. (Lei Isaías 12:4.)

2. ¿Imanirtaq precisan Diospa jutinta reqinantsik?

Diospa jutinta musyanantsikqa precisanmi, pero manam tsëllatsu, jina ima ninan kanqantapis musyanantsikmi, y tsëmi yanapamäshun pëwan alli amigo kanantsikpaq. Jehová nishqan jutiqa, “Rurakänampaq kaqta Ruraq” ninanmi, y tsëmi rikätsikun Jehoväqa munëninta imëkanöpapis cumplinampaq kaqta. Tsëmi Diospa jutinta reqiqa, awnikunqanta cumplinampaq kaqman markäkï o yärakuy (Salmo 9:10). Diospa jutinta reqeqkuna y parlaqkunaqa pëmanmi markäkuyan y kawëninkunachö puntaman churayänampaqmi kallpachakuyan. Jehoväqa jutinta reqeqkunata mana allikunapita tsapänampaqmi awnikun. (Lei Salmo 91:14.)

  3. ¿Imanirtaq jutinta reqiyänanta Dios munan?

Allipaq kaptinmi Diosqa munan jutinta reqiyänanta. ¿Imanirtaq allipaq? Jutinta reqeqkunaqa amïgon këmanmi chäyan y imëyaqpis kawakïtam puëdeyan. Tsëchi Diosqa munan jutinta sirweqninkuna reqitsikuyänanta. (Lei Juan 17:3 y Romanos 10:13, 14.)

Jesusqa Teytan imanö pensanqanta, imanö imatapis ruranqanta, leyninkunata y awnikïninkunata pï mëta musyatsirmi Diospa jutinta reqitsikurqan. Kanan witsampis Cristuta qateqkunaqa tsënöllam rurëkäyan llapan nacionkunachö. Llapanmi “jutinta apaq marka” kayan. (Lei Hechos 15:14, NM y Juan 17:26.)

4. ¿Imanötaq jutinta Dios respetatsikunqa?

Nunakuna mana allichö jorqayashqa kayaptinmi Jehoväqa jutinta respetatsikïta munan. Pï mëmi creiyan Patsata Dios mana kamanqanta, tsëmi pensayan pëta wiyakï mana precisanqanta. Wakinkunanam niyan noqantsikpaq mana yarpanqanta y imëka mana allikuna pasanqan pëpa culpan kanqanta. Pero Diosqa ichikllachönam tsënö pensar jutinta mana allichö jorqaqkunata ushakäratsinqa. (Lei Salmo 83:17, 18.)

Diospa Gobiernonqa ichikllachönam Patsachö alli kawakï kanampaq llapan gobiernokunata ushakäratsimunqa, tsënömi Diosqa jutinta respetatsikunqa (Daniel 2:44). Ichikllachönam llapan musyariyanqa Jehovälla rasumpa kaq Dios kanqanta. (Lei Ezequiel 36:23 y Mateo 6:9.)

Tsëqa, ¿imatataq ruranëki? Diosmanmi más witinëki, y tsëpaqqa Bibliapitam yachakunëki y sirweqninkunawanmi juntakunëki. Awmi, Jehoväqa jutinta respetatsikunqan höram sirweqninkunapaq yarpärinqa (Malaquías 3:16).

Más yachakïta munarqa, Rasumpëpaqa, ¿imatataq Biblia yachatsikun? libropa 1 kaq capïtulonta ashiri, kë librotaqa Jehoväpa testïgonkunam rurayämushqa.

[24 kaq päginachö dibüju]

Hebreo idiömachö unë witsan qellqayanqan Diospa jutin