¿Imatataq Jesusqa polïticapaq nirqan?

TUKÏ pasanqankunachö Jesus ninqampaq y ruranqankunapaq Biblia willakunqanmi rikätsimantsik política asuntopaq imata pensanqanta. Këman pensarishun, 30 watayoqnö këkar bautizakuriptinmi Diablu tentarnin awnirqan llapan Patsata gobernanampaq. Tiempowanman, mëtsikaq nunakuna o runakuna munayarqan rey kananta. Y más tiempokuna pasariptinnam, polïticaman mëtikur tsë witsan gobiernopa contran kananta munayarqan. Tsëkuna pasakuptin, ¿ima nirqantaq y imatataq rurarqan?

Llapan nunakunata gobernaq. Biblia qellqaqkunam niyarqan Diabluqa Jesusta tentarnin “jinantin munducho nasioncunata riquesancunatawan” awninqanta. Pensari, ¿ima allikunataraq nunakunapaq Jesus ruranman karqan Diablu awninqanta chaskirqa? Polïticachö karnin tukï allikunata rurëta puëdenampaq kaqta pensarqa, ¿manatsuraq Diablu awninqanta chaskikunman karqan? Pero Jesusqa manam tsëta rurarqantsu (Mateo 4:8-11).

Rey. Jesuspa tiemponchöqa, pï më nunakunam munayaq pipis política asuntota altsananta y llapankunapaq imëka kanampaq yanapakunanta. Jesus tukï allikunata ruranqanta rikarmi nunakunaqa munayarqan política asuntoman yëkunanta. Pero ¿imatataq pë rurarqan? Bibliata qellqaq Juanmi kënö nirqan: “Jesusqa musyarerqanmi nunacuna reynincuna cananpaq malas chureta munayanqanta. Tsemi jircacunapa yape cuticorqan japallan” (Juan 6:10-15). Awmi, yapëmi polïticaman mëtikïta munarqantsu.

Gobiernopa contran. Tsënöllam pasarqan Jesusta wanutsiyänampaq ichikllana pishikaptin. Fariseokunapa qateqninkuna y Herodista qateqkunam Jesusta parlapäyarqan. Fariseokunapa qateqninkunaqa Roma gobiernopita rakikëtam munayaq, pero Herodispa kaqkunaqa manam tsë gobiernopa contrantsu kayaq. Mëqanman karpis qaqänanta munarmi tapuyarqan Judïokuna impuestokunata pagayänan precisanqanta o mana precisanqanta.

Marcos willakunqannöpis, Cristuqa kënömi nirqan: “¿Imanirtaq mana alliman ishquitsimeta munayanqui! Mä, apayämï tse qelleta ricanäpaq. Qelleta qoriyaptinnam Jesus nerqan: —Que qellecho ¿pipa retratuntaq quecan? ¿Pipa jutintaq  escribirëcan? Pecunanam niyarqan: —Mandacoq cesarpam —nir. Jesusnam nerqan: —Tsepenqa mandacoq cesarpa caqtaqa mandacoq cesarta qoycuyë; y Diospa caqtaqa Diosta qoycuyë —nir. Tsenam pecuna mana ni ima nita puediyarqantsu” (Marcos 12:13-17). Awmi, religionpaqwan polïticapaq parlaq libropis kënömi nin: “Pëqa rasumpam Mesias karqan, pero manam pëkuna [judïokuna] munayanqannötsu ‘política asuntochö Mesias’ karqan. [...] Jesus yachatsikunqanqa clärom rikätsikun religionwan polïticaqa jukläya kayanqanta y mana takukäyanqanta” (Teología Moral).

Tsëqa, ¿waktsakunata, mana alli rurëkunata y sufrimientokunata rikëkarpis Cristu wiyaräkunqantaku rikätsikun? Manam, antis Bibliaqa willakun nunakuna imëkapa pasaqta rikarnin alläpa llakikunqantam (Marcos 6:33, 34). Tsënö kaptimpis, pëqa manam campäñata rurarqantsu imëka mana alli rurëkunata ushakätsinampaq, ni política asuntochö tukï problëmakunata altsar yanapakunampaq mañayaptimpis mëtikurqantsu.

Kë kiman pasakunqankunam rikätsikun Jesus política asuntoman ni imëpis mana mëtikïta munanqanta. Pero kanan witsan cristiänokunaqa, ¿imanötaq política asuntota rikäyänan?