Diospa Palabrampita yachatsikïkuna

¿Imëtaq Jesus gobernar qallarqan?

Kë yachatsikïmi yanapashunki wakin tapukïkunapa respuestanta Bibliëkichö tarinëkipaq, y tsë tapukïkunataqa capaz qampis rurakushqanki. Munaptikiqa, Jehoväpa testïgonkuna yanapariyäshunkimanmi kë tapukïkunapa respuestanta más yachakurinëkipaq.

1. ¿Ima gobiernotataq Jesus chaskishqa?

Diosmi rey Davidta awnirqan kastampita yureq Diospa Gobiernonchö imëkamayaqpis gobernanampaq kaqta. Tsë kastampita yureqqa Jesusmi karqan, y kanan witsanqa ciëlochömi gobernëkan. (Lei Salmo 89:4 y Lucas 1:32, 33.)

Wamrallaraq këkaptinmi Jehová Diosqa Davidta akrarqan Israel markata gobernanampaq. Tsëpitanam tsurin Salomonta akrarqan tiempowanqa pëna Jerusalenchö “Jehová mandakur täranqanman” täkunampaq (1 Crónicas 28:4, 5; 29:23). Y Salomón wanuriptinnam, mëtsikaq reykuna pëpa rantin o trukan gobernayarqan. Pero casi llapanmi Jehoväta wiyakuyarqantsu. Tsëmi 607 manaraq Jesus shamunqan (m.J.sh.) watachö, Jehová permitirqan Babiloniapa tröpankuna Jerusalenta ushakäratsir reyninta jorqayänanta. Tsëpita witsëpaqa, mananam Davidpa ni mëqan kastan Jerusalenchö gobernashqanatsu. (Lei Ezequiel 21:27.)

2. ¿Ëka tiempotaq Diospa Gobiernon reyninnaq kanan karqan?

Jerusalenta ushakäratsiyanqanchömi profeta Danielta Jehová willarqan ciëlopita gobernanampaq juk mushoq reyta akranampaq kaqta. Pero ¿imëtaq gobernar qallanan karqan? (Lei Daniel 7:13, 14.)

Juk visión imata rikätsikunqanta profeta Daniel willakunqanmi tsëta musyatsimantsik. Jerusalenchö gobiernota ushakätsiyänampaq Jehová mandakunqannöllam, tsë visionchöpis Dios mandakurqan juk jatun monteta o qeruta walluyänampaq. Tsëpitanam willakatsirqan “qanchis tiempokuna[taraq]” tsë monte o qeru tseqllinampaq kaqta. Bibliachöqa, kima o kimsa tiempo y pullanyoqqa 1.260 junaqkunam, tsëmi qanchis tiempokunaqa 2.520 junaqkunaman chan (Apocalipsis 12:6, 14, NM). Mëtsika profecïakunam rikätsikun junaqkunapaq Biblia parlarqa, watakunapaq parlanqanta (Números 14:34). Tsëmi Diospa Gobiernonchö juk rey yapë kanampaqqa, 2.520 watakunaraq pasanan karqan. (Lei Daniel 4:10-17.)

  3. ¿Imëtaq Jesus gobernar qallarqan?

1914 watachömi Diosqa ciëlochö gobernanampaq Jesusta churarqan, Jerusalenta ushakätsiyanqampita 2.520 watakuna pasariptinlla. Y Rey këman chärirqa, Satanastawan demonionkunatam puntata ciëlopita qarpamurqan (Apocalipsis 12:7-10). Tsë pasakunqankunataqa nunakuna manam rikäyarqantsu, pero tsëpita witsëpa kë Patsachö imëka pasakunqankunatam sïqa rikäyashqa (Apocalipsis 12:12). 1914 watapita witsëpa pasanqankunam rikätsikun tsë watachö Jesus gobernar qallanqanta. (Lei Mateo 24:14 y Lucas 21:10, 11, 31.)

4. ¿Imachötaq qamta yanapashunki Jesus Rey kanqan?

Kë llapan profecïakuna cumplikanqanmi rikätsikun Diospa Palabranman y Rey karnin Jesus llapan sufrimientokunata ichikllachöna ushakätsimunampaq kaqman markäkïta o yärakuyta puëdenqëkita. (Lei Salmo 72:8, 12, 13 y Daniel 2:44.)

Maslla yachakïta munarqa, Rasumpëpaqa, ¿imatataq Biblia yachatsikun? libropa 215-218 päginankunata leiri, kë librotaqa Jehoväpa testïgonkunam rurayämushqa.

[17 y 19 kaq päginakunachö recuadru]

(Imanö yarqamunqanta rikëta munarqa, kikin publicacionta rikäri)

Octubre Octubre

607 m.J.sh. 1914 J.sh.

← 2.520 watakuna →

1000 m.J.sh. 1 m.J.sh. 1 J.sh. 1000 J.sh. 2000 J.sh.

← 606 watakuna y 3 killakuna →← 1.913 watakuna y 9 killakuna →

Jerusalenchö Ishkanta sumari: Ciëlochö

gobierno 606 watakuna y 3 killakuna gobernanampaq

ushakärin + 1.913 watakuna y 9 killakuna Jesusta Dios churan

2.519 watakuna y 12 killakuna = 2.520 watakuna