Diospa Palabrampita yachatsikïkuna

¿Imatataq angelkuna y demoniokuna rurayan?

Kë yachatsikïmi yanapashunki wakin tapukïkunapa respuestanta Bibliëkichö tarinëkipaq, y tsë tapukïkunataqa capaz qampis rurakushqanki. Munaptikiqa, Jehoväpa testïgonkuna yanapariyäshunkimanmi kë tapukïkunapa respuestanta más yachakurinëkipaq.

1. ¿Pikunataq angelkuna kayan?

Angelkunaqa espïritum kayan, nunakunapita más puëdeqmi kayan y ciëlochömi täräyan. Rasumpa kaq Diospis espïritum, y manaraq Patsata rurarmi angelkunata rurarqan (Job 38:4, 7; Mateo 18:10). Jehovätaqa millonyëpayan angelkunam sirwiyan. (Lei Salmo 103:20, 21 y Apocalipsis 5:11.)

2. ¿Angelkuna yanapamantsikku?

Unë witsanmi Lot jutiyoq alli nunata o runata angelkuna yanapayarqan. Mana alli nunakuna täräyanqan markachömi Lotqa täraq, y tsë markatam Dios ushakätsinan karqan. Ishkë angelkunam Lottawan familianta niyarqan tsë markapita ëwakuyänampaq. Wakin nunakunaqa asikurninmi tsëta wiyakuyarqantsu. Pero Lotwan wamrankunaqa wiyakuyarqanmi, y tsënöpam salvakuyarqan. (Lei Génesis 19:1, 13-17, 26.)

Bibliam nin kanan witsampis angelkuna yanapamanqantsikta. Diospa Gobiernompita alli willakïkunata puritseqkunatam pushayan (Mateo 24:14). Tsë willakïkunata Lotnö wiyakunantsikqa alläpam precisan. Diosmi angelninkunata utilizan tsë willakïkunata musyatsimänantsikpaq, tsëmi mana kaqpaqqa churashwantsu. (Lei Apocalipsis 1:1 y 14:6, 7.)

Jina Diosqa angelninkunata utilizan, Jesuswan ruranqannöpis, pruëbakunapa pasashqa kallpata qomänantsikpaqmi. (Lei Lucas 22:41-43.)

Ichikllachönam Jehoväqa angelkunata utilizanqa sufritsikoq mana alli nunakunata ushakätsinampaq. ¡Tsëqa alli kawakïnam kanqa! (Lei 2 Tesalonicenses 1:6-8.)

  3. ¿Pikunataq demoniokuna kayan y imatataq rurayan?

Mëtsikaq nunakuna Diosta mana wiyakuyanqannöllam, mëtsikaq angelkunapis Diospita rakikäkuriyarqan (2 Pedru 2:4). Tsë mana wiyakoq angelkunam demoniokuna kayan. Mandaqninkunaqa Satanás Diablum, y pëwanmi nunakunata engañayan. (Lei Apocalipsis 12:9.)

Jatun negociokunata, gobiernokunata y mana alli religionkunatam Diabluqa utilizan nunakunata Diospita rakinampaq. Tsëmi kë Patsachö imëka mana alli rurëkuna, wanutsinakïkuna y sufrimientokunaqa Satanaspa culpan. (Lei 1 Juan 5:19.)

4. ¿Imanötaq demoniokuna nunakunata engañayan?

Wanushqakuna espïrituman tikrarir kawaqkunawan parlëta puëdeyanqantam Satanasqa nunakunata creitsin. Pero Bibliaqa willakun wanushqakuna imatapis rurëta manana puëdeyanqantam (Eclesiastés 9:5). Tsëmi nunakunata engañayänanrëkur demoniokunaqa wanushqakunanö parlayan (Isaías 8:19). Jina utilizäyanmi suerte qateqkunata, chaqchaqkunata, estrella rikaqkunata y brujería ruraqkunata. Pero Bibliaqa nimantsik tsëkunata mana ashinantsikpaq, y demoniokunapa kaqkunapita chipyë rakikäkurinantsikpaqmi. (Lei Deuteronomio 18:10, 11 y Hechos 19:19.)

Diosta kuyarninqa manam mantsashwantsu mana alli espïritukunata. Bibliata estudiarnin y ninqanta wiyakurninqa Diablupitam witikuntsik y Diosmanmi witintsik. Jehoväqa demoniokunapitapis más puëdeqmi, y mana allikunapa pasashqapis angelninkunawanmi kallpata qomantsik. (Lei Salmo 34:7 y Santiagu 4:7, 8.)

Maslla yachakïta munarqa, Rasumpëpaqa, ¿imatataq Biblia yachatsikun? libropa 10 kaq capïtulonta leiri, kë librotaqa Jehoväpa testïgonkunam rurayämushqa.