Jehoväpa testïgonwan parlëkan ¿Ciëlomanku llapan alli kaqkuna ëwayan?

JEHOVÄPA TESTÏGONKUNATAQA alläpam gustan vecïnonkunawan Bibliapita parlë. ¿Ima tapukïpa respuestanllatapis Bibliawan musyëta munankiku? ¿Testïgokuna rurayanqampita o creiyanqampita imallatapis musyëta munankiku? Tsënö kaptinqa, imëllapis pëkunawan parlarqa musyëta munanqëkikunapita tapuri, pëkunaqa kushishqam yacharatsiyäshunki.

Qateqninchömi rikärishun imëpis parlayanqannö juk Testigo juk nunawan parlëkaqta. Testigo kaqpa Marcos jutin katsun y wayiyoq kaqpana Roberto katsun.

¿Imataraq ciëloman ëwaqkuna rurayanqa?

Marcos: Shamoq tiempochö, ¿más mana allimantsuraq imëkapis chanqa, igual-llatsuraq kanqa, o altsakanqatsuraq? ¿Ima ninkitaq?

Roberto: Noqapitaqa, alli kawakïtaqa tarishun ciëlochö Diosnintsikpa nöpanchöran.

Marcos: Tsëqa alläpa shumaqchi kanman. Bibliaqa nin ciëlochö tärëqa alläpa shumaq qarë kanqantam. Pero ¿imëllapis pensashqankiku ciëlopa ëwaqkuna tsëchö imata rurayänampaq kaqman?

Roberto: Ari Diostachi llapan tiempo alabashun.

Marcos: Tsëqa shumaqchi kanman. Tsënö kaptimpis, ciëlochö tärë juk shumaq qarë kanqanllatatsu manam Bibliaqa rikätsimantsik, sinöqa ciëloman ëwaqkunapaqqa juk precisaq rurëninkuna kanqantawanmi.

Roberto: ¿Y ima precisaq rurëtataq rurayanqa?

Marcos: Apocalipsis 5:10 textom tsëta willakun. Kënömi nin: “Pecunatam churarqonqui mandaquiniquicho cayänanpaq, tsenopa saserdoticunano Diosnintsicta sirwiyänanpaq y patsacho nunacunata mandayänanpaq”. Këchö ninqannöpis, ¿imapaqshi nunakuna ciëloman ëwayan?

Roberto: Bueno, leimunqëkichöqa nin, Patsachö nunakunata mandayänampaq o gobernayänampaq ëwayanqantam.

Marcos: Awmi, tsëpaqmi ëwayanqa.

¿Pikunatataq gobernayanqa?

Marcos: Kananna këman pensari, ¿pikunataraq ciëloman ëwaqkuna gobernayanqa? Musyanqantsiknöpis, nunakuna kaptinran gobiernoqa kan, ¿rasunku manaku?

Roberto: Awmi, tsëqa rasunmi.

 Marcos: Tsëqa, ¿pikunataraq ciëloman ëwaqkuna gobernayanqa?

Roberto: Ari... manaraq wanurnin Patsallachöraq kawëkaqkunatachi.

Marcos: Bueno, wanurirqa llapan alli nunakuna ciëloman ëwayanqantachi tsëqa rikätsikunman. Pero ¿manatsuraq wakin alli nunakunaqa mana wanurnin kawayänampaq kë Patsachö quedayanqa?

Roberto: Noqapitaqa manachi ni mëqan cristiänopis tsëtaqa creinmantsu.

Marcos: Salmo 37:29 texto tsëta rikätsikuptinmi tsëtaqa nireq. ¿Leiramunkimantsuraq?

Roberto: Ari, kënömi nin: “Patsachöqa alli nunakunallam täräyanqa, y tsëchömi imëkamayaqpis kawayanqa”.

Marcos: Gracias. Kë versïculochö ninqannöpis, ¿mëchötaq alli kaq nunakuna täräyanqa?

Roberto: Patsachö nintaq.

Marcos: Awmi, pero manam wallka tiempollatsu. Leimunqëkinöpis, “imëkamayaqpis kawa[yänampaq]” kaqtam willakun.

Roberto: Capazchi tsë textoqa rikätsikïkan alli nunakunaqa kë Patsachö imëpis kayänampaq kaqta. Porque wanurir ciëlopa ëwakuyaptimpis, qepäta yureqkunaqa Patsachö këkäyanqaran.

Marcos: Pï mëmi tsënö niyan. Pero ¿manatsuraq alli nunakuna Patsachö imëkamayaqpis täräyänampaq kaqta rikätsikïkan?

Roberto: ¿Imanö? Manam entiendïtsu.

Juk shumaq Paraïsochömi alli nunakuna täräyanqa

Marcos: Shamoq tiempochö alli nunakunarëkur Dios imata ruranampaq kaqta Apocalipsis 21:4 willakunqanta rikärishun: “Mananam waqayanqanatsu ni llaquiyanqanatsu, mananam imancunapis nananqanatsu, ni wanuyanqanatsu. Porqui tse sufrimientucunaqa ushacärishqanam”. Tsënömi kawakuyanqa tsë witsan Patsachö täraqkunaqa. Tsëqa, ¿manaku alläpa shumaq willakï?

Roberto: Awmi, pero noqapaqqa ciëlochö kawëpaqmi tsë textoqa parlëkan.

Marcos: Rasunmi, ciëloman ëwaqkunaqa tsënö bendicionkunatam chaskiyanqa, pero kë versïculochö ninqannöpis, ¿wanï kanqaraqtsuraq?

Roberto: Manam “wanuyanqanatsu” ninmi, juk parlakïchöqa, wanïqa ushakärinqash.

Marcos: Y musyanqantsiknöpis, imapis ushakänampaqqa puntataqa kananraqmi, ¿aw? ¿Ima ninkitaq?

Roberto: Awmi, tsëqa rasunmi.

Marcos: Kanan këman pensari, ¿ciëlochö wanï kantsuraq? ¿Manaku wanïqa Patsallachö kan?

Roberto: Rasun kaqchöqa, manam imëpis tsëmanqa pensarqötsu.

Marcos: Bibliaqa yachatsikun wakin alli nunakuna ciëlopa ëwayänampaq kaqta, y wakin mëtsikaq alli nunakunana kë Patsachö täräyänampaq kaqtam. ¿Imëllapis wiyashqankiku “cushicuyanqam qollmi shonquyoqcuna, porqui pecunapam que patsaqa” nir Jesus yachatsikunqanta? (Mateo 5:5.)

Roberto: Awmi, tsëtaqa iglesiächö imëpis niyämunmi.

Marcos: Clärom këkan qollmi shonqu kaqkunaqa Patsata chaskiyänampaq kaq. Apocalipsis willakunqan bendicionkunataqa Patsachö täraqkunam chaskiyanqa. Alläpa jukläya Patsachömi täräyanqa, Diosqa chipyëmi ushakätsinqa imëka mana allikunata, hasta wanïtapis.

Roberto: Entiendïmi imapaq parlëkanqëkita, pero manachi juk ishkë textokunallawanqa tsëta creirishwantsu.

Marcos: Rasuntam ninki. Y rasun kaqchöqa, más textokunapis rikätsikunmi shamoq tiempochö, Patsachö kawë imanö kanampaq kaqta. Tiempïki kaptinqa rikäratsishqëki juk textota.

Roberto: Ari, allim kanqa.

 Mananam kanqanatsu mana alli nunakuna

Marcos: Salmo 37 textoman kutirishun, 29 kaq versïculotam leirqantsik. Kananqa rikärishun 10 y 11 kaq versïculokunata. ¿Leiramunkimanku?

Roberto: Kënömi nin: “Ichik tiempollachönam mana alli nunakunaqa kayanqanatsu, mëchö këkäyanqanta ashirpis manam tarinkinatsu. Pero manshukunapaqmi patsaqa kanqa, y tsëchömi alläpa alli kawakïta tarirnin kushishqa kawakuyanqa”.

Marcos: Gracias. 11 kaq versículo ninqannöpis, ¿mëchötaq “manshu kaqkuna”, o alli kaqkuna täräyanqa?

Roberto: Tsëchöqa pëkunapaq Patsa kanampaq kaqtam nin. Pero këqa kanan witsanmi cumplikëkan. ¿O entero Patsachöqa manaku alli nunakuna kayan?

Marcos: Awmi, kanmi. Pero jina tsë versïculochöqa nin “alläpa alli kawakïta” tariyänampaq kaqtam. ¿Tsëqa kanan witsan cumplikëkantsuraq?

Roberto: Rasun kaqchöqa manam.

Marcos: Tsëqa, imapis pasananran kë awnikïkunata rikänapaqqa. Këman pensari: qampa kapushunkiman alquilakunqëki jatun wayiki. Tsëchö wakin täraqkunaqa alli nunakuna kayanman, wayikita cuidayanman y vecïnonkunatapis respetayanman. Pero wakin tsëchö täraqkunana tukï problëmakunata rurayanman, wayikita malograyanman y vecïnonkunawampis mana alli kawakuyanman. Y munayanmantsu alli kawakïta, ¿imataraq rurankiman?

Roberto: Qarqurimanchi.

Marcos: Tsënöllam Diospis mana alli nunakunawan ruranqa. 10 kaq versïculota yapë rikärishun. Tsëchöqa, “mana alli nunakunaqa kayanqanatsu” ninmi. Tsëqa rikätsimantsik mana alli nunakunata Dios ushakätsinampaq kaqtam. Tsëran alli kaq nunakunaqa Patsachö kushishqa kawakuyanqa. Awmi, musyämi këqa qam creinqëkipita alläpa jukläya kanqanta.

Roberto: Rasunmi, iglesiächöqa manam imëpis tsëta wiyarqätsu.

Marcos: Qam ninqëkinöpis manam juk ishkë versïculokunata rikärirllatsu tsëtaqa creirintsik. Bibliapa juk textonta alli entiendinantsikpaqqa qepan y puntan kaq versïculokunataran alli rikänantsik, jina juk textokunawanran igualatsinantsik. Kanan leirinqantsik textokunaqa, ¿manaku rikätsikun wakin nunakuna ciëlopa ëwayänampaq kaqta, y wakin kaqkunana kë Patsachö kawayänampaq kaqta?

Roberto: Manam chipyëtsu crei, tsënö kaptimpis cuentata qokömi leirinqantsik textokunaqa tsëta rikätsikunqanta. Pero creinäpaqqa masran estudianä.

Marcos: Capaz këpita yachakïkaptiki más tapukïnikikuna yurimunqa. Këllaman pensari, wanushqa alli nunakuna ciëlochö mana këkarqa, ¿mëchötaq këkäyan?

Roberto: Rasun aw, tsëqa juk alli tapukïmi.

Marcos: Juk textokunata qellqarinëkitam munä tsëkunapita yachakïkänëkipaq. * Y nïkurmi kutiramïta munä tsëkunapita parlakurinapaq. ¿Ima ninkitaq?

Roberto: Allim kanqa.

[Päginapa ura kuchunchö willakï]