DERECHA lädochö qellqarëkaqta Zahra jutiyoq shipash ninqanqa alläpa llakikïpaq pasakïkanqantam rikätsikun: entero Patsachö warmikunam, pishillaraq kar o mayorna karpis, tukï rurashqa y despreciashqa kayan. Rikärishun imakunapa pasayanqanta:

• Despreciashqam kayan. Asia nishqan continentechöqa wamrankuna ollqulla kanantam masqa munayan. Tsë continentechöqa, manaraq yureqta jitariyaptin, yurishqata wanutsiyaptin o dejariyaptinshi, 134 millönesnö warmi wamrakuna wanuyashqa, tsëtam Naciones Unidas nishqan 2011 watachö willakurqan.

• Estudio asuntochö. Chusku watapita mënoslla estudiashqakunapitaqa, cada chunka nunakunapitash casi qanchisnö warmikuna kayan.

• Violación. Majankuna violananta ley mana michanqan nacionkunachömi, 2.600 millönespitapis más warmikuna täräyan.

• Hospitalkunachö atención. Waktsa nacionkunachöqa, qeshyaq këkaptin o wamran yurinan hora juk doctor mana atiendeptinmi, cada ishkë minütota juk warmi wanun.

• Herencia asuntochö. Entero Patsachö murukïkunaqa, casi pullampita masmi warmikuna muruyanqan. Tsënö këkaptimpis, wakin nacionkunachöqa manam warmikuna chakrayoq kayänanta o herenciata chaskiyänanta permitiyantsu.

¿Imanirtaq warmikunata tsënö tratayan? Markankunapa y religionninkunapa costumbrenta qatirmi wakinkunaqa warmikunata mana alli tratayan, y hasta allitanö tsëta rikäyan. India nacionpita Chandra Rami Chopra jutiyoq abogädash kënö ninaq: “Entero Patsachö religionkunam juk asuntochö igualayan: llapanmi warmikunata despreciayan”, ninmi francés periódico.

¿Qampis tsënöku pensanki? ¿Bibliapis wakin librokunanö warmikunata mana kaqpaq churanqantaku creinki? Juk ishkë versïculokunata leirirmi wakinkunaqa tsëta creiyan. Pero ¿imanötaq warmikunata rikan Bibliata qellqatseq Diosqa? Mana llutalla parlana asunto kaptimpis, allim kanqa Bibliapa yanapakïninwan tsë asuntota claro y alli rikärinqantsikqa.