ILOCOS NORTE (Filipinas) markachömi 1968 wata 10 de diciembre killachö yurikurqä. Chunka wamrakunapita qanchis kaqmi karqä. Marka mayïkunatanömi wamra kënïchöqa católico religionpita yachatsiyämarqan. 1986 watachö secundariäta usharirqa, enfermera këtam munarqä. Pero manam lograrqätsu, porque alläpam qeshyakurkurqä y hasta wanukunäpaq kaqtam pensarqä. Llapan shonqöwanmi Diosta rogarqä yanapëkamänampaq, y kachakäratsimaptinqa llapan kawënïchö sirwinäpaqmi awnirqä.

Ichikllapa ichikllapa kachakärirmi Diosta awninqäta cumplita procurarqä. Tsëmi 1991 wata junio killachö pentecostalkuna Bibliapita yachatsikuyanqan escuëlaman matriculäkurqä. Tsëchömi niyämarqan ayunarnin y Diosta mañakurninqa, “santo espïrituta” chaskiyänäpaq kaqta. Tsëtam munarqä qeshyëkaqkunata jampinäpaq. Juk kutim, llapäkuna mañakïkäyaptï, juk yanaqïkuna esquïnaman ëwëkur sinchillapa parlarnin mañakïkarqan. “Santo espïrituta” chaskinqäta wakinkuna creiyänampaqmi, yachëllapa witirir imata mañakïkanqanta wiyarqä. Ushanampaq këkaptinnam, qonquriranqä sitioman raslla kutirirqä. Nïkurnam pëta nirirqä imakunata mañakunqanta. ¡Rasllam creiramarqan! “Santo espïrituta” chaskinqätam llapankuna pensayarqan.

Tsëchö yachakur kanqä witsankunaqa tukï tapukïkunatam rurakoq kä. Tanteariyänëkipaq, Mateo 6:9 textochömi Jesus parlan ‘Dios Yayapaq’ y ‘jutinpaq’. Tsëmi kënö tapukoq kä: “¿Pitaq Dios Yayaqa? ¿Ima jutitaq alläpa respëtowan alabashqa kanan?”. Kë tapukïkunapita profesornïkuna yachatsiyämanqantaqa manam alleqllaqa entiendeqtsu kä. Pantashqam këkarqä, Kima Dios Jukllëllachö kanqantam yachatsiyämaq, pero nïkurqa tsë creencia mana tanteëpaq kanqantam niyämaq. Tsënö kaptimpis, jinallam yachakur sïguirqä iglesiachö pastora känärëkur.

Escuëläkunachöqa yachatsiyämaq llapan uli o llulla religionkunapitapis, Jehoväpa testïgonkunaqa más peor kayanqantam. “Anticristum kayan” niyaqmi. Tsëmi pëkunata chikipaq kä.

Ishkë watana estudiëkanqäpita vacacionman yarqurirmi teytäkunata watukaq ëwarqä. Mayor kaq nanä Carmenmi wayichö këkanqäta musyarir watukayämaqnï shamurqan. Jehoväpa testïgonmi tikrarishqa kanaq. Jinamampis llapan tiemponwanmi Diospita yachatsikoq. Diospita parlapämëta munaptinmi  alläpa piñashqa kënö nirqä: “¡Noqaqa reqïnam sirwinqä Diosta!”. Imëkata sinchipa nikacharkurmi kumarïkurqä, y tsëkunapita manana ni imëpis parlapänampaqmi nirqä.

Escuëlaman kutirishqächömi Carmen apatsimarqan ¿Debería creer usted en la Trinidad? nishqan follëtota. * Rikärirllam pitukacharkur ninaman jitarïkurqä. Piñashqam nanäwan këkarqä.

Escuëlallachöraq këkarmi atskaq nunakunata yanaparqä religionnïman yëkayämunampaq. Alläpam kushikurqä mamänïwan turïpis Pentecostal tikrariyaptin.

1994 wata marzo killachömi pentecostal escuëlapita graduakurqä. Qallananchö ninqänöpis, tsë junaqmi juk pastor watukayämarqan. Llapä escuëlata ushëkaqkunam pëman witita munayarqä, porque creiyaq kayä qeshyëkaqkunata pë kachakätsita puëdenqantam. Escenarioman lloqarkurmi bandapa müsicanmannö saltar y paqchir o taqllar kayarqä. Tsëchömi tsë pastor yatanqan kaqkunaqa, “santo espïrituta” chaskir patsaman ishkiriyaq. * Yatamanqan höram noqapis punukaqnö patsaman ishkirirqä. Mantsakashqa shäriramurpis, alläpam kushikurqä qeshyëkaqkunata kachakätsinäpaq podernï kanqanta mäkurir.

Tsëpita ichik tiempollatam, podernïta utilizarnin alläpa achachëwan qeshyëkaq wamrata kachakätsirqä. “Diosman” mañakuriptïmi, tsë hörallachö wamra sudar qallëkurqan y achachënin ushakärirqan. Tsënömi Diosta awninqäta cumplir qallëkurqä. Pero tsëta rurëkarpis, manam kushishqatsu sientekoq kä. Musyaqmi kä Dios kanqanta, pero manam reqeqtsu kä. Jinamampis rasuntsuraq o manatsuraq nirmi tapukoq kä Iglesiachö yachatsiyämanqankunapaq.

Tsë witsampaqqa, imëpitapis masmi Jehoväpa testïgonkunata chikeq kä. Mëqan publicacionninkunatapis tarïkurqa jinan höram kayëkoq o rupaykacheq kä. Tsëpinkunam wanuritapis munarqä mamänï Pentecostal këta manana munanqanta musyarir. ¡Mä... nanä Carmenmi Bibliapita yachatsishqa kanaq! Mananam ni fötollachöpis nanäta rikëta munarqänatsu.

Juk kutim ¡Despertad! revistata mamänïpa wayinchö tarïkurqä. Ninawan ushakäratsitam munarqä, pero mamänï imata leikanqanta musyëta munarmi ichik rikapärirqä. Religionninchö yachakunqanman chipyëpa creeq nuna, Jehoväpa testïgonkunapa publicacionninkunawan Bibliapita yachakurir, creencianta dejarinqanta leinqämi pensaratsimarqan. Kima Dios Jukllëllachö kanqanta, mana alli nunakuna ninachö rupayanqanta y alma mana wanunqanta yachatsiyanqanqa, Bibliapita mana kanqantash chipyëpa cuentata qokurinaq. Tsëta leinqäqa shonqöyaqmi chäramurqan. Tsëkunata entienditam imëpis alläpa munarqä. Biblia yachatsikunqankunapita masta musyëtam alläpa munarqä.

 Juk ¡Despertad! revistachönam leirqä, Bibliapita yachakurir, washku upyëta y drögakunata juk nuna dejanqanta. Tsë willakïkunata leinqäpita witsëpam, Testïgokunapa publicacionninkunata seguido leir qallëkurqä. Jina El nombre divino que durará para siempre nishqan follëtotapis tarirqämi, tsëchömi yachakurirqä Diospa jutinqa Jehová kanqanta. * Rasumpa kaq Diosta reqirinqäqa alläpam kushitsimarqan (Deuteronomio 4:39; Jeremías 10:10).

Wakinkuna mana musyayanqanyaqllam, rasumpa kaqta Bibliapita yachakur sïguirqä. Pentecostal escuëlachöqa yachatsiyämarqan Jesus Dios kanqantam, pero Bibliachöqa yachakurirqä Jesusqa “cawecaq Diospa tsurin” kanqantam (Mateo 16:15, 16).

Carmenwan tinkurirqa, El nombre divino que durará para siempre nishqan follëtota y más publicacionkunatam mañakurirqä, tsënam pëqa alläpa espantakurqan. Atska watakunapam pentecostalkunapa escuëlankunachö yachakushqa karqä, pero rasumpa kaqtaqa manam yachatsiyämarqantsu. Paqaschö këkaq cuentatam dejarayämarqan. Bibliachö tukïkunata yachakïkanqäpitam shonqöqa alläpa kushikurqan. Kikïpa kawënïchö Juan 8:32 ninqan cumplikëkanqantam rikarqä, tsëchöqa “rason caqta musyariyaptiqui[m], tse rason caq librariyäshunqui” ninmi. Kawënïqa jukläyanam tikrëkarqan.

Noqaqa pensarqä Jehoväta pakëllapa adorëta y pastora këta puëdenqätam, pero wallka tiempollachömi cuentata qokurirqä Iglesiächö yachakunqäkunata yachatsikïta manana puëdenqäta. Pero alläpam mantsakurqä. ¿Mëpitaraq kawanäpaq tarïman karqan religionnïta dejarirqä? Manam nunarqätsu pastora këkar Jehoväpa testïgon tikrariptï, Iglesiäpita kaqkuna penqakïchö quedayänanta. Iglesiächö yachatsikur sïguitam akrarqä, pero mana rasun kaqkunata mana yachatsikurllana.

Carmenwan yapë tinkuriyaptïmi Testïgokunapa reunionninkunaman ëwanäpaq nimarqan. Noqaqa seguïdom ëwaq kä Laoag markachö pentecostalkunapa más precisaq kaq iglesiankunaman, tsëchömi pakëllapa ashirqä Jehoväpa Testïgonkuna Yachatsikuyänan Wayita. Tsëchömi reqirqä Diospita llapan tiemponwan yachatsikoq Alma Preciosa Villarin nanata, pero casi llapankunam Precious nir reqiyaq (tsëqa ingleschö Preciosa ninanmi). Testïgokunata mana allillaraq rikëkarnimpis, Bibliapita yachatsimänampaqmi pëta awnirqä.

Nanä Carmenqa alläpa pacienciawanmi imëpis tratamarqan. Y Precious nanapis tsënöllam tratamaq. Piñakïkaptï, discutipëkaptï, sinchipa parlapëkaptï y punta creinqäkunata  imëkanöpa defendita procurëkaptïpis, shumaqllam yanapamarqan Biblia yachatsikunqanta entiendenäpaq. Precious y wakin Testïgokunapis noqapaq yarpachakuyanqan, qollmi shonqu kayanqan y raslla mana piñakoq kayanqanmi shonqöyaq chäramurqan. Tsëmi Jehoväta sirwitana munarqä.

1995 wata julio killachömi cuentata qokurirqä Iglesiäta dejanä alläpa precisanqanta. ¿Imanir? Apocalipsis 18:4 textochömi uli o llulla religionkunapaq parlarnin kënö willakun: “Noqata cäsumaq caqcunaqa tse marcacho nunacuna jutsa rurayashqanta mana rurayänequipaq tse marcapita yarqucuriyë; porqui manam munätsu tse nunacuna sufriyashqanno, sufriyänequita”. Pero pastora këta dejarirqa, ¿imapitaraq kawäman karqan? Hebreus 13:5 textochömi yachakurirqä munëninta ruraqkunataqa, “manam qonqashqequitsu ni jaqirishqequitsu [dejarishqëkitsu]” nir Dios awninqanta.

Teytäwan turï conträchö këkäyaptimpis, Testïgonö bautizakunäpaq ishkë semänakuna pishikaptinmi, valorta tsarïkur wayïta ëwarqä y pastora karnin yachatsikunäpaq utilizanqäkunata kayarqä o rupachirqä. Tsëta rurarirmi cuentata qokurirqä noqachö këkaq poderqa ushakärinqanta. Jina unë witsanqa punïkarmi mäkoq kä imapis nitimaqtanö, pero tsëkunapis mananam pasamarqannatsu. Manam yapëqa rikarqänatsu pununä cuartöpa ventänanchö wäninö o llantunö yurimoqtapis. Bibliachömi yachakurqä qeshyëkaqkunata kachakätsiyänampaq chaskiyanqan poderqa Diospita mana shamunqanta, sinöqa supëkunapita. Alläpam kushikö supëkunapa makinkunapita yarqunqäpita, tsënöllam unëpis pasarqan “suertita cateq esclabu shipash[ta]”, Pablum yanapayarqan pëpita supëkuna yarqunampaq (Hechos 16:16-18).

Alläpa kushikïpaqmi noqapaqqa karqan mamänïwan paqta 1996 wata septiembre killachö bautizakï. Ichik tiempo pasarinqanllachömi llapan tiempöwan Diospita yachatsikur qallëkurqä, y atskaq watakunapam tsënö kushishqa yanapakurqö.

Kanan witsanqa, nunä Silverwan ishkämi kallpachakuyä warmi wamräkunata rasumpa kaq nänita reqitsiyänäpaq. Jina kimaq nanäkunapis Jehoväpa testïgonmi tikrayashqa. Y atska watakunapa rasun kaqta mana musyar kawakushqa karpis, kananqa alläpam kushikö, porque kananmi sï reqï sirwinqä Diosta.