Ohio nishqan mayu kuchunchö këkaq Moundsville nishqan markachömi yurikurqä, Estados Unïdoschö Virginia markapa occidente kaq lädomampa. Teytakunapa wamrankunaqa chuskum kayarqä, kimaq ollqu y juk warmi, noqaqa segundo kaqmi karqä y alläpa kushishqam kawakuyarqä. Teytakunaqa, honrado, alli trabajaq y nuna mayinkunata kuyaqmi kayarqan, manam alläpa kapoqyoqtsu kayarqä, pero wayïkunachöqa necesitayanqakunaqa manam pishipayämaqtsu. Jehoväpa testïgon karninmi, tukïnöpa procurayarqan wamra kayanqäpita Bibliapa musyatsikïninkunata yachatsiyämëta.

Tsënö kaptimpis wamra kanqäpita joven këman pasanqä witsankunapaqqa, teytäkuna yachatsiyämanqan yachatsikïkunataqa dejarnam qallëkurqä. Manam segürotsu karqa Bibliapa musyatsikïninkuna ninqannö kawëqa kushikïman chätsikunqanta. Noqapaqqa, chipyëpa libre këlla rasumpa kushikïta apamunqantam neq kä. Tsënöpam reunionkunaman ëwarqänatsu. Mayor kaq wawqï y panïpis noqa ruranqällatam qatir qallëkuyarqan. Teytakunaqa tukïnöpam yanapayämëta procurayarqan, pero manam cäsokuyarqätsu.

Manam ichikllapis pensarqätsu libre këta ashinqäqa tukïläya viciokunaman chätsimänampaq kaqman. Juk junaqmi, escuëlapita wayiman kutirëkapti, juk amigo cigärrota munatsimarqan y noqaqa chaskirirqämi. Tsëpita patsëmi, tukï viciokunaman ishkir qallëkurqa, drögakunaman, alcohol upyëman y warmikunawan lluta punukïman. Tiempowannam más fuerte kaq drögakunata probarqä y manam dejëta puëdirqänatsu. Viciöpaq tarinärëkurmi hasta drögakunata rantikurqä.

Concienciä nimanqanta mana kaqpaq churëta procurëkaptïpis, rurëkanqäkuna mana alli kanqantaqa imëpis nikämaqllam. Pero kënömi kikïta nikoq kä, “mana allimanqa ishkirqonkinam, manam altsëta puëdenkinatsu”. ¡Fiestakunachö y conciertokunachö nunakunawan këkarpis, mëtsika kutim alläpa yarpachakïwan llakishqa japallälla sientikoq kä! Hora höraqa, teytakuna respetöso y alli kayanqanmanmi yarparaq kä, tsëmi imanöpa kënö kawëman chanqäman yarpachakoq kä.

Imapaqpis manana sirwinqätam pensaq kä, pero wakinkunaqa manam tsënötsu pensayaq. 2000 watachömi Jehoväpa testïgonkunapa jatun kaq asamblëankunaman teytakuna invitayämarqan. Mana munëkarpis ëwanäpaq awnikurirqämi. Y Jehoväpita rakikashqa wawqïwan panïpis jina tsë asamblëamanqa shayämurqanmi.

Asamblëachö këkarnam yarpärirqä pasaq wata tsë localchö rock conciertochö kanqäta. Pero kananqa alläpa jukläya kanqanmi pasëpa shonqöyaq chärirqan. Conciertoman ëwanqächöqä, më tsëpam basürallana kakoq y cigarro qoshnillana o goyëllanam asyäkoq. Y tsëchö nunakunaqa casi llapampis mana allillam kayarqan y müsicapa letrankunapis pasëpa llakinätsikoqllam kaq. Pero asamblëachöqa kushishqa nunakunawanmi këkarqä, y atska watapa mana rikämashqa këkarpis, alläpa kuyakïwanmi chaskiyämarqan. Y localpis limpiom këkarqan, y yachatsikayämunqampis alläpa kushitsikoqmi karqan. Bibliapa yachatsikïninkuna shumaq kawakïta apamunqanta rikanqämi, pensatsimarqan tsë yachatsikïkunata imanir dejanqäta (Isaías 48:17, 18).

Tsëpitanam congregacionman kutinäpaq decidirirqä. Tsë asamblëachö rikäyanqanwanmi, wawqïwan panïpis decidiyarqan congregacionman kutiyänampaq. Kimämi Bibliapita yachakur qallëkuyarqä.

Santiago 4:8 (NM), “Diosman witiyë, y pëpis qamkunamanmi witimonqa” ninqanmi shonqöyaq chärirqa. Entiendirirqämi Diosman witita munarqa mana alli kawënïtaraq dejanäpaq kaqta. Jina precisarqanmi cigärrota, drögata y tukïläya washkuta dejanä (2 Corintios 7:1).

Mana alli amïgokunatam dejarirqä y tsëpa rantinnam o trukannam Jehoväta sirweq amïgokunatana ashirqa. Congregacionpita juk anciänom Bibliapita yachatsimar tukïchö yanapamarqan. Telëfonopam qayamaq y wayïmampis visitamaqmi imanöpis këkanqäta musyanampaq. Y kanankamayaqpis más kuyë kaq amïgömi.

2001 watachömi, wawqïwan y panïwan junto, Jehovällatana sirwiyänäpaq awnikuyanqäta rikätsikurnin bautizakuriyarqä. Teytakuna y Jehoväta mana dejëta sirweq menor kaq wawqïpis, alläpam kushikuyarqan llapäkuna junto familianö Jehovällatana sirwiyänäpaq kaqta musyarnin.

Unëqa, Bibliapa musyatsikïninkunaqa libre kawakunäpaq mana dejakunqantam pensaq kä, pero kananqa imëka mana allikunapitapis tsapäkoq kanqantam pensä. Drögata dejanäpaq, alli y yanapakoq nuna kanäpaqmi Bibliaqa yanapamashqa.

Alläpam kushikö entero patsachö shonqupita patsë Jehoväta sirweqkunawan y rasumpa kuyanakoq nunakunawan junto këkanqäta (Juan 13:34, 35). Diosta tsënö shonqupita patsë sirweqkunachömi reqirirqa Adrianne jutiyoq juk shumaq shipashta y pëwanmi casakurirqa, noqapaqqa juk bendicionmi kashqa y alläpam kuyä y respetä. Ishkäkunapis alläpa kushishqam sientikuyä Kamamaqnintsikta sirwirnin.

Kikïpa munënïllata ruranäpa rantinmi, kananqa Diospa Palabranta wiyakï alläpa yanapakunqampita, llapan tiempöwan nunakunata yachatsï. Kënö yanapakïqa imawampis mana igualaq kushikïtam apamun. Shonqöpita patsëmi nï, Bibliapa yachatsikïninqa kawënïta cambianqanta. ¡Kananqa rasumpa libre këtam taririrqö!