¿Diospita rasumpa kaqta musyëta munankiku? ¿Pï kanqanta? ¿Ima gustanqanta, y ima mana gustanqanta? ¿Munënin ima kanqanta? Palabran Bibliachömi Jehoväqa willamantsik pëpita rasumpa kaqta. Tsënö kaptimpis, manam Bibliata llapan leeqkunatsu tsë rasumpa kaqta entiendiyan. ¿Imanir? Porque tsë rasumpa kaq entiendimientotaqa manam llapantsu chaskiyan. Rikärishun tsë asuntopaq Jesus parlanqanta. (Lei Mateo 11:25, NTCN.)

Kë versïculom kënö nir qallan: “Tsay öram Señor Jesucristo nirgan”. Capaz tsë hora pasakunqampita Jesusqa parlëta munëkarqan; galilëapa kima markankunachö täraq nunakunam cuentaman churayarqantsu Jesus tukï milagrokunata ruranqanta, tsëmi pëkunata piñaparqan o ajäparqan (Mateo 11:20-24). Pero Jesus milagro ruranqanta rikëkarpis, ¿imanöpataq wakinkunaqa qateqnin këman tikrayarqantsu? Tsënö kayanqanqa rikätsikurqan rumi shonqu kayanqantam (Mateo 13:10-15).

Jesusqa musyarqanmi Bibliachö Diospa rasumpa yachatsikïninta entiendiyänampaqqa, Diospa yanapakïninta y alli shonquyoq këtaraq necesitäyanqanta. Tsëmi Mateo 11:25 textochö kënö nirqan: “Tayta Dios, cieluchö patsachöpis gammi alläpa mandacug canqui. Imanö cangayquitapis pacashcanquim musyagtucugcunapitawan alläpa estudiagcunapitapis. Tsaypa rantinmi, imayca pishi wamranö umildecagcunata tantiyatsishcanqui. Tsaypitam alläpa cushishga alabag”. Këchömi musyarintsik, rasumpa entiendimientotaqa Dioslla qoyta puëdinqanta. “Cieluchö patsachöpis [...] alläpa mandacug” Jehoväqa munanqannömi yachëninta pakëta o entienditsikïtapis puëden, y tsëtaqa manam llutallatsu ruran. Tsëqa, ¿imanötaq ruran?

Jehoväqa humilde kaqkunallatam munëninta musyatsin y manam orgullösokunataqa (Santiagu 4:6). ‘Musyagtucugcunapitawan alläpa estudiagcunapitam’ Jehoväqa yachëninta pakan, tsë nunakunaqa orgulloso karnin y kikinkunallaman alläpa pensarnin Diospa yanapakïninta mana necesitäyanqanta pensayan (1 Corintios 1:19-21). Pero “pishi wamranö” kaqkunataqa munëninta entienditsinmi, shonqupita patsë pëta ashiyaptin y wamranö humilde kayaptin (Mateo 18:1-4; 1 Corintios 1:26-28). Diospa Tsurinqa alleqmi reqirqan orgullösokunata y humildekunatapis. Mëtsikaq pushakoq religiösokunaqa orgulloso kayanqanrëkurmi Jesus yachatsikunqanta entiendiyarqantsu, pero humilde pescadorkunaqa entiendiyarqanmi (Mateo 4:18-22; 23:1-5; Hechos 4:13). Jina kapoqyoq y yachaq nunakunapis alläpa humilde kayanqantam rikätsikuyarqan, tsëmi Jesuspa qateqnin tikrayarqan (Lucas 19:1, 2, 8; Hechos 22:1-3).

Kë yachatsikïpa qallananchö tapukïta ruranqantsikta yapë rurarishun: ¿Diospita rasumpa kaqta musyëta munankiku? Rikanqantsiknöpis, pëqa manam yanapantsu kë mundochö yachaqtukoq nunakunataqa, tsëpa rantinqa tsë yachaqtukoq nunakuna despreciayanqan nunakunatam yanapan. Alli shonquwan y alli pensëwan Diospa Palabranta yachakuptikiqa pëpa qarënintam chaskinki, y rasumpa yachëninta entiendeq nunakunawanmi junto kanki. Tsë rasumpa yachatsikïkunata entiendinqëkiqa kanan witsan más alli kawakunëkipaqmi yanapashunki y rasumpa kawakïmanmi apashunki, Dios awnikunqan mushoq Patsachö mana wanurnin kawakïman (1 Timoteu 6:12, 19; 2 Pedru 3:13). *