¿Wamrëki yurinqan junaqta yarpankiku? Mëraq kushishqa mellqarëtana munëkarqëki. Tsënö kaptimpis, qeshyayoq wamra yuriptinqa tsë kushikïqa llakikïmanmi tikrarin, Carlowan Mia pasanqannö.

¿Kapushunkiku yurikunqampita qeshyayoq wamrëki? ¿Tsënö pasakuptin imanö ruranëkipaq kaqta musyankiku? Tsënö kaptinqa, ama alläpa yarpachakïtsu, tsënöpa pasaq wakin teytakunapis alli kawakïtam tarita puëdiyashqa. Rikärishun kima problëmakunata y Bibliapa consëjonkuna imanö yanapakunqanta.

Mëtsikaq teytakunam wamrankuna qeshyayanqanta musyarirnin alläpa llakikuyan. Mexicopita Julianam kënö nin: “Santiagu parálisis cerebralwan kanqanta doctorkuna nirayamaptinmi,  creita puëdirqätsu. Manam imanö këtapis musyarqätsu.” Wakinnam Italiapita Viviana ninqannölla niyan: “Edänïchö warmikunapa llullun höraqa mana alli yurinanta musyëkarpis, noqaqa wamrayoq këtam decidirqä y síndrome de Down nishqanwanmi wamra yurirqan. Kananqa sufreqta rikarmi culpayoq sientikö”.

Imatapis mana rurëta puëdinqëki y culpayoq sientikonqëkiqa entiendipaqmi. Diosqa manam qeshyayoq kanatatsu munarqan (Génesis 1:27, 28). Jinamampis, Jehoväqa manam qeshyakunata rikarnin allitanölla rikänapaqtsu ruramarquntsik. Llakikunqëkiqa entiendipaqmi wamrëki sano mana yurikunqampita. Tranquilizäkï y tsë cambiokunawan yachakë.

¿Imataraq rurankiman wamrëki qeshyayoq kanqampita culpayoq sientikurninqa? Yarpänëkim jutsasapa kanqantsik o mëchöpis täranqantsik o maskuna wamrakuna tsënö yurinampaq causanqanta. ¿Y majëki culpayoq kanqanta nïta munarninqa? Ama tsëta rurëtsu. Ishkëki imatapis rurayanqëki y wamrëki imakunata necesitanqanman pensayanqëkim más alliqa kanqa (Eclesiastés 4:9, 10).

IMATA RURANAPAQ: Wamrëkipa qeshyanta maslla musyëta procurë. Bibliam kënö nin: “Yachëwanmi wayitaqa [familiataqa] sharkatsintsik, y alli juiciowanmi tsarakoqta rurantsik” (Proverbios 24:3).

Doctorta tapukï y tsëpaq rasumpa parlaq publicacionkunata lei. Juk qeshyapita yachakïqa juk idiömata yachakïnömi, qallananchöqa sasaraqmi pero tiempowanqa más yachaqmi tikrarintsik.

Carlowan Mia ëwayarqan doctorninkunamanmi y wamrampa qeshyanta trataq hospitalmanmi. Pëkunam kënö niyan: “Tsëkunam ima peligrokuna chämunampaq kaqta musyatsiyämarqan y allin kaqta síndrome de Down nishqan qeshyapita rikäyänäpaqpis. Wamräkuna wakin wamrakunanölla kawanampaq kaqtam entiendiriyarqä. Alläpam yanapayämarqan”.

Quizá wamrëkita cuidanqëkiqa utishqata o pishipashqata dejarishunkiman. Nueva Zelandapita Jenneym kënö nin: “Espina bïfidawan wamrä kanqanta nirayamaptinmi, atska watakunapa ruranäpaq kaqpitapis masta ruranqä chipyëpa utishqata dejaramaq, waqëtapis munanqäyaq”.

Höraqa japallantsikmi sientikuntsik. Benpa wamranqa distrofia muscular y el síndrome de Asperger nishqan qeshyayoqmi. Pëmi nin: “Mëtsikaq nunakunam comprendiyanqatsu imapa pasëkayanqäta. Höraqa piwampis parlakuritam munanki, pero amïguïkikunapa wamrakuna sano kaptinmi, rasumpa imanö sientikunqëkita willarita puëdinkitsu.”

IMATA RURANAPAQ: Yanapakïta mañakï y yanapayäshunëkipaq niyäshuptiki chaskikï. Julianam nin: “Höraqa qowäwan noqaqa penqakuyämi yanapayämänanta mañakïta, pero musyayämi yanapayämänanta wanayanqäta. Pipis yanapayämaptinqa manam japalläkunatsu sientikuyä”. Juk amïguïkikuna o familiëki wamrëkiwan reunionkunachö o congregacionchö jamakuyänampaq niyäshuptikiqa, yanapashunëkita permiti. “Llapan tiempochömi rasumpa amïgoqa kuyakun. Y llakikï tiempochö yanapamänapaq yurishqam” ninmi Bibliaqa (Proverbios 17:17).

Saludnikita ama descuidëtsu. Imanömi ambulancia qeshyëkaqkunata hospitalman apanampaq combustibletaraq seguido necesitan, tsënöllam qampis necesitanki alli alimentäkïta, ejercicio rurëta y jamapëta, kallpëki yapë yurinampaq, tsënöpa wamrëkita necesitanqanmannö atiendinëkipaq. Javierpa wamranqa paralïticom, tsëmi nin: “wamrä mana purita puëdiptinmi, noqaqa alli alimentäkunä, porque noqam puritsëqnin kä. Chakïmi pëpa chakin cuenta”.

Pero ¿mëpitataq tiempota jorqankiman saludnikita cuidanëkipaq? Wakinkunaqa cambianakuyanmi: wamrata juknin cuidanqanyaqmi, juknin kaqqa jaman o kikimpa juk rurëninkunata ruran. Quizás mana precisaq rurëkunapita tiempota jorqarishwan, más alliqa kanqa yachëwan imatapis rurëmi. India nacionpita Mayurim nin: “Tiempowanqa llapampis shumaqmi patsakärin”.

 Confianqëki amïgowan parlë. Amïguïkikuna pasëkanqëkipa mana pasayaptin, mana comprendiyäshunëkipaq kaqta ama pensëtsu. Jina yarpänëkim Jehoväman mañakïtapis. Quizá Diosman mañakunqä yanapamantsuraq nir tapukunkiman. Yazminpam fibrosis quística qeshyayoq ishkë wamrankunam kan, pëmi kënö willakun: “Höraqa pasëpa llakishqa karninmi shutëtapis puëdïnatsu. Pero Jehovätam mañakö yanapamänampaq y kallpata qomänampaq y tsënöpam masta rurëta puëdï” (Salmo 145:18).

Juk wamra qeshyaptinqa, llapan familia mikuyänanta, paseaq ëwayänanta y wakin wamrakunata alli atiendiyänantam dejanmantsu. Tsënö pasakuptinqa quizá wakin kaq wamrakunaqa qonqakashqanö sientikuyanman. Jinamampis, teytakuna qeshyëkaq wamraman más preocupäkurmi casado kawëninkunatapis mana kaqpa churariyanman. Liberiapita Lionelmi, nin: “Höraqa pëlla llapanta ruranqanta y noqaqa wamräta mana casunqätam warmïqa niman. Y tsëqa pasëpa mana allim sientikatsiman y höraqa feyupam respondirï”.

IMATA RURANAPAQ: Wakin kaq wamrëkikunatapis kuyanqëkita rikätsiyë. ¿Imanö? Gustayanqan rurëkunata rurarnin. Jenney nin: “Mayor kaq wamräkunapaqmi hora höraqa imatapis rurariyä. Gustanqan sitioman mikoq ëwarninllapis”.

Majëkiwan parlëta y mañakïta ama qonqëtsu, tsëmi casado kawakïnikikunata yanapanqa. Indiapita Aseem teytapam Convulsiones nishqan qeshyayoq wamran kan, pëmi nimantsik: “Warmïwan noqaqa tiempotam jorqayarqö parlayänäpaq y mañakuyänäpaq y tsëtaqa cumpliyämi kallpannaq sientikurpis. Patsa waräriptinmi manaraq wamräkuna shärikuyaptin Bibliapa juk textonta estudiayä”. Wakin casädokunanam manaraq punukurnin tiempota jorqayan parlayänampaq. Shumaq parlakuyanqëki y Diosman mañakuyanqëkim yanapayäshunki, sufrimientokuna chämuptin casado kawakïnikikuna tsarakunampaq (Proverbios 15:22). Juk pareja ninqannöpis: “Casado kawënïkunachöqa más shumaq kuyanakuyarqö, alläpa sasa o aja tiempokunapa pasarninmi”.

Bibliam awnikun llapan qeshyakunata Dios ichikllachöna ushakätsinampaq kaqta (Apocalipsis 21:3, 4). Tsë junaq chäramuptinqa “manam ni pï: ‘Qeshyämi ninqanatsu’” (Isaías 33:24). *

Tsënö kanqanyaqqa, confiakï imëkapa pasarnin alli tsarakuyänëkipaq kaqman. Carlowan Miam niyan. “Llapampis mana allinö yarqoqta rikarqa ama alläpa llakikïtsu. Wamrëkichö ima allikuna kanqanman pensë, atska kanqantam cuentata qokurinki.”