Humilde këqa allitukoq y gälakoq këpita alläpa jukläyam. Humildeqa musyanmi imachöpis jukkuna pëpita más yachaq kayanqanta. Jina llapanta rurëta mana puëdinqantam musyan.

Moisesqa manam autoridadyoq kanqampita gälapäkurqantsu. Juk nunata autoridadnin qoykushqaqa, rasllam rikätsikurin humilde kanqanta o mana kanqanta. 1800 watakunachö juk yachatsikoq nuna kënö nirqan: “Imanö kanqanta musyëta munarqa, pitapis autoridadnin qori”. Tsënö kaqchömi, Moisesqa humildadninwan alläpa alli ejemplo kashqa.

Jehoväqa jatun autoridadyoq kanampaq y israelïtakunata pushanampaqmi churarqan. Tsënö kaptimpis, Moisesqa manam orgullösotsu tikrakurirqan. Rikärishun imanö juk sasa o aja herencia asuntota altsanqanta (Números 27:1-11). Tsëqa alläpa precisaqmi karqan, imanö decidinqanqa shamoq tiempochö kastankunapaqwanmi kanan karqan.

¿Imatataq Moisesqa rurarqan? ¿Israelpa pushaqnin karnaku imanöpis decidita musyarqanna? ¿Yachanqankunaman, atska watapa imëkapa pasashqanman o Jehová imanö pensanqanta musyarnintsuraq kikinllaman confiakurqan?

Juk orgulloso nunaqa ruranmanmi karqan, pero Moisesqa manam. Bibliam nimantsik “mañakuyanqanta Jehoväta willarinqanta” (Números 27:5). ¡Pensari! Chusku chunka watapana israelpa pushaqnin këkarpis Jehoväman confiakurnin sigikarqanllaraqmi y manam kikinmanqa. ¡Këmi rasumpa humilde këqa!

Moisesqa manam pëlla autoridadyoq kanampaq kaqta pensarqantsu. Juk israelïtakuna profëtanö kanampaq Jehová permitiptimpis manam celösotsu karqan, sinöqa kushikurqanmi (Números 11:24-29). Jukkunata trabäjonta qonampaq suëgron consejariptimpis humilde karmi wiyakurqan (Éxodo 18:13-24). Y wanunampaq këkarninnam, kallpayoqllaraq këkarpis Jehoväta mañarqan pëpa rantin jukta nombranampaq. Josuëmi akrashqa karqan, y Moisesqa llapanchömi shonqupita yanaparqan. Jina israelïtakunatam nirqan mushoq pushakoqtana wiyakuyänampaq Dios awnikunqan patsaman yëkatsinampaq (Números 27:15-18; Deuteronomio 31:3-6; 34:7). Mëraq Moisesqa kushikurqan israelïtakunata Diospa adorayänampaq pushar. Tsënö kaptimpis, manam autoridadyoq kënintsu pëpaqqa precisarqan, sinöqa israëlitakuna alli kayänanmi.

Ama imëpis permitishuntsu yachaq kënintsik, autoridadyoq kënintsik o poderyoq kënintsik orgulloso tikratsimänata. Jehoväqa manam sirwëqninkunachö yachaq kënintatsu ashin, sinöqa humilde kënintam (1 Samuel 15:17). Rasumpa humilde karqa kë shumaq consëjotam qatishun: “Llapan shonqïkiwan Jehoväman markäkï [yärakuy], y kikikipa yachënikillamanqa ama markäkïtsu” (Proverbios 3:5, 6).

Jina Moises ruranqanqa yachatsimantsik ima cargoyoq kanqantsikta o autoridadnintsikta mana alläpa precisaqpaq churanapaqmi.

¿Moises humilde kanqanta qatinqantsik yanapamäshuntsuraq? Awmi. Rasumpa humilde kanqantsikta rikätsikushqaqa, wakinkuna shumaq kawaküyanampaqmi yanapakushun y kuyakïninkunatapis tarishunmi. Pero tsëpitapis más precisaqqa Jehoväpa kuyakïnintam chaskishun, porque pëqa alläpa humildem (Salmo 18:35). “Diosnintsicqa manam yanapantsu musyaq tucoqcunata; peru qollmi shonquyoqcunataqa [humilde kaqkunataqa] alli queninwanmi yanapan” (1 Pedru 5:5). Tsëmi, Moisespa humilde kënimpitaqa masraq yachakïta puëdintsik.