DIOSMAN WITI
Seguido ‘mañacuyaptiqueqa, qoyäshunquim’
“Diosman mañacu,yänäpaq, noqacunatapis yachecatsiyämë” (Lucas 11:1). Tsëtam juk discïpulon Jesusta mañarqan. Tsëta contestanqanchömi Jesus ishkë igualatsikïkunata o ejemplokunata utilizarqan Dios wiyamänapaq imanö mañakunapaq kaqta. ¿Imëllapis tapukushqankiku mañakïnikita Dios wiyanqanta? Tsënö tapukushqa kaptikiqa, Jesus ninqanmi yanaparishunki. (Lei Lucas 11:5-13.)
Punta kaq igualatsikïqa juk nuna mañakunqampaqmi parlan (Lucas 11:5-8). Jesusqa willakun juk nunapa invitädom pullan paqas chäriptin mikïnin qonampaq mana kapunqampaqmi. Y këqa wayiyoqpaq alläpam precisan. Tsëmi alläpa tardena kaptimpis amïgompa wayinman ëwëkurmi kima tantata mañakun. Puntataqa, amïgon manam sharikïta munantsu familianta mana riyatsinanrëkur o rikchatsinanrëkur. Kë nunaqa mañakur siguinllam hasta amïgon sharkur wananqanta qonqanyaq. *
¿Imatataq këchö mañakïpaq yachakuntsik? Mana jaqipa mañakïta, ashita, y takakïtam (Lucas 11:9, 10). ¿Imanötaq tsëqa? ¿Mañakurninqa mana wiyamënintsikta munaq Diospa punkunta takakïkaq cuenta kanqantsiktaku Jesusqa nikarqan? Manam. Kë igualatsikïchö amïgopitaqa, Diosqa mañakïninkunata qoykunqam munëninmannö y pëman markäkïwan o yärakuywan mañakuyaptinqa. Markäkïnintsiktaqa rikätsikuntsik mana jaqita mañakurninmi. Kutin kutin imatapis mañakurninqa, mañakïkanqantsikta rasumpa ministinqantsiktam rikätsikuntsik y segürom këkantsik Dios qomänapaq kaqman (Marcos 11:24; 1 Juan 5:14).
Juknin kaq igualatsikïnam “mañakïkuna Wiyaq” Jehoväpaq parlan (Salmo 65:2). Jesusmi tapukun: “Acasu meqequipis tsuriquicuna [...] pescaduta mañacuyäshuptiqui, ¿culebrancu qoycuyanqui! Jina ruruta mañayäshuptiqui, ¿atoq curuntsuraq qoycuyanquiman?”. Musyënam, juk kuyakoq teytaqa manam qeshyatseq cösaskunata wamrankunata qoykunmantsu. Tsëpitanam Jesusqa kënö yachatsikurqan: “Si qamcuna mana alli ruraq quecarpis tsuriquicunata allicunata qoyanqui, sielucho quecaq Dios Yayanäqa mas alli carmi, mañacoqcunataqa [más alli kaq qarëta] Santu Espiritunta qoyconqa” (Lucas 11:11-13; Mateo 7:11). *
Diosqa mañakïninkunata qoykunqam markäkïwan mañakuyaptinqa
Kë igualatsikïwanmi Jesusqa yachatsimantsik “mañakïkuna Wiyaq” Jehoväqa juk kuyakoq teytanö wamrankuna wanayanqanta qonampaq listo këkanqanta. Tsëmi, Jehoväta adoraqkunaqa libre sientikuyänan llapan shonqunkunachö munayanqanta mañakuyänampaq. Jina, pëkunapaq alli kaqta pë munanqanta musyarmi, mañakïninkunata imanöpis contestanqampitam kushishqa chaskikuyan, munayanqannö mana kaptimpis. *
^ par. 2 Tsë witsanchö costumbrekunatam Jesuspa igualatsikïninqa rikätsikun. Invitädota chaskitaqa judïokuna respëtowanmi rikäyaq. Pëkunaqa tsë junaq wanayanqanmannöllam tantata rurayaq, tsëmi ushakäpakurirninqa, vecïnonkunapita mañakuyaq. Waktsa familiakunaqa, patsachömi tsë cuartollachö llapankuna punuyaq, tsëmi pipis shärikurninqa llapanta rikcharatsëq o riyaratseq.
^ par. 4 Jesusqa utilizarqan “mas alli carmi” neq palabratam más precisaq kaqta yachatsikunampaq. Jina juk estudiösopis kënömi nirqan: “Si A alli kaptinqa, B más alli kaqraqmi kanqa”.
^ par. 5 Dios wiyamänapaq imanö mañakunapaq kaqta maslla musyëta munarqa, Rasumpëpaqa, ¿imatataq Biblia yachatsikun? libropa 17 kaq capïtulonta rikäri, kë librotaqa Jehoväpa testïgonkunam rurayämushqa.
