Texcoco markapitam kä. Yurikunqä witsanqa markäqa waktsam karqan. Yarpämi wakin markakunapita nunakuna ashnunkunawan negociuta apayämunqanta. Waktsam familiäqa karqan, teytäqa llanqikunata altsapakurmi wätayämaq, peru qanchis watayoq këkaptïmi wanukurqan. Mamänïpaqqa manam fäciltsu karqan qespitsiyämänampaq.

Awilïtüqa misachömi violinta tocaq, jina tsë religionchö juk grüputapis müsica tokëchö dirigeqmi. Cäsi llapan familiäkunam imallatapis tocayaq, mamänïqa iglesiapaqmi cantaq y tiyüpis cantaq y piänutam tocaq. Alläpa religiösum kayarqä. Tantiyariyänëkipaq, cüra misata ruraptin yanapaqninmi karqä y catölicuchö misionëru këtam munarqä, peru karate pelïculakunam gustamaq, tsënöpam maqakoq tikrakurirqä.

Cüra këta munarninmi Puebla markachö catölicukunapa escuëlanman yëkurirqä. Peru estudiëta ushëkarnam Iglesiächö mana allikunata rikar qallëkurqa. Juk jövin monjam noqawan këta munarqan, peru tsarakushqa karpis, casakï munëmi noqachö yuririrqan. Jina rikarqämi atskaq cürakuna mana allikunata pakëllapa rurayanqanta. Tiempuwannam cüra këta munarqänatsu.

Müsicata estudiëta munarninmi Mëxicuchö yachatsikuyanqanman yachakoq ëwarqä. Tsëta usharirnam casakurirqä y chusku wamräkunam kayäpamarqan. Y mïsachö cantarmi trabajarqä.

 Warmïwan juntakäyanqäpita patsëmi, problëmäkunaqa qallëkurqan. Mana allim tratanakuyaq kayä, masqa ishkäpis celösu karnin. Puntataqa shimillapam ninakuyaq kayä, tsëpitaqa maqanakïmannan chäyarqä. Kima watallaraq casädu këkarmi rakikäkuriyarqä y divorciakuriyarqä.

Manaraq rakikarmi Jehoväpa testïgunkunata reqirqä. Punküta takakarayämurmi Bibliapita yachatsiyämänampaq niyämarqan. Religionpita alläpa musyanqäta pensarmi, pantashqa këkäyanqanta rikätsinärëkurlla awnirirqä. Alläpa sasa o aja tapukïkunatam rurarirqä contestamëta mana yachayänampaq kaqta pensar, peru mantsakäkïpaqqa llapan tapukïnïkunatam Bibliawan contestayämarqan, tsëmi imata mana yachanqäta cuentata qokurirqä. Imanö kaptimpis, warmïqa mana allipam Testïgukunata trataq y noqapis ocupädu karnam chaskirqänatsu.

Pitsqa wata pasariptinnam Testïgukunawan yapë tinkurirqä. Tsë tiempupaqqa Elvïrawannam yachëkarqa, pëqa Testïgukunata chaskiptï manam piñakoqtsu, tsënöpam yapë Bibliata estudiar qallëkurqä. Tsënö kaptimpis, atska watataran mana alli rurënïkunata jaqirqä.

Cuentatam qokurirqä Jehoväta rasumpa sirwita munarninqa mëtsika cambiukunata ruranäpaq kaqta. Iglesiachö trabajëtam puntataqa jaqinä karqan jukchöna trabajanäpaq (Apocalipsis 18:4). Jinamampis, Elvïrawanqa casakunämi karqan.

Peru alläpa ras piñakoq kanqäta vencinämi mas sasa noqapaqqa kashqa. Bibliam alläpa yanapamashqa. Salmu 11:5 textum yachatsimarqan Jehovä maqakoqkunata chikinqanta, y 1 Pëdru 3:7 textunam yachatsimarqan mañakïnïta Dios wiyamänanta munarqa warmïta shumaq tratanäpaq. Kë textukunaman alläpa yarpachakurmi Jehovä yanapëkamänampaq mañakurqä, tsënöpam tiempuwanqa mana alli geniüta jaqirirqä.

Kananqa familiäwan kushishqam kawakö, jina punta kaq warmïchö wamräkunawampis alli kawakïtam procurëkä y kanan kaq familiätanam yanapëkä Jehoväta mas kuyayänampaq.

Wamra karninqa cüra këtam munarqä nunakunata yanapanäpaq, y kananqa musyänam rasumpa imanö yanapakunäpaq kaqta, tsëmi alläpa kushitsiman. Müsicata yachatsikurninmi kananqa familiäta wätä. Jehovätam agradecikö pacienciawan alli nuna kanäpaq yanapamanqampita.