“Jutsa ruraqkuna wanuriyaptinmi raslla almankuna infiernuman ëwan, y tsëchöqa rawrëkaq ninachömi sufriyan.” (Catecismo de la Iglesia Católica.) Tsëpaq parlarmi, pushakoq religiösukunaqa niyan juk nuna wanurirqa Diospita pasëpa rakikärinqanta.

“Jutsa ruraq almaqa. . . kikinmi wanunqa.” (Ezequiel 18:4.) “Wanushqakunaqa manam imatapis musyayannatsu” (Eclesiastes 9:5). Alma wanurir mana ni imatapis mäkoq këkarninqa, ¿imanöraq ‘rawrëkaq ninachö’ sufrinman o Diospita imëyaqpis rakikashqa kanman?

Hebrëu idiömachö Seol y griëgu idiömachö Hades palabrakunatam wakin Bibliakunaqa “infiernu” nir tikratsiyan, y tsëqa “wanushqakuna këkäyanqan” ninanmi. Tantiyarinapaq, Job alläpa qeshyarninmi Diosta mañakurqan kënö nishpa: “Alläpa allichi kanman wanushqakuna këkäyanqanman pakëkamaptikiqa” (Job 14:13, Nueva Versión Internacional español, noqakunam quechuaman tikratsiyarqö). Y (Guillermo Jünemannpa) La Sagrada Biblia nishqanmi “infiernuman” nin. Jobqa manam munarqantsu imëkamayaqpis sufrina sitiuchö këta, sinöqa wanushqakuna pamparäyänan sitiuchö descansëllatam.

Rumi shonqutanö Diosta rikëqa pëpitam rakimantsik. Mexicupita Rocïum kënö willakun: “Wamra kanqäpita patsëmi infiernu kanqanta yachatsiyämarqan, tsëmi Diosta alläpa mantsëkoq kä y alli kanqantaqa manam creeqtsu kä. Imëpis piñashqa këkanqanta y sinchipa tratakoq kanqantam pensaq kä”.

Diospaq y wanushqakuna imanö këkäyanqampaq Biblia yachatsikunqanmi Rocïupa pensëninta cambiratsirqan, pëmi kënö yarpan: “Imëka lasaq qepita jaqireq cuentam libri sientikurirqä. Cuentatam qokurirqä Dios noqantsikpaq alli kaqta munanqanta y kuyamanqantsikta, y noqapis pëta kuyëta puëdinqäta. Kananqa, wamrankunapaq alli kaqta munaq y cuidaq teytatanömi rikä” (Isaïas 41:13).

Mëtsikaq nunakunam Diosta sirwiyan infiernuta mantsarninlla, peru Diosqa manam munantsu mantsarninlla sirwinata. Jesusmi kënö nirqan: “Diosllata cuyanqui llapan shonqiquiwan” (Marcus 12:29, 30, noqakunam kinkishätsiyarqö). Tsëta musyanqantsikmi yanapamantsik rurëninkunamannö nunakunata shamoq tiempuchö juzganampaq kaqman confiakunapaq. Jobpa amïgun Elihunömi markäkïwan kënö ninantsik: “¡Mana alli rurëkuna, y mana kaqpita jipatsikïkunaqa Llapan Puëdeq rasumpëpa Diospita karuchömi këkäyan!” (Job 34:10).