¿Precisaqpaqtsuraq Diosqa churan kushitsiyänampaq sinchikuyanqanta? Wakinkunaqa manam niyanmi, porqui Dios noqantsikpaq mana yarpachakunqantam pensayan. Peru tsënö niyanqanqa rikätsikun alleq mana reqiyanqantam. Sirweqninkuna sinchikuyanqanta Jehovä precisaqpaq churanqantam Bibliaqa yachatsikun. Hebrëus 11:6 textuchö Pablu ninqampita maslla yachakurishun.

¿Imataq pishin Jehoväta kushitsinapaq? Pablum kënö qellqarqan: “Mana marcäcurqa, manam imanopapis puedishuntsu pe munanqanno cawaquita”. Apostul tsënö nirninqa manam “sasa kanqantatsu” nikarqan, sinöqa ‘mana imanopapis puedikanqantam’ nikarqan. Juk parlakïchöqa, markäkïmi (yärakuymi) alläpa precisan Diosta kushitsinapaq.

Tsëqa, ¿ima ninantaq markäkïyoq kë? Puntataqa ‘marcäcunantsik Dios rasonpa cawanqantam’, porqui kawanqanman mana creirninqa manam kushitsita puëdintsiktsu. Manam creinanllatsu porqui demoniukunapis musyayanmi Dios rasumpa kawanqantaqa (Santiägu 2:19). ‘Dios rasonpa cawanqanta marcäcunqantsikmi’ yanapamashwan pë munanqannö kawakunapaq (Santiägu 2:20, 26).

Ishkë kaqqa, Dios bendicikoq kanqanmanmi creinantsik. Markäkoq nunaqa Diosta kushitsinampaq sinchikunqan envänu mana kanqantam pasëpa següru këkan (1 Corintius 15:58). ¿Imanötaq Diosta kushitsishwan ruramunampaq kaqta o bendicimänapaq kaqta mana següru këkarqa? (Santiägu 1:17; 1 Pëdru 5:7.) Mana kaqpaq churamanqantsikta o micha kanqanta Diospaq pensarninqa, manam alleqllaqa reqintsiktsu.

¿Pikunatataq Dios bendicin? Apostul Pablum willakun, ‘llapan shonquncunawan asheqkunata’ bendicinqanta. Juk librum, griëgu idiömachö këkaq “llapan shonquncunawan asheq” neq palabrakunapaq Diosta ‘adorë kanqanta’ rikätsikun. Juk librunam tsë palabrakunapaq alläpa y llapan shonquwan ashi kanqanta rikätsikun. Awmi, Jehoväqa bendicinmi pëman markäkur alläpa kuyakïwan adoraqkunata (Mateu 22:37).

¿Y sirweqninkunataqa imatataq awnin? Mushoqyashqa Patsachö mana wanushpa kawakïtam, tsëtaqa ruran alläpa kuyakoq karninmi (Apocalipsis 21:3, 4). Jina kanan witsankuna llapan shonqunkunawan Diosta asheqkunapis atska bendicionkunatam chaskiyan. Santu espïritu y Bibliapa consëjunkuna yanapaptinmi shumaq y kushishqa kawakuyan (Salmu 144:15; Mateu 5:3).

Rikanqantsiknöpis, Jehoväqa sirweqninkuna rurayanqanta precisaqpaq churaq Diosmi. Tsëta musyanqantsikmi yanapamashwan pëman mas witinapaq. Imanö markäkïyoq këta Jehovä bendicinqanta, ¿musyëta munankimantsuraq?