Jerusalenchö këkarmi Jesusqa Teytan Jehoväpita yachatsikurqan, y tsë witsan pushakoq religiösukuna janan shonqulla kayanqantam rikätsikurqan (Juan 8:12-30). Jesus ninqanmi rikätsimantsik nunakuna Diospaq niyanqanta alli musyë precisanqanta. Pëmi nirqan: “Sitsun yachatsicushqäcunata cäsucur siempri cacuyanqui, rasonpa disipulücunam ticrariyanqui. Tsenam rason caqta musyariyaptiqui, tse rason caq librariyäshunqui” (Juan 8:31, 32).

‘Yachatsicushqäcunata cäsucur cacuyanqui’ nirqa, Jesusqa rikätsikïkarqan juk creencia rasumpa o mana rasumpa kanqanta musyanapaqmi. Diospaq imatapis niyäshuptikiqa, kënö tapukï: “¿Jesus parlanqankunawan y Biblia yachatsikunqanwan igualanku?”. Apostul Pablu yachatsikunqanta wiyaq cristiänukunanö rurë, niyäshunqëki rasumpa o mana rasumpa kanqanta Bibliachö ashi (Hëchus 17:11).

Punta kaq yachatsikïchö parlanqantsik Marcu, Rösa y Raimundam tsëta rurayarqan, Jehoväpa testïgunkunawanmi Bibliapita yachakuyarqan. ¿Imatataq musyariyarqan?

Marcu: “Bibliapita yachatsiyämaqni Jehoväpa testïgunqa, Bibliatam utilisaq warmïwan noqa tapukuyanqäta contestayämänampaq. Ichikpa ichikpam Jehoväta kuyar qallëkuyarqä, hasta casädu kawënïkunapis masmi sinchiyarqan”.

Rösa: “Bibliaqa nunakunapa pensëninmannö Dios pï kanqanta yachatsikoq librulla kanqantam pensaq kä. Peru tiempu pasanqanmannömi tapukïnïkunapa respuestanta tsëchö tareq kä. Kananqa, Jehovä noqapaq rasumpa kawaq Diosmi, y pëman confiakïtam puëdï”.

Raimunda: “Pëta reqinäpaq yanapëkamänampaqmi Diosta mañakurqä. Tsëpita ichik tiempullatam qowawan ishkä Bibliata estudiar qallëkuyarqä. ¡Al finmi Jehoväpita rasumpa kaqta yachakuriyarqä! Imanö kanqanta musyarirqa alläpam kushikuyarqä”.

Bibliaqa yachatsikun Diospaq uli (llulla) yachatsikïkuna mana rasumpa kanqantam, jina Dios imanö kanqantapis yachatsikunmi. Jinamampis, kuyakïninchö Dios qomanqantsik cösaskunata reqinapaqmi yanapamantsik (1 Corintius 2:12). ¿Imanirtaq Diospita, munënimpita y shamoq tiempuchö imanö kawanapaq kaqta Bibliawan kikiki yachakurinkitsu? Kë precisaq yachatsikïkunapitam www.pr418.com/es nishqan español päginachö mas yachakurinki, ëwë “Enseñanzas bíblicas > Preguntas sobre la Biblia” neqman. Jina tsëllachömi mañakïta puëdinki Jehoväpa testïgun Bibliapita yachatsishunëkipaq. Tsënö rurarqa, Diosta kuyëta puëdinqëkitam cuentata qokurinki.