Bibliachöqa wakin puëdeq nunakuna dëbil kaq nunakunata dominayanqantam willakun. Tantiyarinapaq, 900 watakuna witsanmi m.J.sh. Nabotpa y tsurinkunapa üvas chakrankunawan Israelpa reynin Acab quedakïta munarqan. Tsëmi warmin reyna Jezabelqa, chakranwan quedakuyänanrëkur Nabotta wanutsiyänampaq patsätsirqan, y qowanqa manam micharqantsu (1 Rëyes 21:1-16; 2 Reyes 9:26). ¿Imanirtaq kënö mana alli trätukuna kananta Dios permitin?

Tsëtaqa Dios ruran mana ulikoq (llullakoq) karninmi (Tïtu 1:2). Maslla tantiyarinapaq, Diosmi punta teytantsikkunata nirqan pëpa contran churakarninqa wanuyänampaq kaqta, y ninqannöllam pasakurqan. Tsëpita patsëmi nunakunaqa wanïpita salvakïta puëdiyashqatsu. Jina tsënöllam Cainpis puëdeq kanqanrëkur wawqin Abelta wanuratsirqan, tsënöpam qallarqan puëdeq kaqkuna dëbil kaqkunata dominayanqan (Genesis 2:16, 17; 4:8).

Tsëpita patsëmi Biblia willakunqannöpis “nunaqa nuna mayinta dominashqa [sufritsinanllapaq].” (Eclesiastes 8:9). Maslla tantiyarinapaq, Jehoväqa Israel markantam mandakoqninkuna mana alli tratayaptin pëman qayakunampaq kaqta nirqan (1 Samuel 8:11-18). Hasta yachaq rey Salomonpis imëkapita impuestukunata pagayänampaqmi israelïtakunata obligarqan (1 Rëyes 11:43; 12:3, 4). Acabwan wakin reykunanäqa mas peor-ran kayarqan. Këman yarpakurkï, puëdeq kaqkuna wakinkunata dominayänanta Dios micharninqa, ¿manatsuraq ulikïkanqanta rikätsikunman karqan?

Jina imatapis chaskita munarlla nunakuna Diosta sirwiyanqantam Satanasqa nirqan (Job 1:9, 10; 2:4). Tsëmi, puëdeq kaqkuna sirweqninkunata dominayänanta Dios micharninqa, ¿manatsuraq Satanas rasumpa kaqta parlëkanqanta rikätsikunman karqan? Jina nunakunata imëkapita tsaparninqa, yanapananta mana wanayanqanta y japallankunalla gobernakïta puëdiyanqantam rikätsikunman karqan. Peru nunakunaqa japallankunalla gobernakïta mana puëdiyanqantam Bibliaqa nin ( Jeremïas 10:23). Tsëmi, Diospa Gobiernun shamunanta wanantsik, tsënöpa llapan mana alli rurëkunata ushakäratsimunampaq.

¿Tsëqa makin choqpashqatsuraq Diosqa këkan? Manam, pëqa ishkë cösaskunatam rurëkashqa. Juk kaq: Alleq clärum musyatsikushqa puëdeq kaqkuna dëbil kaqkunata dominayanqampita. Tantiyarinapaq, Palabran Bibliachömi willakun Nabotpa chakranwan quedakunanrëkur Jezabel imata ruranqanta. Jina willakunmi nunakunata mana allita rurayänampaq Satanas Diablu yanapanqanta ( Juan 14:30; 2 Corintius 11:14). Mana alli rurëkunapaqwan puëdeq kaqkuna rurayanqampaq musyatsikurnin y pipa yanapakïninwan tsëkunata rurayanqanta willakurninmi, Diosqa yanapamantsik mana allikunata mana ruranapaq y mana wanushpa imëyaqpis kawakïta mana oqranapaq.

Ishkë kaq: Diosqa awnimantsik llapan mana alli trätukunata ushakätsimunampaqmi. Acabwan Jezabel y mëtsikaq nunakuna mana allita rurayanqampita musyatsikunqan, y pëkunata juzganqan y castiganqanmi awnikunqanman markäkunantsikpaq yanapamantsik (Salmu 52:1-5). Jinamampis, mana alli rurëkunata altsamunampaqmi sirweqninkunata awnimantsik. * Awmi, tsëta ruraramuptinqa Nabotwan tsurinkunapis, shumaq huertaman tikrashqa patsachömi imëka mana allikunapita librina kawakuyanqa (Salmu 37:34).