WAKINKUNA IMANIR MANA CREIYANQAN: Mëtsikaq nunakunam creiyan Diosqa jutsasapa kayaptin nunakunaman mana interesäkunqanta. Kendra jutiyoq warmim qeshyarqan alläpa llakinë qeshyawan, tsëmi alläpa mana alli sientikoq Dios munashqannö mana kawarnin. Kënö nirmi yarpan: “Tsëmi Diosmampis mañakïta jaqirirqä”.

¿IMATATAQ BIBLIA YACHATSIKUN? Jehoväqa manam jutsa ruranqantsikllatatsu rikan, sinöqa alleqmi reqimantsik. “Musyanmi imanö rurashqa kanqantsikta, y yarpanmi allpapita rurashqa kanqantsikta.” Tsëmi, jutsa ruranqantsikpita castigamänantsikpa rantin ankupämantsik y arrepentikushqaqa perdonamantsik (Salmu 103:10, 14).

Punta yachatsikïchö rey Davidpita yachakunqantsikman pensarishun. Pëmi Diosta kënö nirqan: “Rurakar qallëkaptïmi rikämarqëki, y imanö kanäpaq kaqqa librïkïchömi llapannïkuna qellqarëkarqan” y “Diosllä, paqwëpa rikëkallämë, y shonqöta reqï” (Salmu 139:16, 23). Jatusaq jutsakunata rurashqa karpis, Davidqa segürum këkarqan shonqupita patsë arrepentikunqanta Jehovä rikänampaq kaqta.

Segürum kanëki pipitapis mas Jehovä entiendishunqëkita. Bibliam kënö nin: “Nunaqa nawin rikanqanllatam rikan, peru Jehoväqa shonqutam rikan” (1 Samuel 16:7). Pëqa musyanmi imanir imanö kanqantsikta. Musyanmi imanö wätashqa, imanö kënintsikta y imanö markachö winashqa kanqantsikta. Jina jutsa ruraq këkarpis alli nuna kanëkipaq kallpachakunqëkita rikarmi precisaqpaq churan.

Tsënö kaptinqa, ¿imanötaq reqishunqëkita Dios utilisan shoqashunëkipaq?