Wamra kënï witsanqa tärarqä Alemania nacionpa Leipzig markampa amänunchömi. Joqta watayoq këkaptïnam Brasil nacionta täraq ëwayarqä teytäpa trabäjunrëkur, nïkurnam Ecuador nacionta.

14 watayoq këkaptïnam, Alemania nacionchö juk especial escuëlaman teytäkuna mandayämarqan. Pëkunapita karuchö karmi kikï puëdinqämannö imatapis rurana karqan. Munanqämannö kawakïtam yachakurqä y ruranqäkuna wakinkunata piñatsinqantaqa manam imapis qokamaqtsu.

Alemaniamanqa teytäkuna kutiyämurqan 17 watayoqna këkaptïmi. Kutirayämunqanllachöqa pëkunawanmi tärarqä, peru munanqämannö kawakurmi controlayämänanta yachakarqätsu, tsëmi 18 watayoq këkar wayïpita ëwakurqä.

Kawënï imanö kanqanqa cada junaqmi gustamaqtsu, tsëmi imapaq kawëta munanqäta musyëta munarqä. Tsënöpam, tukïläya sitiukunachö musyapakïta procurarqä, peru kë shumaq Patsantsikta manaraq nunakuna ushakätsiyaptin, entërupa rikapakur viajë mas alli kanqantam decidirqä.

Juk mötuta rantirirmi Alemaniapita ëwakurqa Africaman. Tsëpita ichik tiempullatam Euröpata kutirqä, porqui mötümi malograkïkurqan. Altsarirnam viajarqä Portugal nacionpa juk pläyanman. Tsëchömi cuentata qokurirqä mötuta jaqirïkur barcuwan entëru Patsapa viajë mas alli kanqanta.

Oceano Atlantico lamarpa viajayänampaq juk grüpu jövinkuna alistapakïkaqmanmi yapakärirqä. Tsëchömi, Laurie këkarqan y tiempuwanqa pëmi warmï karqan. Islas del Caribe nishqanyaqmi ëwayarqä, y Puerto Rico nishqanchö ichik tiempulla quedarirmi, Europata kutiyarqä. Lauriewan noqaqa juk barcutam ashikäyarqä shumaq altsapärir tsëchö  täräyänäpaq. Kima killa ashikarnam rantiriyarqä, peru altsëtaqa manam puëdiyarqätsu, porqui Alemaniapa tröpakunam noqata apakayämarqan.

15 killam tröpachö sirwirqä, y tsë witsanmi casakuyarqä. Rikapakur viajëtam sïguita munayarqä. Tröpachö këkarninmi, rantiyanqä barcuta altsapëkäyarqä shumaq täräyänäpaqnö. Pensënïkunaqa karqan tsëchö tärë y entëru Patsapa viajëmi. Peru tröpapita yarqurinqällachö y barcuta altsar manaraq ushayaptïmi, Jehoväpa testïgunkuna noqakunawan parlayarqan y Bibliapita yachakur qallayarqä.

Qallananllachöqa manam atska cambiukunata ruranäpaq kaqtatsu pensarqä: täranqä warmiwanmi casakurqä y cigärruta shoqïtapis jaqishqanam karqä (Efesius 5:5). Jinamampis, Dios llapan kamashqankunata rikapakurnin entëru Patsapa viajar kawënïta utilisë alli kanqantam creirqä.

Peru rasumpa kaqchöqa, kawënïchöqa mas cambiukunataran ruranä karqan. Orgullösu y munanqämannö kawakoqran karqä, y rurëta yachanqäkunapita gälapakïmi gustamaq. Kawënïchö mas precisaqqa noqam karqä.

Juk junaqmi Jesus Jirkapita Yachatsikunqanta leyirqä (Mateu 5-7 kaq capïtulukuna). Qallananllachöqa espantakurqämi kushikïpita Jesus ninqanta. Tantiyarinapaq, mallaqaqkunapaq y yakunaqkunapaq kushikï kanqantam nirqan (Mateu 5:6). Peru ¿imanöraq juk mallaqaq y yakunaq kushishqa këta puëdinman? nirmi tapukoq kä, Bibliapita yachakunqämannömi cuentata qokurirqä Dios adorë munëyoq llapantsik kanqantsikta, y tsë munënintsikta tarinapaqqa puntataqa wananqantsiktam reconocinantsik. Jesusmi kënö nirqan: “Kushishqam kayan Diosta wanar asheq kaqkunaqa” (Mateu 5:3, NM).

Alemaniachömi Lauriewan noqaqa Bibliata estudiar qallëkuyarqä, peru Francia naciontam täraq ëwakuyarqä y tsëpitanam Italiata. Mëta ëwayanqächöpis Jehoväpa testïgunkunaqa këkäyaqmi. Llapankuna kuyanakuyanqan y juknölla kayanqanmi alläpa gustamaq. Rikärirqämi entëru markakunachö Jehoväta sirweqkuna juk kastanölla kayanqanta (Juan 13:34, 35). Tiempuwanqa bautisakuriyarqämi.

Jehoväpa testïgunna karnimpis, kawënïchö cambiukunata ruranäran karqan. Lauriewan noqaqa decidiyarqä costa de Africa nishqampa viajayänäpaqmi y Atlantico lamarpam tsimpayarqä hasta Estädus Unïdusyaq. Mëtsikan lamarpa viajëkarnin ishkäkunalla juk ichikllanlla barcuchö këkarmi, cuentata qokuriyarqä Puëdeq Kamakoqnintsikpa lädunchöqa mana kaq cuenta kanqantsikta. Tsë viäjichöqa tiempu karqanmi, tsëmi Bibliata leyirqa. Masqa gustamarqan Jesuspa kawënimpita willakïkunam. Jutsannaq y alläpa alli nuna karnimpis, pëqa manam nunakuna alabayänantatsu ashirqan. Kawëninchö mas precisaqqa karqan Teytanmi.

Jesus ruranqankunaman yarpachakurmi, cuentata qokurirqä Diospa Gobiernunta sobramanqan tiempöllawan mana yanapakunäpaq kaqta, sinöqa kawënïchö mas precisaq kanampaq kaqta (Mateu 6:33). Estädus Unïdusman chärirnam, barcuta jaqiyänäpaq y Diosta mas sirwiyänäpaq decidiyarqä.

Unëqa, kikïllaman pensarninmi musyaqtsu kä decidinqäkuna imanö ushanampaq kaqta. Peru kananqa rasumpa yachëtam tarirqö y tsëqa imëpis allillam (Isaïas 48:17, 18). Jinamampis, imarëkur kawanqätam musyä: Diosta adoranäpaq y pëta reqiyänampaq nunakunata yanapanäpaq.

Lauriewan casädu kawakïnïqa Bibliapa consëjunkunawanmi mas sinchiyashqa. Jinamampis, Jehovämi bendiciyämashqa juk shumaq warmi wamrawan y pëpis Jehovätam reqin y kuyan.

Kawënïkunaqa manam fäciltsu kashqa. Peru Jehoväqa manam jaqiyämashqatsu, tsëmi mana imëpis jaqiyänäpaq y pëman imëpis markäkuyänäpaq churapakäyarqö (Proverbius 3:5, 6).